__ تەقینەوەی مین لە سەلاسی باوەجانی ٤ منداڵى کردە قوربانی__ هێرشی عەرەبستان بۆ سەر حۆسیەكانی یەمەن دەستی پێكرد__ هێرشی سوپای تورکیا بۆ سەر بنکەکانی پەکەکە لە ماردین __ ناردنی 4 كەشتی شەركەری میسری بۆ كەنداوی عەەن__ سەرلێشێواوی رژێمی ئاخوندی لە هێرش بۆ سەر چەكدارانی حۆسی__ لە 15 مانگی رابردوو زیاتر لە 1000 كەس لە ئێران لە سێدارە دراون__ وتووێژە ناوكەییەكان ئەمرۆ لە لۆزانی سوئیس دەستی پێكرد

تەقینەوەی مین لە سەلاسی باوەجانی ٤ منداڵى کردە قوربانی
لە یەکەم رۆژەکانی نەورۆزدا ٤ هاووڵاتیی خەڵکی ناوچەی سەلاسی باوەجانی، کە یەکێکیان منداڵیش بووە، لە ئەنجامی تەقینەوەی مینی بەجێماوی شەڕی ٨ ساڵەی نێوان ئێران و ئێراق، بوونە قوربانی. بەپێی راپۆرتی هەواڵدەریی کوردپا، لە کاتێکدا چەند رۆژێک بەسەر رووداوی تەقینەوەی گوللـە خومپارەی نەتەقیوی شەری ٨ ساڵە بەرووی ٥ قوتابیی کورد لە مێهراندا تێدەپەڕی، سەرلە ئێوارەی رۆژی سێ‌شەممە رێکەوتی ٤ی خاکەلێوە، سێ مێرمنداڵ و منداڵێکی تەمەن ١٠ ساڵەی کورد، لە ئەنجامی تەقینەوەی مینێکدا لە گوندی گاڕێ (بەرکوڕ)ی سەربە تازاوای سەلاسی باوەجانی، بریندار بوون. دەگوترێ ئەو ٤ کەسە ئەندامی بنەماڵەیەک بوون و لە کاتێکدا لە تەنیشت گوندەکەی خۆیان ئاگرێکیان کرۆتەوە، مین لەژێر ئاگرەکەدا تەقیوەتەوەو بەو هۆیەوە هەر چوار کەسەکە بریندار بوونە. ئەو ٤ هاووڵاتییە، پاش رووداوەکە دەستبەجێ لەلایەن دانیشتوانی گوندەکەوە گوازراونەتەوە بۆ نەخۆشخانەی جوانرۆ و پاش چارەسەرێکی سەرەتایی، رەوانەی نەخۆشخانەیەکی کرماشان کراون. هەتا ئێستا شوناسی ئەو چوار هاووڵاتییە کوردەی خەڵکی گوندی بەرکوڕی سەربە تازاوای باوەجانی، کە هەنووکە لە نەخۆشخانەی کرماشان لەژێر چاوەدێریی پزیشکیدان، روون نەبۆتەوە.








هێرشی عەرەبستان بۆ سەر حۆسیەكانی یەمەن دەستی پێكرد
عادل بن ئەحمەد جبیر، باڵوێزی عەرەبستان لە ئەمریكا لە شەوی چوارشەممە 5ی خاكەلێوە رایگەیاند، عەرەبستان بۆ بەرەوروو بوونەوە لەگەڵ چەكدارانی شێعەی یەمەن هێرشی نیزامی دەكاتە سەریان. بە پێی راپۆرتی هەواڵدەریەكان، عەرەبستان رایگەیاند، هێزەكانی ئەو وڵاتە لەگەڵ هاوپەیمانانی ناوچەیی بە مەبەستی پشتیوانی لە دەوڵەتی یاسایی یەمەن هێرشی كردووەتە سەر بارەگاكانی چەكدارانی حۆسی. بە پێی ئەم راپۆرتە، لەو هاوپەیمانییەدا 10 وڵاتی سوننی ناوچەكە وەك ئیمارات، بەحرەین، قەتەر و كووەیت لەو هێرشەدا بەشدارن. جێگەی باسە كە هێرشی عەرەبستان و هاوپەیمانانی كاتژمێر 2ی سەرلە بەیانی رۆژی پێنجشەممە 6ی خاكەلێوە بۆ سەر بارەگاكانی گرووپی شێعەی حۆسی دەستی پێكردووە.








