__ گواستنەوەی زیندانیەكی سیاسی مەحكووم بە ئیعدام بۆ شوێنێكی نادیار__ كوژران و برینداربوونی دوو هاووڵاتیی كرماشانی بەهۆی تەقینەوەی مین__ گۆلی "زرێبار" و" ورمێ‌" چوونە لیستی رەشی تاڵاوە كارەساتبارەكانەوە__ گەورەترین گەنەدەڵی لە حكوومەتی ئاخوندەكان__ شۆرای هاوكاریی كەنداوی فارس ووتەكانی ئاخوند جەننەتی مەحكووم كرد__ بەرنامەی مووشەكی رژیم هەرەشەیێكە بۆ ناوچەكە __ داعش لە پاشەكشەدایە__ لێكۆڵینەوەیەك سودێكی سەیری هێلكە ئاشكرادەكات

گواستنەوەی زیندانیەكی سیاسی مەحكووم بە ئیعدام بۆ شوێنێكی نادیار
 گواستنەوەی كتوپڕی عەلی ئەحمەد سلیچمان زیندانی سیاسی زیندانی ناوەندی ورمێ‌ بۆ شوێنێكی نادیار بۆتە هۆی نیگەرانی كەس و كاری ناوبراو. بە پێی راپۆرتی هێرانا عەلی ئەحمەد سلێمان هاوەڵاتی كوردی كوردستانی عێراق لە لایەن داگای رژیم مەحكووم بە ئیعدام كراوە و حوكمەكەشی پەسند كراوە لە دیوانی بالای رژیم. ناوبراو رۆژی سێ شەممە 14ی رێبەندان بە كتوپڕی بۆ شوێنیكی نادیار گواستراوەتەوە. ئەو زیندانیە كە پێشتر لە ساڵۆنی 12 ساڵۆنی زیندانیانی سیاسی زیندانی ورمێ‌ رادەگیرا بە كوشتنی 2 ئەندامی سپای پاسداران لە عەملیاتێكی چەكدارانە تۆمەتبار كراوە. پێشتریش كەس و كاری ئەو زیندانیە ئەو تۆمەتانەیان رەد كردبۆوە و ووتبوویان كە هیچ بەڵگەیێك بۆ سەلماندنی ئەو تۆمەتە لەبەردەست دانییە.  دەوترێ‌ كە لەلایەن رژیمەوە پێی ووتراوە كە ئەگەر تۆمەتبارە سەرەكیەكان نەناسێنێ‌ ئەوە تۆمەتەكە لەسەر عەلی ئەحمەد سلێمان ساغ دەكەنەوە. 




كوژران و برینداربوونی دوو هاووڵاتیی كرماشانی بەهۆی تەقینەوەی مین
تەقینەوەی مین لە ناوچەی (چەزابە)ی سەربە ئوستانی خووزستان، كوژران و برینداربوونی دوو هاووڵاتیی كوردی خەڵكی كرماشانی لێكەوتەوە. بەپێی راپۆرتی هەواڵدەریی كوردپا، رۆژی یەكشەممە رێكەوتی ٥ی رێبەندان هاووڵاتییەكی كوردی خەڵكی كرماشان بەناوی فەرامەرز ئەسەدی‌پوور و تەمەن ٢٢ ساڵ، بەهۆی تەقینەوەی مینی بەجێماوی شەڕی ئێران و عێراق، گیانی  دا و هاووڵاتییەكی دیكەش بەناوی ئەمین میرشكار و تەمەن ٢٠ ساڵ بەتوندی بریندار بوو. ئەو دوو هاووڵاتییە كوردە، لە كاتی لەوەڕاندنی ئاژەڵ و مەڕوماڵاتەكەیاندا لە ناوچەی چەزابە و پشت پاسگای (دویرجی)ی سەربە ئوستانی خووزستان تووشی ئەو رووداوە بوون. فەرامەرز ئەسەدی بەهۆی ئەو تەقینەوەیەو قووڵیی برینەكانی، دەستبەجێ گیانی داوە.هەروەها رۆژی پێنج‌شەممە، رێكەوتی ٩ی رێبەندان دوو هاووڵاتیی دیكەی كوردی خەلكی گوندی "باخان"ی سەربە ناوچەی سەرشیوەی مەریوان، بەناوەكانی ئیقباڵ شەریفی تەمەن ٤٠ ساڵ و ئیبراهیم تام تەمەن ٢٥ ساڵ، لە ئەنجامی تەقینەوەی مینی كۆنە پایەگایەكی سوپای پاسداراندا بە توندی بریندار بوو.





