__ مامۆستایانی ناڕازی لە كوردستان، جارێكی دیكە هاتنەوە سەرشەقام__ لە بەرەبەری مانگرتنی مامۆستایاندا، ٨ مامۆستا لە سەقز بانگهێشتی ئیتلاعات كران__ دوو چالاكی كرێكاریی لە سنە حوكمی زیندان و قامچی لێدانیان بەسەردا سەپا__ لە ڕێوڕەسمێكدا لە ناوچەی سەقز، یادی خاتووزین كرایەوە__ دەركرانی ٦٤ خوێندكاریی ئێرانی بەتاوانی ئەمنیەتی__ لە كەمتر لە 3 هەفتەی رابردوو 55 كەس لە ئێران ئێعدام كراون__ 40 چەكداری‌ داعش كوژران__ ژمارەی كوژراوانی سوریا 220 هەزاری كەسی تێپەڕاند__ حوسییەكان دان بەشكستدا دەنێن و داوای گفتوگۆ دەكەن__ گوێتان زۆر پاك بكەنەوە توشی ئەم نەخۆشیە دەبن


مامۆستایانی ناڕازی لە كوردستان، جارێكی دیكە هاتنەوە سەرشەقام
لە نزیك بە تێكڕای شارەكانی كوردستان، مامۆستایان بۆ جارێكی دیكە و بە مەبەستی ناڕەزایەتی دەربڕین بە هەڵاواردنی مامۆستایان لە لایەن حكوومەتی ئێرانەوە، هاتنەوە سەر شەقام. بەپێی راپۆرتی هەواڵدەریی كوردپا، ئەمرۆ پێنج‌شەممە رێكەوتی ٢٧ی خاكەلێوە، بەشێكی بەرچاو لە مامۆستایانی كورد لە شارەكانی ئێران و كوردستان، سەرلەنوێ لەبەردەم ئیدارەی پەروەردەی شارەكاندا كۆبوونەوەو خوازی كۆتایی هێنان بە هەڵاوارن لە هەمبەر بوون.جێبەجێ كردنی پەسندكراوی "زیادكردنی مووچەی كارمەندانی دەوڵەت" و پەراوێز خستن و هەڵاواردنی مامۆستایان، خوێندنی قوتابیان بە زمانی زگماكی، هۆكارەكانی مانگرتنی مامۆستایان لەسەرتاسەری ئێراندا بووە.پرسی مووچەی مامۆستایان، كە سەرەكی‌ترین خواستی مامۆستایانی ناڕازییەو لەگەڵ ئەوەشدا خوازیاری ئەوە بوونە كە لە بودجەی ئەمساڵی وەزارەتی پەروەردەدا، لەسەدا ٧٠ زیاد بكرێت".مامۆستایانی كوردستان و ئێران، لە رێكەوتی ٣ و ١٠ی رەشەمەی ساڵی رابردووشدا سەبارەت بە خواستە سینفییەكانیان هاتنە سەرشەقام، بەڵام سەرەڕای مانگرتن و ناڕەزایەتی دەربڕین، هیچ گۆڕانێك لە دۆخی ژیان و مووچەی مامۆستایاندا پێك نەهاتووە.مامۆستایانی ناڕزای لە شاری دیواندەرە بە بەدەستەوە گرتنی پلاكارد و نووسراوەی وەكوو "لاواز كردنی فەرهەنگیان وە مامۆستایان، رووخاندنی فەرهەنگی كۆمەڵگەیە"، "ئەم بێدەنگییە لە ناڕەزایەتییەوە سەرچاوە دەگرێ" و "بەڵێنیی بێ بنەما و بێ ناوەرۆك، دەردی ئێمە چارە ناكات"، لە بەردەم ئیدارەی پەروەردەی ئەو شارەدا كۆبوونەوە.هەروەها مامۆستایان لە كرماشانیش وێڕای هەڵگرتنی نووسراوەو پلاكارد، بە شێوەی هێماننە و بێدەنگ لەبەردەم ئیدارەی پەروەردەدا كۆبوونەوەیان پێكهێناو خوازیاری جیبەجێ كرانی خواستەكانیان لەلایەن حكوومەتی ئیسلامی و ئیدارەی پەروەردەوە بوون.