هۆگرهەندێك لە راڤەكارانی بواری رامیاری ئەڵێن كە وڵاتانی 5+1 و ئێران زور نزیكن لە رێكەوتنێكی مێژوویی كە ئەبێتە هۆی گۆڕانكاری جیدی لە بواری سیاسی و ئابوری ناوخۆ و دەروەی ئێراندا و پێیان وایە نزیك بوونەوەی ئێران و ئامریكا لە سەر بابەتی ناوەكی ئەبێتە هۆی بەردەوام بوونی ئەو  ووتووێژانە لە سەر بابەتەكانی جۆراوجۆری تر و پەیوەندیەكانی نێوان ئەم دوو وڵاتە دژ بەیەكترە بەرەو باشتر بوون دەچێت . بە پێچەوانەوە نووسەری ئەم بابەتە پێی وایە مێژووی كرداری سیاسی ئاخوندەكان ....
لەمپەڕێكی گەورەیە بۆ كردنەوەی هەرجۆرە درگایەك بۆ پێوندیەكی راستەقینە و لە راستیدا ئیدئۆلۆژی ئیسلامی سیاسی ئاخوندەكان - كە هەرگیز لە ناخیان نایەتە دەر - هۆكاری هەموو ئەو ناكۆكیانەیە كە لە نێوان ئێران و رۆژئاوا دا بەدی هاتووە و هەتا ئێستاش دیپلۆماسی ئاخوندی رێ و رەسمێكی فریوكارانە و درۆزنانە بووە  و ئامانجی ئاخوندەكان لە دیپلۆماسی پەرەپێدانی ئیدئۆلۆژی وەیلایەتی فەقیە بووە لە زۆربەی ولاتانی جیهاندا . هەروەك دیارە هەڕەشە و گوشار و گەمارۆكان رژێمی هێناوەتە سەر مێزی ووت وێژ دەنا هەركەس پێشتر باسی گرتنی پەیوندی دیپلۆماتیكی لە گەڵا ئامریكا بكردایە ئەكەوتە بەر رەخنە و هروژم و سزای دەسەلاتدارانی ئەو رژیمە .
روونە كە رژێم  لەم دراما تازەیەشدا نەك گوێ بە قسەی ئامریكا و رۆژئاواییەكان لە سەر بابەتەكانی تر نەدات بەڵكوو دوور نیە هەرئەم رێكەوتنەش بە راستی و روونی بەرێوە نەبات . چاوەڕوانی گۆرانكاری لە رەفتاری رژیم لە سەر بابەتی مافی و مرۆڤ و ئازادی و بەرابەری كۆمەلایەتی و كشانەوە هێز و گروپەكانی لە ولاتانی ناوچە و ... بە ووت ووێژ و رێكەوتنی ناوەكی چاوەڕوانیەكی خیاڵیە و رژێمێك كە ئەساسی لە سەر دژایەتی مافەكانی مرۆڤ دامەزرابێت نالۆژیكیە كە وەها چاوەڕوانیەكی لێ بكرێت . 
عەلی خامنەیی دیكتاتۆری ئێران لە ماوەی ساڵانی 84 تا 92 كە مەحموود ئەحمەدی نەژاد ( یەكێك لە نزیكترین كەسەكانی خۆی ) بە زۆرملی كردە سەرۆك كۆماری ئێران و  لە هەردوو هەڵبژاردنەكانی ساڵی 84 و 88 دا تەزویر وساختەكاری بۆ كرد ،لەو باوەرە دا نەبوو كە بۆ سڕینەوەی هەموو گەندەڵیەكانی خۆی و خزمەتكارەكانی بگاتە ئەوقۆناغەی دەستەوەداوێنی سەرۆك كۆماری ئامریكا بێت . 
