سیامەنداحمدرەزا پوردەستان، فەرماندەی هێزی زەمینی ئەرتەشی رژیمی ئێران لە پێوەند بە هێرشی سەربازی عەربستانی سعودی بۆ یەمەن بە بەكرێگیراو ناو هێنانی ئەرتەشی عەرەبستان، رایگەیاند  كە (ریاچ) لەو هێرشەدا  شكست دەخوا.لە بەرانبەردا دەوڵەتی عەربستانی سعودی داوای لە رژیمی ئێران كرد دەست لە پشتیوانی حوسیەكان و دەستێوەردان لە كاروباری ناوخۆی یەمەن هەڵگرێ.هەڵویستی دەسەلاتدارانی رژیم لە پێشیانەوە خامنەیی رێبەری رژیم بەڵگەی حاشاهەڵنەگر ...
لە سەر بەردەوام بوونی دەستێوەردانەكانی حكومەتی ئێران لە كاروباری ناوخۆی یەمەن نیشان دەدا.  لە 20ی خاكەلێوەدا،‌ خامنەیی ریبَەری رژیم لە كۆبوونەوە لەگەڵ دەستوپێوەندەكانی رایگەیاند جینایەتەكانی عەرەبستانی سعودی قەبوڵ ناكرێ و ئەوان لەو جینایەتەدا شكست دەخۆن.
وەك ئاشكرایە سەرهەڵدانی جەنگ و ئاڵۆزی یەمەن لە بنەرەتدا بە هۆی دەستێوەردانەكانی رژیمی ئێران لە كاروباری ناوخۆی ئەو وولاتە و لە هەمانكاتدا پشتیوانی و هاوكاری كردنی هەمەلایەنەی  حوسیەكان  بۆ لە سەر كار لابردنی حكومەتی قانوونی بە سەرۆكایەتی عەبد رەبۆ و دامەزراندنی دەسەلاتی ناشەرعی لەو وولاتە بوو.
دەخالەتە بەردەوامەكانی رژیمی ئێران لە كاروباری ناوخۆی ولاتانی ناوچەكە نە تەنیا بۆتە هۆی مەترسی بۆ سەر حكومەت و خەڵكی ئەو وولاتانە بەڵكو بۆتە هۆی مەترسی بۆ سەر ئاسایشی جیهانی  بە تایبەت مەترسی دروست كردن بۆ سەر بازرگانی و تجارەتی جیهانی كە رژیمی ئێران مەبەستیەتی دەست بە سەر رێرەوە ئاوییەكانی ناوچەكەدا بگرێ كە كەشتیە بازرگانیەكانی جیهانی بۆ ناوچەكە پێیدا هاتووچۆ دەكەن.
رژیمی ئێران بە دەستێوەردانی راستەوخۆ لە كاروباری ناوخۆی وولاتانی ناوچەكە و بە ئاشكرا راگەیاندنی ئەوەی كە وولاتانی عێراق، لوبنان،سوریە و یەمەن لە ژێر دەسەلاتی ئێراندایە، بانگەوازیان بۆ روبەروبونەوە و جەنگ لە گەڵ وولاتانی ناوچەكە و سەرهەڵدانی قەیرانێكی درێژماوە و مەترسیدار كرد. ئەو سیاسەتە پاوانخوازانەیەی كە لەژێرناوی ناردنە دەرەوەی ئینقلابی خومەینی هەر لەسەرەتای بە دەسەلات گەیشتنی ئاخوندان لە ئێراندا پەیرەو دەكرێ زیانی گەورەی بۆ پێگەی سیاسی و ئیعتباری ئێران و جەماوەری ئێران بە تێكرا بە دواوە بووە.
 بە هۆی دەستێوەردانی رژیمی ئێران لە كاروباری ناوخۆی وولاتانی ناوچەكە زۆر جار بەرپرسانی ئەمریكایی رژیمیان ئاگادار كردۆتەوە كە دەخالەتەكانی لە وولاتانی  ناوچەكە و بە تایبەت یەمەن  قەبووڵ ناكرێ. لەو پێوەندییەدا (ئەد رۆیس) سەرۆكی كومیتەی پێوەندییەكانی دەرەوە لە مەجلیسی نوێنەرانی ئەمریكا داوای كردوە رووبەرووی كردەوەكان ودەخالەتەكانی رژیم ببنەوە و لەو پێوەندەدا ووتویە”كاتێك لێگەرێین ئێران بە كەیفی خۆی بكات، زۆر‌ مەترسیدارە،ئەوان لە ئێستادا نە تەنیا لە (یەمەن)  بەلكو لە سەرانسەری شێوە دووڕگەی عەربی چالاكن. 
