__ پێشگیرى له‌ ئازادى زیندانیه‌كى سیاسی كورد
__ نیگه‌رانى سه‌باره‌ت به‌ دۆخى چالاكێكى ژینگه‌ى مه‌ریوان
__ ئیعدامى ٥ زیندانى سیاسی له‌ زیندانى ورمێ
__ گه‌وره‌ترین پرۆژه‌ى گاز له‌ئیلام داخرا
__ ٣ وه‌زیرى رژیمى ئاخوندى چوونه‌ ناو لیستى ئابلۆقه‌كانه‌وه‌
__ ئاژانس به‌ چالاكیه‌ نیزامیه‌ ئه‌تۆمیه‌كانى رژیمى زانیوه‌
__ هه‌لاوسان له‌ مانگى خه‌رمانان له‌ ٢٨ له‌سه‌دیش تێپه‌رى
__ دانپێنانى ده‌سه‌لاتى دادوه‌رى رژیم به‌ په‌ره‌سه‌ندنى تاوان و جینایه‌ت
__ ده‌ستپێكردنه‌وه‌ى تۆپبارانه‌كانى تركیا و موحاكه‌ممه‌ى ٧ ئه‌ندامى گروپى ئاشتى قه‌ندیل 

پێشگیرى له‌ ئازادى زیندانیه‌كى سیاسی كورد
خه‌باتمێدیا: به‌رپرسانى ده‌سه‌لاتى قه‌زایی به‌ كارشكێنى له‌ دۆسیه‌ى ئه‌سلان دودكانلو زیندانى سیاسی كورد، پێش به‌ ئازادى ناوبراو ده‌گرن. ئه‌سلان دودكانلو ٤ ساڵ له‌مه‌وبه‌ر به‌ تۆمه‌تى هاوكارى له‌گه‌ڵ پارتى كرێكارانى كوردستانى توركیه‌ گیرا و به‌ تۆمه‌تى موحارب به‌ ٤ ساڵ زیندان
مه‌حكووم كرا. ناوبراو ٨ مانگ له‌ماوه‌ى حوكمه‌كه‌ى له‌ زیندانى خۆى و ٣ ساڵ و سێ مانگ له‌ زیندانى خۆى له‌ زیندانى كروونى ئه‌هواز و له‌دوورخراوه‌یی تێپه‌راند. سه‌ره‌راى ته‌واو بوونى ماوه‌ى حوكمه‌كه‌ى ده‌زگاى قه‌زایی خوزستان پێش به‌ ئازاد بوونى ناوبراو ده‌گرێ. 