زور كەس لە خەڵكانی ناو ئێرانیش پێشبینی وەها رۆژێكیان نەدەكرد كە ئەو گەلاڵە و گەمارۆیانەی كە لە ساڵی 1385وە لە لایەن یەكیەتی ئوروپا و ئامریكا و دامەزراوەی نەتەوە یەكگرتووكان بە سەر ئێران دا سەپێندرا ، ئەوندە كاریگەریان لە سەر ئێران و حكومەت دانابێت كە رژێم ناچار بكات مل بۆ خواستەكانی جیهانی دانەوێنێ . ئایا رژیم ئەیهەویت وەك حكومەتێكی ژیر و عاقل بەرژەوەندیەكانی خەڵك لە بەر چاو بگرێت و خواست و داواكاریەكانی رۆژئاوا قەبوول بكات وپێبەند بێت بەو رێكەوتننامە و بەڵینانەی بە خەڵك و جیهانیانی داوە ؟! وەلامەكی زۆر ئاشكرایە . نەخیر . ئامانجی رژیم لە رێكەوتن و وەلامدانەوە بە خواستەكانی جیهانی شتێكی ترە . فێلێكی تر لە بەرنامەی رژیم دایە ئەویش درێژكردنەوە دانوستان و ئەمرۆ بە سبەی پیكردنە بە توێژەرانی ئاژانسی وزەی ئەتۆم و كۆمەڵگای جیهانی . رژیم ئەیهەویت لە ژیر دروشمی "رێكەوتن"  لە چالاكیەكانی ئەتۆمی خۆی هەربەردەوام بێت  و هاوكات درێژە بە سەركوت كردنی جەماوەری ئێران لە ناو خۆ و شێواندن و میلیتاریزە كردنی ناوچەی رۆژهەلاتی ناوەراست بدات . رێكەوتن لە یەك قۆناغدا و كۆتایی بە دانیشتنەكانی ئەتۆمی كە كات و ساتی رێبەرانی ولاتە زلهێزەكانی جیهانی گرتووە و واژۆ كردنی چەند لاپەڕەیك لە خەیاڵی ئاخوندەكاندا كۆتایی بابەتەكە یە بۆ ئەوەی بەرگری بكەن لە سەردانی توێژەرانی دامەزراوەی وزەی ناوەكی لە ناوەندەكانی ئەتۆمی و درێژەدان بە چالاكیەكانیان. بی گومان رژیم ناهێڵێت هەموو ناوەندەكانی ئەتۆمی و تاقیگەكان و بنكەكانی موشەكی بخرێنە ژیر چاوەدێری و پێش بینی دەكرێت كە دوای واژۆی رێكەوتن نامە كە ناكۆكیەكان هەر بەردەوامی بن و كار بكەوێتە گلەیی و گازندەی ولاتانی 5+1 و دواتر هەڕەشەی دەست پێكردنەوەی گەمارۆكان.
لە راستی دا سزادانی ئێران لە سەربابەتی ناوەكی رێگایەكی گونجاو نەبوو بۆ ئەوەی گۆڕانكاری بە سەر چۆنیەتی جوڵانەوەی رژیم دابێنێت . لە سەرەتای گەمارۆكان تا ئێستاشی لە سەر بێت ئیعدام و لە سێدارەدانی خەڵكی ئێران و گوشار بۆ سەر ئازادیخوازان زیاتر بووە ، خەڵك هەژارتر بوون و رژیم لەوماوەیە دا شێعەكانی لە رۆژهەلاتی ناوەراست هاروژاندووە و بۆتە بەدیهێنەری شەڕێكی خوێناوەی لە نیوان نەتەوەكانی ناوچەكە دا .
خامنەیی و سوپا بە رێكەوتن لە گەڵ  ولاتە زلهێزەكان ئەگەر بۆیان بلوێ لە یەك قۆناغ دا ئەیانهەوێ ئەوبابەتە كۆتایی پێ بێنن . قوناغی دووهەمی رێكەوتن كە ئامریكا و 5+1 ئەیانهەوێ دوای رێكەوتنی قۆناغی یەكەم (لە مانگی داهاتوودا) دەستی پێبكەن لێكۆڵینەویەكی وردی بەدواوەیە لە سەر چەند و چوون و باری فەننی و بوارەكانی زانستی و ... كە پێویستی بە وردبینی و سەردانی بنكەكانی ناوەكی لە ناو ئێران و دواتر را و بۆچوون و راپۆرتی ئاژانسی جیهانی وزەی ناوەكیە لە ویەن .
خامنەیی مەرجێكی قورسی داناوە بۆ ئەو رێكەوتنە  و بە واتایە ك ئەیهەوێت بە رێكەوتن نامەیەكی یەك قۆناغی : 1. رژێم خۆ لە قۆناغی دووهەم بدزیتەوە و باس و لێكۆڵینەوە لە بنكەكانی ناوەكی و سەردانەكانی دامەزراوەی وزەی ئەتۆمی جیهان ببەنە بازنەی فەرامۆشی و بە نهێنی درێژە بە چالاكیەكانیان بدەن .
