__ بانگهێشتی دوو چالاكی كرێكاری كورد بۆ ئیدارەی ئیتلاعات__ جیاوازی له‌ به‌رانبه‌ر خه‌ڵکی کوردستان ده‌کرێت __ تەقینەوە، گیانی دوو هاووڵاتیی کوردی ستاند__ ئەندامێکی دیکەی شۆرای شاری کرماشان دەستبەسەر کرا__ ئه‌گه‌ری په‌خشی ڕاسته‌وخۆی ته‌له‌فزیۆنی په‌یامی ئۆجه‌لان __ نیگەرانی ئەحمەد شەهید لە زیادبوونی سەرسورهێنەری ئێعدامەكان

بانگهێشتی دوو چالاكی كرێكاری كورد بۆ ئیدارەی ئیتلاعات
لە ماوەی دوو رۆژی رابردوو دوو چالاكی كرێكاری كورد بانگهێشتی ئیدارەی ئیتلاعاتی شاری سنە كراون. بە پێی راپۆرتی هەواڵدەریەكان، سەرلە بەیانی رۆژی چوارشەممە 13ی رەشەمە حامد مەحموودی چالاكی كرێكاری و ئەندامی كومیتەی هاوئاهەنگی بۆ دامەزرانی ناوەندە كرێكاریەكان بانگهێشتی ئیدارەی ئیتلاعاتی شاری سنە كراوە. هەروەها سەرلە بەیانی رۆژی پێنجشەممە 14ی رەشەمە خەلیل كەریمی لە ئەندامانی هەیئەتی بەرێوەبەری ئیتحادیەی ئازادی كرێكاران بانگهێشتی ئیدارەی ئیتلاعاتی شاری سنە كرا. بە پێی ئەم راپۆرتە، دەگوترێت بانگهێشت كردنی ئەم دوو چالاكە كرێكاریە پەیوەندی بە نزیك بوونەوەی 8ی مارس رۆژی جیهانی ژنەوە هەیە.








جیاوازی له‌ به‌رانبه‌ر خه‌ڵکی کوردستان ده‌کرێت 
نوێنه‌ری مه‌ریوان وسەوڵاوا له‌ مه‌جلیسی شۆرای ئیسلامی، سه‌رۆک کۆماری ئاگادارکرده‌وه‌ و هۆشداریی به‌ وه‌زیری ناوخۆ و وه‌زیری به‌رگری دا که‌ گرینگی بده‌ن به‌ مافی برینداران و کوژراوانی ناوچه‌ مینڕێژه‌کان، به‌ڵێنه‌کانی هه‌ڵبژاردن جێبه‌جێ بکه‌ن و پاک نه‌کردنه‌وه‌ی کوردستانی ئاخێندراو له‌ مین به‌ هه‌ند وه‌رگرن . بە پێی راپۆرتی هەواڵدەریەكان، ئومێد که‌ریمیان ڕایگه‌یاند: ماوه‌ی دوو ساڵه‌ که‌ ده‌وڵه‌تی یازده‌هه‌م ده‌ستی به‌ کارکردووه،‌ سه‌رۆک کۆمار له‌ به‌یاننامه‌ی ژماره‌ سێ پێکهاته‌کان له‌ ڕۆژانی بانگه‌شه‌ی هه‌ڵبژاردن که‌ هاته‌ کوردستان له‌ یاریگای وه‌رزشی ئازادی سنه‌ وتی: کارگرووپێکی تایبه‌ت بۆ پارێزگای کوردستان پێکدێنێت که‌ ئه‌م به‌ڵێنه‌ هێشتاکه‌ جیبه‌جێ نه‌کراوه‌. كەریمیان به‌ ئاماژه‌ به‌ به‌ڵێنی لابردنی هه‌ڵاوارده‌یی له ‌لایه‌ن رۆحانییەوە ڕایگه‌یاند: به‌سه‌ر پڕۆژه‌ی پێشنیارکراوی ڕۆحانی دوو ساڵ تێپه‌ڕیوه‌ و نه‌ک ‌ته‌نیا پێکهێنانی کارگرووپمان نه‌بووه‌ به‌ڵکوو ته‌رخانی بودجه‌ش زیاتر نه‌بۆته‌وه‌ و هه‌ڵاواردنه‌کان هێشتاکه‌ به‌رده‌وامه‌.....








تەقینەوە، گیانی دوو هاووڵاتیی کوردی ستاند
 لە ئەنجامی دوو تەقینەوەی جیاوازدا لە شارەکانی سەردەشت و شنۆ، دوو هاووڵاتیی کورد گیانیان لەدەست دا. بەپێی راپۆرتی هەواڵدەریی کوردپا، رۆژی چوارشەممە رێکەوتی ١٣ی رەشەمە، خانووی هاووڵاتییەکی کوردی خەڵکی شاری سەردەشت لە ئەنجامی تەقینەوەیەکدا، لە ئاگردا سووتا و پاشان بە تەواوەتی تێکڕووخا. ئەو رووداوە لە گەڕەکی شیوە برایمی شاری سەردەشت هاتۆتە ئاراوەو هاووڵاتییەکی تەمەن ٣٠ ساڵ بەهۆی ئەو تەقینەوەیە بریندار بووەو پاش گەیشتن بە نەخۆشخانە و بەهۆی کاریگەریی برینەکانییەوە گیانی لەدەست داوە. لەلایەکی دیکەوە، دووکانی هاووڵاتییەکی کوردەی خەڵکی شاری شنۆ بەناوی یوونس ئەمینی بەهۆی تەقینەوەی کەلوپەلی نەورۆزی لە ئاگردا سووتا و بۆخۆیشی بەشێکی بەرچاو لە ئەندامانی جەستەی سووتابوون. ئەو لاوە تەمەن ٢١ ساڵەیە، بەهۆی سووتانی لەسەدا ٩٦ی جەستەیەوە رەوانەی نەخۆشخانەی ورمێ کراو پاشان بەهۆی نالەباریی جەستەیی و نەبوونی ئیمکانات، بۆ نەخۆشخانەی سینای تەورێز گوازرابوویەوە. ئەو هاووڵاتییە کوردە، پاش ٨ رۆژ مانەوە لە نەخۆشخانەی تەورێز، بەهۆی سووتانی لەرادەبەدەر گیانی لەدەست دا.








