__ خۆكوژى دوو لاوى كورد له‌ شاره‌كانى سه‌قز و مه‌ریوان__ ناڕوونیی چارەنووسی خوێندکارێکی مەهابادی __  "سوننەی تووندڕەو" هه‌ره‌شه‌یه‌ بۆ سه‌ر رژێمى ئاخوندى__ باڵیۆزی ئەمریكا لە ئانكارا: پشتیوانی کورد و حکومەتی تورکیا دەکەین__ دوو باڵیۆزی روسیا: ئه‌مریكا و رۆژهه‌ڵاتی ئوروپا داگیر ده‌كه‌ین__ رژێمى ئاخوندى ناتوانێت داهاته‌ نه‌وتییه‌كانى خۆى به‌ ده‌ست بێنێت__ جه‌ننه‌تى: كۆمه‌ڵێك بێ عه‌قل له‌ پارله‌مانى ئوروپا دژ به‌ رژێمى ئێران به‌یاننامه‌ ده‌ر ئه‌كه‌ن__ به‌رنامه‌ى  نوێى رژێمى ئاخوندى دژبه‌ كچه‌ زانكۆییه‌كان

خۆكوژى دوو لاوى كورد له‌ شاره‌كانى سه‌قز و مه‌ریوان
به‌ پێى راپۆرتى هه‌واڵده‌رییه‌كان، کچێک لەشاری سقز بە چەکی راو کۆتایی بەژیانی خۆى هێناوه‌. به‌ پێى ئه‌م راپۆرته‌، رۆژی یەکشەممە ١٧‌ی خاکەلێوە کچێک بەناوی "کەژاڵ قادری" خەڵکی شاری سەقز بە چەکی "تاپڕ" کۆتایی بەژیانی خۆی هێناوە. هەتا ئێستا هۆکاری خۆکوژیی ناوبراوو روون نەبۆتەوە و تەرمه‌كه‌یشى لە پزیشکی دادوەریی ئەو شارە لەژێر پشکنین دایە و رادەستی بنەماڵەکەی نەکراوەتەوە. هه‌روه‌ها له‌ شارى مه‌ریوان لاوێك به‌ ناوى عەبدوڵڵا واحیدی، تەمەن ٢٠ ساڵ و کوڕی عەلی،  لە قەبری دەروێش لە نزیک گۆلی زرێبار خۆی هەڵواسیوه‌ و کۆتایی بەژیانی خۆی هێنا. جێگه‌ى باسه‌ كه‌ ئەو لاوە کوردەى خەڵكى "دانیکەش"ی سەربە شاری سەوڵاوا و دانیشتووی گەڕەکی "مەردۆخ"ی شاری مەریوان بووە، رۆژی ١٤ی خاکەلێوە خۆی کوشتووە و تەرمەکەی پاش دوو رۆژ دۆزراوەتەوە.








ناڕوونیی چارەنووسی خوێندکارێکی مەهابادی 
پاش نزیک بە یەک مانگ لە دەستبەسەر کرانی خوێندکارێکی کوردی خەڵکی شاری مەهاباد، هیچ هەواڵێک لە چارەنووسی لەبەر دەستدا نییە.
بەپێی راپۆرتی هەواڵدەریی کوردپا؛ سابیر شێخ عەبدوڵڵا، کە خوێندکاری کارناسی باڵای زانکۆی عەلامە تەباتەبایی تاران بووە، رۆژی ٢٤ی رەشەممەی ساڵی ١٣٩٢ی هەتاوی لەلایەن هیزە لیباس شەخسییەکانەوە لە شاری مەهاباد دەستبەسەر و رەوانەی شوێنێکی نادیار کراوە. سەرچاوەیەکی ئاگادار راگەیاند؛ ئەو خوێندکارە کوردە پاش گەڕانەوە لە زانکۆی عەلامە تەباتەبایی تاران بەرەو شاری مەهاباد، لەلایەن هێزە لیباس شەخسییەکانەوە لەو شارە بەرەوڕووی دەستبەسەر کران بۆتەوە. دەگوترێت، هێزە لیباس شەخسییەکان پاش دەستبەسەر کردنی سابیر شێخ عەبدوڵڵا، چوونەتە ماڵی باوکی ئەو چالاکە خوێندکارییە و لەپ‌تاب و کەرەستە شەخسییەکانی ناوبراویشیان زەوت کردووە. هەتا کاتی بڵاوبوونەوی ئەم هەواڵە، سەرەڕای بەدواداچوونی بنەماڵەکەی، هیچ زانیارییەک لەمەر هۆکاری دەستبەسەر کردن و شوێنی راگیرانی ئەو خوێندکارە کوردەی خەڵکی شاری مەهاباد لەبەر دەستدا نییە.