 2 . هەموو گەمارۆكانی جیهانی لە سەر بواری ناوەكی لاببردرێن و بتوانن لە رەكابەری  نێوان ئێران ولاتانی عەرەبی و بە تایبەت قەتەر و عەرەبستان لە بواری فرۆشی نەوت و پاشكەوتكردنی دراو و كرینی چەك و چوڵا دوا نەكەوون  و  لە هێز و دەسەڵاتیان لە ناوچەكەدا كەم نەبێتەوە و لایەنگرانیان لە ناوخۆ و دەروەوە رابگرن.
رژێمی ئاخوندی لە سەر بنیاتی درۆ و دوژمنایەتی گەلانی ناوچەكە دروست بووە بۆیە بە بێ پیلان گێری بۆ دراوسێ و نەتەوەكانی ناو ئێران و ناوچەی رۆژهەلاتی ناوەراست ناتوانێت درێژە بە مان و كارەكانی بدات .
نەبوونی پول و دراوی پاشكەوت بە هۆی كەم بوونەوەی فروشی نەوت و هەروەها گرفتەكانی بەردەم گەیشتنی دراو  بۆ ناو ئێران و گەمارۆكانی كۆمپانیاكانی سەر بە رژێم بۆ كاروباری ئابوری نێودەوڵەتی و گوشار بۆ سەر چینەكانی هەژاری ناوخۆیی ئێران بۆتەهۆكاری تەنگ پێ هەڵچنین بە كاربەدەستانی حكومەت .
بەلام ئەوان نەك لە بەر خەڵكی هەژار بەڵكوو لە بەر پەك كەوتنیان لە درێژەدان بە ئاژاوە گێری و دزینی سەرمایەی خەلكانی ئێران پنایان بۆ ووتووێژ بردووە  و وەك قەدیمی ئەڵێن تێر ئاگای لە برسی نیە ، هەموو كاتیك خۆیان لە داخوازیەكانی خەڵك دزیەوەتەوە . رژیم لە هاتنە خوارەوەی فرۆشی نەوت و گۆشاری گەمارۆكان دەستی داوەتە بە قاچاخ و بڵاو كردنەوەی مادە هۆشبەركان و لە بیری پڕكردنی گیرفان و بودجە نیزامی ودەسەڵاتداری خۆیانن . 
وتەی وەزیری ناوخۆی رژێم لە سەر بەكارهێنانی پارەی پیس كە مەبەستی پارەی فرۆشی مادە هۆشبەركان بە دەستی حكومەتیەكانی سەردەمی ئەحمەدی نەژاد و پاسدارەكان و نوێنەرانی مەجلیسە ،هێمای كەڵك وەرگرتنی رژیمە لە هەموو جۆرە كار و ئاكارێكی دژ بە ئەخلاق و مرۆڤایەتی .
بنیامین نتانیاهو بە وتەكانی لە كۆنگرێسی ئامریكادا توانی سەرنجی سێناتۆرەكان بۆ لای بابەتی رێكەوتنەكە زیاتر رابكێشێ و ئەگەر توافق لە بەرژەوەندی ئاخوندەكان بێت ئەوا نەك بەرهەڵستی دەبنەوە بەڵكوو  رێ خۆش كەر دەبێت بۆ رەخنەی زیاتر لەسیاسەتە هەڵەكانی ئۆباما و هاتنە سەركاری كۆماری خوازەكان لە هەڵبژاردنەكانی2016 دا و لە رۆژان و مانگەكانی داهاتوو دا باسی زیاتر لە سەر بابەت و نهێنیەكانی رێكەوتن نامەكە ئاشكرا دەبێت كە ئەبێتە هۆكارێك بۆ ناسینی زیاتر رژێمی ئاخوندی و دەركەوتنی لایەنەكانی تری شاراوەی ئەو رێكەوتنە .


ڕێکه‌وت: 2015-03-23 17:49:42
به‌شی ( داواكاریەكانی لەیەكتر دوور : لە نێوان ئێران و رۆژئاوا لە سەر بابەتی وزەی ناوەكی )