مامۆستا سه‌یید جه‌لال حسێنى كێ بوو؟ (به‌شی دووهه‌م و كۆتایی)
وه‌لامێكى زۆر سه‌ختى پێده‌داته‌وه‌ و ده‌ڵێ: "ئه‌تۆ كه‌ ده‌ستت تا ئه‌نیشك به‌ خۆینى رۆله‌كانى نه‌ته‌وه‌م سووره‌ چۆن ده‌توانى داوا له‌من بكه‌ى و پێم بڵێى بۆ پله‌ و پایه‌ بگه‌رێمه‌وه‌ لاى بكوژ و كاولكه‌رانى گه‌ل و خاكه‌كه‌م، به‌و په‌روه‌ردگاره‌ى ئێوه‌ باوه‌رتان پێ نییه‌ هه‌تا وه‌رنه‌گرتنه‌وه‌ى حه‌قى هه‌موو ئه‌و خوێنانه‌ى ئێوه‌ بوونه‌ هۆى رِشتنى و ستاندنى مافه‌كانمان رێزه‌كانى شۆرش دژى ئێوه‌ به‌ جێ ناهێڵم". 
مامۆستا سه‌یید جه‌لال كه‌ وه‌ك رێبه‌رێكى هه‌ره‌كاریگه‌ر له‌ كوردستان ده‌رده‌كه‌وێ و به‌هۆى لێهاتوویی و پشتیوانى و متمانه‌ى له‌راده‌به‌ده‌رى جه‌ماوه‌ریی ده‌توانێ  كاریگه‌رى زۆر باش دابنێ له‌سه‌ر ره‌وتى جولانه‌وه‌ى كورد، له‌وسه‌رده‌مه‌ به‌مه‌به‌ستى رێكخراوتر كردن ریزه‌كانى كورد و خستنه‌ ناوچوارچێوه‌ى هه‌وڵه‌كانى له‌ته‌شكیلاتێكى مونه‌زه‌م و به‌فیرۆ نه‌دانى وزه‌ و پوتانسیلی به‌شێكى زۆر له‌جه‌ماوه‌رى كوردستان و چه‌ندین فاكته‌رى دیكه‌ به‌رێزیان بیر له‌دامه‌زراندنى رێكخراوێكى سیاسی نه‌ته‌وایه‌تى و ئیسلامى ده‌كاته‌وه‌.  له‌فاكته‌ره‌كانى دیكه‌ى گه‌لاڵه‌بوونى ئه‌و بیره‌ له‌ مێشكى مامۆستا ده‌توانین ئاماژه‌ به‌و بۆشایه‌ بكه‌ین كه‌ به‌ هۆى نه‌بوونى رێكخراوه‌یه‌كى له‌وشێوه‌یه‌ كه‌ بتوانێ خاوه‌ن باوه‌رانى ئه‌و جۆره‌ له‌موباره‌زه‌ له‌ده‌ورى خۆى كۆبكاته‌وه‌ و هه‌روه‌ها ئه‌و هێزى پیشمه‌رگه‌یه‌ى له‌ژێر رێبه‌ریى جه‌نابی مامۆستا دا و له‌چوارچێوه‌ى ده‌فته‌ر هه‌ڵده‌سووران و قاره‌مانه‌ حه‌ماسه‌ى جێژنى قوربانیان خوڵقاندبوو تووشی نائومێدى و لێك هه‌ڵپرژان نه‌بن و هه‌روه‌ها بۆ سه‌ڵماندنى ئه‌وه‌ى كه‌ تۆمه‌ته‌كانى خومه‌ینى و داروده‌سته‌كه‌ى له‌سه‌ر ئه‌وه‌ى كه‌ كورد كافرن و جیهادى له‌دژ كردن، له‌پاش راوێژ له‌گه‌ڵ جه‌نابێ مامۆستا شێخ عێزه‌دین و كه‌سایه‌تى شۆرشگیر و نیشتمان په‌روه‌ر و ئایینى دیكه‌ى كوردستان به‌ردى بناغه‌ى سازمانى خه‌بات ى نه‌ته‌وایه‌تى و ئیسلامى كوردستانى ئێرانی له‌ ٥ى خه‌رمانانى ١٣٥٩ دا دامه‌زراند و به‌ وزه‌ و تینێكى تر و له‌قاڵبى رێكخراوێكى سیاسی و نه‌ته‌وه‌ی خه‌باتى گه‌لى كوردی به‌ره‌وپێش برد.