هاوكات لە شارەكانی سەقز، ئیلام، بیجاڕ، پیرانشار، ئەیوان، قوروە، مەریوان و سنە و چەندین شاری دیكە، مامۆستایان بە شێوەی بەرین لەبەردەم ئیدارەی پەروەردەی شارەكاندا كۆبوونەوە خوازیاری دەستەبسەركردنی مافە سینفییەكانی توێژی مامۆستا لە كۆمەڵگەی ئێراندا و كوردستاندا بوون.لە قوتابخانەكانی شاری سەقز، قوتابیانیش، پەیوەستی رەوتی مانگرتنەكە بوون و بە هەڵگرتنی نووسراوە، خوازیاری خوێندن بە زمانی زگماكی بوون.مامۆستایانی ناڕازیش لە خۆراسانی باكوور، كە بەشێكی بەرچاو لە شارەكانی ئەو ئوستانە هاووڵاتیانی كورد پێكی دینن، بە هەڵگرتنی نووسراوەی وەك "بێدەنگیی ئێمە نیشانەی رەزای بونوی ئێمە نییە"، "لەسەر تەختەی پۆلەكان بنووسین یەك و یەك هاوتای یەكتر نین"، خوازیاری ئازادیی مامۆستایانی زیندانی كراو و هەڵوەشانەوەی حوكمی دەزگای قەزایی لەسەر مامۆستایانی دەستبەسەركراو و زیندانی بوون.هەروەها مۆستایان لە ئوستانی سیستان و بەلووچستانیش لە حەرەكەتێكی هاوشێوەدا بە هەڵگرتنی پلاكارد و نووسراوە، خوازیاری دەستەبەربوونی خواست و مافە رەواكانیان بوون.





لە بەرەبەری مانگرتنی مامۆستایاندا، ٨ مامۆستا لە سەقز بانگهێشتی ئیتلاعات كران
لە بەرەبەری مانگرتنی مامۆستایان لە سەرتاسەری ئێراندا، ٨ مامۆستای كورد لە قوتابخانەكانی شاری سەقز، بانگهێشتی ستادی خەبەریی ئیدارەی ئیتلاعاتی شاری سەقز كران.بەپێی راپۆرتی هەواڵدەریی كوردپا، لە كاتێكدا بڕیاربوو مامۆستایانی ئێران و كوردستان ئەمڕۆ پێنج‌شەممە ڕێكەوتی ٢٧ی خاكەلێوە خۆپیشاندانی گشتی لەشارەكان بەڕێوە ببەن، ئیدارەی ئیتلاعات ژمارەیەك مامۆستای كوردی لە شاری سەقز بانگهێشت كرد. بڕیاربوو ئەمڕۆ پێنج‌شەممە، رێكەوتی ٢٧ی خاكەلێوە، لە بەردەم ئیدارەی پەروەردەی شاری سەقزدا مانگرتنی مامۆستایانی ناڕازی بەڕێوە بچێت.بە گوتەی سەرچاوەیەكی ئاگادار، هێزەكانی سەربە وەزارەتی ئیتلاعات شەوی چوارشەممە لە رێگەی تەلەفۆنەوە ژمارەیەك مامۆستای شاری سەقزیان بانگهێشت كردووەو هەڕەشەیان لێكردوون.ستادی خەبەریی شاری سەقز ٨ كەس لە مامۆستایانی شاری سەقز بەناوەكانی (حەسەن رەحیمیان، خالید عەبدوڵڵاهی، سلێمان عەبدی، تاهیر قادری، حامید شێخی، عەزیز مەرزی، ئیبراهیم حوسینی و سمایل رێحانی)ی بانگهێشتی ئەو ناوەندە ئەمنییە كردبوو.