گۆلی "زرێبار" و" ورمێ‌" چوونە لیستی رەشی تاڵاوە كارەساتبارەكانەوە
سەرەڕای هوشدارییەكانیی ساڵانی رابردووە چالاكانی ژینگەپارێزیی كورد سەبارەت بە قەیراناوی بوونی بارودۆخی ئێكۆلۆژیكی زرێبار و ورمێ‌، ئێستا دەنگۆی چوونی ناوی ئەو دوو گۆلە بۆ ناوی لیستی رەشەوە وەڕاست گەڕاوە. " مۆنترۆ" ناوی یەكێك لەشارەكانی وڵاتی سویسە كە سەرجەم ئەو تاڵاو و زۆنگاوانەی كە لەگەڵ مەترسیی لەناو چوون و ئێكۆلۆژیكی" بەرەوڕوون لە ناو لیستی مۆنێرۆدا تۆمار دەكرێن. رۆژی ٢ فێوریەی هەموو ساڵێك رۆژ جیهانی زۆنگاو تاڵاوەكانە ولەماوەی چەند رۆژ رابردوودا چەندین بابەت و شی كردنەوەی تایبەت بە دۆخی گۆلی ورمێ‌ و زرێبار لە ماڵپەڕەكان بڵاو كرایەوە كە دۆخی قەیراناوی ئەو دوو زەریاچەیەی پشتڕاست دەكردەوە. ئەنجومەنی سەوزی چیا لە مەریوان بابەتێكی لە نووسینی (بەیان نیك بین) بڵاو كردۆتەوە، كە تێیدا نووسەر پێشبینی ئەوەی كردووە كە تاڵاوی زرێباریش وەكوو شوێنەكانی دیكەی وەكوو " شور گل"، شادگان، هاموون و ئەنزەلی و ... خراوەتە لیستی رەشی " مۆنتێرۆ"‌وە. ئەو چالاكە ژینگەپارێزییە باسی لەوەش كردووە، رژانی پاشماوە و ئاوەڕۆی ئاواییەكان بۆ ناو زرێبار، لێدانی بەنداوی دایك، پەرەگرتنی شارسازی، لێدانی بیری ئێرتەوازی، راو كردنی بێ‌ سەر و بەرە لەو هۆكارانەن كە زرێباری گەیاندۆتە ئەو دۆخە كارەساتبارە.كەڵك وەرگرتنی خراب و نابەجێ‌، دروست كردنی بەنداو، راو كردنی نایاسایی، كەم ئاوی و وشكە ساڵی، هێنانی ئاژەڵ و گیان لەبەری ناخۆجێی، لێدانی شاڕێیان، دەرهێنانی نەوت و ... لەو هۆكارانەن كە مەترسیی لەناو چوونی گۆلی ورمێیان پێك هێناوە.ماڵپەڕ " جام جەم ئانلاین"‌یش لە زاری كارناسانی ژینگەپارێزی ئێرانەوە بڵاوی كردۆتەوە، كە نزیك بە ٧٥% تاڵاو زۆنگاوەكانی ئێران تووشی خەسار هاتوون و دۆخیان قەیراناوییە.هەر لەو پێوەندییەدا ئیرنا بڵاوی كردبوویەوە، لە هەزار تاڵاو و زۆنگاوی ئێران ٨٠٠ دانەسات لە دۆخی قەیران دایە.





