__ دوو زیندانیی سیاسیی کورد زیاتر لە ٢ دەیەیە لە مافی مەرەخەسی بێبەرین__ لاوانی کورد گەورەترین زنجیرە چیای ئیلامیان خاوێن کردەوە+وێنە__ تاوتوێ كردنی پرسی نەتەوەكانی ئێران لە بارەگای نەتەوەیەكگرتووەكان__ KCK وشه‌ به‌ وشه‌ی په‌یامی نه‌ورۆزی ئۆجه‌لان جێبه‌جێ ده‌کات __ بالوێزانی فەرانسە، بریتانیا و ئەمریكا: رژێمی ئاخوندی دەبیت بریارێكی سەخت بدات__ گواستنەوەی چەكە قۆرسەكانی عەرەبستان بۆ سنووری یەمەن

دوو زیندانیی سیاسیی کورد زیاتر لە ٢ دەیەیە لە مافی مەرەخەسی بێبەرین
دوو زیندانیی سیاسی کورد، کەزیاتر لە ٢ دەیەیە لە زیندانەکانی رژێمی ئاخوندی ئێران لەدەستبەسەریدان، لە مافی چوونە مەرەخەسی بێبەرین. بەپێی راپۆرتی هەواڵدەریی کوردپا، عوسمان مستەفاپوور، زیندانیی سیایسی کوردی خەڵكی پیرانشار، کە ماوەی ٢٣ ساڵە لە زیندانەکانی رژێمی ئاخوندیدا راگیراوە، سەرەڕای چەندین جار داواکاریی خۆی و بنەماڵەکەی بۆ چوونە مەرەخەسی، لەو مافە بێبەرییە. یەکێک لە نزیکانی ئەو زیندانییە سیاسییە کوردە راگەیاند؛ بەهۆی نەبوونی پارێزەر بە دروستی لە دۆخی پەروەندەکەی ئاگاداریمان نییە. ناوبراو وێرای رەت کردنەوەی هەواڵی ونبوونی پەورەندەکەی لە دادگوستەریدا، رایگەیاند؛ نیگەرانیی ئێمە بۆ زیادکردنی ١٠ سال زیندانی بە حوکمەکەیەتی، کە هەتا ئیستاش هۆکاری زیادکردنی ئەو حوکمە نازانین. عوسمان مستەفاپوور، بە پێشینەترین زیندانیی سیاسیی کورد، ساڵی ١٣٧٥ دەستبەسەر کراو هەنووکە زیاتر لە ٢٣ ساڵە لە زیندانەکانی حکوومەتی ئیسلامیی ئێران لە دەستبەسەریدایە و لە ئێستادا لە زیندانی ناوەندیی ورمێدایە. هاوکات محەمەد نەزەری، زیندانیی سیاسیی کوردی خەڵکی سایین قەڵا، کە زیاتر لە ٢١ ساڵە لە دەستبەسەریدایە، ئیتلاعاتی مەهاباد رێگری لە ئازادبوونی ناوبراو دەکات. لەماوەی رابردوودا، دادگەی مەهاباد بڕیاری ئازادکرانی ناوبراوی دابوو، بەڵام ئیتلاعاتی مەهاباد رێگریی لەو بڕیارەی دەزگای دادوەریی مەهاباد کرد. بە گوتەی محەمەد نەزەری، ساڵی ٩١ لەسەر بڕیاری دادستانیی گشتیی وڵات پەروەندەکەم خرایەوە بەر پێداچوونەوەو پاش ماوەیەک، کە دادگا بریاری ئازادکردن و لێبوردنی بۆ من دەرکرد، بەڵام ئیتلاعات بەهۆی غەرەز و کینەوە لەگەڵ ئازادبوونی من دژایەتی کرد.








لاوانی کورد گەورەترین زنجیرە چیای ئیلامیان خاوێن کردەوە+وێنە
ژمارەیەک لە لایەنگر و چالاکانی ژینگەپارێزیی کورد، گەورەترین زنجیرە چیای ئوستانی ئیلامیان لە زبڵ و پاشماوەی گەشتیاران خاوێن کردەوە. بەپێی راپۆرتی  هەواڵدەریی کوردپا، ژمارەیەک لاوی کوردی خەڵکی دەڕەشار لە ئوستانی ئیلام لە چالاکییەکی بەکۆمەڵ و خۆڕسکدا، ٢٠٠ کیسە زبڵی بەجێماویان لە چیای کەبیر کێو کۆکردەوە. چالاکانی ژینگتەپارێزی، ئامانجی خۆیان لەو چالاکییە بەکۆمەڵە بۆ جێگیر کردنی فەرهەنگی ژینگەپارێزی و پەرە پێدانی دروشمی خۆشەویستی بۆ ژینگە" گەڕاندۆتەوە. ئەو چالاکانە رایانگەیاندووە: لە راستای خاوێن راگرتنی ژینگەدا، پاش سێزدە بەدەریش چالاکییەکی لەو شێوەیە رێک دەخەن. کەبیر کێو کە ١٥٠ کیلۆمیتر درێژایی هەیە، بە گرینگترین و گەورەترین ناوچەی پارێزراوی ئوستانی ئیلام ئەژمار دەکرێت، کە ١٦٦٥ هێکتار رووبەری دارستان و لەوەڕگەی هەیە. لە ماوەی دوو ساڵی رابردوودا هاووڵاتییانی کورد لە کوردستان، بەدیان شێوە خشەویستی و ئۆگریی خۆیان بۆ ژینگە و سروشتی کوردستان نیشان داوەو چالاکیی هاووڵاتییان لە واز هێنانی بەکۆمەڵی راوچیان لە راوکردن، شکاندنی چەکی راو، ئازادکردنی باڵندە کێوییەکانی وەکوو کەو و هەڵۆ، خاوین کردنەوەی ژینگە و چاندنی نەمام و تۆوی دار بەروودا بینیوەتەوە.