نیگه‌رانى سه‌باره‌ت به‌ دۆخى چالاكێكى ژینگه‌ى مه‌ریوان
به‌ تێپه‌رِینى نزیك به‌ ٨٠ رۆژ له‌ گیرانى شه‌ریف باجوه‌ر چالاكى ژینگه‌یی مه‌ریوان نیگه‌رانیه‌كان سه‌باره‌ت به‌ دۆخى ئه‌و چالاكه‌ كورده‌ به‌ره‌وسه‌ر چووه‌. به‌ پێى راپۆرتى هه‌واڵده‌رى هێرانا، ئه‌و چالاكوانه‌ ژینگه‌پارێزه‌ كه‌ ئه‌ندامى شاندى به‌رێوه‌به‌رى و به‌رپرسی كومیته‌ى به‌ربه‌ره‌كانێ له‌گه‌ڵ قه‌یرانى ئه‌نجوومه‌نى ژینگه‌پارێزى چیاى شارى مه‌ریوانه‌، رۆژى شه‌ممه‌ رێكه‌وتى ١ى گه‌لاوێژ ساعه‌ت ١ى دوانیوه‌رۆ بۆ ئیداره‌ى ئیتلاعات بانگ كرا و له‌دواى سه‌ردانى ناوبراو بۆ ناوه‌ندى هه‌واڵده‌رى ئیداره‌ى ئیتلاعاتى ئه‌و شاره‌ له‌ لایه‌ن ئه‌و دامه‌زراوه‌ ئه‌منیه‌تیه‌ ده‌ستبه‌سه‌ر كراوه‌. ناوبراو له‌سه‌رتاى گیرانى چه‌ندین جار توانیوێتى له‌گه‌ڵ خانه‌واده‌كه‌ى له‌ئیداره‌ى ئیتلاعاتى ئه‌و شاره‌ چاوپێكه‌وتن بكات، به‌لام نزیك به‌ مانگێكه‌ كه‌ هیچ جۆره‌ هه‌واڵێك له‌بارودۆخى ئه‌و چالاك وانه‌ كورده‌ وه‌ده‌ست نه‌هاتووه‌ و ئه‌وه‌ بۆته‌ مایه‌ى نیگه‌رانى سه‌باره‌ت به‌ دۆخى ناوبراو. جێگه‌ى وه‌بیرهێنانه‌وه‌یه‌ كه‌ ٢ ئه‌ندامى شاندى به‌رێوه‌به‌رایه‌تى ئه‌و ئه‌نجوومه‌نه‌ كه‌ هاوكات له‌گه‌ڵ شه‌ریف گیرابوون مانگى رابردوو به‌ دانانى بارمته‌ به‌ شێ,ه‌ى كاتى ئازاد كران. 






ئیعدامى ٥ زیندانى سیاسی له‌ زیندانى ورمێ
سه‌رله‌به‌یانى رۆژى سێ شه‌ممه‌ ١٩ى ره‌زبه‌ر ٥ زیندانى له‌ زیندانى ناوه‌ندى ورمێ ئیعدام كران. به‌ پێى راپۆرتى چالاكانى مافى مرۆڤ و دیموكراسی له‌ ئێران، رۆژى دووشه‌ممه‌ ١٨ى ره‌زبه‌ر له‌ كاتێكدا كه‌ رۆژى جیهانى خه‌بات دژى ئیعدام بوو، رژیمى ولایه‌تى فه‌قیه‌ بۆ ده‌رخستنى دژایه‌تى خۆى له‌گه‌ڵ پێوه‌ندییه‌ مرۆڤایه‌تیه‌كان نێ,ده‌وڵه‌تى ٥ زیندانى به‌ مه‌به‌ستى به‌رێوه‌بردنى حوكمى ئیعدام بۆ ژووره‌ تاكه‌كه‌سیه‌كان گواسته‌وه‌ و سه‌ر له‌به‌یانى رۆژى سێ شه‌ممه‌ ١٩ى ره‌زبه‌ر هه‌مووانى له‌ زیندانى ناوه‌ندى ورمێ به‌ په‌تى سێداره‌وه‌ كرد. تۆمه‌تى ئه‌و كه‌سانه‌ هه‌بوونى ماده‌ هۆشبه‌ره‌كان بوو. ناوى ئه‌و كه‌سانه‌ بریتیه‌ له‌ فه‌رهاد ئیسلامى، مه‌جید...، جه‌ماڵ شێخ زاده‌، دیهقان سه‌لامه‌ت و ره‌زا عه‌لیپوور. 