مامۆستاى كۆڵنه‌ده‌ر به‌دامه‌زراندنى سازمانى خه‌بات ئه‌ركى شۆرشگیرانه‌ى قورستر ده‌بێ و خزمه‌ت به‌ ئاو و خاكه‌كه‌ى له‌چوارچێوه‌ى ئه‌و ته‌شكیلاته‌ ره‌سه‌نه‌ كه‌ له‌ناخى كۆمه‌ڵگاكه‌ى دا هه‌ڵقولیوه‌ و له‌سه‌رده‌ستى خه‌باتكاران و نیشتمانپه‌روه‌رانى كورد به‌ بێ ده‌ستێوه‌ردانى لاوه‌كى و به‌پرۆگرام  سیاسه‌تێكى خۆماڵیانه‌ دامه‌زراوه‌ درێژه‌ پێده‌ده‌ا. پێشوونه‌ و سیماى دیار و خۆشه‌ویستى مامۆستا له‌گه‌شه‌سه‌ندن و په‌ل و پۆ هاویشتنى سازمان له‌به‌رینایی كوردستان ده‌ورێكى ئه‌ساسی ده‌بێنى و هه‌ر به‌و هۆیه‌وه‌ و لیبراویی و قاره‌مانه‌تى پێشمه‌رگه‌كانى سازمان له‌ماوه‌ێكى كه‌م دا سازمانى خه‌بات ناو و ناوبانگ په‌یدا ده‌كا و وه‌ك هێزێكى كاریگه‌ر له‌موعادلاته‌كانى كوردستان ده‌ورى ده‌بێ.
ده‌بێ ئیشاره‌ به‌و ئه‌و كه‌سانه‌ى كه‌ هاوكارى ماموستای نه‌مریان كرد بۆ دامه‌زراندنى سازمانى خه‌بات و گه‌شه‌سه‌ندنى بكه‌م كه‌ بریتین له‌، شه‌هیدان مامۆستا ئارام و شه‌هید مامۆستا خه‌لیلى شه‌ریفیان  و مه‌رحووم مامۆستا مه‌لا خدرى عه‌بباسی و مه‌رحووم ماموستا مه‌لا كه‌ریمى سه‌یادى (سارده‌كۆستانى).
جێگه‌ى داخه‌ كه‌ له‌دواى دامه‌زرانى سازمان هیزه‌ كانى دیكه‌ى كوردستان كۆسپ و ته‌گه‌ره‌ بۆ سازمانى خه‌بات و جه‌نابی مامۆستا دروست ده‌كه‌ن كه‌ ئه‌و كۆسپانه‌ یه‌كێك له‌ كێشه‌ گه‌وره‌كان له‌ به‌رده‌م كار و هه‌ڵسوورانى سازمان و گه‌شه‌سه‌ندنى بوو. به‌لام سه‌ره‌راى هه‌موو فشار و له‌مپه‌ره‌كانى لایه‌نه‌كان و  و هه‌روه‌ها پیلانه‌كانه‌كانى رژیمى ئێران، ماموستا ى به‌رێز بۆ ساتێكیش له‌رێبه‌رى كردن و به‌شدارى له‌خه‌باتى نه‌ته‌وه‌یی سارد و ماندوو نه‌ده‌بۆوه‌ و به‌وپه‌رى لێبراوى و به‌كه‌مترین ئیمكاناته‌وه‌ رساڵه‌تى حه‌ق ویستى و عه‌داڵه‌تخوازى و دژه‌ دیكتاتۆرى له‌سه‌ر بناغه‌ى بیر و بۆچون و ئاكار و كرده‌وه‌ى دروست و په‌سه‌ندى به‌ جێ ده‌گه‌یاند. مامۆستا تا دوایین ساته‌كانى ژیانیشى له‌پیناو گه‌ل و باوه‌ره‌كه‌ى هه‌ڵسوورا. یه‌كێك له‌دیارترین و جێگه‌ى شانازیترین تایبه‌تمه‌ندییه‌كانى مامۆستا ئه‌و روحیه‌ى خۆنه‌ویستى و لیبراوییه‌ى بۆ شۆرش و خزمه‌ت به‌ كوردستان بوو. پێوانه‌ى هه‌ڵسه‌نگاندنى گه‌وره‌یی شۆرشگیرِان ده‌گه‌رێته‌وه‌ بۆ ئه‌وه‌ى كه‌ ئه‌و كه‌سه‌ شۆرِشگێره‌ ئاماده‌ بووه‌ چه‌نده‌ نرخ و باج