__ كؤژرانی کۆڵبەرێکی کورد بە تەقەی هێزە نیزامییەکانی رژێم__ لەشاری بانە لاوێکی کورد کۆتایی بە ژیانی خۆی هێنا__ هۆشداریی توندی فیگن یۆکسکداغ به‌ ده‌وڵه‌تی تورکیا __ ماددە هۆشبەرەكان، گیانی ٢٩٠٠ کەسیان لە سالی رابردوو ئەستاندووە__ بە ئێعدامی 4 زیندانی لە ورمێ رێژەی ئێعدامەكان لە یەك حەفتەدا گەیشتە 85 كەس__ هۆشداری ئەمریكا بە رژێمی ئاخوندی بۆ دوور بوون لە كەنارەكانی یەمەن__ حسینیان: تەنیا كاریكاتۆرێكی مینیاتۆری لە پیتاندن بۆمان ماوەتەوە

كؤژرانی کۆڵبەرێکی کورد بە تەقەی هێزە نیزامییەکانی رژێم
تەقە و دەستڕێژی هێزەکانی هەنگی مەرزی لەناوچە سنوورییەکانی سەردەشت گیانی کۆڵبەرێکی کوردی تەمەن ٤٥ ساڵی ستاند.بەپێی هەواڵی  هەواڵدەریی کوردپا، شەوی یەکشەممە رێکەوتی ٣٠ی خاکەلێوە لەناوچە سنوورییەکانی شاری سەردەشت لەگەڵ هەرێمی کوردستان، هێزەکانی هەنگی مەرزی کۆڵبەرانی کوردییان داوەتە بەر ئاگری چەکەکانیان. لە ئەنجامی تەقە و دەستڕێژییەکاندا کۆڵبەریک بەناوی " کەریم مورادی" تەمەن ٤٥ساڵ و خەڵکی ناوچەی سەردەشت پێکراوە و پاش چەندین کاتژمێر لە ئەنجامی خوێنرێژی زۆرەوە تەرمی بێ گیانی دۆزراوەتەوە. جێگەی باسە كە، کەریم مورادی لەگەڵ پۆڵێکی دیکەی کۆلبەر، هیچ کەلوپەلێکیان پێ نەبووە و ویستوویانە لەناوچە سنوورییەکانەوە بە کۆڵ کەلوپەل بگوازنەوە.








لەشاری بانە لاوێکی کورد کۆتایی بە ژیانی خۆی هێنا
لاوێکی تەمەن ٢٢ ساڵەی کوردی ناوچەی بانە کە پێشتریش هەوڵی خۆکۆژی دابوو، بە بڕینی شادەماری دەستی خۆی کوشتووە. بەپێی هەواڵی  کوردپا لەشاری بانە، چەند ڕۆژ لەمەوبەر لاوێک بە ناوی "قارەمان ڕەزگەیی" تەمەن ٢٢ ساڵ لە ناو ماڵەکەی خۆیاندا شادەماری دەستی خۆی بڕیوە و بەو هۆیەوە گیانی لەدەست داوە. قارەمان رەزگەیی پاش ئەوەی شادەماری دەستی بڕیوە بێهۆش بووە و دواتر لەلایەن ئەندامانی بنەماڵەکەیەوە بردراوەتە نەخۆشخانە و دوای یەک ڕۆژ مانەوەی لەژێر چاودێرییدا بە هۆی خوێنڕێژی لەرادەبەدەرەوە کۆتایی بە ژیانی هاتووە. ئەو لاوە کوردە پێشتریش ویستوویەتی لە رێگەی خۆهەڵواسینەوە خۆی بکووژێت بەڵام لەلایەن بنەماڵەکەیەوە رێگری لێکرابوو.قارەمان رەزگەیی خەڵکی ناوچەی "نەنۆڕ"ی شاری بانە بووە و تێڕمێکیشی لە زانکۆ گوزەراندووە و دواتر وازی لە خوێندن هێنابوو، هەروەها باس لەوەش کرابوو کە ئەو لاوە کوردە تووشی خەمۆکی هاتبوو.بەپێی دوایین لێكۆڵینەوە و توێژینەوەكانی شارەزا لەسەر پرسە كۆمەڵایەتی و دەروونیەكان، لەئێران لەهەر ٢٠ كەسی خەمۆك ١٢ كەسێیان دەست دەدەنە خۆكوژی و لەهەر ٣٠ حاڵەتی خۆكوژی لەنێو خوێندكاران، ٨ حاڵەتی كوڕان و ٢٢ حاڵەتی دیكەشی كچان پێكی دێنن.