گه‌وره‌ترین پرۆژه‌ى گاز له‌ئیلام داخرا
له‌دواى راگرتنى پرۆژه‌ى پێترۆشیمى ئیلام، پالاوتگه‌ى گازى پارێزگا وه‌ك گه‌وره‌ترین پرۆژه‌ى گازى رۆژئاواى ئێران له‌دواى چه‌ندین جار دابه‌زینى كاره‌كانى ئیتر به‌ بێ هیچ چالاكیه‌ك داخراوه‌. پارێزگاى ئیلام هه‌ر چه‌ند خاوه‌نى ٠٤%ی پاشكه‌وتی نه‌وت و ١١%ی پاشكه‌وتی گاز له‌ ئێرانه‌، به‌لام هه‌رگیز به‌ شێوه‌یێكى ئوسولى كه‌ڵك له‌وسه‌رچاوه‌ گه‌وره‌یه‌ له‌راست به‌ره‌وپێش بردنى پارێزگا وه‌رنه‌گیراوه‌. له‌ رواڵه‌تدا پاڵاوگه‌ی گازی ئیلام به مه‌به‌ستی دابینكردنی گازی نێو ماڵانی پارێزگای ئیلام، ماده‌ی خاوی پێترۆشیمی ئیلام، شیرین كردنه‌وه‌ی گازی شاره‌كانی بیجار و كمانكوه‌ به‌هێز كردنی فشاری گازی رۆژئاوای ئێران، ره‌خساندنی هه‌لی كار بۆ لاوانی پارێزگای ئیلام و په‌ره‌پێدانی باری ئابووریی ناوچه به‌رِێوه چووه كه هه‌تا ئێستا هیچ یه‌ك له‌وانه جێبه‌جێ نه‌كراون.





٣ وه‌زیرى رژیمى ئاخوندى چوونه‌ ناو لیستى ئابلۆقه‌كانه‌وه‌
به‌ پێى راپۆرتى هه‌واڵده‌رى فه‌رانسه‌ سه‌رچاوه‌ێكى دیپلۆماتیك له‌ یه‌كێتى ئورووپا گووتوویه‌تى، ٣ وه‌زیرى ى رژیمى ئێران له‌ لیستى ئابلۆقه‌كانى نوێى یه‌كێتى ئورووپا. پێشتر راگه‌یه‌ندرابوو كه‌ یه‌كێتى ئورووپا رۆژى دووشه‌ممه‌ ناوى ٢٩ لێپرسراوى دیكه‌ى رژیمى تارانى له‌ لیستى ره‌شى ئه‌و كه‌سانه‌ زیاد كردووه‌ كه‌ هۆى به‌شدارى له‌ پێشێلكردنى مافى مرۆڤ خرابوونه‌ به‌ر ئابلۆقه‌. ئابلۆقه‌كان بریتیه‌ له‌ راگرتن و به‌ربه‌ست كردنى دارایی و داهات و هه‌روه‌ها قه‌ده‌غه‌ كردنى ده‌ركردنى ویزا بۆ ئه‌و كه‌سانه‌. پێشتریش ٣٢ به‌رپرسی دیكه‌ى رژیم خرابوونه‌ به‌ر ئابلۆقه‌ى یه‌كێـتى ئورووپا. 






ئاژانس به‌ چالاكیه‌ نیزامیه‌ ئه‌تۆمیه‌كانى رژیمى زانیوه‌
به‌ پێى سایتى عه‌سرى ئێران، دیپلۆماته‌كانى رۆژئاوایی له‌ ئاژانسی نێوده‌وڵه‌تى وزه‌ى ئه‌تۆم ده‌لێن، ئاژانس له‌داهاتوویێكى نزیك ورده‌كارى زیاتر سه‌باره‌ت به‌ چالاكیه‌ ئه‌تۆمیه‌كانى ئێران بلاو ده‌كاته‌وه‌ و به‌ گومانى دیپلۆماته‌كان رژیم بۆ وه‌ده‌ست هێنانى ته‌كنه‌لۆژى دروست كردنى چه‌كى ئه‌تۆمى هه‌وڵ ده‌دات. دیپلۆماته‌كان له‌ ویه‌ن به‌ راگه‌یاندنى ئه‌و بابه‌ته‌ به‌ رۆیته‌رزیان گووت: كه‌ ئه‌و راپۆرته‌ نوێیه‌ شیكه‌ره‌وه‌ى نیگه‌رانیه‌كانى ئاژانسه‌ له‌ ئه‌گه‌رى بوونى به‌رنامه‌ى شاراوه‌ى ئێران بۆ دروست كردنى چه‌كى ناوكه‌یی. ئه‌وان ده‌لێن ئه‌و راپۆرته‌ كه‌ قه‌راره‌ له‌ نوامبرى ئه‌مساڵ بلاوبكرێته‌وه‌ ده‌بێته‌ هۆكارێك بۆ به‌ره‌وسه‌ر بردنى ئابلۆقه‌ تێوده‌وڵه‌تیه‌كان دژى رژیمى ئێران. یۆكیا ئامانۆ سه‌رۆكى ئاژانسی نێوده‌وڵه‌تى وزه‌ى ئه‌تۆم له‌ راپۆرته‌كه‌ى پێشووى دا به‌ ئاشكرا باسی ئه‌گه‌رى بوونى به‌رنامه‌ى ناوكه‌یی كرد و نه‌بوونى ئیمكانى ده‌ستپراگه‌یشتن به‌ دامه‌زراوه‌ ئه‌تۆمیه‌كانى به‌ هۆكارى نیگه‌رانیه‌كانى ئاژانس زانى. 