لەماوەی چەند مانگی رابردوودا، مامۆستایانی كورد هاوڕێ لەگەڵ مامۆستایانی سەرتاسەری ئێران و بە نیشانەی ناڕەزایەتی دەربڕین بە دۆخی نالەباری ئابووری و ژیانی خۆیان، چەندین جار مانیان گرت و خوازیاری كۆتایی هێنان بە هەڵاواردنكاریی حكوومەت لەهەمبەر مامۆستایاندا بوون.دوو رۆژ پێش ئێستا ١٢ كەس لە زیندانیانی سیاسیی زیندانی رەجایی شاری كەرەج، لە بەیاننامەیەكدا خوازیاری پیشتیوانیی سەرجەم چین و توێژەكانی كۆمەڵگە لە مامۆستایان بوون و رایانگەیاندبوو: لەم دۆخەی ئێستادا، كە بزاوتی كۆمەڵایەتی و ناڕەزایەتی وەكوو تاقە رێگەی رزگاربوون لەدەست زوڵم و سەركوتی حكوومەتی ئيران بەرەو پێشەوە دەچێت، نابێ ئیزن بدرێ كە ئەم رژیمە فێلبازە، بیر و زەینی ئێمە بەلاڕیدا ببات".




دوو چالاكی كرێكاریی لە سنە حوكمی زیندان و قامچی لێدانیان بەسەردا سەپا
2 كەس لە نوێنەرە یاساییەكانی كرێكارانی نانەواییەكانی شاری سنە بە 5 ساڵ زیندانی تەعزیری و 30 زەربە قامچی مەحكوم كران. حوكمی ئەو چالاكە كرێكارییە بە بڕیاری قازیی گۆڕاوە بە 5 ساڵ زیندانی هەڵپەسێردراو.بە پێی راپۆرتی هەواڵنێریی حكومەتیی ئیلنا، “یەدوڵڵا سەمەدی و ئێقباڵ شەبانی” كە بە ریز سكرتێر و لێپرسەری ئەنجومەنی پیشەیی كرێكارانی نانەواییەكانی شاری سنە و دەروبەرین سەرەتا مانگی رێبەندانی ساڵی رابردوو بە تۆمەتی “تێكدانی نەزم” لە دادگای ئینقلاب و سزادانی سنە دادگایی كران.دەنگی مەحكوم كردنی ئەو 2 چالاكە كرێكارییە كۆتاییەكانی مانگی رەشەممەی ساڵی رابردوو پێیان راگەیەندرا، بەڵام تا ئێستا بە نووسراو پێیان نەدراوە.ئەو 2 چالاكە كرێكارییە دەڵێن: دادستان پاش كۆبوونەوەی كۆمەڵێ لە خەڵكی شاری سنە لە رێكەوتی 16ی مانگی رەزبەری ساڵی رابردوو بە مەبەستی پشتیوانیی لە خەڵكی خۆڕاگری كۆبانێ لە رۆژئاوای كوردستان دژی هێرشەكانی گرووپی داعش، سكاڵایان لەسەریان تۆمار كردووە.بە پێی ئەو راپۆرتە، دادستان لە رۆژیی دادگایی كردنیاندا ئیدعای كردووە وێنەی لە بەردەستدایە كە دەریدەخات ئەو 2 چالاكە كرێكارییە لەو كۆبوونەوەیەدا ئامادە بوون بەڵام ئەو وێنەیە لە دادگا پیشان نەدراوە. لە لایەكی دیكەوە سەمەدی و شەبانی ئیدعایان كردووە كە هاوڵات لەگەڵ ئەو كۆبوونەوەیە هاوڕێ لەگەڵ باقی ئەندامەكانیان لە كۆبوونەوەی لیژنەی بەڕێوەبەرایەتی ئەنجومەنی پیشەیی كرێكارانی نانەواییەكانی سنە و دەوروبەری بەشدار بوون و بۆ سەلماندنی ئەم ئیدعایەش لانیكەم 4 شایەتیان هەیە كە لەو كۆبوونەوەدا ئامادەبوون.