__ گوندێکی ناوچەی سەردەشت لەلایەن هیزی ئینتزامییەوە گولـلە باران کرا__  کوڕێک دوای کوشتنی خوشکەکەی کۆتایی بەژیانی خۆی هێنا__ سه‌ركرده‌ێكى سپا: مانه‌وه‌ى ئه‌سه‌د خواستى ئێمه‌یه‌__ وریایى ئه‌مریكا به‌ روسیه‌ له‌مه‌ر ئۆكراین__ عراقچى: جێنشین بۆ ئه‌بوتالبى دیارى ناكه‌ین__ مانۆرى به‌سیجییان له‌ شارى بیجار__ بۆمبارانى شیمیایى سه‌رله‌ نوێ له‌لایه‌ن رژێمى ئه‌سه‌ده‌وه‌__ ده‌رگیرى لاوانى ئه‌هوازى به‌ دروشمى خه‌ڵك خوازیارى رووخانى نیزامن" له‌گه‌ڵ هێزه‌ سه‌ركوتكه‌ره‌كان__  په‌رله‌مانی‌ ئێران ١٠ رۆژ مۆڵه‌ت ده‌داته‌ حكومه‌تى رۆحانی‌

گوندێکی ناوچەی سەردەشت لەلایەن هیزی ئینتزامییەوە گولـلە باران کرا
 لە کاتێکدا ژمارەیەک لە هاووڵاتییانی گوندی مەزناوێ لەناوچەی ئالانی سەردەشت، بەمەستی دابین کردنی بژیویی ژیان لە رێگەی کۆکردنەوەی گژوگیای بەهاری چووبوونە کوێستانەکانی "تاڵش" لە ناوچەی سەردەشت، لەلایەن هیزە ئینتزامییەکانی پاسگای بێتووشەوە دراونەتە بەر دەستڕێژی گولـلە.  بەپێی راپۆرتی  هەواڵدەریی کوردپا و بە وتەی یەکێک لە دانیشتوانی گوندی مەزناوێ، رۆژی پێنج‌شەممەی حەفتەی رابردوو لە ئەنجامی هێرشی هێزە ئینتزامییەکانی جێگیر لە پاسگای بێتووش، بۆ سەر هاووڵاتییان، سەربازێک بە تەقەی خودی ئەو هێزانە بریندار بووە و ٣ سەر هێستری هاوولاتیانیش بەکوشت چوون. دوابەدوای برینداربوونی ئەو سەربازە، فەرماندەری پاسگای بێتووش بەناوی "دووستی"، داوای یارمەتی لە خەلکی مەزناوێ دەکات، بەڵام بەهۆی سووکایەتیی ئەو هێزانەوە بە هاووڵاتییانی گوندەکە، خەڵک هیچ یارمەتییەکیان نادەن و لە ئەنجامدا فەرماندەری ئەو پاسگایەوە هەڕەشەی تیرباران کرانی گوندەکە دەکات.رۆژی هەینی فەرماندەری پاسگای بێتووش بە ٦٠ کەس هێزی ئینتزامییەوە و بە بیانووی کۆکردنەوەی ماهووارە هێرشیان هێنایە سەر گوندی مەزناوێ و دەستیان بە هاویشتنی گازی فرمێسک‌ڕێژ بۆ نێو حەوشەی خانووبەرەی هاووڵاتییان و تەقە کردن لە حەوشەی خانووبەرەی دانیشتوانی گوندەکە کرد كه‌ لە ئەنجامی تەقەی ئەو هێزانەدا تانکڕێکی هەزار لیتری لە نێو خانووبەرەی هاووڵاتییەک بەناوی "دڵشادی حەمە سمایلی مەزناوێ" ئاگری تێبەربوو، کە بەو هۆیەوە خانووبەرەی ناوبراو بە تەواوەتی لە ئاگردا سووتا. دەگوترێت، ئەو هەڵسووکەوتەی پاسگای بێتووش ناڕەزایەتیی بەرینی خەڵكی ناوچەی ئالانی سەردەشتی لیکەوتۆتەوە و رۆژی هەینی فەرمانداری سەردەشت سەردانی مەزناوێی کردووە، کە لەئەنجامدا لەگەڵ ناڕەزایەتیی بەرینی دانیشتوانی گوندی مەزناوێ بەرەوڕوو بۆتەوە.