هه‌لاوسان له‌ مانگى خه‌رمانان له‌ ٢٨ له‌سه‌دیش تێپه‌رى
هه‌لاوسان وه‌كوو یه‌كێك له‌ سه‌ره‌كى ترین پێوانه‌كانى دابه‌ش كردنى دهات له‌ كۆمه‌ڵگا ده‌رخه‌رى دۆخى سیاسه‌ته‌ ده‌وڵه‌تیه‌كان و بانكى ناوه‌ندییه‌. بلام نرخى هه‌لاوسان له‌مانگه‌كانى رابردوو بۆته‌ بابه‌تێكى جێ مشتومرِى نێوان بانكى ناوه‌ندى و ناوه‌ندى سه‌رژمێرى. خاڵى جێ ناكۆكى ئه‌و ٢ ناوه‌نده‌ له‌سه‌ر نرخى راگه‌یه‌ندراوى هه‌لاوسانه‌ كه‌ به‌ پێى به‌ڵگه‌كان سه‌رژمێرییه‌كانى بانكى ناوه‌ندى راست نین. پێوانه‌ى خاڵ به‌ خاڵ بۆ مانگى خه‌رمانانى ئه‌مساڵ سه‌بره‌ت به‌ مانگى پێشووى ساڵى رابردوو ٢٨,٣ له‌سه‌د بووه‌. به‌ پێى پێوانه‌ى نرخى ناوه‌ندى سه‌رژمێرى ئاستى گشتى نرخه‌كان له‌ پووشپه‌ر و گه‌لاوێژى ٩٠ سه‌باره‌ت به‌ پووشپه‌ر و گه‌لاوێژى ٨٩ زیاتر له‌ ٢٧ له‌سه‌د زیادى كردووه‌. 






