__ هونەرمەندانی مەهابادی پشتیوانی لەمنداڵانی تووشبوو بە شێرپەنجە دەکەن__ چالاکیی جۆراوجۆری ژینگەپاریزی لە شارەکانی کوردستانی ئێران__ ئێعدامى ٦ زیندانى له‌ زیندانى به‌نده‌رعه‌باس__ عه‌لى ئه‌كبه‌ر سالحى: پێویستمان به‌ ٣٠ هه‌زار سانترفیوژى نوێیه‌__ مه‌حاكمه‌ى دوو ده‌لاڵى چه‌ك و چۆڵى رژێمى ئاخوندى له‌ ئاڵمان__ كۆبوونه‌وه‌ى له‌ ناكاوى شۆراى ئه‌منییه‌ت بۆ تاوتوێ كردنى بارودۆخى ئۆكراین__ رادانى جه‌نایه‌تكار: په‌شیمان نیم و سه‌رله‌ نوێیش ئه‌كۆژم__ ٩ میلیۆن و ٧٠٠ هه‌زار بێسه‌واد له‌ ئێران بوونیان هه‌یه‌__ ٣٠ هەزار زیندانى له‌ ئێران رەوانەی ئوردوگای کاری زۆرەملی دەکرێن

هونەرمەندانی مەهابادی پشتیوانی لەمنداڵانی تووشبوو بە شێرپەنجە دەکەن
 ژمارەیەک لە هونەرمەندانی کوردی خەڵکی شاری مەهاباد، بۆ پشتیوانی لە منداڵانی تووشبوو بە نەخۆشیی شێرپەنجە، نوقسانی جەستیەیی و زەینی و بێ سەرپەرست، پیشانگەیەکیان کردەوە. بەپێی راپۆرتی هەواڵدەریی کوردپا؛ ٣٠ هونەرمەندی مەهابادی، بەرهەمەکانی خۆیان لە بواری نەققاشی، گرافیک، پیشەی دەستی و خۆشنووسی‌دا لە تەلاری وەحدەتی شارەوانیی مەهاباد کردەوە، کە بەشێک لە داهاتەکەی بۆ منداڵانی تووشبوو بە نەخۆشییە تایبەتییەکان تەرخان دەکرێت. ئەو پیشانگەیە، کەلە ژێر ناوی "یاد"دا کراوەتەوە، ٥٠٠ بەرهەمی هونەریی ئەو ٣٠ هونەرمەندە کوردەی خەڵکی مەهابادی لەخۆ گرتووە. دەگوترێت، بەشێک لە داهاتی فرۆشی کەلووپەلەکان و پیشە دەستییەکانی ئەو پیشانگەیە، بۆ ئەنجومەنی پشتیوانی لە منداڵانی تووشبوو بە شێرپەنجە، نوقسانی جەستەیی و زەینی و بێ سەرپەرستی شاری مەهاباد سەرف دەکرێت. بەرپرسی پیشانگەی یاد رایگەیاندووە، ئەم پیشانگەیە بەمەبەستی برەودان بە فەرهەنگ، داب و نەرتی جوانی خەڵکی ئەم ناوچەیە و پشتیوانی لە منداڵانی نوقسان و بێ سەرپەرستی ئەم شارە کراوەتەوە.








