__ سێ لاوی سەقزی و نەغەدەیی لە ریزی داعشدا کوژران__ کرانه‌وه‌ی به‌شی زمان و وێژه‌ی کوردی له‌ زانکۆی کوردستان __ سەڵاحەدین دەمیرتاش: بەربەستی بەردەم پەرلەمان تێدەپەڕێنین__ هه‌ڵوێستی رژێمی ئاخوندی له‌سه‌ر سه‌پاندنی گه‌مارۆی نوێی رۆژئاوا __ دژكردەوەی ئۆباما بە وتەكانی خامنەیی__ ساڵحی: دوای رێكەوتنی كۆتایی دوو جۆر گەمارۆ دەمێنێتەوە__ ئەمریكا: هەڵپەساردنی گەمارۆكان قۆناغ بە قۆناغ دەبێت__ كوژرانی دوو ئەندامی سوپای پاسداران

سێ لاوی سەقزی و نەغەدەیی لە ریزی داعشدا کوژران
 سێ لاوی کوردی خەڵکی شارەکانی سەقز و نەغەدە کە لەژێر ناوی "هیجرەت و جیهاد" روویان لە ریزەکانی داعش کردبوو، لە میانەی تێکهەڵچوونەکانی چەکدارانی داعش لەگەڵ سوپای عێراقدا کوژراون. بەپێی راپۆرتی هەواڵدەریی کوردپا، لەماوەی چەند رۆژی رابردوودا دوو لاوی خەڵکی شاری سەقز، کە ماوەی نزیک مانگێک پێش ئێستا چووبوونە نێو داعش، لە شەڕەکانی ناوچەی تکریتدا کوژراون.ئەو دوو لاوە کوردە، کە برای یەکتر بوون ناوەکانیان سەعدی قارەمانی تەمەن ٢٦ ساڵ و خێزاندار و باوکی دوومنداڵ و دانیشتووی گەڕەکی شاناز و عیرفان قارەمانی تەمەن ٢٢ ساڵ و دانیشتووی گەرەکی سیلۆی شاری سەقز بوون.دەگوترێ کە هاووڵاتییان ئیزنیان بە بنەماڵەکەی نەداوە کە لە مزگەوتەکاندا پرسە بۆ کوڕەکانیان بگرن. هەروەها لاوێکی خەڵكی شاری نەغەدە بەناوی "ئیدریس" کە پەیجەکانی سەربە داعش بە "ئەبوو محەمەد خۆراسانی" ناویان بردووە، لە تێکهەڵچوون لە گەڵ سوپای عێراقدا کوژرا. هەواڵی کوژرانی ئەو لاوە نەغەدەییە، رۆژی سێ‌شەممەی ئەم حەفتەیە لەلایەن چەکدارە کوردەکانی نێو داعشەوە لە پەیجەکانیاندا بڵاو بۆتەوە.








کرانه‌وه‌ی به‌شی زمان و وێژه‌ی کوردی له‌ زانکۆی کوردستان 
سه‌رۆکی زانکۆی کوردستان وتی: به‌شی زمان و وێژه‌ی کوردی له‌ زانکۆی کوردستان ده‌کرێته‌وه‌ و مانگی ڕه‌زبه‌ری ئه‌مساڵ خوێندکار وه‌رده‌گرێت. به‌پێی راپۆرتی هەوتاڵدەرییەكان، دوکتۆر فه‌ردین ئه‌خلاقیان ڕایگه‌یاند: به‌ ڕاگه‌یاندنی چارتی نوێی زانکۆی کوردستان له‌ ڕۆژه‌کانی کۆتایی ساڵی ڕابردوو، تێده‌کۆشین به‌پێی ئه‌م چارته‌ که‌موکوڕییه‌کانی زانکۆ له‌ بواری هێزی مرۆڤی و کارناس و لێژنه‌ی زانستی قه‌ره‌بوو بکرێته‌وه‌. ناوبراو له‌ کرانه‌وه‌ی به‌شی زمان و وێژه‌ی کوردی له‌ مانگی ڕه‌زبه‌ری ئه‌مساڵ هه‌واڵی دا و زیادیشی کرد: به‌ سه‌رنجدان به‌ ده‌وڵه‌مه‌ندی زمان و وێژه‌ی کوردی و پێشوازی خه‌ڵک و لاوان و فه‌رهه‌نگ دۆستان له‌م کاره‌ و جه‌ختکردنه‌وه‌ی له‌سه‌ر زمانی کوردی وه‌کوو سه‌رمایه‌یه‌کی نه‌ته‌وه‌یی، دانانی به‌شی زمان و وێژه‌ی کوردی له‌ ڕیزی کار و به‌رنامه‌کانی زانکۆی کوردستان دایه‌.