گەورەترین گەنەدەڵی لە حكوومەتی ئاخوندەكان
ئیسحاق جەهانگیری جێگری یەكەمی روحانی بە مەبەستی تەسویە حیساب لەگەڵ باڵی خامنەیی ووتی: گەورەترین گەنەدەڵی سەدە لە دەوڵەتی رابردوو رووی داوە.  جیهانگیری وێرای ئاماژە بە قەیرانی ئابووری ووتی: كەمبوونەوەی نرخی نەوت سێ كاریگەری دەبێ، یەكەم لەسەر بووجە كاریگەری دادەنێ‌ و دووهەم  تەرازی دانی دەروەیی وەڵاتە و سێهەم كاریگەریی كەمبوونی سەرچاوەی داهاتەكانی یارانەیە. 






شۆرای هاوكاریی كەنداوی فارس ووتەكانی ئاخوند جەننەتی مەحكووم كرد
 عەبدوللەتیف بێن راشد ئەلزیانی بەرێوەبەری گشتی شۆرای هاوكاریی كەنداوی فارس ووتەكانی ئاخوند جەننەتی لە شانۆی نوێژی هەینی بە سووكایەتی و قەبووڵ نەكراو زانی ووتی:  ووتنی ئەو قسە دژمنانەیە لە لایەن بەرپرسێ:ی رژیمی ئێران جگە لە پەرەدان بە ناكۆكیەكانی ئەو رژیمە و وەڵاتانی ئەندامی  ئەو شۆرایە كاریگەرییەكی تری نابێ. ناوبراو لە راگەێندراوێكدا لە سایتی رەسمی شۆرای هاوكاریی كەنداوی فارس خوازیاریی پێشگرتن لە دەربریتنی ئەو جۆرە قسە خۆراییانە بو. ئاخوند جەننەتی لە شانۆی نوێژی هەینی تاران مەلیك عەبدوڵلا بێن عەبدولعەزیز پاشای پێشووی عەرەبستانی بە قارونی سەعوودی ناو هێنابوو و ووتبووی دەبێ بە هۆی مردنی ئەو پیرۆزبایی بلێین. 





بەرنامەی مووشەكی رژیم هەرەشەیێكە بۆ ناوچەكە 
رژیمی ئاخوندی لە تەلەویزیۆنی خۆیدا سەبارەت بە هەڵوێستەكانی وەەزارەتی دەرەوەی ئەمریكا دژكردەوەی نیشاندا ووتی:  وەزارەتی دەرەوەی ئەمریكا لە دژكردەوە بە ناردنی ماهوارەی فەجر ئیدعای كرد كە بەرنامەی مووشەكی ئێران هەرەشەیێكە بۆ ناوچەكە. ووتەبێژی وەزارەتی دەرەوەی ئەمریكا ووتی: بەرنامەی مووشەكی ئێران و دروستكردنی مووشەكێك كە توانای هەڵگرتنی كڵاوەی ناوكەیی هەبێ بەشێك لە بابەتی دانووستانەكانی وەڵاتانی 1+5 دەمێنێتەوە. جین ساكی ماهوارەی فەجری بە پرۆژە نیزامیەكانی رژیمەوە گرێ دا ووتی:  بەرنامەی مووشەكی ئێران هەرەشەیێكی بۆ ناوچەكە . ئەو بەرپرسەی ئەمریكا ووتی توانایی هەڵگرتنی كڵاوەی ناوكەیی لە مووشەكەكانی ئێران پێشتر لە ووتووێژەكان لەگەڵ ئێران باس كراوە و دووبارەش دەخرێتە بەرباسەوە. 






