__ چالاکێکی خوێندکاریی کورد، ٧٥ رۆژە لە ئیتلاعاتی سنە دەستبەسەرە__ كاراتەكارێكی كورد لە ئاستی جیهاندا پلەی یەكەمی بەدەست هێنا__ گواستنەوەی لە ناكاوی زیندانیێكی سیاسی كورد بۆ دادگا__ كوشتنی 14 ئەسپی كۆڵبەرانی كورد لە سنووری سەردەشت__ لە ماوەی دوو حەفتەدا 38 كەس لە ئێران لە سێدارە دراون__ گران بوونی نرخی مریشك لە كوردستان__ بانگهێشتی مسر بۆ دامەزرانی هێزێكی نیزامی عەرەبی لە ناوچەكە__ بڵاو بوونەوەی شەرتی ئەمریكا لە وتووێژە ناوكەییەكاندا

چالاکێکی خوێندکاریی کورد، ٧٥ رۆژە لە ئیتلاعاتی سنە دەستبەسەرە
ماوەی ٧٥ رۆژ بەسەر دەستبەسەرکرانی یەکێک لە چالاکانی خویندکاریی کوردی خەڵکی شاری مەریوان لە زانکۆی سنەدا تێپەر دەبێ و هەتا ئیستاش لە دەستبەسەریی هێزە ئیتلاعاتییەکاندا ماوەتەوە. بەپێی راپۆرتی هەواڵدەریی کوردپا، رێبوار کامرانی‌پوور، چالاکی خوێندکاری و ژینگەپارێزیی کورد، کە رێکەوتی ١٩ی سەرماوەز پاش خۆناساندن بە ئیتلاعاتی شاری سنە دەستبەسەر کرا ، هەتا ئیستا لە ئیتلاعاتی ئەو شارە لە دەستبەسەریدایە.هێزە ئیتلاعاتییەکان لە رۆژی ٢٠ی سەرماوەزدا چووبوونە ماڵی ئەو چالاکە کوردە و دەستیان بەسەر ژمارەیەک لە کتێبەکان و کۆمپیوتێرەکەی ناوبراویشدا گرتبوو. یەکێک لە هاورێیانی ئەو چالاکە خوێندکارییە راگەیاند؛ دادگەی سنە بە بنەماڵەکەی رێبواریان گوتووە، کە پێدەچیت لە ماوەی داهاتوودا بدرێتە نێو زیندانی سنە یان بە دانانی بارمتە و هەتا کاتی دادگایی کرانی، ئازاد بکرێت. هەتا ئێستا تۆمەتی وەپاڵدراوی دادگەی ئینقلابی سنە بەو چالاکە کوردە بۆ کەسوکار و هاورێکانی روون نەبۆتەوە. 








كاراتەكارێكی كورد لە ئاستی جیهاندا پلەی یەكەمی بەدەست هێنا
وەرزشكارێكی كوردی خەڵكی شاری مەهاباد لە ركابەرییە نێودەوڵەتییەكانی "كیۆكووشین ئۆیاما" كە لە تاران بەڕێوە چوو، پلەی یەكەمی لە ئاستی جیهاندا بەدەستهێنا. بەپێی هەواڵی هەواڵدەریی كوردپا، بێهزاد خزری كاراتەكاری مەهابادی بەشداریی لە ركابەرییەكانی " كیۆكووشین ئۆیاما"‌دا كردووە و میداڵی زێری بۆ خۆی مسۆگەر كردووە. ئەو ئەندامەی تیمی كاراتەی مەهاباد، توانیویەتی لەكێشی كەمتر لە ٧٠ كیلۆ بەسەر بەرامبەرەكەیدا سەربكەوێ‌و ئەو پلەیە بەدەست بێنێت. هەر لەوپێوەندییەدا كەریم مێهرنژاد وەرزشكارێكی دیكەی خەڵكی مەهاباد لە كێشی خوار ٦٠ كیلۆدا توانیویەتی پلەی چوارەمی جیهانی " كیۆكووشین ئۆیاما" مسۆگەر بكات. لەو ركابەرییانەدا لوقمان مەحموودی ئازەر وەكوو سەرپەرەست و دوو كەسی دیكەش بەناوەكانی ئیسماعیل دادوەند و مریەم مەسجدی وەكوو داوەر بەشدار بوون.ركابەرییە نێودەوڵەتییەكانی كاراتەی(كیۆكووشین ئۆیاما) بە بەشداریی ١٣٠ وەرزشكار لە ١٢ وڵاتی جیهانەوە بۆ ماوەی دوو رۆژ لەتاران بەڕێوە چووە.