سەمەدی لەمبارەوە بە ئیلنای وتووە: جاری یەكەم بە مەبەستی لێپرسینەوە بانگهێشت كراوە و پێی وابووە هۆكاری بانگهێشتەكە بەشداریی لە كۆبوونەوەی پیشەیی كرێكارانی نانەواییەكاندایە.ئەو هەروەها باسی لەوە كردووە كە مەئمورەكان لە كاتی لێپرسینەوەدا هەڵسووكەوتێكی نەشیاویان هەبووە.دەنگی دادگای سەرەتایی سەمەدی و شەبانی پاش یەكەم كۆبوونەوەی دادگایی و بە بێ ئامادەبوونی شایەت دەركراوە. ئەو 2 چالاكە كرێكارییەش دەیانەوێ بەرامبەر بەو دەنگە ناڕەزایی دەرببڕن.






لە ڕێوڕەسمێكدا لە ناوچەی سەقز، یادی خاتووزین كرایەوە
لە ڕێوڕەسمێكدا لە ناوچەی سەقز، یادی خاتووزین كرایەوە+وێنەئاژانسی كوردپا: لە ڕێوڕەسمێكدا بە بەشداریی خەڵكی گوندەكانی ناوچەی گەوركی سەقز، یادی خاتووزین ژنە هونەرمەندی كوردی پەیكەرتاشی خەڵكی ئەو ناوچەیە، كرایەوە.بەپێی راپۆرتی هەواڵدەریی كوردپا، رۆژی چوارشەممە رێكەوتی ٢٦ی خاكەلێوە، لە گوندی قاراوای خواروو، فستیڤاڵێك بۆ یادی خاتوون ساڵحی ناسراو بە خاتووزین، ژنە هونەرمەندی دەستڕەنگینی پەیكەرتاش و گۆزەكەری كورد بەڕێوەچوو.لە دەستپێكی رێوڕەسمەكەدا وێنەیەكەی خاتووزین، كە لەلایەن هونەرمەندیكی سەقزییەوە لە تابلۆیەكدا نەخشێندرابوو، خرایە روو.نوێنەری مەجلیس لە شارەكانی سەقز و بانە، كە بەشداریی لە كردنەوەی رێوڕەسمەكەدا كردبوو، داوای كرد كە شەقامێك لە شاری سەقز بەناوی خاتووزینەوە بكرێت و تەمری شاری سەقزیش وێنەی ئەو ژنە هونەرمەندە كوردەی لەسەر چاپ بكرێت.هەروەها لە بەشێكی دیكەی ئەو رێوڕەسمەدا، هونەرمەندانی دەستڕەنگینی ناوچەی سەقز، بەرهەمەكانیان لە چەندین بەشدا پیشانی بەشدارانی رێوڕەسمەكە دا.خاتوون ساڵحی، كە ژنە هونەرمەندێكی نەخوێندەواری خەڵكی گوندی بۆگەبەسی لە ناوچەی گەوركی سەقز بوو، لەماوەی كاری گۆزەكەری و پەیكەرتاشیی خۆیدا رۆحی بە بەر گڵەسوورەدا دەكرد و دیان بەرهەمی ناوازەی لە پەیكەری ئاژەڵ خولقاند.خاتووزین، ٣١ ساڵ پیش مردنی خۆی، بەهۆی مردنی هاوسەرەكەیەوە بۆتە سەرپەرەستیی ماڵ و بەم هۆیەوە، لە رێگەی گۆزەكەری (سفالگری)یەوە دروست كردنی، دیزە، تەنوور و دەرخۆنە، پەیكەری ئاژەڵی كێوی و ماڵی و فرۆشتنی ئەو بەرهەمانە، بژیویی ژیانی خۆی و ٦ منداڵەكەی دابین دەكرد.له سەر ژیان و كار و بەرهەمەكانی خاتوون ساڵحی ناسراو بە خاتووزین، فیلمێك له دەرهێنانی "مەجید ماهیچی" به ناوی "خاتووزین" ساز كراوەو هەروەها هەنووكه بەشێك له بەرهەمه دەستكردەكانی خاتووزین له مۆزەخانەی شاری سنەدا پارێزراوه.