 "سوننەی تووندڕەو" هه‌ره‌شه‌یه‌ بۆ سه‌ر رژێمى ئاخوندى
به‌ پێى راپۆرتى هه‌واڵده‌رییه‌كان، سه‌ردانى هۆشیار زێبارى بۆ ئێران به‌ تەواو لە ئامانجەكەی خۆی لای دا، كاتێك بەرپرسانی رژێمى ئاخوندى یەكەم قسەیان لەگەڵ زێباری لەبارەی سوننەكانی عێراقەوە بوو، كە بە بڕوای ئەوان كاریگەری "سوننە تووندڕەوەكان" زیادی كردووە. لەكاتی ‌چاوپێكەوتنی لەگەڵ‌ هەر بەرپرسێكی ئێرانی، زێباری داوای هاریكاری بۆ رووبەڕووبونەوەی ئەم كێشەیەی لێدەكرا،‌ بە جۆرێك ئەو بابەتە وایكرد‌ مەبەستی سەردانە فەرمییەكەی زێباری، كە گەیشتن بوو بەڕێكکەوتنێك لەسەر ئەو ناكۆكییە سنووریانەی لە نێوان هەردوو وڵاتدا هەیە، نەبێتە خاڵی سەرەكی سەردانەكة. جێگه‌ى باسه‌ كه‌ رژێمى ئاخوندى به‌م دوواییانه‌ به‌ره‌وو رووى هێرشى زۆرى سوونه‌ مه‌زهه‌به‌كان بووه‌ته‌وه‌ وه‌ك،هێرشی سنووری، تەقینەوە، كوشتن و رفاندن، كە دواترینیان هێرشێكی خۆكوژی بوو بۆ سەر قونسوڵگەری ئێران لە بەیرووت و كوشتنی دیبلۆماتێكى رژێمى ئاخوندى لە یەمەن و رفاندنی سەربازانی ئێرانی لەسەر سنووری پاكستان. رێكخستنی پرسەی رۆژانەی ئەو ئێرانییانەی لە وڵاتانی ناوچەکە دەکوژرێن، لە سەرتاسەری ئەو وڵاتە، شایەتی ئەو حاڵەتەن. هەمان ئەو رۆژەی زێباری سەردانی ئێرانی كرد، دوو پرسە لە رۆژئاوای ئێران بۆ دوو ئەندازیار گیرا، كە لە دیالە كوژرابوون. بەدڵنیاییەوە تاران بەرپرسیارێتی كێشە نوێیەكانی لە ئەستۆ دەگرێ، ئەوەش بەهۆی هەوڵدانی بۆ فراوانكردنی پێگە و كاریگەری لەو دیو سنوورەكانییەوە، بەڵام لەگەڵ ئەوەشدا پێناچێت ئەو ئاستەنگە تایفییانە ببێتە رێگر لە بەردەم تەماعی رژێمى ئاخوندى بۆ فراوانكردنی پێگەی لە ناوچەكە. 








باڵیۆزی ئەمریكا لە ئانكارا: پشتیوانی کورد و حکومەتی تورکیا دەکەین
به‌ پێى راپۆرتى هه‌واڵده‌رییه‌كان، باڵیۆزی ئەمریكا لە توركیا رایدەگەیاند، كە وڵاتەكەی پشتیوانی لە یەكپارچەیی خاكی توركیا دەكات، هاوكات پشتیوانی لە یەكسانی و بوونی بە هاووڵاتی پلە یەكی كورد و هەموو پێكهاتەكانی دیكەی توركیا دەكات. فرانسیس ریكاردۆن، باڵیۆزی ئەمریكا لە توركیا ئاماژەى به‌وه‌ كرد "بە هەر بیانووەكەوە بێت، كردەوەی تیرۆریستی بكرێت، ئێمە پشتیوانی لە حكومەت و هاووڵاتیانی توركیا دەكەین، بێگومان بەدیهێنانی ئاشتی و نەڕژانی خوێن ئیرادەیەكی زۆری دەوێ". فرانسیس ریکاردۆن وتیشی: "بۆ سەرخستنی ئەو پڕۆسەیە و تەواوكردنی هەنگاوەكانی، پشتیوانی لە حكومەتی توركیا و سەركردەكانی كورد دەكەین و هیوای سەركەوتنیان لەو رێگەیە بۆ دەخوازین".