گواستنەوەی لە ناكاوی زیندانیێكی سیاسی كورد بۆ دادگا
گواستنەوەی لە ناكاوی حامد ئەحمەدی زیندانی عەقیدەتی كوردی مەحكوم بە ئێعدام بۆ دادگا نیگەرانی لەمەڕ بارودۆخی ناوبراوی لێ كەوتەوە. بە پێی راپۆرتی هەواڵدەریەكان، سەرلە بەیانی ئەمرۆ دووشەممە كاتژمێر 9، زیندانی عەقیدەتی كوردی مەحكوم بە ئێعدام، لە ناكاو لە زیندانەوە بۆ دادگا بانگهێشت كراوە كە ئەم بانگهێشتە لە ناكاوە بووە بە هۆی نیگەرانی لەمەر بارودۆخی ناوبراوو. بە پێی ئەم راپۆرتە، یەكێك لە هاوبەندەكانی حامد ئەحمەدی بە هەواڵنێری كەمپەینی بەرگری لە زیندانیانی سیاسی و مەدەنی وتووە، كاتژمێر 9و 40 دەقە لە هۆڵی زیندان رۆیشتووەتە دەرەوە و چونكوو جارێكیتر بەم بیانوە ( ناردن بۆ دادگا) بردبوویان بۆ بەرێوەبردنی حوكمەكەی، ئەم بانگهێشتە لە ناكاوە بووە بە هۆی نیگەرانی. جێگەی باسە كە حامد ئەحمەدی هاورێ لەگەڵ كەماڵ مەلایە، جەمشید دێهقانی و جەهانگیر دێهقانی بە تۆمەتی مۆحاربە لە رێگای لایەنگری لە گرووپە سەلەفیەكان لە دادگای بێ پارێزەردا بە سەرۆكایەتی قازی محمد مۆقیسەیی لە لقی 28ی دادگای شۆرشی تاران بە ئێعدام مەحكوم كراون.








كوشتنی 14 ئەسپی كۆڵبەرانی كورد لە سنووری سەردەشت
كۆمەڵێك لە كۆڵبەرانی كورد لە كاتی پەرینەوە لە ناوچەی سنووری سەردەشت كەوتنە بۆسەی هێزە ئینتزامیەكان و 14 ئەسپی ئەو كۆڵبەرانە لە لایەن ئەو هێزانەوە كوژرا. بە پێی راپۆرتی هەواڵدەریەكان، كۆمەڵێك لە كاسبكارانی كوردی دانیشتووی ناوچەی سنووری سەردەشت لە گوندی ئیسلام ئاباد لە ناوچەی بەندەن لە نزیك زەرگە لە كاتژمێر 4ی سەرلە بەیانی رۆژی یەكشەممە 3ی رەشەمەی 1393 كەوتنە بۆسەی هێزە ئینتزامیەكان و لە ئاكامی تەقەی راستەوخۆی ئەو هێزانە 14 ئەسپی كۆڵبەران كوژرا و بارەكانیان دەستی بەسەردا گیرا. بە پێی ئەم راپۆرتە، یەكێك لە شاهێدانی ئەو رووداوە رایگەیاندووە كە، زۆربەی ئەو كاسبكارانە لەم دوواییەدا بۆ بژێوی ژیانی خۆیان و بنەماڵەكانیان ئەسپیان كریوە و تاكوو ئێستا نەیانتوانیوە كە پارەی ئەسپەكانیان بە دەست بێننەوە.