سەڵاحەدین دەمیرتاش: بەربەستی بەردەم پەرلەمان تێدەپەڕێنین
هاوسەرۆكی هەدەپە رایگەیاند: "لە دڵەوە باوەڕمان وایە كە بە بەدەستهێنانی دەنگێكی زۆر و پشتیوانی گەل، بەربەستی بەردەم پەرلەمان تێدەپەڕێنین". بە پێی راپۆرتی هەواڵدەرییەكان، سەڵاحەدین دەمیرتاش، هاوسەرۆكی پارتی دیموكراتی گەلان (هەدەپە) بە ئاژانسی ئەنادۆڵی رایگەیاندووە : " لە دڵەوە باوەڕمان وایە كە بە بەدەستهێنانی دەنگێكی زۆر و پشتیوانی گەل، بەربەستی بەردەم پەرلەمان تێدەپەڕێنین."ئاماژەی بەوەشكرد، كە هەفتەی داهاتوو دەست دەكرێت بە كەمپینی هەڵبژاردن، وتیشی " لەگەڵ خستنەڕووی كاندیدەكانمان لە ئەنكارە، دەستدەكەین بە كارەكانمان ". بە وتەی دەمیرتاش، هەدەپە سیاسەتێك بەرهەم دەهێنێت كە شایستە بێت و بەوەش كێشە سەرەكییەكانی توركیا چارەسەر دەكرێت و ئەگەر هەدەپە ئەم دید و روانگە فراوان و ئاشتییەی بەباشی بە خەڵك بگەیەنێت، كێشەی تیپەڕاندنی بەربەستی پەرلەمانی نامێنێت. لە چوارچێوەی كارەكانی هەڵبژاردندا، هەدەپە پلانی داناوە سەردانی هەر 81 پارێزگاكەی توركیا و زۆربەی شار و شارۆچكەكان بكەن.








هه‌ڵوێستی رژێمی ئاخوندی له‌سه‌ر سه‌پاندنی گه‌مارۆی نوێی رۆژئاوا 
رژێمی ئاخوندی لە دوای سەپاندنی گەمارۆی نوێی وڵاتانی یەكیەتی ئورووپا دژكردەوەیان نیشان دا. وته‌بێژی وه‌زاره‌تی ده‌ره‌وه‌ی رژێمی ئاخوندی ئێران هه‌نگاوی یه‌کێتی ئه‌ورووپا بۆ سه‌پاندنی گه‌مارۆی نوێ به‌ سه‌ر بانکێک و چه‌ندین کۆمپانیای ئێرانی به‌ پێداگری له‌سه‌ر هه‌ڵوێستێکی نایاسایی وه‌سف کرد و به‌ جێ پرسیاری زانی. به‌پێی راپۆرتی هەواڵدەرییەكان،  مه‌رزییه‌ ئه‌فخه‌م به‌ ئاماژه‌ به‌وه‌ی که‌ ئه‌م کاره‌ سیاسی و به‌ پێچه‌وانه‌ی نیازپاکییه‌، وتی: له‌ بارودۆخێکدا که‌ دانوستانه‌کان به‌رده‌وامه‌ و هه‌وڵه‌کان بۆ گه‌یشتن به‌ ڕێککه‌وتنێکی گشتگیر له‌ئارادایه‌، ئه‌م هه‌نگاوه‌ی یه‌کێتی ئه‌ورووپا له‌ که‌شێکی نوێی که‌ به‌هۆی دانوستانه‌کانی ئه‌مدواییه‌ی لۆزان دروست بووه‌، سازێنه‌ر نییه‌. وته‌بێژی وه‌زاره‌تی ده‌ره‌وه‌ی ئێران به‌ ئاماژه‌ به‌ حوکمه‌ ده‌رکراوه‌کان له‌لایه‌ن دادگه‌کانی ئه‌ورووپا له‌سه‌ر به‌ڵگه‌مه‌ندبوونی سکاڵای بانک و کۆمپانیا ئێرانییه‌کان، جه‌ختی کرد: به‌رده‌وامیی ئاوڕنه‌دانه‌وه‌ی یه‌کێتی ئه‌ورووپا له‌سه‌ر‌ بڕیاری دادگه‌کانی ئه‌ورووپا جێ داخ و ئه‌سه‌فه‌ و ئه‌م جۆره‌ بڕیارانه‌ هیچ یارمه‌تییه‌ک به‌ ڕه‌وتی ئێستا نادات و ده‌بێته‌ هۆی دابه‌زینی متمانه‌ له‌ نێوان هه‌ردوولا. یه‌کێتی ئه‌ورووپا ڕۆژی ڕابردوو جارێکی دیکه‌ گه‌مارۆکانی دژی بانکێک و 32 کۆمپانیای که‌شتی ڕانی ئێران سه‌پاند. 