هۆشداریی توندی فیگن یۆکسکداغ به‌ ده‌وڵه‌تی تورکیا 
 هاوسه‌رۆکی پارتی دیموکراتیکی گه‌لان  له‌ لێدوانێکی تونددا ڕایگه‌یاند: با هه‌مووی گه‌لی تورکیا بزانن ئه‌گه‌ر پارتی دیموکراتیکی گه‌لان ده‌نگه‌کانی که‌متر له مه‌رجی‌ 10 له‌سه‌دی هه‌ڵبژاردنه‌کان بێت،ئەوە‌ پیلانێکی گه‌وره‌ بووه‌. به‌پێی راپۆرتی هەواڵدەرییەكان، فیگن یۆکسکداغ، هاوسه‌رۆکی پارتی دیموکراتیکی گه‌لان له‌ لێدوانێکدا وێڕای ئاماژه‌ به‌وه‌ی که‌ پارته‌که‌ی له‌ هه‌ر هه‌لومه‌رجێکدا بێ مه‌رجی 10 له‌سه‌دی هه‌ڵبژاردنه‌کان وه‌ده‌ست دێنێت، ڕایگه‌یاند: ئه‌و که‌سانه‌ی که‌ هه‌وڵ ده‌ده‌ن به‌ پیلان و فریوکاری و ئاژاوه‌ پارتی دیموکراتیکی گه‌لان له‌ ژێر‌ مه‌رجی 10 له‌سه‌دی هه‌ڵبژاردنه‌کان بهێڵنه‌وه،‌ ئه‌گه‌ر هه‌وڵه‌کانین سه‌رکه‌وێ ته‌نیا پارتی دیموکراتیکی گه‌لان شکست ناهێنێت به‌ڵکوو خۆیشیان تووشی شکست دێن. پارتی داد و گه‌شه‌ به‌ ده‌ستی خۆی خه‌ریکی هه‌ڵوه‌شانه‌وه‌ی شه‌رعییه‌تی هه‌ڵبژاردنه‌کانه‌ که‌ ئه‌م بابه‌ته‌ ئاژاوه‌ی سیاسی لێده‌وکه‌وێته‌وه‌. ناوبراو زیادیشی کرد: ‌ گه‌لی تورکیا باری به‌رپرسیارێتییه‌ قورسه‌کانی ده‌وڵه‌تی تورکیایان له‌ کۆڵ گرتووه‌، وتی: گه‌لی تورکیا خوازیاری ڕزگار بوون له‌ ژێر باری ئه‌م به‌رپرسیارێتییانه‌ی ده‌وڵه‌ته‌. پارتی داد و گه‌شه‌ بووه‌ته‌ بارێک له‌سه‌ر شانی گه‌لی تورکیا.








ماددە هۆشبەرەكان، گیانی ٢٩٠٠ کەسیان لە سالی رابردوو ئەستاندووە
لە یەک ساڵی رابردوودا بەهۆی بەکار هێنانی ماددەی هۆشبەرەوە لە ئێراندا، ٢هەزار و ٩٨٦کەس بوونەتە قۆربانی. بە پێی راپۆرتی هەواڵدەرییەكان، لە ساڵی رابردوو ٢هەزار و ٩٨٦کەس بە هۆی بەکار هێنانی ماددەی هۆشبەرەوە گیانیان لە دەست داوە و ئەم ئامارە بە بەراورد لەگەڵ ساڵی پار، لە سەدا یەک زیادی کردووە. لە کۆی ئەم ئامارە،٢ هەزار و ٦٩١ کەس پیاو و ٢٩٥ ژنن. پزیشکی قانوونی ئێران سەبارەت بە تووشبووانی ماددەهۆشبەرەكان رایگەیاند: لە ساڵی رابردوودا(٩٣) پارێزگاکانی تاران، خۆراسانی رەزەوی، فارس و ئەسفەهان زۆرترین ڕێژەی گیان لە دەستدانیان بوو، بەڵام پارێزگاکانی تر وەک بووشهر و خۆراسانی باکوور و ئازەربایجانی رۆژئاوا رێژەیان کەمتر بووە. هەروەها لە ٥ ساڵی رابردوودا هەموو رۆژێک ٧٠ کەس بە رێژەی تووشبووانی ماددە سڕکەرەکان لە ئێران زیاتر دەبێ. تەمەنی بەکاربەرانی ماددە سڕکەرەکان لە ساڵی٨٦ لە نێوان ٢٣تا ٢٤ ساڵ بووە کە لە ماوەی ٦ساڵدا گەیشتووە بە ٢١ساڵ.