دەركرانی ٦٤ خوێندكاریی ئێرانی بەتاوانی ئەمنیەتی
پایەبەرزترین ناوەندی ئەمنیەتیی نۆروێژ، زانكۆ دەوڵەتییەكانی ئێرانی بە هەوڵی سیستماتیك بەمەبەستی ناردنی خوێندكاری سیخوڕ بۆ ئەو وڵاتە تاوانبار كرد. پۆلیسی ئەمنیەتیی نۆروێژ بە فەرمی رایگەیاندووە كە خوێندكارانی ئێرانی لەكاتی خوێندن لەناوەندە فێركارییەكانی ئەو وڵاتە، سەرقاڵی كۆكردنەوەی زانیاری بەمەبەستی دروستكردنی چەكە كۆمەڵكوژەكانن.ئەو تاوانە لەلایەن بەرپرسی پێوەندییەكانی پۆلیسی نۆورێژ(PST) ـەوە راگەیەندراوە.رۆژنامەی " ێ‌فتن پوستن" لەزاری بەپرسانی ی نۆروێژەوە بڵاوی كرووەتەوە، زانكۆكانی ئێران بە هاوكاری دەوڵەت وبەشێوەی رێكخراو بڕوانەمەی ساختە بۆ خوێندكاران دروست دەكەن.ئارنە كریستین لەدرێژەدا ئەو خوێندكارە دەركراونەی بەوە تۆمەتبار كردووە كە ویستوویانە گەمارۆ نێودەوڵەتییەكانی زانستی ـ تەكنیكی سەر ئێران بشكێنن.كاناڵی ٢ی نۆروێژ لە راپۆرتێكدا باسی لەدەركردنی ئەو ٦٤ خوێندكارەی ئاستی كارناسی باڵا و دوكتوڕا كردووە و رایگەیاندووە، چوونەسەری رێژەی خوێندكارانی ئێرانی لەرشتەی " فیزیكی هەستەیی"، ئێلكترۆنیك، مێتالۆژی و مكانیك هۆكاری ئەو گۆمان كردنە بووە.دەوڵەتی نۆروێژ خۆی لەهێنانی شوناسی ئەو خوێندكارانە بواردووە، بەڵام رایگەیاندووە ئەو ٦٤ كەسە لەهەوڵی وەدەست خستنی زانیاری لەسەر چەكە كۆمەڵكوژەكان بوون.لەحاڵی حازردا ٣٠٠ خوێندكاری ئێرانی لە نۆروێژ سەرقاڵی خوێندنن.پێشتریش دەوڵەتی هۆڵەند لە ساڵی ١٣٨٧ و ١٣٩١دا یاسایەكی تایبەتی سەبارەت بە خوێندنی خوێندكارانی ئێرانی لە وڵاتەكەیدا پەسند كردبوو.








