__ لە ماوەی ١٧ رۆژدا لە ئێران، ١٠٠ کەس لەسێدارە دراون__ ناروونی بارودۆخی 3ی شارۆمەندی بۆكانی دوای 35 رۆژ دەستبەسەری__ مامۆستایانی كرماشانی ٢٠ ساڵە چاوەڕوانن ببنە خاوەنی ماڵ__ چاره‌سه‌ریی پزیشکی بۆ ئه‌میرێکی داعش له‌ نه‌خۆشخانه‌ی ده‌نیزلی تورکیا __ دەستبەسەركردنی چالاكێكی كرێكاری كورد__ ئۆباما: ئەگەر نەگەینە رێكەوتنێكی باش لە وتووێژەكان ئەكشێینەوە__ دۆزینه‌وه‌ی به‌ردێكی ته‌مه‌ن 250 ملیۆن ساڵ مشتومڕ ده‌نێته‌وه‌

لە ماوەی ١٧ رۆژدا لە ئێران، ١٠٠ کەس لەسێدارە دراون
 هاوکات لەگەڵ دانیشتنی شۆرای مافی مرۆڤی رێکخراوی نەتەوە یەکەگرتووەکان، رەوتی لەسێدارەدانی هاووڵاتییان بە تۆمەتی جۆراوجۆر لە زیندانەکانی رژێمی ئاخوندی ئێراندا رووی لە زیادبوون کردووە. بەپێی راپۆرتی هەواڵدەریی کوردپا، تەنیا لە ماوەی ١٧ رۆژدا (١ی رەشەمە هەتا ١٧ی رەشەمە) ٩٥ کەس بە تۆمەتی جۆراوجۆری وەکوو بازرگانی بە ماددە هۆشبەرەکان، دەستدرێژی، کوشتن و هۆکاری مەزهەبییەوە لە نێو زیندانەکان و هەروەها لەبەرچاوی خەڵکی ئێراندا لەسێدارە دراون. سەرلەبەیانیی رۆژی شەممە رێکەوتی ١٦ی رەشەمە، ٩ کەس لە زیندانی قزلحەساری کەرەج بە تۆمەتی بازرگانی کردن بە ماددە هۆشبەرەکان لەسێدارە دران. هەر لە هەمان رۆژدا(رۆژی شەممە) ، ٥ کەسی دیکە لە زیندانەکانی شیراز، زابول و ئێرانشار بە تۆمەتی بارزگانی بە ماددە هۆشبەرەکان لەسێدارە دراون و ٦ کەسی دیکەش لە زیندانی کرمان، بۆ بەڕێوەبردنی حوکمی لەسێدارەدان، بۆ ژووری تاکەکەسی گوازراونەتەوە.  چالاکانی مافی مرۆڤ و دیمۆکراسی لە ئێران بڵاوی کردەوە، لەماوەی رۆژانی ١١ هەتا ١٣ی رەشەمەدا ٦٠ کەس لە زیندانەکانی ئێراندا لەسێدارە دراون، هەروەها حامید ئەحمەدی، جەمشید دێهقانی، جهانگیر دێهقانی، کەماڵ مەلایی، هادی حوسێنی و سەدیق محەمەدی ئەو ٦ زیندانییە مەزهەبییە کوردەن کە لە زیندانی رەجایی شاری کەرەج حوکمی لەسێدارەدانەکەیان بەڕێوە چووە بیست و هەشتەمین دانیشتنی شۆرای مافی مرۆڤی رێکخراوی نەتەوە یەکگرتووەکان، رێکەوتی ١١ی رەشەمەی ئەمساڵ لە شاری ژنێڤ دەستی پێکردووەو هەتا رێکەوتی ٧ی مانگی خاکەلێوەی ساڵی داهاتوو بەردەوام دەبێت.








ناروونی بارودۆخی 3ی شارۆمەندی بۆكانی دوای 35 رۆژ دەستبەسەری
دوای 35 رۆژ لە دەستبەسەری سێ شارۆمەندی بۆكانی لە لایەن هێزەكانی ئیتلاعاتەوە تاكوو ئێستا هیچ زانیاریێك لەمەر بارودۆخیان لە بەردەست دا نییە. بە پێی راپۆرتی هەواڵدەریەكان، سێ شارۆمەندی بۆكانی بە ناوەكانی هەژار مەحموودی، وەفا و سۆران ئازەربار ماوەی 35 رۆژە لە لایەن هێزە لیباس شەخسییەكانی ئیتلاعاتەوە دەستبەسەر و بۆ شوێنێكی نادیار گواستراونەتەوە كە تاكوو ئێستا بارودۆخیان نارونە. جێگەی باسە كە وەفا ئازەربار خوێندكاری یەكێك لە زانكۆكانی شاری ورمێیە و سۆران ئازەربار خوێندكاری زانكۆی مەهابادە كە لەگەڵ هەژار مەحموودی لە ماڵەكەی خۆیاندا بە بێ هیچ حوكمێكی یاسایی دەستبەسەر كراون.