هەروەها جان كێری وەزیری دەرەوەی ئەمریكا لە پێوەند بە دەستێوەردانە شەرخوازانە و هاندەرانەی رژیم لە یەمەن ووتی: ”ئێمە لە پێوەند بەو هەلومەرجە نیگەرانی و هەستیاری زۆرمان هەیە.ئەوە روونە كەلوپەل و هاوكاری لە ئێرانەوە نێردراوە بۆ یەمەن . هەموو حەوتوێك  چەند فرۆكە لە ئێرانەوە دەچێ بۆ یەمەن كه ئێمە چاودێریان دەكەین و زانیاریمان لە بارەیانەوە هەیە.وەزیری دەرەوەی ئەمریكا ووتی ئێمە بە باشی ئاگاداری پشتیوانی و هاوكارییەكانی رژیمی ئێران لە یەمەنین. رژیمی ئێران دەبێ بزانێ كە ئەمریكا بێ هەڵوێست نابێ،لە كاتێكدا كە ناوچەكە ئاڵۆزی بە خۆوە ببینێ.
جان كێری ووتی دەخالەتەكانی رژیمی ئێران پێچەوانی قانونە نێودەوڵەتیەكانە و ئەمریكا بە زیان بۆ دامەزراوی و ئاسایشی ناوچەكەی دەزانێ ”ئێمە پشتیوانی لە بەرەی دۆست وهاوپەیمانەكانمان لە ناوچەكە دەكەین و پێویستە لە گەڵ كەسانێك بین كە بە هۆی سیاسەتەكانی رژیمی ئێران هەست بە مەترسی دەكەن.
هەروەها ئانتۆنی بلینكن جێگری وەزیری دەرەوەی ئەمریكا لە پێوەند بە پەیامی‌ بە هێز بۆ بەرەی جەنگ دژ بە حوسیەكان وپشتیوانەكانی ‌ (رژیمی ئێران)  لە حوسیەكان ووتی: ”ئێمە لە رۆژی یەكەمەوە پێوشوێنی ئەو هەلومەرجەمان گرتوە و ئەوەی كە عەرەبستان و هاوكارەكانی لەكەنداوی فارس ئەنجامی دەدەن لە لایەن ئێمەوە پشتییوانی لێ دەكرێ و زۆر گرینگە.
بەو پێیە، دەردەكەوی كە جەنگ لە یەمەن تەنیا جەنگی ناوخۆیی لەو وولاتە نیە،بەڵكو ئەمە جەنگێكی بە بەرنامەو خاوەن پشتیوانی جیهانیە كە لە بەرانبەر سەرەرۆییەكانی رژیمی ئێران بەرێوە دەچێ كە وولاتانی خاوەن هێزی جیهانیش هەر یەك بە شێوەیەك دەخالەت لەو جەنگەدا دەكەن. وەك دەردەكەوێ ئەمریكاو وولاتانی رۆژئاوایی بە جیددی پشتیوانی لە عەربستان و هاوپەیمانانی دەكەن و لە بەرانبەردا روسیە بە شێوەی راستەوخۆ و ناراستەوخۆ، پشتیوانی لە رژیمی ئاخوندی و سیاسەتە پاوانخوازییەكانی دەكات و لە تازەترینی ئەو پشتیوانیانەدا ویلادیمیر پۆتین سەرۆك كۆماری روسیە لە بریارێكدا رێگەیدا مووشەكی اس 300 تەحویل بە رژیمی ئێران بدرێ كە ماوەی چەندین ساڵ بوو لە لایەن رژیمەوە بە نرخی 800 ملوێن دۆلار كردرابوو بەلام روسیە ئامادە نەبوو تەحویلی بدات.   
سەرهەڵدانی جەنگی یەمەن، كە بە هۆی پاوانخوازی رژیمی ئێران و لە لایەن دەست وپێوەندەكانی دروست بوو و هەورەها حكومەتی عەرەبستانی سعودی و هاوپەیمانەكانی ناچار كرد بە كردەوە بێنە مەیدان بۆ روبەروبوونەوەی رژیمی ئێران وێ دەچێ درێژخایەن بێ، زۆربەی كارناسانی سیاسی و سەربازی پێ یان وایە ئەو جەنگە بە واتای جەنگ  بەرانبەر رژیمی ئێران و سیاسەتی دەستێوەردانی لە كاروباری ناوخۆی وولاتانی ناوچەكەیە و  چەند شارەزایەكی سیاسی پێ یان وایە ئەو جەنگەو چاڵ وباتلاقێكی دیكەیە كە رژیمی ئێران تی كەوتوەو بە ئاسانی لێی رزگاری نابێ. 


ڕێکه‌وت: 2015-04-19 17:17:29
به‌شی ( جەنگی یــــــەمەن، جــــەنگ لەدژی رژیمی پاوانـــــخوازی ئاخـوندی ئێــــرانە )