دژكردەوەی ئۆباما بە وتەكانی خامنەیی
تەلەفزیۆنی سی ئێن ئێن لە راپۆرتێك لە سەر قسەكانی رۆژی پێنجشەممەی رابردووی خامنەیی و رۆحانی لە پەیوەند بە رێكەوتنی ناوكەیی وتی، حەفتەێك دوای رێكەوتن لەسەر چوارچێوەی كاری لەمەر رێكەوتنی ناوكەیی، وادیارە كە رژێمی ئاخوندی لە تێگەیشتنی ئەمریكا لەو رێكەوتنە بە شێوەەی بەرچاو مەودای گرتووە. بە پێی راپۆرتی هەواڵدەرییەكان، ئۆباما لە سەفەرەكەی خۆیدا بۆ جامائیكا بەو وتانە دژكردەوەی نیشان دا و رایگەیاند، معیار بۆ ئەو رێكەوتنە بەرێوەبردنی خاڵەكانە و وتووێژەكانی 2 تا 3ی مانگی داهاتوو زۆر گرنگە، دەبێت رێكەوتنێك واژۆ بكرێت كە بە جیهان دڵنیایی بدات كە رژێمی ئاخوندی دەستی بە چەكی ناوكەیی راناگات. بە پێی ئەم راپۆرتە، تەلەفزیۆنی سی ئێن ئێن رایگەیاندووە كە تاكوو گەیشتن بە رێكەوتنێكی كۆتایی رێگاێكی دوور و درێژ ماوە، كێشەكان بە شێوەێكن كە چاوەروان دەكرێت هیچ رێكەوتنێكی كۆتایی نەێتە ئاراوە.








ساڵحی: دوای رێكەوتنی كۆتایی دوو جۆر گەمارۆ دەمێنێتەوە
عەلی ئەكبەر ساڵحی سەرۆك سازمانی ئێنرژی ئەتۆمی رژێم شەوی رابردوو لە وتووێژ لەگەڵ تەلەفزیۆنی رژێمی ئاخوندی رایگەیاند، لە ئەگەری رێكەوتنی كۆتایی دوو چۆر گەمارۆ دەمێنێتەوە. بە پێی راپۆرتی هەواڵدەرییەكان، ساڵحی شەوی رابردوو 20ی خاكەلێوە رایگەیاند، بە رێكەوتنی كۆتایی گەمارۆ ئابووریەكان لادەبرێن بەڵام دوو شۆر گەمارۆ دەمێنێتەوە. ئەمانە گەمارۆی ناوكەیین كە بریتین لە فرۆشی كەیكی زەرد و كرین و فرۆشتنی پێداویستی و كەل و پەلێكە كاربۆردی دوو گانەی نیزامی و غەیرە نیزامییان هەیە.








ئەمریكا: هەڵپەساردنی گەمارۆكان قۆناغ بە قۆناغ دەبێت
دەوڵەتی ئەمریكا رایگەیاند كە هەڵپەساردنی گەمارۆكانی سەر رژێمی ئاخوندی بە شێوەی قۆناغ بە قۆناغ دەبێت. بە پێی راپۆرتی هەواڵدەرییەكان، هەواڵدەری فەرانسە بڵاوی كردەوەكە ئەم هەڵوێستەی ئەمریكا دوای ئەوە دێت كە رژێمی ئاخوندی داوای كردبوو كە گەمارۆكان لەگەڵ بەرێوە چوونی رێكەوتنەكە لاببرێن. بە پێی ئەم راپۆرتە، جف راتكی یەكێك لە تەبێژانی وەزارەتی دەرەوەی ئەمریكا وتی، ئێمە نامانەوێت كە بە هەر بەیاننامەێكی بەرپرسانی ئێرانی وڵام بدەینەوە. گەمارۆكان بە پێی راستی كردارەكان و كاتێكە رژێمی ئاخوندی بە پەیمانەكانی خۆی پابەند بوو بە شێوەی قۆناغ بە قۆناغ هەڵدەسپێردرێت.








كوژرانی دوو ئەندامی سوپای پاسداران
دوو ئەندامی سوپای پاسداران لە پارێزگای سیستان و بەلووچستان لە لایەن كەسانی چەكدارەوە كوژران. بە پێی راپۆرتی هەواڵدەرییەكان، دوو كەس لە ئەندامانی مۆخابراتی سوپای پاسدارانی رژێمی ئاخوندی لە باشووری سیستان و بەلووچستان لە لایەن چەند كەسێكی چەكدارەوە كوژران. بە پێی ئەم راپۆرتە، ئەو دوو ئەندامەی سوپای پاسداران نیوەرۆی پێنجشەممە 20ی خاكەلێوە لە كاتی هاتنە خوارەوە لە كێو لە شاری مێهرستان لە لایەن چەند كەسێكی چەكدارەوە كوژراون. جێگەی باسە كە ناوی ئەو دوو پاسدارە، مۆرتەزا محەمەد باقری و مەحمەد محەمەدی سلیمانی راگەێندراوە.

ڕێکه‌وت: 2015-04-10 12:22:37
به‌شی ( هەواڵەكانی كوردستان، ئێران و جیهان 21ی خاكەلێوەی 1394 )