له‌پیناو شۆرش، بدا. به‌راستى به‌ میلاك گرتنى ئه‌و ووته‌یه‌، ده‌بێ بڵێین، ماموستا گه‌وره‌ترین و به‌رزترین پله‌ى شۆرِشگێرى هه‌یه‌. له‌دیرۆكى نه‌ته‌وه‌كه‌مان كه‌م نه‌بوون ئه‌و قاره‌مانانه‌ى كه‌ ئاماده‌ى خۆبه‌ختكردن بوونه‌ له‌پیناو بیروباوه‌ر و میلله‌ته‌كه‌یان، به‌لام ده‌گمه‌ن بوونه‌ ئه‌و كه‌سانه‌ى كه‌ ته‌نانه‌ت ده‌ستیان به‌ جگه‌رگۆشه‌ و ماڵ و كه‌سه‌كانیشیانه‌وه‌ نابێ بۆ دیفاع له‌نیشتمان و گه‌له‌كه‌یان. سرۆشتى مرۆڤه‌ كه‌ كه‌ ئاماده‌ى هه‌موو ره‌نج و مه‌ینه‌تیكه‌ له‌پیناو حه‌سانه‌وه‌ى ساتێكى خانه‌واده‌ ورۆڵه‌ و جگه‌رگۆشه‌كه‌ى و ته‌نانه‌ت ئاماده‌ى خۆبه‌ختكردنه‌ له‌پیناویدا. بێ شك زۆر زه‌حمه‌ته‌ مرۆڤ به‌سه‌ر ئه‌و هه‌سته‌ سروشتیه‌ دا زاڵ بی. به‌لام ماموستاى رێبه‌رمان ئه‌و كاته‌ دڵخۆش بوو كه‌ رۆڵه‌كانى له‌سه‌فى پێشه‌وه‌ى شه‌ره‌كان دابوونه‌ و فه‌رمانده‌یی خۆراگرییه‌كانیان كردووه‌، كه‌ هه‌ر له‌ئاكامى خۆنه‌ویستى و شۆرِشگێرى مامۆستا و كور و كه‌سه‌كانى، كورێكى قاره‌مانى به‌ناوى كاك سید عه‌بدولكه‌ریمى حوسینى شه‌هید بوو. هه‌روه‌ها رۆڵه‌یێكى دیكه‌شی كه‌ به‌ریز كاك بابه‌شێخى حسێنى یه‌، شهیدى زیندووه‌ و ده‌یان جار له‌مه‌یدانه‌كانى نه‌به‌رد له‌به‌رانبه‌ر داگیركه‌ران دا و به‌ كرده‌وه‌ى ترۆریستى ترۆریستانى رژیم به‌سه‌ختى زمدار بووه‌. ئه‌وه‌ له‌كاتێكدا بوو كه‌ كه‌ هه‌تا ئه‌و دواییانه‌ش كاتێك جه‌نابی مامۆستا بیره‌وه‌رى شه‌هیدى نه‌مر كاك سه‌یید عه‌بدولكه‌ریمى ده‌گێرایه‌وه‌ نه‌یده‌توانى پێش به‌ هه‌ستى سارێژ له‌ جه‌رگ خۆشه‌ویستیه‌كه‌ى بگرێ و به‌وپه‌رى شانازییه‌وه‌ فرمێسك له‌چاوه‌ پرِسۆزه‌كانى ده‌هاتنه‌ خواره‌وه‌.
به‌ڵێ ماموستاى هه‌رده‌م زیندوومان ده‌یفه‌رموو رۆڵه‌كانم له‌پیناو رزگارى و عیزه‌ت و كه‌رامه‌تى نه‌ته‌وه‌یی فیداكاریان كرد و هه‌رگیز ده‌ستم وه‌به‌رنه‌نان و هه‌روه‌ها ده‌یفه‌رموو چۆن ده‌توانم به‌ رۆڵه‌ى خه‌ڵكى بڵێم خۆتان فیدا بكه‌ن و نه‌هێڵم رۆڵه‌كانى خۆم بچنه‌ مه‌یدانى نه‌به‌رد. ماموستا ئه‌و تایبه‌تمه‌ندییانه‌ى، ئه‌و روحه‌ پرِ له‌سه‌داقه‌ت و خۆنه‌ویستیه‌ى هه‌بوو كردبووى به‌ خۆشه‌ویستى خه‌ڵك، بۆیه‌ ده‌ڵێین خه‌ساره‌ت و زیانێكى قه‌ره‌بوونه‌كراوه‌مان لێ كه‌وت،بۆیه‌ ده‌ڵێین رێبه‌ر و خه‌باتكار و شۆرشگێرى بێ په‌ڵه‌ و لێهاتوومان له‌ده‌ست دا.