هێرشی سوپای تورکیا بۆ سەر بنکەکانی پەکەکە لە ماردین 
سوپای تورکیا لە ئۆپراسیۆنێکی سەربازیدا بنکەکانی پەکەکە لە پارێزگای ماردینی کردە ئامانج. بە پێی راپۆرتی هەواڵدەرییەكان،هێزە چەکدارەکانی تورکیا لە ئۆپرسیۆنێکی سەربازی لە ناوچەی" مازی داغی" پارێزگای ماردین بە دۆزینەوەی بنکە،حەشارگە و هومارەکانی پەکەکە هێرشێکی خەستیان رێکخستووە.ئەم هێرشە لەلایەن فەرمانداریی پارێزگای ماردین،پشتڕاست کراوەتەوە و ڕاگەیێندراوە کە بە 5 تیمی تایبەتی سوپا ئەنجام دراوە. دوای ئەم ئۆپراسیۆنە گواستنەوەی هێزە سەربازییەکان و زریپۆشی"کریپی"بۆ ناوچەی ئامەد دەستیپێکردووە.  پاش ئەم ئۆپراسیۆنە لە نێوان سوپای تورکیا و هێزەکانی باڵی سەربازی پەکەکە لە کاتژمێر 13:25 خولەک بە کاتی تورکیا لە ناوچەی "داغلیجا" سەر بە پارێزگای جۆلەمێرگ شەڕ هاتە ئاراوە. ئاژانسەکانی هەواڵی تورکیا لە ئەگەری بوونی کوژراو و بریندار لە هێزی دوولایەن هەواڵیان داوە. تا ئێستا پەکەکە لەمبارەوە هەڵوێستی فەرمی نەبووە.








ناردنی 4 كەشتی شەركەری میسری بۆ كەنداوی عەەن
میسر چوار كەشتی شەركەری خۆی لە كەنداوی عەدەن جێگیر كرووە. بە پێی راپۆرتی هەواڵدەرییەكان، چوار كەشتی شەركەری میسر لە كەناڵی سۆئزیان تێپەراندووە تاكوو لە كەنداوی عەدەن پارێزگاری بكەن. بە پێی ئەم راپۆرتە، دەوڵەتی میسر رایگەیاندووە كە، هێزە دەریایی، ئاسمانی و زەوینیەكانی خۆی بۆ هێرش كردنە سەر چەكدارانی حۆسی لە یەمەن بە كار دێنێت. جێگەی باسە كە كاتژمێر 2ی شەوی رابردوو عەرەبستان و 10 ولاتی هاوپەیمانی سوونە مەزهەبی هێرشێكی بەربڵاویان كردووەتە سەر حۆسیەكانی یەمەن.