چالاکیی جۆراوجۆری ژینگەپاریزی لە شارەکانی کوردستانی ئێران
 لە درێژەی رەوتی ژینگەدۆستی و خاوێنکردنەوەی سروشتی کوردستان، لە شارەکانی کوردستان بە شێوەی جۆراوجۆر چالاکیی ژینگەپاریزی بەڕێوەچوو.
بەپێی راپۆرتی هەواڵدەریی کوردپا؛ ژمارەیک هاووڵاتیی کورد لە شاری ئیسلام‌ئاباد لە ئوستانی کرماشان، بە شێوەیەکی خۆڕسک سەیرانگەی گڵاڵسیەی سەربەو شارەیان خاوێن کردەوە. ئەو سەیرانگەیە کەلە سەر رێگەی ئیسلام‌ئاباد (شاهاباد) بۆ گیلانغەرب هەڵکەوتووە، رۆژی هەینی لە زبڵ و پاشماوەی گەشتیاران خاوین کراوەتەوە.  لەلایەکی دیکەوە و رۆژی شەممە رێکەوتی ٢١ی خاکەلێوە ژمارەیک راوچیی کوردی خەڵکی گوندی شارانی لە ناوچەی مەریوان، لەرێوڕەسمێکدا ١٢ کەویان لە چیاکانی دەوروبەری ئەو گوندە ئازاد کرد و دواتر قەفەسەکانیان لە ئاگردا سووتاند. هەروەها رۆژی ٢٠ی خاکەلێوە، راوچییەکی کوردی خەلکی گوندی ولەژێر لە ناوچەی مەریوان بەناوی "تایر خوسرەوی"، تاقە کەوەکەی خۆی بە ژینگەی کوردستان سپاردەوە. تایر خوسرەوی، کە کارمەندی خانەنشین‌کراوی ئیدارەی برقی شاری مەریوانە، پاش ئازاد کردنی کەوەکەی، بە نێشانەی وازهێنانی هەمیشەیی لە راگرتنی کەو، قەفەسەکەشی لە ئاگردا سووتاند. لە رۆژی ١٨ی خاکەلێوەی ئەمساڵیشدا، بەهاوکاریی ئەنجومەنی خەڵکیی پاژین لە شاری بانە، لە رێوڕەسمێکدا ١٠ سمۆرە و ١١ کەو بۆ داوێنی سروشتی کوردستان گەڕێندرانەوە.لە ماوەی ٢ مانگی رابردوودا، رەوتی ئازادکردنی باڵندە و وازهێنان لە راوکردن، نزیک بە تێکڕای شارەکانی کوردستانی ئیرانی گرتۆتەوە، لە زۆربەی شارەکاندا راوچییە کوردەکان بە کۆمەڵ وازیان لە راو کردن هێناوە.








ئێعدامى ٦ زیندانى له‌ زیندانى به‌نده‌رعه‌باس
به‌ پێى راپۆرتى هه‌واڵده‌رییه‌كان، رژێمى دژه‌ مرۆڤى ئاخوندى شه‌ش كه‌س له‌ زیندانیانى زیندانى به‌نده‌رعه‌باسى له‌ رۆژى پێنجشه‌ممه‌ ٢١ى خاكه‌لێوه‌ له‌ سێداره‌ داوه‌. به‌ پێى ئه‌م راپۆرته‌ به‌كرێگیراوانى رژێمى ئاخوندى شه‌ش زیندانیان له‌ سێداره‌ داوه‌ كه‌ چوار كه‌سیان بریتین له‌ زه‌رغام جه‌هانگیرى، مه‌نسور ناسرى، ئه‌حمه‌د ره‌حیمى و ئۆمید شكارى و ناوى ئه‌و دوو ئێعدامكراوه‌یتر تاكو ئێستا نه‌زانراوه‌.










عه‌لى ئه‌كبه‌ر سالحى: پێویستمان به‌ ٣٠ هه‌زار سانترفیوژى نوێیه‌
به‌ پێى راپۆرتى هه‌واڵده‌رییه‌كان، سه‌رۆكى سازمانى ئێنرژى ئه‌تۆمى رژێمى ئاخوندى رۆژى یه‌كشه‌ممه‌ ٢٤ى خاكه‌لێوه‌ رایگه‌یاند، بۆ دابین كردنى پێویستییه‌ ناوخۆییه‌كانمان ٣٠ هه‌زار سانترقیوژى نوێمان ده‌وێت. هه‌واڵده‌رى فه‌رانسه‌ وێرِاى بلاو كردنه‌وه‌ى ئه‌م هه‌واڵه‌ رایگه‌یاند، وته‌كانى عه‌لى ئه‌كبه‌ر سالحى درووست چه‌ند رۆژ دواى وتووێژه‌كانى ئه‌م دواییانه‌ له‌ وییه‌ن كراوه‌، وتووێژێكه‌ به‌ مه‌به‌ستى گه‌یشتن به‌ رێكه‌وتننامه‌ێكى درێژماوه‌ له‌ سه‌ر به‌رنامه‌ ناوه‌كییه‌ كێشه‌ له‌سه‌ره‌كه‌ى رژێمى ئاخوندى به‌رێوه‌ چووه‌. رژێمى ئاخوندى له‌ ئێستادا ١٩ هه‌زار سانترفیوژى هه‌یه‌ كه‌ ١٠ هه‌زار دانه‌یان له‌ نه‌سلى یه‌كه‌من و بۆ پیتاندنى ئۆرانیۆم كه‌ڵكى لێ وه‌ر ده‌گیردرێت. جێگه‌ى باسه‌ كه‌ به‌ پێى رێكه‌وتنى ژنێڤ رژێم ناتوانێت رێژه‌ى سانترفیوژه‌كانى خۆى زیاد بكات.