مامۆستایانی كرماشانی ٢٠ ساڵە چاوەڕوانن ببنە خاوەنی ماڵ
دوای تێپەڕینی ٢٠ ساڵ، یەک هەزار و ٢٠٠ مامۆستای ناحیەی ٣ی پەروەردە و بارهێنانی كرماشان لە بوونی ماڵ و خانووبەرە بێبەرین.بەپێی راپۆرتی هەواڵدەریی كوردپا، لەساڵی ١٣٧٢وە، هەزار و ٢٠٠ كەسی فەرهەنگی لە شاری كرماشان ئەندامەتیان لە تەعاوەنی مەسەكەندا هەیە و لە هەر مامۆستایەك ٦٠٠ هەزار تا یەك ملیۆن و ٢٠٠ هەزار تمەن پارە وەرگیراوە، بەڵام دوای تێپەڕینی ٢٠ ساڵ، هیچ هەوڵێك بۆ پیچدانی خانوو بەو مامۆستایانە ئەنجام نەدراوە. خانمە محەممەدی بەنوێنەرایەتی لە ئەندامانی تەعونی باسی لەوە كردووە، سەرەڕای ئەوەی لە ساڵی ٨٩ جارێكی دیكە هەر مامۆستایە و ١٠٠ هەزا رتمەنی دیكەی لێوەرگیرایەوە بە هۆی هێندێ‌كێشەی میرات، پێنج ساڵی دیكە بە سەر وادەی دیاریكراودا زیاد كرا. محەمەدی لەدرێژەدا وتوویەتی: هەتا ئێستا لەرێگەی ناوەندە پێوەندیارەكانەوە بەدواداچوون بۆ ئەو كێشەیە كراوە و هیچ ئەنجامێكی نەبووە.پێشتریش نیوەی دانیشتوانی شارەكی جەوادییەی كرماشان بە پشت بەستن بە یاسای 5 ساڵ لەمەوبەر بە ناچاری و زۆرە ملێ‌لە ماڵەكانی خۆیان دەركرابوون.








چاره‌سه‌ریی پزیشکی بۆ ئه‌میرێکی داعش له‌ نه‌خۆشخانه‌ی ده‌نیزلی تورکیا 
ئه‌میرێکی داعش که‌ له‌ شه‌ڕی هێزه‌ کوردییه‌کانی سووریا بریندار کرابوو، پاش گواستنه‌وه‌ی بۆ تورکیا له‌ نه‌خۆشخانه‌یه‌کی ناوچه‌ی ده‌نیزلی خه‌وێندرا و چاره‌سه‌ریی پزیشکی بۆ ئه‌نجام بووه‌. به‌پێی ڕاپۆرتێکی فه‌رمی له‌ فه‌رمانده‌یی پارێزگای "ده‌نیزلی" تورکیا، فه‌رمانده‌یه‌کی ده‌وڵه‌تی ئیسلامی عێراق و شام (داعش) که‌ له‌ سووریا و به‌ هۆی شه‌ڕ و پێکادان له‌گه‌ڵ یه‌کینه‌کانی پاراستنی گه‌ل YPG بریندارکرابوو له‌ نه‌خۆشخانه‌یه‌کی زانکۆی "پامۆک قه‌ڵا"ی شاری ده‌نیزلی چاره‌سه‌ری پزیشکی بۆ ئه‌نجام دراوه‌. به‌پێی ڕاپۆرتی فه‌رمانده‌یی ده‌نیزلی، "امراه‌. چ" فه‌رمانده‌یه‌کی داعشه‌ که‌ له‌ هاووڵاتیانی تورکیا بووه‌ و 6 مانگ پێش ته‌ڤلی ئه‌م گرووپه‌ تیرۆریستییه‌ بووه‌، ئۆرهان چیچه‌ک، سه‌رۆکی پارتی دیموکراتیکی گه‌لان له‌ پارێزگای ده‌نیزلیش هاوپه‌یوه‌ند به‌‌م بابه‌ته‌ ڕایگه‌یاند: ناوبراو له‌ سه‌ره‌تادا گواسترابووه‌وه‌ بۆ نه‌خۆشخانه‌یه‌کی حکوومی له‌ ده‌نیزلی که‌ قبووڵیان نه‌کردبوو و پاشان سه‌ردانی نه‌خۆشخانه‌ی "سه‌روه‌ر قازی" کردبوو که‌ ئه‌م نه‌خۆشخانه‌یه‌‌ش قبووڵیان نه‌کردبوو  و له‌ کۆتاییدا له‌ نه‌خۆشخانه‌ی زانکۆی "پامۆک قه‌ڵا" خه‌وێندراوه‌ و نه‌شته‌رگه‌ری په‌لاستیکی بۆ ئه‌نجام دراوه‌..