تاوتوێ كردنی پرسی نەتەوەكانی ئێران لە بارەگای نەتەوەیەكگرتووەكان
كونفرانسی ساڵانه‌ی كۆمه‌ڵه‌ی مافی مرۆڤی كوردستان له‌نه‌ته‌وه‌یه‌كگرتووه‌كان، به‌به‌شداریی ئه‌حمه‌د شه‌هید و شیرین عیبادی و نوێنه‌رایه‌تیی وڵاتانی كانه‌دا و بریتانیا و زیاتر لە سەد کەس لە پسپۆڕانی مافی مرۆڤ و نوێنەرانی رێکخراوەکانی مافی مرۆڤی نێونەتەوەیی و ناوچەیی، له‌سه‌ر پرسی نه‌ته‌وه‌كانی ئێران بەرێوەچوو. بەپێی راپۆرتی هەواڵدەرییەكان،رۆژی پێنجشەممە رێکەوتی ٢٨ی رەشەمەی ٩٣ کۆمەڵەی مافی مرۆڤی کوردستانی ئێران-ژنێڤ، لە بنکەی رێکخراوی نەتەوە یەکگرتوەکان، کونفرانسێکی لە سەر پرسی نه‌ته‌وه‌كانی ئێران رێک‌خست. لە کۆنفرانسەکەدا ئەحمەد شەهید، شیرین عیبادی، رافایل هۆزان لە "بزووتنەوەی نێونەتەوەیی دژی ئێعدام"، پڕۆفیسۆر عەباس وەلی مامۆستای زانکۆ لە ئیستانبووڵ، مونیرە سلێمانی (شیرانی) لە "حیزبی مەردوومی بڵووچستان"، تەیموور ئەلیاسی بەرپرسی پێوەندی نێونەتەوەیی کۆمەڵەی مافی مرۆڤی کوردستانی ئێران- ژنێڤ قسەیان کرد. لەو كۆبوونەوەیەدا ئەحمەد شەهید وێڕای باس کردن لە زیادبوونی رادەی ئێعدامەکان لە دەورەی رۆحانی، ئاماژەی بەو ئاستەنگ و بەربەستانەش کرد کە حکوومەتی ئێران لەسەر رێگەی کارەکانی دای دەنا و ناتوانێ دەستی بە زانیاری لە ناوخۆی ئێران رابگا. لە بەشێکی دیکەدا بەشدارانی کۆنفڕانسەکە گلەیی و تێبینییان لەسەر راپۆرتەکەی ئەحمەد شەهید هەبوو، کە زۆربەیان لەو باوەڕەدا بوون کە کەموکۆڕی بە راپۆرتەکەی ئەحمەد شەهیدەوە دیار بوو. دواتر دوکتور شیرین عیبادی باسی رادەی ئێعدامی سیاسیی کوردەکان و پێشلکارییەکانی مافی مرۆڤ لە کوردستاندا کردووە.  هەروەها ئاماژەی بە مافی کەمینە مەزهەبی و ئایینییەکان کردووە کە چەندین ساڵە کورد و سونییەکان داوای دروست کردنی مزگەوتێک لە تاران دەکەن هێشتا ئیجازەیان پێ نەداون و لەگەڵ بەهاییەکان مودارای نەکردووە بەڵکوو سووکایەتییان پێ دەکا و سەرکوتیان دەکا. عیبادی ئاماژەی بەوەداوە کە لە حکوومەتی ئیسلامیدا هەموو ئورگانەکان لە سەرەوەی قانوونن و لە بەرانبەر کەسدا وەڵامدەر نین. لە کۆتاییشدا مونیرە سلێمانی (شیرانی) نوێنەری بەلووچێستان باسی هەڵاواردنەکانی کۆماری ئیسلامی لەو ناوچەیە، زیندانیانی سیاسی، دەستبەسەرکردنی سەرەڕۆیانە، نەبوونی ئاو و بە هەژاری هێشتنەوەی خەڵکی ناوچەکە کرد. 








