__ مادەی سڕکەر گیانی دوو هاووڵاتیی کوردی ستاند__ بە ئەندام وەرگیرانی مێرمنداڵێکی کورد لەهەڵبژاردەی تۆپی پێی ئێران__ مانگرتنی 15 زیندانی سیاسی لە زیندانی رەجایی شار__ رۆحانی: دەڵێن كارێكمان كردووە كە رژێم دەستی بە چەكی ناوكەیی نەگات__ كێری: ئەمریكا لە بەرانبەر ئاژاوەنانەوەی رژێمی ئاخوندی بێ دەنگ نابێت__ ناردنی دوو كەشتی شەركەری رژێمی ئاخوندی بۆ یەمەن__ هۆشداری وەزیری دەرەوەی ئیمارات لەمەر دەستێوەردانەكانی رژێم لە یەمەن__ ریاز یاسین: رژێمی ئاخوندی بەكرێگیراو رەوانەی یەمەن دەكات__ خامنه‌یی: نه‌ رای ئه‌رێنیم هه‌یه‌، نه‌ رای نه‌رێنی

مادەی سڕکەر گیانی دوو هاووڵاتیی کوردی ستاند
 لەشارەکانی روانسەر و ورمێ دوو گەنجی کوردی تووشبوو بە مادەسڕکەرەکان، گیانیان لەدەست دا. بەپێی راپۆرتی هەواڵدەریی کوردپا، رێکەوتی ١٩ی خاکەلێوە لاوێکی خەڵکی شاری روانسەر بە ناوی وەفا گوڵمحەمەدی تەمەن 18 ساڵ بە هۆی بەکارهێنانی مادەی سەنعەتیی سڕکەر لەیەکێک لەشاخەکانی دەورووبەری ئەو شارە کۆتایی بەژیانی هاتووە. بەپێی ئامارە فەرمییەکانی ناوەندی بەرەنگاربوونەوەی مادەسڕکەرەکان زیاتر لە یەک ملیۆن و ٤٠٠ هەزار موعتاد لە ئێراندا بوونی هەیە و ئەمە لەحاڵێکدایە کە ئامارە نافەرمییەکان باس لەبوونی چوار ملیۆن تووشبوو بە مادەسڕکەرەکان لەئێران دەکەن. هەر لەو پێوەندییەدا  هاووڵاتییەکی دیکەی کوردی خەڵکی ناوچەی تەرگەوەر کە لەبەکارهێنەرانی مادە سڕکەرەکان بووە گیانی لەدەست داوە.نوورەدین حوسێن‌پوور خەڵکی ئاوایی "مەوانا"ی ورمێ بە مەبەستی وازهێنان لە بەکارهێنانی تریاک بردراوەتە کەمپەکانی تەرک و دەوترێت بەهۆی راوەستانی دڵییەوە گیانی لەدەست داوە.








بە ئەندام وەرگیرانی مێرمنداڵێکی کورد لەهەڵبژاردەی تۆپی پێی ئێران
یەکێک لەمێرمنداڵانی دەڕەشاری ئوستانی ئیلام چووە ریزی هەڵبژاردەی تۆپی پێی ئێرانەوە.بەپێی هەواڵی هەواڵدەریی کوردپا، راهێنەری هەڵبژاردەی تۆپی پێی مێرمنداڵان، محەممەد رەزا گوڵی یاریزانی کوردی بانگهێشتی ئۆردووی هەڵبژاردەکە کردووە. ئەو یاریزانە کوردە گۆڵپارێزی (دەروازەبانی) هەڵبژاردەی تۆپی پێی خوار تەمەن ١٦ ساڵی لە ئەستۆ دەبێت. محەممەد رەزا گوڵی خەڵکی دەڕەشاری ئوستانی ئیلام ،پێشتریش ئەندامی هەڵبژاردەی تۆپی پێی خوار تەمەن ١٣ ساڵ بووە ئۆردووی ئامادەکاریی رێکەوتی ٢٢ی خاکەلێوە بە بەشداریی ٢٥ مێرمنداڵ لەتاران دەست پێدەکات.ئەو مێرمندالە کوردە کە لە یانەیەکی ئوستانی خووزستاندا یاری دەکات پێشتر لە ئۆردووی وڵاتانی قەتەر و بلارووس بەشدار بووە.








مانگرتنی 15 زیندانی سیاسی لە زیندانی رەجایی شار
15 زیندانی سیاسی زیندانی رەجایی شار لە نارەزایەتی بە گواستنەوەی 3 كەس لە هاوبەندییەكانی خۆیان بۆ ژوری تاكەكەسی مانیان لە خواردن گرت. بە پێی راپۆرتی هەواڵدەرییەكان، بە نیشانەی نارەزایەتی لەمەڕ گواستنەوەی سێ زیندانی بە ناوەكانی سەعید عابدینی، خالد حەردانی و مۆستەفا ئەسكەندەری بۆ ژوری تاكەكەسی لە رۆژی دووشەممە 19ی خاكەلێوە، 15 زیندانی سیاسی زیندانی رەجایی شاری كەرەج بە شێوەی هاوبەش مانیان لە خواردن گرتووە. دەگوترێت كە خالد حەردانی بە نەخۆشی زەخمی مەعیدە گیرۆدەیە و تاكوو ئێستا چەندین جار مەعیدەی خوێنرێژی كردووە.








