__ پاڵاوگەی گاز و لەناوچوونی ژینگەی ئیلام__ قوتابییەکی تەمەن ١٧ ساڵ و ژنێکی تەمەن ٢١ ساڵی کورد خۆیان کوشت__ مەوجی نوێی ئێعدامەكان دوای رێكەوتنی ناوكەیی__ دانانی دەزگای پاڕازیتی موبایل لە زیندانی رەجایی شار__ پێشگرتن لە بەرێوەچوونی جەژنی پاكی هاووڵاتیانی مەسێحی لە ورمێ__ باراك ئۆباما: رژێمی ئاخوندی لە كاتی مندا نابێتە خاوەن چەكی ناوكەیی__ وەزیری ئێنرژی ئەمریكا، بەربەستە ناوكەییەكەی رژێم بۆ 10 ساڵ نییە__ كاریگەری هێرشە ئاسمانییەكان: حوسییەكان ئامادەی دانوستانین

پاڵاوگەی گاز و لەناوچوونی ژینگەی ئیلام
پاشماوە و زبڵی پاڵاوگەی ئیلام و دووکەڵی سووتەمەنی گۆگرد، ژینگەی ناوچەی ئیلام و هەروەها ژیانی زیندەوەرانی خستۆتە مەترسییەوە بە پێی راپۆرتی هەواڵدەریی کوردپا، پیسبوونی ژینگەی ناوچەی ئیلام بەهۆی بارینی بارانە ئەسیدییەکان وای کردووە کە بەشێک لەزیندەوەرانی ئەو ناوچەیە لەناو بچن.مێهدی نەزەری چالاکی ژینگەپارێزی کورد لەشاری ئیلام لەو بارەیەوە بە هەواڵدەریی "ئیسنا"ی وتووە، لەئیلام هێندێ شوێن لەناو دڵی لێڕەوارەکان بۆ دروستکردنی پڕۆژەکانی وەکوو پاڵاوگەی گاز و پێترۆشیمی دەستنیشان کراوە و ئەوەش وایکردووە کە ژینگەی ئەو ناوچەیە بەرەو فەوتان بڕوات. مێهدی نەزەری کە بە " پیاوی دەرختی"یش ناسراوە باسی لەوەش کردووە، من وەکوو هاووڵاتییەکی ئیلامی داوا لەبەرپرسان دەکەم کە هەوڵەکانیان بە مەبەستی کەمکردنەوەی ئاسەوارە نەرێنییەکانی ئەو پاڵاوگانە وەگەڕ بخەن. پێشتریش لایەنگرانی ژینگەپارێزی نیگەرانیان سەبارەت بە دووکەڵی پاڵاوگەی گاز لەئیلام دەربڕیبوو.








قوتابییەکی تەمەن ١٧ ساڵ و ژنێکی تەمەن ٢١ ساڵی کورد خۆیان کوشت
لاوێکی تەمەن ١٧ ساڵە و ژنێکی تەمەن ٢١ ساڵ لە شارەکانی جوانڕۆ و سەلاسی باوەجانی کۆتاییان بەژیانی خۆیان هێنا. بەپێی راپۆرتی هەواڵدەریی کوردپا، سەرلەئێوارەی رۆژی رابردوو لاویکی کوردی خەڵکی گەڕەکی "قڕگە"ی شاری جوانڕۆ بە ناوی مەروان تەیبی خوێندكاری ساڵی دووەمی دواناوەندی، هەوڵی خۆکوژیی داو لە ئەنجامدا بووە هۆی گیان لەدەست دانی. هەتا ئێستا هۆکاری خۆکوژیی ئەو لاوە کوردەی خەڵکی جوانڕۆ روون نەبۆتەوە.لەلایەکی دیکەوە رۆژی شەممەی ئەم حەفتەیە، ژنێکی تەمەن ٢١ ساڵەی خەڵکی تازئاوای سەربە شاری سەلاسی باوەجانی لە رێگەی خۆهەڵواسینەوە هەوڵی خۆکوشتنی داو کۆتایی بەژیانی خۆی هێنا. هەتا ئێستا هۆکاری خۆکوژیی ئەو ژنە کە دایکی کچێکیشە، روون نەبۆتەوە تەرمی ئەو ژنە پاش پشکنین لە پزیشکی دادوەریی جوانڕۆ، رادەستی کەسوکاری کراوەتەوە. دۆخی نالەباری ئابووری، بێکاری و نەبوونی داهاتوویەکی روون و لەگەڵ ئەوەشدا نەبوونی هیوا بە گۆڕانکاری لە دۆخی هەنووکەییدا، سەرکوتی کۆمەڵایەتی و یاسای هەڵاواردنکارانە و نەبوونی ئازادی لە هەڵبژاردن لە شێواز و چۆنیەتیی ژیان کردندا وەکوو پێکهێنانی ژیانی هاوبەش، کار و پیشە لە هۆکارەکانی چوونە سەرەوەی ئاماری خۆکوژی لە وڵاتی ئێراندان.








