عەلی بەهرامیپیكهاتەی رێژیمی ئێران له ئێستادا دابەش بووە بە سەر دوو لایەنی بەناو ئیسلاحخواز و موحافزەكار. ئەم دوو جەمسەرەی نێو سیستەمی دەسەلاتدارایی ئێستا، بە جۆرێك گەمەی سیاسی خۆیان دەكەن كە  بەشێك لە ڕای گشتی لە نێوخۆ و دەرەوە تووشی لێكدانەوەی هەڵە دەكەن. ئەمە بە تایبەت بە نیسبەت ئیسلاحخوازەكان زۆر بەرچاوترە. بە هاتنی خاتەمی و هەڵگرتنی شیعاری ئیسلاحخوازی هەموو هیوایەكیان بە ناوبراو بۆ چاكسازی له سیستەمی دەسەلاتداری رێژیم...
 هەڵچنیبوو بەلام لە دوای 8 ساڵ نەك نەیتوانی بەڵێنەكانی بێنێتەدیی بەلكوو لە كاتی سەرۆك كۆماری ئەودا بە رێژەیەكی زۆر رۆژنامە و بلاوكراوە لە ئێران داخران و رۆژنامەنووسان و وێبلاگ نووسان رەوانەی بەندیخانەكان كران، جینایاتی وەك قەتڵە زنجیرەییەكان رووى دا و به هۆی پێشێلكاریی مافی مرۆڤ، هەموو ساڵێك لەلایەن كۆروكۆمەڵی نێودەوڵەتیەوە مەحكوم دەكرا. جیاواز لەو بابەتانە، لە باری ئابووری نەیتوانی كێشە ئابوریەكان چارەسەر بكا یان مەسەلەی بێكاری لاوانی پێ چارەسەر نەكرا.
لە دوای هاتنەسەركاری ئەحمەدیی نژاد، بەهۆی سیاسەتەكانی ناوبراو، ترس و خەفەقان زیاتر پەرەی پێدرا، سیاسەتی خاریجی ناوبراو، رێژیمی بەرەو هەڵدێر و گۆشەگیری زیاتر برد، لە كاتی ناوبراودا ئابلوقەكانی سەر رێژیم زیادی كرد، بە جۆرێك بەشی پیشەسازی لە ئێران تووشی دارمان هات، رێژەی بێكاری زۆر زیادی كرد، لە باری پێشێلكاری مافی مرۆڤ و كەمە نەتەوەو ئایین و مەزهەبەكان بە ئاستێكی زۆر هەڵكشاو زیادی كرد. دیاردە كۆمەلایەتیەكان له ئێران تەنگی بە كۆمەڵگا هەڵچنی. لە وەها حاڵێكدا لە دوای ئەحمەدی نژاد سیاسەەتی رێژیم وەرچەرخانی بەخۆوە بینی و لە راستیشدا پێویستی بەو ئاڵوگۆرانە بوو، لەبەر ئەوەی ئابڵوقەكان چۆكیان پێی دادابوو و ترسیان لە تەقینەوەی كۆمەڵگا هەبوو هەر بۆیە، بۆ جارێكی دیكە شیعاری ئیسلاحخوازی هاتەوە مەیدان و به هەندێ شیعاری وەك چارەسەری كێشه و دیاردە كۆمەلایەتیەكان و لە هەندێ حاڵەتدا باسی كیشه و دۆزی نەتەوەكانی ئێرانیشیان دەهێنا گۆڕێ. 
ئەوە له حاڵیكدایه رێژیمی ئێران بۆ خۆی خولقێنەری هەندێ دیاردەی وەك پەرە پێدانی مەوادی موخەدیر و بێكاری، گرانی و هەلاوسانی ئابوری بووە. هەروەها رێژیمی ئێران هیچ كات باوەڕی بە چارەسەری كێشەی نەتەوەكانی ئێران و بەتایبەت نەتەوەی كورد نەبووە و پێی وابووە لەلایەك هەموویان دەبێ له ژێر چەتری ئیسلامی ویلایەتی فەقیه، لەلایەك و وەك میلەتی ئێران كە خاوەن یەك زمان و یەك ئاڵای واحیدە. بەبێ جیاوازی بژین و بە هەموو شتێك شكور بن.