رۆحانی: دەڵێن كارێكمان كردووە كە رژێم دەستی بە چەكی ناوكەیی نەگات
حەسەن رۆحانی ئەمرۆ پێنجشەممە 20ی خاكەلێوە لە شانۆی( رۆژی فەناوەری ناوكەیی) لە رێكەوتنی شەرماوەرانەی لۆزان بەرگری كرد و هەوڵیدا كە نیگەرانی رەخنەگرانی نیزام برەوێنێتەوە. بە پێی راپۆرتی هەواڵدەرییەكان، رۆحانی وتی، ئەگەر ئەوان نازانن ئێمە ئەزانین لە جیهانێكدا دەژین كە وتووێژی سەركەوتن و شكست درێژەی نابێت و نامێنێتەوە، ئەو وتووێژانە دەمێننەوە كە سەركەوتن بە سەركەوتن بێت، گرووپی 5 + 1 دەڵێن لەو وتووێژانەدا كارێكمان كردووە و كارێك دەكەین كە رژێمی ئاخوندی دەستی بە چەكی ناوكەیی نەگات. ئێمە زیاتر لە 1000 سانترفیۆژمان لە فردۆ هەیە و دەمێنێت، ئێمە لە ئەراك رەئاكتۆری ئاوی قۆرسمان هەیە كە بۆ پێداویستی پزشكی كەڵكی لێ دەگرین، ئێمە لێكۆلینەوە و پەرەپێدان بە پێی توانایی خۆمان و زاناكانمان تاكوو گەیشتن بە ئامانجی نەتەوەیی درێژە پێ دەدەین.








كێری: ئەمریكا لە بەرانبەر ئاژاوەنانەوەی رژێمی ئاخوندی بێ دەنگ نابێت
جان كێری وەزیری دەرەوەی ئەمریكا رایگەیاند، واشەنگتۆن لە بەرانبەر ئاژاوە نانەوەی رژێمی ئاخوندی لە ناوچەكە دەست بەستراو نابێت. بە پێی راپۆرتی هەواڵدەرییەكان، كێری وتی، ئێمە لە مەر كێشەكانی یەمەن بە توندی نیگەرانین. روونە كە رژێمی ئاخوندی یارمەتی حوسیەكان دەدات و هەر حەفتەێك كە سەفەری هەوایی بوونی هەیە ئێمە ئەو سەفەرانە پێ و شوێن دەگرین و لەمەر یارمەتی رژێمی ئاخوندی بە حوسیەكانی یەمەن زانیاری تەواومان هەیە. جێگەی باسە كە جان كێری وتی، رژێمی ئاخوندی دەبێت ئەوە بزانێت كە كاتێك ئاسایشی ناوچەكە تێك دەدات و لە سنووری وڵاتان شەرئەنگێزی دەكات، ئەمریكا دەست بەستراو نابێت.









ناردنی دوو كەشتی شەركەری رژێمی ئاخوندی بۆ یەمەن
هەواڵدەرییەكانی سەر بە رژێمی ئاخوندی دوێنی چوارشەممە 19ی خاكەلێوە بڵاویان كردەوە كە رژێمی ئاخوندی دوو كەشتی شەركەری رەوانەی كەنداوی عەدەن و گەروی باب لمندەب كردووە. بە پێی راپۆرتی هەواڵدەرییەكان، حەبیب للاە سەیاری سەركردەی هێزی دەریایی ئەرتەشی رژێمی ئاخوندی لە وتووێژ لەگەڵ تەلەفزیۆنی ئینگلیسی زمانی رژێم، پرس تی وی، دوێنی چوارشەممە 19ی خاكەلێوە رایگەیاند، ئامانج لە ناردنی ئەو دوو كەشتییە پاراستنی ئەمنییەتی هێڵی گواستنەوەی كەشتیرانی و پارێزگاری لە بەرژەوەندی كۆماری ئیسلامی ئێرانە. بە پێی وتەی ناوبراوو مەئموریەتی ئەو كەشتییانە سێ مانگە.