لە كەمتر لە 3 هەفتەی رابردوو 55 كەس لە ئێران ئێعدام كراون
كۆمیتەی نێودەوڵەتیی دژ بە ئیعدام لە راگەیەندراوێكدا، وێڕای ڕاگەیاندنی هەواڵی ئێعدام كرانی 55 كەس لە زیندانە جیاجیاكانی ئێران لە ماوەی كەمتر لە 3 هەفتەدا، داوای لە ڕاگەیەنە فارسی زمانەكان كردووە تا كۆتایی بە بێدەنگیی خۆیان لە بەرامبەر ئەم بابەتەدا بێنن.لەم راگەیەندراوەدا هاتووە كە كۆماری ئیسلامی پاش ڕێككەوتنی لۆزان و خواردنەوەی جامی ژەهری دووهەم، دەستی بە كوشت‌و كوشتار لە نێو زیندانەكاندا كردووە. زۆربەی بنەماڵەی زیندانییان باس لە ئەگەری ئێعدامكرانی ڕۆڵەكانیان دەكەن‌و، كۆمەڵێك لەم بنەماڵانە دەڵێن كاربەدەستانی زیندان پێیان ڕاگەیاندوون بۆ دواجار و بە مەبەستی دوایین دیدار بچنە زیندان و سەردانی ئازیزانیان بكەن.لەم راپۆرتەدا هاتووە كە لە ماوەی ئەم مانگەدا 3 كەس لە زیندانی وەكیل ئابادی مەشهەد، كەسێك لە شیراز، 2 كەس لە زیندانی بووشێهر، كەسێك لە دیزڵ ئابادی كرماشان، كەسێكی دیكە لە زابۆل، 4 كەس لە شیراز، 2 كەس لە بەندەرعەبباس، 11 كەس لە رەجایی شار، 8 كەس لە كەرەج، 4 كەس لە عادڵ ئابادی شیراز، كەسێك لە مەهریز، 4 كەس لە زیندانی ئیسفەهان و 15 كەس لە قزڵحەسار لە ماوەی 3 حەوتوودا ئێعدام كراون.كۆمیتەی نێودەوڵەتیی دژ بە ئێعدام دەڵێ ڕزگار كردنی گیانی هەزاران كەسی مەحكووم بە ئێعدام لە سلوولە مەرگەكانی كۆماری ئیسلامیدا، ئەركی سەر شانی گشت ئەم كەسانەیە كە گوێیان لەم هەواڵانە دەبێ و لەم جینایەتانە ئاگادار دەكرێنەوە.




40 چەكداری‌ داعش كوژران
شەوی‌ رابردوو فرۆكە جەنگییەكانی‌ هاوپەیمانان بۆردوومانی‌ چەكدارانی‌ رێكخراوی تیرۆریستی داعشیان كردووە لە ناوچەی‌ نزیك ڤێلای‌ سمایل بەگ و ناوچەی‌ گەڕەكی‌ نەوت، لە ئەنجامی‌ بۆردوومانەكەشدا 40 چەكداری‌ داعش كوژران.عەقید عیسا زێوەیی، فەرماندەی‌ لیوای‌ 4ی‌ پیادە لە قەزای‌ شنگال، بە خەندانی‌ راگەیاند: "شەوی‌ رابردوو فرۆكە جەنگیەكانی‌ هاوپەیمانان بۆردوومانی‌ چەكدارانی‌ داعشیان كردووە لە ناوچەی‌ سمایل بەگ و گەڕەكی‌ نەوت لە شنگال".وتیشی‌" لەو بۆردوومانانەدا 40 چەكداری‌ داعش كوژران زیانێكی‌ زۆری‌ ماددیشیان بەركەوتووە".