دوو باڵیۆزی روسیا: ئه‌مریكا و رۆژهه‌ڵاتی ئوروپا داگیر ده‌كه‌ین
به‌ پێى راپۆرتى هه‌واڵده‌رییه‌كان، ره‌نگه‌ گفتوگۆیه‌كی دزه‌پێكراوی نێوان دوو باڵیۆزی روسیا، به‌رپرسانی مۆسكۆ دووچاری رووگیرییه‌كی گه‌وره‌ بكات كه‌ تیایدا به‌ گاڵته‌ و نوكته‌، سوعبه‌ت ده‌كه‌ن و به‌ بێ بایه‌خی باس له‌ قه‌یرانی ئۆكرانیا ده‌كه‌ن و دواتریش به‌ خه‌یاڵى خۆیان دێنه‌سه‌ر ئه‌وه‌ی له‌ داهاتوودا وڵاته‌كه‌یان ئه‌مریكا و رۆژهه‌ڵاتی ئه‌وروپاش داگیر بكات. له‌و گفتوگۆیه‌دا كه‌ له‌ پێگه‌ی یوتیوب بڵاوبوووه‌ته‌وه‌، هه‌ریه‌ك له‌ ئیگۆر شۆبارۆف، باڵیۆزی روسیا له‌ ئه‌ریتریا پیرۆزبایی له‌ سێرگی باهاریف، باڵیۆزی روسیا له‌ زیمبابۆه‌ ده‌كات هه‌روه‌ها وێڕای ئه‌و پیرۆزباییه‌، هه‌ردوو باڵیۆزه‌كه‌ی روسیا چه‌ند نوكته‌ و گاڵته‌ و گه‌پێكیان كردووه‌ و هه‌ر بۆ سوعبه‌ت باسیان له‌ هه‌وڵه‌كانی وڵاته‌كه‌یان كردووه‌ بۆ پاوانخوازی و ده‌ستبه‌سه‌رداگرتنی هه‌ندێك وڵاتی دیكه‌ی ئه‌وروپا و وتوویانه‌: لكاندنی نیمچه‌ دوورگه‌ی كریمه‌ به‌ روسیاوه‌، ته‌نها سه‌ره‌تایه‌ و شۆبارف به‌ پێكه‌نینه‌وه‌ ده‌ڵێت: "له‌م كاته‌دا ته‌نها یه‌ك شت به‌ سه‌رانی وڵاتانی ئه‌وروپا ده‌ڵێم، پێیان ده‌ڵێم هاوڕێیان، ئه‌وه‌ دوورگه‌ی كریمه‌مان برد،به‌ڵام ئه‌مه‌ كۆتاییه‌ بێ ماناكه‌ نییه‌، به‌ڵكو له‌ داهاتووداهه‌رێمه‌كانی دیكه‌ش بۆ خۆمان ده‌به‌ین." خه‌ون و خه‌یاڵ و گاڵته‌كانی ئه‌و باڵیۆزه‌ روسییه‌ هه‌ر به‌وه‌شه‌وه‌ ناوه‌ستێ و گاڵته‌ به‌ چه‌ند وڵاتێكی دیكه‌ ده‌كات و ده‌ڵێت"پێویسته‌ سه‌قامگیریی كالیۆفۆرنیا و میامی له‌ ئه‌مریكا تێك بده‌ین." ئینجا باڵیۆزكه‌ی هاوڕێی پێده‌كه‌نێ و له‌ وڵامدا ده‌ڵێت: "راست ده‌كه‌ی، چونكه‌ ٩٥%ی هاوڵاتییه‌كانمان له‌ میامی ده‌ژین."