هۆشداری وەزیری دەرەوەی ئیمارات لەمەر دەستێوەردانەكانی رژێم لە یەمەن
شێخ عەبدۆللا بن زاید وەزیری دەرەوەی ئیمارات لە كۆنفەرانسێكی هاوبەشی خەبەری لەگەڵ هاوتا یەمەنییەكەی خۆی ریاز یاسین لەمەر پاڵپشتیكردنی رژێمی ئاخوندی لە حوسیەكانی یەمەن هۆشداری دا. بە پێی راپۆرتی هەواڵدەرییەكان، وەزیری دەرەوەی ئیمارات وتی، رژێمی ئاخوندی هەوڵ دەدات شۆرشی خۆی هەناردەی وڵاتانی ناوچەكە بكات و دەستێوەردانەكانی تەنیا یەمەن لە خۆ ناگرێت. رێژەێكی زۆر لە حوسیەكانی یەمەن لە ئێران راهێنانیان پێ كراوە و هێزەكانی سوپای پاسدارانیش لە یەمەن چالاكی نیزامی بەرێوە دەبەن. جێگەی باسە كە ناوبراو وتی، كرداری حوسیەكان ئێمەی ناچار بە دژكردەوە كرد و ناتوانین مەترسی ئیستراتژیك لەسەر وڵاتانی كەنداو قبووڵ بكەین.








ریاز یاسین: رژێمی ئاخوندی بەكرێگیراو رەوانەی یەمەن دەكات
وەزیری دەرەوەی یەەن رایگەیاند، رژێمی ئاخوندی ئێران بەكرێگیراوانی خۆی رەوانەی یەمەن دەكات. بە پێی راپۆرتی هەواڵدەرییەكان، ریاز یاسین وەزیری دەرەوەی یەمەن لە كونفەرانسێكی خەبری هاوبەش لەگەڵ هاوتا  ئیماراتییەكەی خۆی رایگەیاند، رژێمی ئاخوندی لە ماوەی رابردووودا لە هەوڵی نانەوەی بشێوی لە یەمەندا بووە. بە پێی ئەم راپۆرتە، ناوبراوو ئاماژەی كرد كە، دەستێوەردانەكانی رژێمی ئاخوندی لە ناوچەكە و بە تایبەت لە یەمەن شتێكی نوێ نییە بەڵكوو لە ماوەی ساڵانی رابردوو لە رێگای ناردنی بەكرێگیراو و كەشتی بۆ یەمەن درێژەی پێداوە.








خامنه‌یی: نه‌ رای ئه‌رێنیم هه‌یه‌، نه‌ رای نه‌رێنی
عەلی خامنەیی ویلایەت فەقێهی رژێمی ئاخوندی ئێران بۆ یه‌كه‌مجار دوای رێككه‌وتنی لۆزان له‌ نێوان وڵاته‌كه‌ی و وڵاتانی ١+٥ هه‌ڵوێستی خۆی راگه‌یاند. بە پێی راپۆرتی هەواڵدەرییەكان، خامنه‌یی ئه‌مڕۆ پێنج شه‌ممه‌ 20ی خاكەلێوەی 1394، رایگه‌یاند: "ده‌پرسن بۆ تا ئێستا هه‌ڵوێستم نه‌بووه‌، تا ئێستا هه‌ڵوێستگرتن مانای نه‌بووه‌، به‌رپرسان ده‌ڵێن هێشتا هیچ ئیمزانه‌كراوه‌و ئه‌وه‌شی كراوه‌ ته‌نها رێككه‌وتنێكی سه‌ره‌تاییه‌، تا ئه‌م شوێنه‌ی ئێستا من نه‌ رای ئه‌رێنیم هه‌یه‌ و نه‌ رای نه‌رێنی". وتیشی: "گرنگ ورده‌كارییه‌كانه‌، له‌وانه‌یه‌ لایه‌نی به‌رانبه‌ر كه‌ هه‌میشه‌ به‌ڵێنه‌كانی نه‌بردووه‌ته‌سه‌ر، بیه‌وێت له‌ ورده‌كارییه‌‌كاندا ئابڵۆقه‌مان بدات، ئه‌وه‌ش كه‌ كه‌سانێك دێن و پیرۆزبایی له‌ من و كه‌سانێكی دیكه‌ ده‌كه‌ن زۆر بێمانایه‌، ئه‌وه‌ی تا ئێستا روویداوه‌ نه‌ رێككه‌وتن گه‌ره‌نتی ده‌كات و نه‌ ته‌نانه‌ت گه‌ره‌نتی ئه‌وه‌ ده‌كات كه‌ وتووێژه‌كان بگاته‌ ئه‌نجام". خامنەیی هەر وەها راشیگه‌یاند: "من هیچكات ئومێدم به‌ وتووێژو دانوستان له‌گه‌ڵ ئه‌مریكا نه‌بووه‌، وێڕای ئه‌مه‌ش به‌ڵام مۆڵه‌تی ئه‌م دانوستانه‌م داو له‌ وه‌فدی دانوستانكاری ئێرانیش پشتیوانی ته‌واوم كردووه‌و ده‌یكه‌م، له‌گه‌ڵ رێككه‌وتنێكیشدام كه‌ به‌رژه‌وه‌ندی گه‌لی ئێران دابین بكات، به‌ڵام رێكنه‌كه‌وتن هه‌زار شه‌ره‌فی هه‌یه‌ به‌سه‌ر رێككه‌وتنێكدا كه‌ خراپ بێت".

ڕێکه‌وت: 2015-04-09 13:44:10
به‌شی ( هەواڵەكانی كورستان، ئێران و جیهان 20ی خاكەلێوەی 1394 )