 کوڕێک دوای کوشتنی خوشکەکەی کۆتایی بەژیانی خۆی هێنا
لەناوچەی "ناودەروەن"‌ی کامیاران کچێک بەدەستی براکەی خۆی کوژرا و دواتریش بکووژەکە بە چەک خۆی کوشتووە. بەپێی راپۆرتی هەواڵدەریی کوردپا، رۆژی هەینی رێکەوتی ٢٢‌ی خاکەلێوە کەسێک بەناوی مەیسەم عەزیزی خەڵکی ئاوایی کانی هەنگ لە ناوچەی "ناودەروەن"‌ی کامیاران خوشکەکەی خۆی بەناوی لەیلا عەزیزی کوشتووە. بەوتەی سەرچاوەیەکی ئاگادار ئەو خوشک و برایە بە مەبەستی سەیران چوونەتە یەکێک لەچیاکانی دەورووبەری ئاوایی کانی هەنگ و لەوێ‌"لەیلا" بە براکەی وتووە کە دەیهەوێ‌ژیانی هاوبەش پێک بێنێت و مەیسەم عەزیزی دوای بیستنی ئەو قسەیە بە چەکی راو (تاپڕ) کوشتوویەتی. سەرچاوەکە ئەوەشی خستەڕوو، مەیسەم دوای کوشتنی خوشکەکەی هەر بەو چەکە تەقەی لەخۆی کردووە و کۆتایی بەژیانی خۆی هێناوە. جێگه‌ى باسه‌ كه‌ مەیسەم عەزیزی کێشەی دەروونی هەبووە و خوشکەکەی بە بەردەوامی ئاگای لەدۆخی براکەی بووەو ئەو پارەیەی کە لەکار کردن بەدەستی دەهێنا لە پێداویستییەکانەی براکەی خەرجی دەکرد. لەیلا عەزیزی لەیەکێک لەباخچەی ساوایان( مهد کودک)‌ـەکانی ناوچەی "ناودەروەن"‌ی کامیاران سەرقاڵی کار کردن بوو.








سه‌ركرده‌ێكى سپا: مانه‌وه‌ى ئه‌سه‌د خواستى ئێمه‌یه‌
به‌ پێى راپۆرتى هه‌واڵده‌رییه‌كان، سه‌ركرده‌ێكى هێزه‌كانى هه‌وا فه‌زاى سپاى پاسدارانى رژێمى ئاخوندى دانى پێدانا كه‌ هۆكارى مانه‌وه‌ى رژێمى به‌شارئه‌سه‌د پاڵپشتى رژێمى ئاخوندییه‌. ٨٦ ولاتى جیهان راوه‌ستان و وتیان كه‌ حكومه‌تى سوریه‌ ده‌بێت بگۆردرێت و به‌شارئه‌سه‌د بروات به‌لام چونكوو ئێران رازى نه‌بوو ئه‌وان شكستیان خوارد. ناوبراوو كه‌ له‌ كۆبوونه‌وه‌ى كۆمه‌ڵێك پاسدارى وره‌دابه‌زیو قسه‌ى ده‌كرد و هه‌وڵى ئه‌دا كه‌ شكستى خواردنه‌وه‌ى زه‌هرى ناوه‌كى به‌ قسه‌ى پووچ و بێ بنه‌ما پاساوى بۆ بێنێته‌وه‌ وتى، ئه‌مرۆ گه‌وره‌ى ئێران هه‌زار به‌رانبه‌ر بووه‌ته‌وه‌، ئه‌مرۆ هێندێك له‌ ولاتانى گه‌وره‌ كه‌ له‌وانه‌یه‌ به‌ فكرى كه‌سێك نه‌گات له‌ هێندێك تێكنۆلۆژى یارمه‌تییتن له‌ ئێمه‌ ده‌وێت.








وریایى ئه‌مریكا به‌ روسیه‌ له‌مه‌ر ئۆكراین
به‌ پێى راپۆرتى هه‌واڵده‌رییه‌كان، ئه‌مریكا وریایى دایه‌ روسیه‌ له‌مه‌رِ ئه‌گه‌رى هه‌ر چه‌شنه‌ هه‌وڵێك بۆ شیواندنى ئۆكراین. به‌ پێى ئه‌م راپۆرته‌ ئه‌م وریاییه‌ هاوكاته‌ له‌گه‌ڵ دووپات بوونه‌وه‌ى ناكۆكییه‌كانى رۆژئاواى ئۆكراین و ده‌ستبه‌سه‌ردا گرتنى كۆمه‌لێك پاسگاى پۆلیس و ناوه‌نده‌ ده‌وڵه‌تییه‌كان له‌ لایه‌ن كه‌سانى چه‌كدارى لایه‌نگرى مسكۆوه‌. وته‌بێژێكى شۆراى ئه‌منییه‌تى نه‌ته‌وه‌یى ئه‌مریكا رایگه‌یاند، له‌ سه‌رۆك كۆمارى روسیه‌ و ده‌وڵه‌ته‌كه‌ى داوا ده‌كه‌ین كه‌ له‌ هه‌ر چه‌شنه‌ هه‌وڵێك كه‌ ده‌بێته‌ هۆى شیواندنى ئارامى ئۆكراین خۆیان بپارێزن.








