رۆژی ١٠ی خاكەلێوە ئەو ڕۆژەیە كە لەساڵی ١٣٢٦ی هەتاوی، پێشەوا قازی محەممەد سەرۆك كۆماری كوردستان و حەمە حسین خانی سەیفی قازی و ئەبولقاسمی سەیفی قازی لەدوای مەحكوم بوونیان بە ئێعدام لە دوو دادگای فەرمایشیدا ،بە دەستی رژیمی دژ بە كوردی پاشایەتی لە مەیدانی چوارچرای شاری مەهاباد لە سێدارە دران. لەسێدارە دانی پێشەوا قازیی محەممەد لەو رۆژە دا خەسارەتێكی گەورەی لە بزووتنەوەی رزگاریخوازانەی نەتەوەكەمان دا و خەم و كۆستێكی مەزنیشی لە ناو دڵی هەموو تاكێكی....
 خاوەن هەستی كورد دروست كرد. لە سێدارەدانی قازی محەممەد لەگەڵ ئەوەی تاوانێكی گەورە بوو بەرانبەر بە گەلی كورد و شەهادەتی ئەو رێبەر و  كەسایەتیە دەگمەنەی كورد هەرگیز لەبیر دانیشتوانی كوردستان ناچێ‌، هاوكات كۆتایی هاتن بە ئەزموونی سەركەوتووانەی كۆماری كوردستانیش بوو، ئەو كۆمارەی بۆ ماوەی 11 مانگ  دەسەڵاتی ئیداریی و بەرێوەبەریی ناوچەكانی سەر بە كۆماری  لە دەست دابوو و ببوو بە هیواو هومێدی هەموو كوردێكی ئازادیخواز لەسەرتاسەری كوردستاندا. 
ئەوەی جێگەی فەخر و شانازییە بۆ گشت كوردێك ئازایەتی و نەبەردی قازیی محەممەد لەماوەی دەسەڵاتی كۆمار و بە تایبەتیش لە كاتی مانەوەی لە سیاچاڵەكانی رژیمی شا بوو كە زۆر قارەمانانە لە بەرانبەر شكەنجەو هەرەشەی جەللادەكاندا وێستایەوەو بە مقاومەتی نەبەزانەی رێگەی نەدا تا وەك تاوانبارێك هەلسوكەوتی لەگەڵ بكەن، بەڵكو ئەو دوایین دەرفەتەشی  بۆ مەحكووم كردنی قازیی و بێدادگاكانی رژیمی شا و داكۆكی كردن لە مافە رەواكانی گەلی كورد بەكار هێنا، بە جۆرێك كە رۆژنامەوانە خارجیەكانی  ئامادە لە بیدادگاكانی تووشی سەرسوورمان كردبوو.
بەڵی پێشەوای نەمر دوایین هەوڵ و تێكۆشانیشی بۆ خزمەت گەیاندن بەبزووتنەوەی رەوای كورد تەرخان كردو بە نووسینی وەسیەتنامەیێكی پڕ نێوەرۆك چەندین پەیام و رێنوێنی  گرینگی بۆ گەلەكەی بە جێ هێشت ، كە لە ناویاندا دەتوانین ئاماژە بە پێداگریی لەسەر یەكریزیی و تەبایی نێوان رۆڵەكانی كوردستان بكەین كە پێشەوای نەمر بە شێوەییكی دیارو تایبەتەوە باسی لێوە دەكات. 
پێشەوا ئەركی خۆی بە جێ گەیاندو و دەینی خۆی لەراست خاك و گەلەكەی تا دوا هەناسە بە جێهێنا و هەروەك خۆشی دەفەرمووێ‌ خەباتی گەلی كورد بە كوشتن و لە سێدارەدانی قازی محەممەد كۆتایی پێنایە، ئەمرۆ دەبینین كە رۆڵەكانی كوردستان لەسەر تێكۆشان لە پێناو دەستەبەركردنی مافەكانی كورد بەردەوامن و  و بە خۆشیەوە بزووتنەوەكەمان بە تێپەراندنی قۆناغی گەلێك حەستەم و دژوار توانیوەیەتی پێگەیێكی شیاو وەدەست بهێنێ‌ و مۆمی خەبات بە داگیرساویی بهێلیتەوە. هەر چەند پێویستە زیاتر لەوە هەوڵ بدرێ‌ و لەگەڵ ئەوەش دا وەسیەتنامەی پێشەوا بكرێتە چۆڵەچرای رووناككەرەوەی رێی خەباتمان و ئەزموون و رێنوێنیەكانی كارییان پێ بكرێت. 
 لە ساڵیادی لە سێدارەدان و شەهادەتی پێشەوا قازی محەممەد و هاورێیانی سڵاو و درود دەنێرین بۆ روحی پاكی ئەو شەهیدانە و سەرجەم شەهیدانی كوردستان و هیوادارین خوێنی پێشەوا و هەموو شەهیدانمان لە ئاكامی تێكۆشان و خەباتی رۆڵەكانی كورد بە ئاكام بگات و ئازادی ورزگاری و روخانی رژیمی دیكتاتۆری ئاخوندی بێتە دی. 

سازمانی خەبات ی كوردستانی ئێران 
كومیتەی ناوەندی 
10ی خاكەلێوەی 1394


ڕێکه‌وت: 2015-03-30 18:14:31
به‌شی ( راگەێندراوی سازمانی خەبات ی كوردستان لە یادی 68 ساڵەی ئیعدامی پێشەوا قازی محەممەد و هاورێیانی )