رژێمى ئاخوندى ناتوانێت داهاته‌ نه‌وتییه‌كانى خۆى به‌ ده‌ست بێنێت
به‌ پێى راپۆرتى هه‌واڵده‌رى واڵ ئێستریت ژۆرناڵ، رژێمى ئاخوندى ناتوانێت داهاته‌ نه‌وتییه‌كانى خۆى به‌ پێى رێكه‌وتننامه‌ى ژنێڤ به‌ ده‌ست بێنێت. ئه‌م كاره‌ كێشه‌ى گه‌وره‌یه‌ بۆ كۆتایى هێنان به‌ به‌ربه‌ستى ده‌یان ساڵه‌ى پاوانخوازییه‌ ناوه‌كییه‌كه‌ى رژێمى تارانه‌. ئه‌و كێشه‌یه‌ به‌ وتووێژ له‌گه‌ڵ چه‌ندین به‌رپرس، دیپلۆمات و بانكدار و پارێزه‌رى ئاگادار له‌و بابه‌ته‌ دیارى كراوه‌. جێگه‌ى باسه‌ كه‌ له‌ ئێستادا نزیك به‌ ١٠٠ میلیارد دۆلار له‌ داراییه‌كانى ئێران له‌ ولاتانى ده‌ره‌كى ده‌ستى به‌سه‌ردا گیراوه‌.








جه‌ننه‌تى: كۆمه‌ڵێك بێ عه‌قل له‌ پارله‌مانى ئوروپا دژ به‌ رژێمى ئێران به‌یاننامه‌ ده‌ر ئه‌كه‌ن
به‌ پێى راپۆرتى هه‌واڵده‌رییه‌كان، ئاخوند ئه‌حمه‌د جه‌ننه‌تى ده‌بیرى شۆراى نیگابانى رژێم رۆژى یه‌كشه‌مه‌ ١٧ى خاكه‌لێوه‌ به‌ توره‌ییه‌وه‌ له‌مه‌رِ به‌یاننامه‌كه‌ى یه‌كیه‌تى ئوروپا وتى، كۆمه‌ڵێك بێ عه‌قل له‌ پارله‌مانى ئوروپا كۆ بوونه‌ته‌وه‌ و له‌ كاتێكدا خۆیان به‌ هیچ كام له‌ ئه‌رزشه‌كانى مرۆڤ پابه‌ند نین له‌مه‌رِ پێشێلكارى مافى مرۆڤ له‌ ئێران قسه‌ ده‌كه‌ن و دژ به‌ رژێمى ئێمه‌ به‌یاننامه‌ ده‌ر ئه‌كه‌ن. ئاخوند جه‌ننه‌تى وتى، ئه‌و بریارنامانه‌ هیچ ئه‌رزشێكى نییه‌ وهۆشیارى ئێمه‌ ده‌توانێت به‌ خه‌ڵكى نیشان بدات كه‌ لایه‌نى به‌رانبه‌رى ئێمه‌ كێیه‌. ناوبراوو به‌ ئاماژه‌ به‌ بارودۆخى له‌رزۆكى رۆحانى وتى، خه‌ڵك چاوه‌روانن كه‌ ده‌وڵه‌ت قسه‌ى خۆى هه‌بێت.








به‌رنامه‌ى  نوێى رژێمى ئاخوندى دژبه‌ كچه‌ زانكۆییه‌كان
به‌ پێى راپۆرتى هه‌واڵده‌رییه‌كان، رژێمى دژه‌ مرۆڤى ئاخوندى ده‌یه‌وێت به‌شدارى كچان له‌ رشته‌ى پزشكى له‌ ژێر ناوى ته‌رحى به‌رابه‌رى جنسییه‌تى له‌ زانكۆكانى علوم پزشكى كۆنترۆڵ بكات. جێگرى راهێنانى وه‌زیرى بێهداشت له‌ ده‌وڵه‌تى حسن رۆحانى له‌و باره‌یه‌وه‌ رایگه‌یاند، درووست كردنى هاوسه‌نگى له‌ به‌شه‌كان له‌ رێگاى گۆرانكارى له‌ زه‌رفییه‌تى وه‌رگرتنى جنسییه‌تییه‌وه‌ روو ده‌دات.

ڕێکه‌وت: 2014-04-07 10:43:53
به‌شی ( هه‌واڵه‌كانى كوردستان، ئێران و جیهان ١٨ى خاكه‌لێوه‌ى ١٣٩٣ )