عراقچى: جێنشین بۆ ئه‌بوتالبى دیارى ناكه‌ین
به‌ پێى راپۆرتى هه‌واڵده‌رییه‌كان، عه‌باس عراقچى جێگرى وه‌زیرى ده‌ره‌وه‌ى رژێمى ئاخوندى له‌ دژكرده‌وه‌ به‌ ویزا نه‌دانى ئه‌مریكا به‌ ئه‌بوتالبى باڵوێزى نوێى رژێم له‌ سازمانى نه‌ته‌وه‌یه‌كگرتووه‌كان رایگه‌یاند، ئێمه‌ بۆ ئه‌بوتالبى جێنشین دیارى ناكه‌ین. هه‌روه‌ها غۆلام حسین دێهقان جێگرى نوێنه‌رى رژێم له‌ نه‌ته‌وه‌یه‌كگرتووه‌كانیش به‌ ئاه‌ و ناڵه‌وه‌ له‌مه‌رِ بریارى ئه‌مریكا بۆ وه‌رنه‌گرتنى دیپلۆماتى تیرۆریست رژێم، ئه‌م كاره‌ى ناعاقلانه‌ و پێشێلكردنى ئاشكارى مافى نێونه‌ته‌وه‌یى و به‌ پێچه‌وانه‌ى به‌ڵێنه‌كانى ولاتى خانه‌خوێى نه‌ته‌وه‌یه‌كگرتووه‌كان زانى.








مانۆرى به‌سیجییان له‌ شارى بیجار
به‌ پێى راپۆرتى هه‌واڵده‌رییه‌كان، رژێمى ئاخوندى به‌ مه‌به‌ستى وره‌به‌رز كردنه‌وه‌ى به‌سیجییه‌ بێوره‌كانى مانۆرێكى له‌ ناوچه‌ى بیجار وه‌رێخست. به‌رێوه‌به‌رى فه‌رماندارى شارى بیجار وێرِاى راگه‌یاندنى مانۆرى دوو رۆژه‌ى به‌یتلمۆقه‌ده‌س له‌ ناوچه‌ى بیجار به‌ مه‌به‌ستى به‌رزكردنه‌وه‌ى وره‌ى هێزه‌كانى رایگه‌یاند، گه‌وره‌ترین ئامانجى ئه‌م مانۆره‌ یه‌كگرتوویى زۆرترى به‌سیجییه‌ سه‌ركوتكه‌ره‌كان و به‌رزكردنه‌وه‌ى راده‌ى ئاماده‌گییان له‌ به‌رانبه‌رى هێرشى له‌ ناكاوى دوژناندایه‌. باقرئه‌مین پور كه‌ وته‌كانى له‌ لایه‌ن هه‌واڵده‌رى حكومه‌تى ئیرناوه‌ بلاو ده‌كرایه‌وه‌ وتى، دوو هه‌زار هێزى به‌سیجى و هه‌موو ئیدارات و ناوه‌نده‌ حكومه‌تییه‌كانى شارى بیجار له‌م مانۆره‌دا به‌شدارى ده‌كه‌ن.









بۆمبارانى شیمیایى سه‌رله‌ نوێ له‌لایه‌ن رژێمى ئه‌سه‌ده‌وه‌
به‌ پێى راپۆرتى هه‌واڵده‌رییه‌كان، شارۆمه‌ندانى غه‌یره‌ نیزامى شارى حه‌ما بۆ دووهه‌مین رۆژ بوونه‌ ئامانجى گازى سه‌مى رژێمى به‌شارئه‌سه‌د. جبهه‌ى نه‌ته‌وه‌یى سریه‌ رایگه‌یاند، له‌ هێرشه‌ شیمیاییه‌كانى ئه‌م چه‌ند رۆژه‌ى دوایى هێزه‌كانى به‌شارئه‌سه‌د، ٤ مندال كوژراوو و ده‌یان كه‌سیتریش بریندار بوون. هه‌روه‌ها كۆمه‌ڵێكى زۆر له‌ خه‌ڵكى ناوژه‌ى ئه‌دله‌ب كه‌وتونه‌ته‌ به‌ر ئامانجى گازى شیمیایى. به‌ پێى ئه‌م راپۆرته‌ و به‌ پێى وته‌ى سه‌رچاوه‌ پزشكییه‌كان، ئه‌و گازانه‌ى كه‌ رژێمى ئه‌سه‌د به‌كاریهێناوه‌ له‌ نه‌وعى گازى كۆلر بووه‌.