مه‌حاكمه‌ى دوو ده‌لاڵى چه‌ك و چۆڵى رژێمى ئاخوندى له‌ ئاڵمان
به‌ پێى راپۆرتى هه‌واڵده‌رى دێ پێ ئاى ئاڵمان، دادگاى بالاى شارى فرانكفۆرتى ئاڵمان رایگه‌یاند، به‌م زووانه‌ دادگاییكردنى دوو ده‌لاڵى ئێرانى به‌ تاوانى قاچاخى ٦١ ده‌ستگا مۆتۆرى فرۆكه‌ى بێ سه‌رنشین بۆ ئێران ده‌ست پێ ده‌كات. ١٤ مانگ پێش دوو قاچاخچى ئێرانى به‌ ناوه‌كانى ئیمان و داوود به‌ تاوانى ناردنى ٦١ ده‌ستگا ماتۆرى فرۆكه‌ى بێ سه‌رنشین بۆ ئێران ده‌ستبه‌سه‌ر كران. به‌ پێى گه‌مارۆكانى نه‌ته‌وه‌یه‌كگرتووه‌كان، ناردنى ئه‌و جۆره‌ ماتۆرانه‌ به‌ هۆى به‌ كارهێنانى نیزامییانه‌وه‌ قه‌ده‌غه‌یه‌. جێگه‌ى باسه‌ كه‌ له‌ ئه‌گه‌رى مه‌حكوم بوونى ئه‌و دوو كه‌سه‌ به‌ سزاى ١٥ ساڵ زیندان به‌ره‌وروو ده‌بنه‌وه‌.









كۆبوونه‌وه‌ى له‌ ناكاوى شۆراى ئه‌منییه‌ت بۆ تاوتوێ كردنى بارودۆخى ئۆكراین
به‌ پێى راپۆرتى هه‌واڵده‌رییه‌كان، شۆراى ئه‌منییه‌تى نه‌ته‌وه‌یه‌كگرتووه‌كان به‌ مه‌به‌ستى تاوتوێ كردنى بارودۆخى قه‌یراناوى له‌ رۆژهه‌لاتى ئۆكراین كۆبوونه‌وه‌ێكى له‌ناكاوى وه‌رێخست. ئه‌و كۆبوونه‌وه‌یه‌ له‌ سه‌ر داواكارى روسیه‌ به‌رێوه‌ چوو كه‌ ده‌وڵه‌تى ئۆكراین به‌ هۆكارى بارگرژییه‌كانى رۆژهه‌لاتى ئۆكراین ده‌زانێت، به‌لام باڵوێزى بریتانیا له‌ سازمانى نه‌ته‌وه‌یه‌كگرتووه‌كان وتى، به‌ پێى ئه‌و وێنانه‌ى له‌ ماهواره‌ ده‌ركه‌وتوون روسیه‌ ٣٥ تا ٤٠ هه‌زار هێزى نیزامى له‌ سنووره‌كانى ئۆكراین جێگیر كردووه‌. جێگه‌ى باسه‌ كه‌ باڵًوێزى بریتانیا له‌مه‌رِ هه‌ر چه‌شنه‌ كرده‌وه‌ێكى نیزامى له‌ رۆژهه‌لاتى ئۆكراین وریایى دایه‌ روسیه‌.