داعش لە پاشەكشەدایە
لە بەیاننامەیەكدا، هێزە هاوبەشەكان رایانگەیاند، كە ئەمریكا و هاوپەیمانەكانی، لە ماوەی 24 كاتژمێردا، 27 هێرشی ئاسمانیان كردوەتە سەر هێزەكانی دەوڵەتی ئیسلامی ناسراو بە داعش كە حەوت هێرشیان لە نزیك كۆبانێ بووە.لە بەیاننامەكەدا هاتوە كە حەوت لە هێرشەكان، لە نزیك كۆبانی ئەنجام دراون. هەواڵەكانیش باس لەوە دەكەن كە دوای پێشڕەوی هێزەكانی پێشمەرگە، چەكدارانی داعش پاشەكشەیان كردوە. هێرشەكانیش یەكە تەكتیكیەكان و ناوچەكانی شەڕكردنی داعشیان پێكاوە. بەیاننامەكە ئاماژەی بەوەش داوە كە هێرشێكی ئاسمانیی هێزە هاوبەشەكان، خاڵێكی پشكنینی دەوڵەتی ئیسلامی لە نزیك دێر زوری سوریا كردوەتە ئامانج. لە بەشێكی دیكەی بەیاننامەكەدا، باس لەوە كراوە كە هێزە هاوپەیمانەكان 17 هێرشیان كردوەتە سەر مۆڵگەی چەكدارانی داعش لەناو عیراق. "بەرەبەیانی ئەمڕۆ سێشەممە (3ی شوباتی 2015) فڕۆكە جەنگییەكانی هاوپەیمانان زۆر بەچڕی بۆردومانی مۆڵگەكانی چەكدارانی داعشیان كردووە لە ناحیەی رەشادی سەر بە پارێزگای كەركوك"."چەكدارانی داعش 9 كەسیان لێ كوژراوە و زیاتر لە 15 كەسی تریشیان لێ بریندار بووە".



لێكۆڵینەوەیەك سودێكی سەیری هێلكە ئاشكرادەكات
لێكۆڵینەوەیەكی نوێ دەریدەخات خواردنی هێلكە مرۆڤ بەخشندەتر دەكات و ترشی ئەمینیی تریپتۆفان كە له ‌هێلكەدا هەیە، هەڵسوكەوتی مرۆڤ بۆ باشتر دەگۆڕێت.  لێكۆڵەرانی زانكۆی لەیدن لە هۆڵەندا، لەڕێگەی تاقیكردنەوەكانیانەوە گەیشتوونەتە ئەو ئەنجامەی بەكاربردنی بڕێكی كەم لە تریپتۆفان (سێ هێلكە) بڕی ئەو پارەیەی خۆبەخشان لە بەرژەوەندی كاری خێرخوازیدا دەیبەخشن، دەكاتە دوو ئەوەندە. بەگوێرەی ئەو لێكۆڵەرانە هێلكه ‌و خواردنەكانی تری وەك ماسی و شیر تریپتۆفانیان تیادایە كە ترشێكی ئەمنییه ‌و لەناو لەشدا بۆ هۆرمۆنی سیرۆتۆنین دەگۆڕێت كە پێی دەوترێت "هۆرمۆنی بەختەوەری". لێكۆڵەران دەشڵێن ئەمە یەكەم لێكۆڵینەوەیە كە دەیسەلمێنێت لەڕێگەی خۆراكی پەیوەندیدار بە سیرۆتۆنینەوە، بەخشین بۆ كاری خێرخوازی زیادبكرێت.  لێكۆڵەران تاقیكردنەوەیان لەسەر 32 ژن و پیاو ئەنجامداوە. نیوەی ئەم كەسانە دەرمانگەلێكیان خواردووە كە ترشی تریپتۆفانیان تیادا بووە، دواتر لێكۆڵەران بڕی 11 دۆلار و 25 سەنتیان داوە بە هەر یەكێك لەو كەسانه ‌و پرسیاری ئەوەیان لێكردوون داخۆ حەزدەكەن بەشێك لەو پارەیە بخەنە كاری خێرخوازییەوە یان نا. لێكۆڵەران بۆیان دەركەوتووە كە هەر یەكێك لەوانەی تەواوكاریی تریپتۆفانیان خواردووە تێكڕای ناوەندیی ئەو پارەیەی بەخشیویانە دۆلارێك و 15 سەنت بووە، بەڵام ئەوانی تر نزیكەی نیوەی ئەو بڕە پارەیان بەخشیووە.


ڕێکه‌وت: 2015-02-03 18:31:55
به‌شی ( هەواڵەكانی كوردستان و ئێران و جێهان (14ی رێبەندانی 1393) )