ده‌رگیرى لاوانى ئه‌هوازى به‌ دروشمى خه‌ڵك خوازیارى رووخانى نیزامن" له‌گه‌ڵ هێزه‌ سه‌ركوتكه‌ره‌كان
به‌ پێى راپۆرتى هه‌واڵده‌رییه‌كان، لاوانى چاونه‌ترسى ئه‌هوازى به‌ دروشمى خه‌ڵك خوازیارى رووخانى نیزامن، رۆحانى برۆ ون به‌، له‌گه‌ڵ هێزه‌ سه‌ركوتكه‌ره‌كانى رژێمى ئاخوندى ده‌رگیر بوون. به‌ پێى ئه‌م راپۆرته‌، رۆژى جۆمعه‌ ٢٢ى خاكه‌لێوه‌ى ١٣٩٣ دوا به‌ دواى سه‌ركه‌وتنى تیمى فولادى خوزستان، لاوانى ئه‌و شاره‌ رژانه‌ سه‌ر شه‌قامه‌كان و ده‌ستیان كرد به‌ وتنى دروشمى دژه‌ حكومه‌تى و هێزه‌ سه‌ركوتكه‌ره‌كان به‌ گازى فرمێسك رێژ به‌ره‌و رووى لاوان بوونه‌وه‌.









 په‌رله‌مانی‌ ئێران ١٠ رۆژ مۆڵه‌ت ده‌داته‌ حكومه‌تى رۆحانی‌
به‌ پێى راپۆرتى هه‌واڵده‌رییه‌كان، په‌رله‌مانی‌ ئێران ١٠ رۆژ مۆڵه‌ت ده‌داته‌ حكومه‌ته‌كه‌ی‌ حه‌سه‌ن رۆحانی‌ بۆ ئه‌وه‌ی‌ له‌سه‌ر بابه‌تى ویزا نه‌دانى ئه‌مریكا به‌ ئه‌بوتالبى باڵوێزى نوێى رژێمى ئاخوندى له‌ سازمانى نه‌ته‌وه‌یه‌كگرتووه‌كان و قه‌ده‌غه‌ كردنى رۆیشتنى ناوبراوو بۆ خاكى ئه‌مریكا سكاڵا له‌دژی‌ واشه‌نگتۆن تۆمار بكات. محه‌مه‌د حه‌سه‌ن ئه‌سفه‌ری‌ ئه‌ندامی‌ لیژنه‌ی‌ ئه‌منییه‌تى نه‌ته‌وه‌یی و سیاسه‌تی‌ ده‌ره‌وه‌ی‌ مه‌جلیسى رژێم، رایگه‌یاند كه‌ مه‌جلیس ١٠ رۆژ مۆڵه‌تی‌ داوه‌ته‌ حكومه‌ت بۆ ئه‌وه‌ی‌ له‌ ناوه‌نده‌ نێوده‌وڵه‌تییه‌كان سكاڵا دژی‌ ئه‌مریكا تۆمار بكات به‌هۆی‌ پێنه‌دانی‌ ویزا به‌ حه‌مید ئه‌بوتاڵبی‌ نوێنه‌ری‌ نوێى رژێمى ئاخوندى له‌ نه‌ته‌وه‌یه‌كگرتووه‌كان. ئه‌سفه‌ری‌ وتی‌: "به‌گوێره‌ی‌ رێكه‌وتننامه‌ی‌ نێوده‌وڵه‌تی‌ كه‌ له‌لایه‌ن نه‌ته‌وه‌ یه‌كگرتووه‌كانه‌وه‌ په‌سه‌ندكراوه‌، ئه‌ركی‌ ئه‌مریكایه‌ هاوكاری‌ نوێنه‌رانی‌ وڵاتانی‌ ئه‌ندامی‌ رێكخراوی‌ نه‌ته‌وه‌ یه‌كگرتووه‌كان بكات". ئاماژه‌شی‌ به‌وه‌دا كه‌ به‌پشتبه‌ستن به‌و رێكه‌وتننامه‌یه‌ پێویسته‌ ئه‌مریكا ویزاى چوونه‌ ناو ئه‌و وڵاته‌ بدات به‌ نوێنه‌ری‌ وڵاتانی‌ ئه‌ندامی‌ رێكخراوه‌كه‌، ته‌نانه‌ت شوێنی‌ مانه‌وه‌شیان بۆ دابین بكات.

ڕێکه‌وت: 2014-04-13 08:33:40
به‌شی ( هه‌واڵه‌كانى كوردستان، ئێران و جیهان ٢٤ى خاكه‌لێوه‌ى ١٣٩٣ )