جێی داخ ئەوەیە لە دوای ئەو هەموو ئەزمونەی گەلانی ئێران بەگشتی و گەلی كورد بەتایبەت لەگەڵ دەسەلاتی ویلایەتی فەقیەدا هەیانە، بەشێك لە چالاكان و نوسەران و فەرهەنگیەكان بروا بە شیعارەكان دەكەن و دەبنە بڵینگۆی پروپاگەندەی سەرانی رێژیم لە و لایەنگریان لێ دەكەن. لەگەل ئەوەی لە كوردستان بەتایبەت ئەو هەنگاوانە پێشتر هیچی لێ شین نەبووە، بەلام دیسان لە نوسین و خەتابی جۆاوجۆریاندا كەمكاری سەرۆك كۆماری رێژیم دەگێرنەوە بۆ پێشتر و خەلكی دیكەی پێ تاوانبار دەكرێ. وەك ئەوەی ئێستا كە بێ توانایی و فرت و فێل و پشتگوێ خستنی بەڵێنەكانی رۆحانی دەگێڕنەوە بۆ كەم و كوڕی ئەحمەدی نژاد .لە حاڵێكدا بە هاتنی رۆحانی فشار بۆ سەر چالاكانی مەدەنی لە كوردستان زیادی كردوە، له ئێراندا هیچ كام لە كێشە و دیاردەكان چارسەر نەكراوەو بگرە چەند پلە له ڕابردو بەرزتر بۆتەوە.
ئەو كەسانەی له راستای قازانج و بەرژەوەندی باندی ئیسلاحخوازی رێژیم هەنگاویان ناوە، پێویستە بەو جۆرە نەهج و بەرنامەیاندا بچنەوە و چیتر لایەنگری نەكەن لەو بەناو ئیسلاحخوازییە یان هەر نەوعە قسه و بەڵێنێكی دیكە، چونكە لەلایەك ئیسلاحخوازانی حكومەتی هەرلە سەرەتاوە سەلماندیان كە خزمەتكاری رێژیمن و جوێ لە قسه و شیعار هیچی دیكەیان لە دەست نەهاتووە. لەلایەكی دیكە ئیسلاحی واقیعی یانی گۆرینی سیستەمی ویلایەتی فەقیه و قانونی بنەرەتی ئەو  رێژیمه، لەوە بەدەر هیچ ئیسلاحخوازێك بۆ ئەوە نابێ پشتی پێ ببەسترێ و رای گشتی بە قازانج و بۆ پشتگیری كردنی هان بدرێ.
كۆتا قسه ئەوەیە دەبێ رۆشنیرانی كورد بە چاوێكی كراوەتر لە سیاسەتی باندەكانی رێژیم بروانن و لە راستی دا ئیسلاحخواز و موحافزەكار دوو رووی دراوێكن، و مانەوە و بەهێز بوونی رێژیم لە سەروو هەموو مەلەفێكی دیكەیە بۆیان، هەر بۆیە نابێ لە بەر هەندێ شیعار، كە هیچ كات عەمەلی نەكراوە، مەسەلە ئەساسیەكە كە هەمان پرسی نەتەوەیی و ئازادی و دیموكراسیە پشتگوێ و پەراوێز بخرێ، بەلكو پێویست دەكا هەموو دەمێ چارەسەری پرسی نەتەوەیی و ئازادیەكان بۆ تاكی رۆشنبیر لە ئەولەویەتدا بێ.


ڕێکه‌وت: 2015-03-11 18:00:12
به‌شی ( ئیسلاحخوازانی حكومەتی و ئەركی رۆشنبیران )