ئاماژەی‌ بەوەشكرد: "چەكدارانی‌ داعش تەرمی‌ كوژراوەكانیان بەرەو قەزای‌ تەلەعفەر گواستۆتەوە".هەروەها بەرەبەیانی ئەمڕۆ چەكدارانی رێكخراوی تیرۆریستی داعش هێرشیانكردە سەر سەنگەرەكانی هێزی پێشمەرگەی كوردستان لە میحوەری تلسقۆف و پێشمەرگەش ئازایانە شكستیان بە هێرشەكەی داعش هێنا و و بەپپێی‌ زانیارییەكانی‌ خەندان یازدە لاشەی چەكدارانی‌ داعش لە شوێنی شەڕەكە بەجێماون.غەیاس سورچی بەرپرسی راگەیاندنی مەڵبەندی یەكێتیی نیشتیمانیی كوردستان لە موسڵ بە خەندانی راگەیاند: "كاتژمێر چواری سەر لەبەیانی ئەمڕۆ پێنج شەممە ١٦ نیسانی 2015، چەكدارانی رێكخراوی تیرۆریستی داعش بەهێزێكی زۆری پیادەوە هێرشیانكردە سەر سەنگەرەكانی هێزی پێشمەرگەی كوردستان لە میحوەری تلسقۆف".وتیشی: "هێزەكانی پێشمەرگەی كوردستان بەتوندی رووبەڕووی ئەو هێرشەی چەكدارانی رێكخراوی تیرۆریستی داعش  بوونەتەوە و شەڕەكەش نزیكەی‌ سێ كاتژمێر و نیو خایاندووە".وتیشی: "لەو شەڕ و رووبەڕووبوونەوانەدا هێزەكانی پێشمەرگەی كوردستان هیچ زیانێكی گیانیان بەرنەكەوتووە".




ژمارەی كوژراوانی سوریا 220 هەزاری كەسی تێپەڕاند
بەگوێرەی كۆتا ئاماری روانگەی سوری بۆ مافەكانی مرۆڤ، ژمارەی ئەو كەسانەی له ‌سەرەتای هەڵگیرسانی شۆڕشەكەی سوریاوە له ‌ئازاری ساڵی 2011، كوژراون، 220 هەزار كەسی تێپەڕاندووە. زۆربەی ئەمانەش چەكدارن و لانیكەم 11 هەزاریشیان منداڵن.رامی عەبدولڕەحمان بەڕێوەبەری روانگەكە ئەمڕۆ پێنجشەممە بە ئاژانسی فرانس پرێسیشی راگەیاند: "یەكەم شەهیدی شۆڕشەكەش له ‌پارێزگای دەرعا لە 18ی ئازاری 2011دا بووە".روونیشیكردەوە، ژمارەی كوژراوەكان 67 هەزار و 293 هاوڵاتی سڤیل و 39848 چەكداری ئۆپۆزسیۆن و 28253 جیهادی و 46843 لەهێزەكانی رژێمی بەشار ئەسەد و 34872 چەكداری سەر بەو رژێمه ‌و 3162 كەسی نەناسراون.روانگەكە زانیارییەكانی له ‌تۆڕێكی فراوان لە نێردراوان و چالاكوانان و سەرچاوەی سەربازی و پزیشكی لە سوریا دەست كەوتووە.لەناو هاوڵاتییە سڤیلە كوژراوەكانیشدا 11021 منداڵ و 7049 ژنی سەروو تەمەن 18 ساڵ هەن. هەر لەناو ئەو كوژراوانەشدا 682 چەكداری سەر بە حزبوڵڵا و 2844 چەكداری شیعەی وڵاتە جیاكان هەن.