مەوجی نوێی ئێعدامەكان دوای رێكەوتنی ناوكەیی
سەر لە بەیانی رۆژی شەممە زیندانیێك لە زیندانی زابۆل لە سێدارە درا و لانیكەم دوو زیندانیتر كە لە دوو رۆژ پێشەوە بە ستونەوە بەستراونەتەوە چاوەروانی بەرێوە چوونی حوكمەكەیانن. بە پێی راپۆرتی هەواڵدەرییەكان،رۆژی شەممە 15ی خاكەلێوەی 1394، زیندانیێك لە زیندانی زابۆل بە ناوی ئەمیر قائمی كە ماوەی 8 ساڵە لە زیندانی زابۆل راگیراوە لە سێدارە درا.  بە پێی ئەم راپۆرتە، لە ئێستاشدا دوو زیندانی بە ناوەكانی، زاهێد نەوسانی 30 ساڵە كە ماوەی چوار ساڵە لە زینداندایە و مەحمەد سارانی 29 ساڵە لە بەندی یەكی زیندانی زابۆل چاوەروانی بەرێوەچوونی حوكمی ئێعدامن. ئەم دوو زیندانییە لە رۆژی هەینییەوە بە ستونی ناو زیندانەوە بەستراونەتەوە. جێگەی باسە كە لە زیندانی زابۆل هەر زیندانیێك كە بۆ ئێعدام دەیبەن پێش لە بەرێوە چوونی حوكمەكەی لە ناو زیندان بە ستونەوە دەیبەستنەوە.








دانانی دەزگای پاڕازیتی موبایل لە زیندانی رەجایی شار
بەرپرسانی زیندانی رەجایی شاری کەرەج بە دانانی دەزگای پاڕازیت، تەندروستیی زیندانییەکانیان خستۆتە مەترسییەوە. بەپێی راپۆرتی هەواڵدەرییەكان، لەچەند رۆژی رابردوودا دوو کەس لەزیندانیانی سیاسیی ساڵۆنەکانی ١٠ و ١١ی گرتووخانەی رەجایی شاری کەرەج لە ئەنجامی ئاسەواری شەپۆلی پاڕازیتدا، رەوانەی بێهداریی نێو زیندان کراون. بە وتەی سەرچاوەیەکی ئاگادار، دەزگای پاڕازیتێکی نوێ بە شەپۆلی بەهێزەوە لە سالۆنی ناسراو بە " حوسێنیە" دانراوە و تەنانەت تەلەفزیۆنەکانی نێو زیندانیش تووشی کێشەی تەکنیکی هاتوون.دەوترێت ئەو دەزگا پاڕازیتانە کە بە مەبەستی پچڕاندنی پێوەندی (موبایل)ی نێو زیندان دامەزراوە، هەڕەشە لەسلامەت و تەندروستی زیندانیان دەکات و چەندین نە
خۆشی وەکوو سەر ئێشە، ئازاری جومگەکان و ... سەری هەڵداوە.









پێشگرتن لە بەرێوەچوونی جەژنی پاكی هاووڵاتیانی مەسێحی لە ورمێ
رۆژی یەكشەممە 16ی خاكەلێوەی 1394، ئیدارەی سەركۆتگەری ئەماكنی رژێمی ئاخوندی بە ناردنی نامە بۆ كەنیسەكانی شاری ورمێ پێشی بە بەرێوەبردنی جەژنی پاكی شارۆمەندانی مەسێحی لە شاری ورمێ گرت. بە پێی راپۆرتی هەواڵدەرییەكان، لە نامەكەی هێزە ئینتزامییەكاندا هاتبوو كە، لە هەر چەشنە گردبوونەوەێكی مەسێحیەكان بە مەبەستی بەرێوە بردنی جەژنی ئایینی پاك پێشگیری دەكرێت، چونكوو ئەم جەژنە، پەیوەندی بە كاتی دەستبەسەری و بە سەلیب كێشانی عیسا مەسێح لە ئۆرشەلیم هەیە. جێگەی باسە كە هێزە سەركوتگەرەكانی رژێمی ئاخوندی رایانگەیاندبوو كە خەڵك تەنیا لە ماڵەكانی خۆیاندا دەتوانن ئەو جەژنە یاد بكەنەوە.