دانپێنانى ده‌سه‌لاتى دادوه‌رى رژیم به‌ په‌ره‌سه‌ندنى تاوان و جینایه‌ت
جێگرى ده‌سه‌لاتى دادوه‌رى رژیم دانى به‌وه‌ نا كه‌ سالانه‌ ٢٠ له‌سه‌د به‌ حه‌شیمه‌تى زیندانه‌كان زیاد ده‌بلێز پاسدار زولقه‌در له‌ قسه‌كانى دا له‌ مه‌شهه‌د گووتى: له‌نێو وه‌لاته‌ ئیسلامیه‌كاندا، ته‌رازى تاوانى ئێران یه‌كه‌مه‌ و له‌ ئاسیاش چواره‌مین كه‌ ئه‌وه‌ به‌ هیچ شێوه‌یێك هیوابه‌خش نییه‌. ناوبراو زیادى كرد: له‌ ئێستا دا به‌ هێندێك له‌ پێوانه‌كانى وه‌ك رێژه‌ى په‌روه‌نده‌ قه‌زاییه‌كان كه‌ به‌ گه‌شه‌سه‌ندنى ١٣ له‌سه‌دى به‌ره‌ورووییه‌ و یان دۆخى زینداه‌كان و زیندانیان رێژه‌ى تاوان مه‌زه‌نده‌ ده‌كه‌ین. زولقه‌در ووتى: سالانه‌ ٢٠ له‌سه‌د به‌ حه‌شیمه‌تى زیندانه‌كان زیاد ده‌كرێ كه‌ ٣ به‌رانبه‌رى زه‌رفیه‌تى زیندانه‌كانه‌. بۆ وێنه‌ له‌ زیندانى مه‌شهه‌د به‌ زه‌رفیه‌تى ٣٥٠٠ كه‌س له‌ ئێستا دا ١٢ هه‌زار زیندانى بوونى هه‌یه‌ و زیندانه‌كانمان به‌جێى زانستگاى چاكسازى و په‌روه‌رده‌ بۆته‌ زانستگاى تاوان. 





ده‌ستپێكردنه‌وه‌ى تۆپبارانه‌كانى تركیا و موحاكه‌ممه‌ى ٧ ئه‌ندامى گروپى ئاشتى قه‌ندیل 
سه‌رله‌به‌یانی‌ ئه‌مرِۆ سێ شه‌ممه‌ ١٩ى ره‌زبه‌ر تۆپخانه‌كانی‌ توركیا تۆپبارانی‌ ناوچه‌ سنورییه‌كانی‌ ده‌ڤه‌ری‌ سیده‌كانی سه‌ر به‌قه‌زای‌ سۆرانی ده‌ستپێكرده‌وه‌. به‌ پێى راپۆرتى ماڵپه‌رى هاوه‌لاتى، كاتژمێر حه‌وتی‌ سه‌رله‌به‌یانی‌ ئه‌مرِۆ سێ شه‌ممه‌ تۆپخانه‌كانی‌ توركیا به‌خه‌ستی‌ تۆپبارانی‌ (خنێره‌، به‌نێ) یان كردووه‌ به‌درێژایی ناوچه‌كانی‌ (بێركمه‌‌و چیای‌ سه‌كێو) له‌ده‌ڤه‌ری‌ سیده‌كان. هه‌روه‌ها “به‌هۆی‌ دووره‌ ده‌ستی‌ ناوچه‌كانه‌وه‌ نه‌توانراوه‌ زه‌ره‌روزیانه‌كان بزانرێت”. جێگه‌ى باسه‌ هاوكات فرِۆكه‌ جه‌نگییه‌كانی‌ توركیا به‌ئاسمانی‌ ناوچه‌كه‌دا سورِاونه‌ته‌وه‌، به‌ڵام بۆردومانی‌ هیچ ناوچه‌یه‌كیان نه‌كردووه‌. حه‌وت كه‌س له‌ئه‌ندامانى گرووپه‌ ٣٤ كه‌سییه‌كه‌ی ٢٠٠٩ به‌ناوی گرووپی ئاشتی قه‌ندیل و كه‌مپی مه‌خمور كه‌ به‌رامبه‌ر به‌پرسی كرانه‌وه‌ی دیموكراسی توركیا گه‌رِانه‌وه‌ ئه‌و وڵاته‌، ئه‌مرِۆ سێشه‌ممه‌ له‌لایه‌ن دادگایه‌كی توركیا سزای زیندانیان بۆ ده‌ركرا كه‌ سزاكان ‌حه‌وت تا نزیكه‌ی ١١ ساڵ زیندانی له‌خۆ ده‌گرێت.



ڕێکه‌وت: 2011-10-11 19:50:39
به‌شی ( هه‌واڵه‌كانى كوردستان و ئێران و ناوچه‌كه‌ (١٩ى ره‌زبه‌ر) )