رادانى جه‌نایه‌تكار: په‌شیمان نیم و سه‌رله‌ نوێیش ئه‌كۆژم
به‌ پێى راپۆرتى هه‌واڵده‌رییه‌كان، جێگرى فه‌رمانده‌ى هێزه‌ ئینتزامییه‌كانى رژێمى ئاخوندى رایگه‌یاند، به‌ هیچ شێوه‌ێك له‌ كاركردى خۆم له‌ قه‌یرانه‌كه‌ى ٨٨ په‌شیمان نیم و ئه‌گه‌ریش كارێكى وا دووباره‌ ببێته‌وه‌ به‌ توندى هه‌ڵسوكه‌وت ده‌كه‌م. ئه‌حمه‌د ره‌زا رادان به‌ ئاماژه‌ به‌ ناره‌زایه‌تییه‌كان به‌ ئاكانى هه‌ڵبژاردنه‌كانى سه‌رۆك كۆمارى ساڵى ٨٨ و گواستنه‌وه‌ى نارازییان بۆ گرتووخانه‌ى كه‌هریزه‌ك كه‌ بوو به‌ هۆى كوژرانى سێ كه‌س وتى، له‌و كاته‌دا له‌ گواستنه‌وه‌ى ئه‌و نارازییانه‌ بۆ كه‌هریزه‌ك ئاگادار نه‌بووم به‌لام ئێمه‌ چه‌ندین جار له‌ ته‌له‌فزیۆنه‌وه‌ رامانگه‌یاند كه‌ كاره‌كه‌تان هێڵى سوورى تێپه‌راندووه‌، هه‌ڵسوكه‌وتى ئێمه‌ له‌گه‌ڵیان به‌ پێى كاره‌كه‌یان كه‌م بوو من تا كاتێكه‌ زیندوو بم ناهێڵم كه‌س هێڵى سوور تێپه‌رێنێت.










٩ میلیۆن و ٧٠٠ هه‌زار بێسه‌واد له‌ ئێران بوونیان هه‌یه‌
به‌ پێى راپۆرتى هه‌واڵده‌رییه‌كان، به‌رێوه‌به‌رى بارهێنانى سازمانى نێهزه‌تى سه‌واد ئاموزى رایگه‌یاند، به‌ پێى ئاماره‌كان ٩ میلیۆن و ٧٠٠ هه‌زار بێسه‌واد له‌ ئێران بوونیان هه‌یه‌ و له‌وه‌ش ناخۆشتر ئه‌وه‌یه‌ كه‌ له‌و رێژه‌یه‌ ٣ میلیۆن و ٤٥٠ هه‌زار كه‌سیان له‌ ژێر ته‌مه‌نى ٥٠ ساڵیدان. مه‌حه‌مه‌د مێهدیزاده‌ وتى، بۆ باسه‌واد كردنى خه‌ڵك ده‌بێت ئامانجێكى گه‌وره‌مان هه‌بێت تاكوو بتوانین رۆژێك به‌ ناوى رۆژى باسه‌وادى له‌ ئێران جه‌ژن بگرین.








٣٠ هەزار زیندانى له‌ ئێران رەوانەی ئوردوگای کاری زۆرەملی دەکرێن
به‌ پێى راپۆرتى هه‌واڵده‌رییه‌كان، سه‌رۆكى زیندانه‌كانى رژێمى ئاخوندى رایگەیاند کە لە ئەگەری ئامادەبوونی پرۆژەکانی”ئوردوگای کاری زۆرەملی” نزیک بە ٣٠ هەزار زیندانى کە بە تاوانی کڕین و فرۆشتنی مادە هۆشبه‌ره‌كان سزایان بەسەردا سەپاوە، رەوانەی ئەو ئوردوگایانە دەکرێن. ئەو رێژەیە دەکاتە نزیکەى ٣٣%ی رێژەى هەموو زیندانیانى زیندانه‌كانی ئێران.غولام حسین ئیسماعلی رۆژی شەممە ٢٣ى خاكه‌لێوه‌ رایگه‌یاند،“٧٠ ملیارد تمەن  بوودجە بۆ ئامادەکردنی ئەو ئوردوگایانە تەرخان کراوەو کە هەتا ئێستا زیاتر لە ٣٠%ی ئەو پرۆژەیە ئامادەکراوە.” ناوبراو رایگەیاندووە کە ٢ “ئوردوگای کاری زۆرەملی” لە شارەکانی خوراسان و ئیسفەهان دەستیان بە کارکردووەو هاوینی ئەمساڵیش ٣ ئۆردوگای دیکە لە شارەکانی تاران، کرمان و سیستان و بەلووچێستان دەستبەکاردەبن.

ڕێکه‌وت: 2014-04-14 08:48:16
به‌شی ( هه‌واڵه‌كانى كوردستان، ئێران و جیهان ٢٥ى خاكه‌لێوه‌ى ١٣٩٣ )