دەستبەسەركردنی چالاكێكی كرێكاری كورد
كورش بەخشەندە چالاكی كرێكاری كورد لە لایەن هێزە لیباس شەخسیەكانی ئیتلاعاتەوە دەستبەسەر و بۆ شوێنێكی نادیار گوازرایەوە. بە پێی راپۆرتی هەواڵدەریەكان، كورش بەخشەندە چالاكی كرێكاری و ئەندامی كومیتەی هاوئاهەنگی بۆ یارمەتیدان بە دامەزرانی رێكخراوی سەربە خۆی كرێكاری، سەر لە بەیانی دوێنی شەممە 16ی رەشەمە لە لایەن هێزە لیباس شەخسیەكانی ئیتلاعاتەوە دەستبەسەر و بۆ شوێنێكی نادیار گوازرایەوە. بە پێی ئەم راپۆرتە، دوای دەستبەسەر كردنی ناوبراو هێزە لیباس شەخسیەكان رۆیشتونەتە ماڵی كورش بەخشەندە و ماڵەكەیان پشكنیوە.








ئۆباما: ئەگەر نەگەینە رێكەوتنێكی باش لە وتووێژەكان ئەكشێینەوە
باراك ئۆباما سەرۆك كۆماری ئەمریكا رایگەیاند، ئەگەر لەگەڵ رژێمی ئاخوندی نەگەینە رێكەوتنێكی باش لە وتووێژەكان دەكشێینەوە. یبە پێی راپۆرتی هەواڵدەریەكان، باراك ئۆباما لە وتووێژ لەگەڵ تەلەفزیۆنی سی بی ئس وتی، هەر چەشنە رێكەوتنێكی ناوكەیی لەگەڵ رژێمی ئاخوندی دەبێت بە وڵاتە زڵهێزەكانی رۆژئاوا ئەو دڵنیاییە بدات كە رژێمی ئاخوندی دەستی بە چەكی ناوەكی راناگات. بە پێی ئەم راپۆرتە، باراك ئۆباما  لە درێژەی قسەكانی خۆیدا وتی، ئەم رێكەوتنە دەبێت بە شێوەێك بێت كە ئەگەر رژێمی ئاخوندی هەڵە بكات ئەمریكا و وڵاتانیتر ئەو دەرفەتەیان هەبێت كە كردەوەی پێویستیان هەبێت.








دۆزینه‌وه‌ی به‌ردێكی ته‌مه‌ن 250 ملیۆن ساڵ مشتومڕ ده‌نێته‌وه‌
مشتومڕی زانایان سه‌باره‌ت به‌و توێژه‌ی له‌ساڵی 2013 له‌ناو به‌ردێكدا له‌ناوچه‌ی كوبان له‌هه‌رێمی كراسنۆدار له‌ روسیا دۆزرایه‌وه‌، به‌رده‌وامه‌. بە پێی راپۆرتی هەواڵدەریەكان، له‌ساڵی 2013 راوچییه‌ك به‌ردێكی شێوه‌نامۆی دۆزییه‌وه‌و راده‌ستی زانایانی كرد، دواتر ئه‌و زانایانه‌ سه‌لماندیان كه‌ ته‌مه‌نی زیاتر له‌ 250 ملیۆن ساڵه‌. زانایان ده‌ڵێن له‌ڕێگه‌ی شیكردنه‌وه‌كانیانه‌وه‌ سه‌باره‌ت به‌و به‌رده‌ گه‌یشتونه‌ته‌ ئه‌و ئه‌نجامه‌ی كه‌ شارستانێتییه‌كی زۆر په‌ره‌سه‌ندوو هه‌بووه‌ له‌ رابردودا، به‌ڵام نه‌یان توانیوه‌ بواری به‌كارهێنانی ئه‌و به‌رده‌ بدۆزنه‌وه‌. هه‌ندێك له‌زانایانیش پێیان وایه‌ ره‌نگه‌ ئه‌و به‌رده‌ له‌ڕێگه‌ی دانیشتوانی هه‌ساره‌یه‌كی تره‌وه‌ گه‌یشتبێته‌ زه‌وی.

ڕێکه‌وت: 2015-03-08 17:43:27
به‌شی ( هەواڵەكانی كوردستان، ئێران و جیهان 17ی رەشەمەی 1393 )