لە ماوەی دوو حەفتەدا 38 كەس لە ئێران لە سێدارە دراون
لە دوو حەفتەی رابردوودا 38 كەس لە زیندانیانی مەحكوم بە ئێعدام لە زیندانەكانی ئێران لە سێدارە دراون. بە پێی راپۆرتی كەمپەینی بەرگری لە زیندانیانی سیاسی و مەدەنی، لە 14ی رێبەندانەوە تاكوو 30 رێبەندان حوكمی ئێعدامی 23 زیندانی بە تۆمەتی پەیوەند بە مادەی هۆشبەر، 5 زیندانی بە تۆمەتی كوشتن و هەروەها 8 زیندانی بە تۆمەتی كوشتن و دزی چەكداری و 1 كەس بە تۆمەتی مۆحاربە و كەسیكیتریش بە تۆمەتی سیاسی لە شارە جیاجیاكانی ئێراندا لە سێدارە دراون. بە پێی ئەم راپۆرتە، حوكمی لە سێدارەدانی كەسێك لە بەر چاوی خەڵكەوە و 37 زیندانیتر لە ناو زیندانەكاندا بەرێوە چووە.








گران بوونی نرخی مریشك لە كوردستان
نرخی مریشك لە كوردستان بۆ 8 هەزار تمەن بەرز بووەتەوە. بە پێی راپۆرتی هەواڵدەریەكان، گران بوونی نرخی مریشك لە كوردستان لە چاو باقی ناوچەكانیتری ئێران زیاترە و بە پێی ئەم راپۆرتە، نرخی مریشك رۆژی رابردوو 7800 تمەن بوو كە ئەمرۆ دووشەممە گەیشتە 8 هەزار تمەن. بە پێی وتەی كارناسان ئەم گران بوونەی نرخی مریشك لە سیاسەتە هەڵەكانی كاربەدەستانی رژێم سەرچاوەی گرتووە و پەیوەندی بە كەم بوونی مریشك نیە. جێگەی باسە كە لە ئێستادا لە كوردستان 669 واحدی بەخێوكردنی مریشك بوونی هەیە كە ساڵانە 52 میلیۆن دانە مریشك بەرهەم دێنن كە لەو رێژەیە 37 هەزار و 500 تەنی بۆ بازاری ناوخۆیی كوردستان بە كار دێت و زیاتر لە 27 هەزار تەنی دەرواتە پاریچزگاكانیتری ئێران.








بانگهێشتی مسر بۆ دامەزرانی هێزێكی نیزامی عەرەبی لە ناوچەكە
عەبدۆلفەتاح سیسی سەرۆك كۆماری مسر لە وتارێكی تەلەفزیۆنیدا رایگەیاند، پێویستی جیدی هەیە كە هێزێكی نیزامی هاوبەشی عەرەبی بۆ بەرەوروو بوونەوە لەگەڵ هەرەشەی گرووپە چەكدارەكان لە ناوچەكە دابمەرزێت. بە پێی راپۆرتی هەواڵدەریەكان، عەبدۆلفەتاح سیسی وتی، نەسڵی چوارەمی ئەم شەڕە زۆر مەترسیدارە و ئەم نەسڵە، ترۆریزمی لە پاڵ كەل و پەلی پێشكەوتوو بە كار دێنێن تاكوو ئاكامی بەربڵاو لە مسر و وڵاتانی عەرەبی بە دەست بێنێت.









بڵاو بوونەوەی شەرتی ئەمریكا لە وتووێژە ناوكەییەكاندا
سەرچاوەێكی نزیك لە تیمی وتووێژكەری ناوكەیی رژێمی ئاخوندی چەند نهێنیێكی وتووێژەكانی بڵاو كردووەتەوە. بە پێی راپۆرتی هەواڵدەریەكان، سەرچاوەێكی نزیك لە تیمی پێشووی وتووێژكەری ناوكەیی رژێمی ئاخوندی چەند شەرتێكی ئەو وتووێژانەی راگەیاندووە كە بریتین لە، هیچ شتێك بە ناو پیتاندن نامێنێت و ئەمریكاش هیچ پەیمانێك لەمەڕ لابردنی گەمارۆكان قبووڵ ناكات. بە پێی نووسراوەی ئەو سەرچاوەیە، پێشنیارەكانی ئەمریكا بریتین لە، گواستنەوەی ئۆرانیۆمی 5 لەسەد بە شێوەێك كە پاشەكەوتی ئۆرانیۆم لە 500 كیلۆ زیاتر نەبێت. سنووردار كردنی پیتاندن لانیكەم بە رێژەی 6000 سۆ، هێشتنەوەی بەربەستەكان بۆ ماوەی 15 ساڵ.

ڕێکه‌وت: 2015-02-23 13:13:32
به‌شی ( هەواڵەكانی كوردستان، ئێران و جیهان 4ی رەشەمەی 1393 )