باراك ئۆباما: رژێمی ئاخوندی لە كاتی مندا نابێتە خاوەن چەكی ناوكەیی
باراك ئۆباما سەرۆك كۆماری ئەمریكا لە وتووێژێكدا لەگەڵ رۆژنامەی نیۆیۆرك تایمز رایگەیاندووە كە، من بە روونی نیشانمداوە كە رژێمی ئاخوندی لە كاتی مندا ناتوانێت چەكی ناوكەیی بەرهەم بێنێت و ئەو رژێمە دەبێت بزانێت كە چی دەڵێم. بە پێی راپۆرتی هەواڵدەرییەكان، ئۆباما لەو وتووێژەدا وێڕای پشتگیری لە وتووێژەكان و رێكەوتنی ناوكەیی لەگەڵ رژێمی ئاخوندی ئێران وتویە، هێشتا كاری زۆر و وردەكاری گرنگ ماوە و لە هەمان كاتیشدا كێشەی فەرمی سیاسی لە بەرێوە ژوونی رێكەوتنەكەدا بوونی هەیە. جێگەی باسە كە ئۆباما ئاماژەی بەوە كردووە كە ئەگەر بێتوو رژێمی ئاخوندی بییەوێت فریوكاری بكات هەموو بژاردەكان رادەگرین.








وەزیری ئێنرژی ئەمریكا، بەربەستە ناوكەییەكەی رژێم بۆ 10 ساڵ نییە
ئێرنست مۆنیز، وەزیریئێنرژی ئەمریكا رۆژی یەكشەممە 16ی خاكەلێوە لە وتووێژێكدا لەگەڵ كەناڵی تەلەفزیۆنی سی بی سی رایگەیاند، چوارچێوەی رێكەوتنی كاملی ناوكەیی لەگەڵ رژێمی ئاخوندی بە كۆمەڵگای نێونەتەوەیی ئەو دەرفەتە دەدات كە بە شێوەی بێ وێنە دەستیان بە دامەزراوە ناوكەییەكانی ئەو رژێمە بگات و بەرنامەی ناوكەیی رژێم روون بكەنەوە. بە پێی راپۆرتی هەواڵدەرییەكان، وەزیری ئێنرژی ئەمریكا وتی، بەربەستەكانی بەرنامە ناوكەییەكەی رژێم چەندین قۆناغی هەیە كە بە بەربەستی زۆر سەخت دەست پێ دەكات. جێگەی باسە كە ناوبراوو ئاماژەی بەوە كرد كە ئەم بەربەستانە 10 ساڵە نین و بەرنامەێكی درێژ خایەنە.








كاریگەری هێرشە ئاسمانییەكان: حوسییەكان ئامادەی دانوستانین
بە دوای هێرشە بەربڵاوەكانی عەرەبستان و هاوپەیمانانی عەرەبی بۆ سەر حوسییەكانی یەمەن لە عەمەلیلتی گەردەلوول كاریگەرییەكان خۆی نیشان دا و حوسییەكان رایانگەیاندووە كە ئامادەی دانوستانی ئاشتین. بە پێی راپۆرتی هەواڵدەرییەكان، ساڵح سەماد سەر بە گرووپی حوسییەكان ئەم هەواڵەی راگەیاندووە. بە پێی ئەم راپۆرتە، هاوكات بە راگەیاندنی دانوستانی ئاشتی لە لایەن گروپە چەكدارەكانی حوسییەوە راگەیاندنەكانی رژێمی ئاخوندی بڵاویان كردەوە كە، حەسەن رۆحانی لە نامەێكدا بۆ پاشای عەممان داوای لێ كردووە كە نێوەنجگیری بكات و عەمەلیاتی گەردەلوولی عەرەبستان دژبە حوسییەكان لە یەمەن رابگرێت.

ڕێکه‌وت: 2015-04-06 12:05:21
به‌شی ( هەواڵەكانی كوردستان، ئێران و جیهان 17ی خاكەلێوەی 1394 )