له‌تایبه‌تمه‌ندییه‌ دیاره‌كانى دیكه‌ى مامۆستا ئه‌و هه‌سته‌ به‌رزه‌ نه‌ته‌وه‌ییه‌ى جه‌نابیان بوو، رازى نه‌بوو ته‌نیا له‌پێناو به‌شێك له‌گه‌له‌كه‌ى  له‌كوردستانى ئێران به‌ سه‌ر و ماڵ و گیانى خه‌بات بكا، به‌ڵكو هه‌ستى نه‌ته‌وه‌ییه‌كه‌ى سنووره‌ ده‌ستكرده‌كانى داگیركه‌رانیشى به‌زاندبوو و به‌ده‌یان جار له‌پێناو مه‌سڵه‌حه‌ت و قازانجى كوردستانیان و به‌تایبه‌ت كوردستانى عێراق خۆى خسته‌ مه‌ترسیه‌وه‌. له‌كاتێكدا كه‌ عێراق به‌هۆى هه‌ل و مه‌رجى سیاسی و هاوسه‌نگى هێز ئه‌وپه‌رى یارمه‌تى هێزه‌كان ئۆپۆزسیۆنى ئێرانى ده‌دا، سازمانى خه‌بات به‌رێبه‌رایه‌تى مامۆستاى رێبه‌رمان به‌حه‌شاردانه‌وه‌ى پێشمه‌رگه‌ و داڵده‌دانى شۆرشگیران، یارمه‌تى به‌رینى پێ ده‌كردن و جه‌نابیان و سازمانى خه‌باتى ده‌خسته‌ مه‌ترسیه‌وه‌. ئه‌و هه‌سته‌ لێوانلێو له‌نیشتمان خۆشه‌ویستیه‌ى بوو، بۆیه‌ نه‌ده‌ترسا و بوێرانه‌ و به‌وپه‌رى بروابه‌خۆبوون و سه‌ربه‌رزییه‌وه‌ خزمه‌تى به‌گه‌ل و نیشتمان و نه‌ته‌وه‌كه‌ى ده‌كرد.
له‌تایبه‌تمه‌ندییه‌ جێ ستایشه‌كانى دیكه‌ى مامۆستا سه‌داقه‌ت و راستگۆیی ئه‌و زاته‌ پاكه‌ له‌گه‌ڵ نه‌ته‌وه‌كه‌ى بوو، له‌گه‌ڵ ئه‌وه‌ى كه‌ رێبه‌رانمان چه‌نده‌ پێویسته‌ به‌ زانست و مه‌عریفه‌ و ئه‌زموون ته‌یاربن ده‌بێ ئه‌وه‌نده‌ش خاوه‌ن ئه‌خلاق و ره‌وشتى به‌رز بن، ئه‌گه‌ر بانگه‌وازى ره‌واترین و باشترین سیسته‌مى حوكمرانیى بكه‌ى كاتێك ره‌وشتى به‌رز و راستگۆ و سادق نه‌بی، خه‌ڵك به‌ راده‌ى نووكه‌ ده‌رزیێكیش ووته‌كانى به‌ هێند وه‌رناگرن. مامۆستا سه‌یید جه‌لال ئه‌و كه‌سایه‌تیه‌ بوو كه‌ وێراى زانایی و شاره‌زایی له‌كاروبارى سیاسی و ئه‌زموونى زۆر به‌نرخ خاوه‌ن به‌رزترین ره‌وشت و خووخده‌ى به‌رز بوو. هه‌میشه‌ ده‌یفه‌رموو ئه‌گه‌ر مه‌به‌ست له‌كارى سیاسی درو و فریو بێ ، هه‌رگیز ئاماده‌ نیم درێژه‌ به‌خه‌بات و كارى سیاسی بده‌م. پێناسه‌ى ماموستا بۆ كارى سیاسی و خه‌بات بریتى بوو له‌ سه‌داقه‌ت و راستگۆیی و لێبراویی و فیداكارى و خۆنه‌ویستى و هه‌ست به‌ به‌رپرسایه‌تى. ماموستاى نه‌مرمان هه‌رله‌سه‌ره‌تاى تێكه‌ڵبوون به‌كاروبارى سیاسی به‌و تیروانینه‌وه‌ ده‌ستى پێكرد و هه‌ر به‌و تیروانینه‌ش ماڵئاوایی له‌ رێزى خه‌باتكاران و كارى سیاسی كرد. 
هه‌زاران داخ بۆ كۆچى دوایی مامۆستاى بلیمه‌ت و زانا و خۆنه‌ویستمان، به‌راستى زیانى له‌كیس چوونى ئاوا كه‌سایه‌تیێك هه‌رگیز قه‌ره‌بوو ناكرێته‌وه‌. له‌وه‌ زیاتر درێژه‌ى پێناده‌م و هیوادارم له‌داهاتوو دا زیاتر تیشك بخریته‌ سه‌ر ژیان و تایبه‌مه‌ندییه‌كانى جه‌نابی ماموستا سه‌یید جه‌لال حسێنى. روحى به‌ به‌هه‌شتى به‌رین شاد بێ و ئاكار و بیرو بۆچوونه‌كانى رووناكه‌ره‌وه‌ى رێگه‌مان بێ.

ڕێکه‌وت: 2010-09-09 11:02:33
به‌شی ( )