حوسییەكان دان بەشكستدا دەنێن و داوای گفتوگۆ دەكەن
لەبەرانبەر راگرتنی گەردەلولی پێداگری عەلی عەبدوڵڵا ساڵح و كوڕەكەی بە هەماهەنگی لەگەڵ حوسییەكانی یەمەن پێشنیازی رادەستكردنەوەی چەك و كشانەوەی لە دوو شاری ئەو وڵاتە دەكەن.سایتی عەرەبییە لە زاری چەند سەرچاوەیەك بڵاویكردەوە كە عەلی عەبدوڵڵا ساڵح، سەرۆكی لەسەركار لابراوی یەمەن و كوڕەكەی بە هەماهەنگی لەگەڵ حوسییەكان، پێشنیازیان كردووە لەچوارچێوەی دەستپێشخەرییەكەی وڵاتانی كەنداو، چەكەكانیان رادەست بكەن و هەردوو شاری سەنعا-ی پایتەخت و عەدەنیش چۆڵ بكەن، لەبەرانبەر ئەو پێشنیازەشدا داوایانكردووە، هەڵمەتە سەربازییەكانی گەردەلولی پێداگری رابگیرێت.ساڵح و حوسییەكان داوای گفتوگۆیان كردووە و پارێزگاری سەنعا-ی پایتەختیان بۆ پۆستی سەرۆك وەزیرانی یەمەن پێشنیازكردووە و داوایانكردووە ئەنجومەنێكی سەرۆكایەتی پێكبهێنرێت و كەسێكیشیان بۆ سەرۆكی ئەو ئەنجومەنە و یەكێكی دیكەشیان بۆ وەزیری بەرگری دەستنیشان كردووە.هاوكات راجح بادی، وتەبێژ بەناوی حكومەتی یەمەن ئاشكرایكرد كە چەند كەسایەتییەكی باڵای نزیك لە عەلی عەبدوڵڵا ساڵح داوایان لە عەبد رەبە مەنسور هادی، سەرۆكی شەرعیی یەمەن كردووە كە رێگە بە ساڵح و دارودەستەكەی بدات بە سەلامەتی لە یەمەن بچنە دەرەوە.لەلایەكی دیكەوە، ریاز یاسین، وەزیری دەرەوەی یەمەن لەكاتی سەردانی بۆ جیبۆتی و پێشوازیكردنی لە فڕۆكەی هاوكارییە مرۆییەكان رایگەیاند كە دەبێت حوسییەكان چەك دابنێن و وەك هاوڵاتی مەدەنی بچنەوە ناوچەكانی خۆیان، ئەگەر وا نەكەن، ئەوا هاوپەیمانێتی گەردەلولی پێداگری بۆ سەپاندنی شەرعیەت بەردەوام دەبێت لە گورزەكانی.




گوێتان زۆر پاك بكەنەوە توشی ئەم نەخۆشیە دەبن
پسپۆرانی بواری قوڕگ و لوت و گوێ، ئاشكرای دەكەن، پاككردنەوەی بەردەوامی گوێ دەبێتە هۆی ئەوە گوێتان تووشی كێشە بكات چونكە بەشێك لە كێمی ناو گوێ بۆ تەندروستی گوێ پێویستە، پزیشكان ئاماژە بەوە دەكەن، كێمی ناو گوێ  مادەیەكی تەڕی تایبەت دروست دەكات، ئەم مادەیە غازی ئەسید بەرهەم دێنێت و ناهێلێ بەكترییاكان بەئاسانی لە گوێتان نزیك ببنەوە، جگە لەمە گرنگی ئەم مادەیە لەوەدایە هیچ زیندەوەرێك ناتوانێت بچێتە ناوگوێتان. پاككردنەوەی بەردەوامی گوێ دەبێتە هۆی دروستبوونی مادەی هیستامین ئەم مادەیە تاكە هۆكاری سەرهەڵدانی حەساسیە و خورانی گوێیە، لەبەر ئەوە پزیشكان هۆشداری دەدەن بەوەی بە لەناوبردنی ئەو كێمانە دروستبوونی بەكتریا و سەرهەڵدانی نەخۆشییەكانی تایبەت بە گوێی لێدەكەوێتەوە، بەو هۆیەوە پسپۆران هۆشداری دەدەن لە كاتی پێویستدا دەتوانن سوود بە گیراوەی ئاو و سركەی سپی و بڕێكی كەم كحول و لۆكە بە ئاسانی گوێتان پاك بكەنەوە.

ڕێکه‌وت: 2015-04-16 15:09:18
به‌شی ( هەواڵەكانی كوردستان و ئێران و ناوچەكە (27ی خاكەلێوەی 1394) )