KCK وشه‌ به‌ وشه‌ی په‌یامی نه‌ورۆزی ئۆجه‌لان جێبه‌جێ ده‌کات 
به‌سێ هۆزات ڕایگه‌یاند: کۆما جڤاکێن کوردستان (KCK) ڕازییه‌ به‌ وشه‌ به‌ وشه‌ی په‌یامه‌ نه‌ورۆزییه‌که‌ی عه‌بدوڵڵا ئۆجه‌لان و جێبه‌جێ ده‌کات. به‌پێی راپۆرتی هەواڵدەرییەكان، به‌سێ هۆزات، هاوسه‌رۆکی کۆما جڤاکێن کوردستان به‌ ئاماژه‌ به‌ په‌یامی نه‌ورۆزیی عه‌بدوڵڵا ئۆجه‌لان وتی: KCK وشه‌ به‌ وشه‌ی په‌یامه‌که‌ی ئۆجه‌لانی قبووڵه‌ و جێبه‌جێ ده‌کات. هه‌روه‌ها بۆڵنت ئارینچ، جێگری سه‌رۆک وه‌زیرانی تورکیا ده‌بێ پابه‌ند بێت به‌ لێدوانه‌کانی خۆی و ئه‌م لێدوانانه‌ له‌ وته‌وه‌ بکاته‌ کرده‌وه‌. هاوسه‌رۆکی کۆما جڤاکێن کوردستان زیادیشی کرد: کۆما جڤاکێن کوردستان پاش په‌یامی عه‌بدوڵڵا ئۆجه‌لان ڕێبه‌ری په‌که‌که‌، هه‌وڵه‌کانی خۆی بۆ پێکهێنانی کۆنگره‌ی نه‌ته‌وه‌یی کورد و ئازادی عه‌بدوڵڵا ئۆجه‌لان چڕ کردۆته‌وه‌ و سه‌باره‌ت به‌م بابه‌ته‌ له‌گه‌ڵ له‌یلا زانا و سری سوره‌یا ئۆنده‌ر له‌ ئه‌ندامانی وه‌فدی ئیمرالی له‌ ڕه‌وتی دانوستانی ئاشتی، دیدار و چاوپێکه‌وتن ئه‌نجام ده‌دات. 








بالوێزانی فەرانسە، بریتانیا و ئەمریكا: رژێمی ئاخوندی دەبیت بریارێكی سەخت بدات
فرانسوا دلاترە نوینەری فەرانسە لە سازمانی نەتەوەیەكگرتووەكان وریایی دا كە لە وتووێژە ناوكەییەكان لەگەڵ رژێمی ئاخوندی پێشكەوتنەكان وەك پێویست نەبوون. بە پێی راپۆرتی هەواڵدەرییەكان، نوێنەری فەرانسە لە نەتەوەیەكگرتووەكان وتی، رژێمی ئاخوندی بۆ رازی بوونی كۆمەڵگای جیهانی، دەبێت دەست بداتە هەڵبژاردنی بژاردەێكی سەخت. بە پێی ئەم راپۆرتە، یەكێك لە كێشە چارەسەر نەكراوەكان ئەوەیە كە رژێمی ئاخوندی دەیەوێت لە رەوەند لێكۆڵینەوە و پەرەپێدانی سانترفیوژە پێشكەوتووەكان هیچ بەربەستێك نەبێت. سانترفیوژگەلێكە دەتوانن لە بەرهەمهێنانی چەكی ناوكەیی دەوریان هەبێت. جێگەی باسە كە هاوكات لەگەڵ وتەكانی نوێنەری فەرانسە، پیتر ویلسۆن نێنەری بریتانیا لە نەتەوەیەكگرتووەكان رایگەیاند، رژێمی ئاخوندی دەبێت لە خۆی نەرمی زیاتر بنوێنێت و  بژاردەێكی سەخت هەڵبژێرێت تاكوو لە رێكەوتن نزیك ببینەوە. دەیوید پرسمن، جێگری نوێنەری ئەمریكا لە نەتەوەیەكگرتووەكانیش وتی، هێشتا مەوداێكی فراوان و بژاردەگەلێكی گرنگ ماون.








گواستنەوەی چەكە قۆرسەكانی عەرەبستان بۆ سنووری یەمەن
عەرەبستانی سعوودی چەكە قۆرسەكانی خۆی بۆ سنووری یەمەن گواستەوە. بە پێی راپۆرتی هەواڵدەرییەكان، بەرپرسانی فەرمی ئەمریا رایانگەیاندووە كە، عەرەبستانی سعوودی سەرقاڵی گواستنەوە و جێگیركردنی تۆپخانەیە لە سنووری یەمەن. بە پێی ئەم راپۆرتە، دوو سەرچاوەی ئاگاداری ئەمریكایی رایانگەیاندووە كە گواستنەوەی ئەم تۆپخانەیە بۆ سنووری یەمەن هەم  مەبەستی هێرشكردنی لە پشتە و هەمیش مەبەستی بەرگری. جێگەی باسە كە ئەو سەرچاوە ئەمریكاییانە باسیان لەوە كردووە كە بەشێكی زۆری چەك و چۆَلی قۆرسی عەرەبستان لە سنووری یەمەن جێگیر كراوە.

ڕێکه‌وت: 2015-03-25 18:10:56
به‌شی ( هەواڵەكانی كوردستان، ئێران و جیهان 5ی خاكەلێوەی 1394 )