ئەندامێکی دیکەی شۆرای شاری کرماشان دەستبەسەر کرا
 دووەمین کەس لە ئەندامانی شۆرای ئیسلامیی شاری کرماشان، لەلایەن مەئموورانی ئەمنیەتییەوە دەستبەسەر کرا. بەپێی راپۆرتی هەواڵدەریی کوردپا، دەزگای دادوەریی رژێمی ئاخوندی ئێران لە کرماشان، بڕیاری دەستبەسەرکرانی ئەندامێکی شۆرای شاری کرماشانی دەرکرد. ئەوە دووەمین ئەندامی شۆرای شاری کرماشانە، کە لە ماوەی دوو حەفتەی رابردوودا دەستبەسەر دەکرێت. راپۆرتەکان باس لەوە دەکەن، کە ئەو ئەندامەی شۆرای شار بە هۆی ئەوەیکە دوو پیشەی جیاوازی هەبووە، دەستبەسەر کراوە. پرسی ئەوەیکە دوو کەس لە ئەندامانی شۆرای شاری کرماشان بە دوو پیشەی جیا لە یەکەوە سەرقاڵن، لە مانگی رەزبەری ئەمساڵدا هاتە گۆڕێ پێشتریش یەکێک لە ئەندامانی دەستبەسەرکراوی شۆرای شاری کرماشان بە دانانی بارمتەی یەک ملیارد تمەنی و بە شێوەی کاتی لە زیندان ئازاد کرابوو.








ئه‌گه‌ری په‌خشی ڕاسته‌وخۆی ته‌له‌فزیۆنی په‌یامی ئۆجه‌لان 
وته‌بێژی کۆنگره‌ی جڤاکی دیموکراتیک ڕایگه‌یاند: له‌ هه‌وڵداین بۆ ئه‌وه‌ی په‌یامی مێژوویی عه‌بدوڵڵا ئۆجه‌لان به‌ شێوه‌ی ڕاسته‌وخۆ له‌ ته‌له‌فزیۆندا په‌خش بکرێت. به‌پێی راپۆرتی هەواڵدەریەكان، سه‌یدی فرات وته‌بێژی کۆنگره‌ی جڤاکی دیموکراتیک (DTK) به‌ ئاماژه‌ به‌وه‌ی که‌ له‌ نه‌ورۆزی 2015دا عه‌بدوڵڵا ئۆجه‌لان په‌یامێک بڵاو ده‌کاته‌وه‌ وتی: ئه‌و په‌یامه‌ گرنگیێكی زۆری هەیە  و سه‌رجه‌م گه‌لی کوردی تورکیا ده‌یانه‌وێت ئه‌و په‌یامه‌ ڕاسته‌وخۆ له‌ ته‌له‌فزیۆندا په‌خش بکرێت. وتیشی: ئێمه‌ له‌ هه‌وڵداین بۆ ئه‌وه‌ی به‌ستێنی په‌خش کردنی ڕاسته‌وخۆی ته‌له‌فزیۆنی په‌یامه‌که‌ی ڕێبه‌ری په‌که‌که‌ له‌ زیندانی ئیمرالییه‌وه‌ بڕه‌خسێنین. زیادیشی کرد: کوردی تورکیا ئه‌مساڵیش له‌ مه‌یدانی ئامه‌د کۆده‌بێته‌وه‌ بۆ ڕێوڕه‌سمی جێژنی نه‌ورۆز.








نیگەرانی ئەحمەد شەهید لە زیادبوونی سەرسورهێنەری ئێعدامەكان
ئەحمەد شەهید، راپۆرتنێری تایبەتی نەتەوەیەكگرتووەكان لەمەر كاروباری مافی مرۆڤ لە ئێران لە زیادبوونی سەرسورهێنەری ئێعدامەكان لە لایەن رژێمی ئاخوندییەوە نیگەرانی خۆی دەربری. بە پێی راپۆرتی هەواڵدەریەكان، ناوبراوو رایگەیاند، بە پێچەوانەی بەڵێنەكانی رۆحانی هیچ گۆرانكاریێك لە مەر مافی مرۆڤ لە ئێران رووی نەداوە و رێژەی ئێعدامەكان رۆژ لە دوای رۆژ لە زیادبووندایە. بە پێی ئەم راپۆرتە، ئەحمەد شەهید وتی، رژێمی ئاخوندی ئیزنی رۆیشتنم بۆ ئێران نادات، ئەگەر چیش برۆیشتماێتە ئێران كەسانێك بە هۆی چاوپێكەوتنیان لەگەڵ من كێشەیان بۆ درووست دەبوو. ناوبراوو هەروەها وتی، لە ئێستادا تەكنۆلۆژی نوێی بووە بە پردی پەیوەندی لە نێوان من و خەڵكی ئێران.

ڕێکه‌وت: 2015-03-06 12:23:56
به‌شی ( هەواڵەكانی كوردستان، ئێران و جیهان 15ی رەشەمەی 1393 )