سەرلێشێواوی رژێمی ئاخوندی لە هێرش بۆ سەر چەكدارانی حۆسی
رژێمی ئاخوندی كە خۆی هۆكاری سەرەكی شەر و ئاژاوە نانەوە لە یەمەنە لە مەر هێرشی بەربڵاوی ئاسمانی هاوپەیمانانی عەرەب بۆ سەر مۆڵگەكانی چەكدارە حۆسیەكان لە یەمەن بە سەرلێشێواوی دژكردەوەی هەبوو. بە پێی راپۆرتی هەواڵدەرییەكان، وەزارەتی دەرەوەی رێمی ئاخوندی لە بەیاننامەێكدا رایگەیاند، كردەوەی نیزامی دژبە چەكدارانی یەمەن كە دەرگیری كێەی ناوخۆیی و بەربەرەكانێ لەگەڵ تیرۆریسمە دەبێتە هۆی ئالۆزتر بوونی بارودۆخی ناوخۆیی یەمەن و دەرفەتەكان بۆ چارەسەركردنی كێشەكان لە رێگای ئاشتی ئامێزەوە لە دەست دەدات. بە پێی ئەم راپۆرتە، مەرزیە ئەفخەم وتەبێژی وەزارەتی دەرەوەی رژێمی ئاخوندی لە رێكەوتنی نەتەوەیی لە نێوان ئەحزابی یەمەن قسەی كرد و خوازیاری كۆتایی هێنان بەو هێرشانە بوو. هەروەها جەواد زەریف خوازیاری راگرتنی بە پەلەی هێرشەكان بۆ سەر چەكدارانی حۆسی بوو.








لە 15 مانگی رابردوو زیاتر لە 1000 كەس لە ئێران لە سێدارە دراون
ئەحمەد شەهید راپۆرتنێری تایبەتی نەتەوەیەكگرتووەكان دەلیت 753 كەس لە ساڵی میلادی رابردوو لە ئێران لە سێدارە دراون. بە پێی راپۆرتی هەواڵدەرییەكان، ئەحمەد شەهید لە راپۆرتەكەی خۆی بۆ شۆرای مافی مرۆڤی نەتەوەیەكگرتووەكان لە ژنیڤی سوئیس رایگەیاندووە كە، لە 10 حەفتەی یەكەمی ئەم ساڵدا 252 كەس لە لایەن رژێمی ئاخوندی ئێرانەوە لە سێدارە دراون هەروەها لانیكەم 13 زیندانی خوار تەمەن 18 ساڵ لە ساڵی 2014 لە سێدارە دراون. بە پێی ئەم راپۆرتە ئەحمەد شەهید رایگەیاندووە كە، زۆربەی ئێعدامەكان بە پێچەانەی ئستانداردە نێونەتەوەیەكان بووە و قۆربانیان سزاواری حوكمی ئێعدام نەبوون.








وتووێژە ناوكەییەكان ئەمرۆ لە لۆزانی سوئیس دەستی پێكرد
هەیئەتەكانی رژێمی ئاخوندی و ئەمریكا سەر لە بەیانی ئەمرۆ پێنجشەممە 6ی خاكەلێوە خۆلێكیتر لە وتووێژە ناوكەییەكانیان دەست پێكرد. بە پێی راپۆرتی هەواڵدەرییەكان، جان كێری و جەواد زەریف وەزیرانی دەرەوەی رژێمی ئاخوندی و ئەمریكا كاتژمێر 10ی سەر لە بەیانی ئەمرۆ لە لۆزانی سوئیس خۆلێكی نوێ لە دانوستانە ناوكەییەكانیان دەست پێكردەوە. بە پێی ئەم راپۆرتە، لەم خۆلە لە وتووێژەكان عەلی ئەكبەر ساڵحی سەرۆكی سازمانی ئێنرژی ئەتۆمی رژێم و ئەرنێست مۆنیز وەزیری ئێنرژی ئەمریكا بەشدار دەبن. جێگەی باسە كە باراك ئۆباما لە سەرەتای ئەم وتووێژنە وتی، رێكەوتن كاتێك دێتە ئاراوە كە ئەمریكا دڵنیا بێت كە ئەم رێكەوتنە پێش دەگرێت بە دەستراگەیشتنی رژێمی ئاخوندی بە چەكی ناوكەیی.

ڕێکه‌وت: 2015-03-26 08:20:37
به‌شی ( هەواڵەكانی كوردستان، ئێران و جیهان 6ی خاكەلێوەی 1394 )