بە ئێعدامی 4 زیندانی لە ورمێ رێژەی ئێعدامەكان لە یەك حەفتەدا گەیشتە 85 كەس
 رژێمی دژە مرۆڤی ئاخوندی 4 كەس لەو 5 زیندانیەی كە لە رۆژی 30ی خاكەلێوە بۆ ژوری تاكەكەسی گواستبووە لە رۆژی 31ی خاكەلێوە لە زینانی ورمێ لە سێدارە دا و بەم شێوەش رێژەی ئێعدامەكان لە ماوەی یەك حەفتەدا گەیشتە 85 كەس. بە پێی راپۆرتی هەواڵدەرییەكان، بە ئێعدامكردنی ئەو چوار زیندانیە لە زیندانی رمێ لە لایەن رژێمی ئاخوندی هاوكات لەگەڵ لە سێدارەدانە بە كۆمەڵەكانی زیندانەكانی قەزەلحەسار و كەرەج و باقی شارەكانیتری ئێران 16 زیندانی لە زیندانەكانی مەشهەد و بیرجەند لە سێدارە دا. بە پێی ئەم راپۆرتە، 12 زیندانی لە رۆژی 27ی خاكەلێوە بە شێوەی بە ك‌وۆمەڵ لە زیندانی وەكێلئابادی مەشهد و چوار زیندانیتر رۆژی دواتر لە زیندانی بیرجەند لە سێدارە دران. جێگەی باسە كە لە ماوەی رۆژانی 23 تاكوو 29ی خاكەلێوە 81 زیندانی لە زیندانەكانی ئێران لە لایەن رژێمی ئاخوندییەوە لە سێدارە دراون یانێ رۆژانە زیاتر لە 12 زیندانی.








هۆشداری ئەمریكا بە رژێمی ئاخوندی بۆ دوور بوون لە كەنارەكانی یەمەن
كەشتیێكی فرۆكەهەڵگر و پاپۆرێكی شەڕكەری تەیار بە مووشەكی كۆنترۆڵ لە رێگای دوورەوە لە لایەن ئەمریكاوە نێردرایە دەریای عەرەب. بە پێی راپۆرتی هەواڵدەرییەكان، هێزە دەریاییەكانی ئەمریكا رایانگەیاندووە كە، مەئموریەتی ئەوان پارێزگاری لە رێگای كەشتیرانی لە كاتی تێكهەڵچوونەكانی یەمەندایە. بە پێی ئەم راپۆرتە، دەوڵەتی ئەمریكا هۆشداری بە رژێمی ئاخوندی داوە كە لە كەنارەكانی یەمەن دوور بكەوێتەوە چونكوو نیگەرانی بوونی هەیە كە ئەو رژێمە بۆ چەكدارانی حوسی یەمەن چەك و چۆڵ دەبات.








حسینیان: تەنیا كاریكاتۆرێكی مینیاتۆری لە پیتاندن بۆمان ماوەتەوە
لە كۆبوونەوەی ئاشكرای ئەمرۆی مەجلیسی رژێمی ئاخوندی ئاخوند رۆحۆڵا حسینیان دانیپێدانا كە تەنیا كاریكاتۆرێكی مینیاتۆری لە پیتاندن بۆمان ماوەتەوە. بە پێی راپۆرتی هەواڵدەرییەكان، ناوبراوو ئەمرۆ سێشەممە 1ی بانەمەری 1394 لە كۆبوونەوەی مەجلیسی رژێم رایگەیاند، ئەمرۆ ئێمە لە بەرانبەر بریارێكی چارەنوسسازداین. ئێمە بۆ خەڵكی خۆراگری ئێران یان سەربەرزی دەخۆڵقێنین یان بە قبووڵی ئاپارتایدێكی علمی كە سەدان جار لە كاپیتالاسیۆن خرابترە دیسەپێنین بەسەر خەڵكی ئێراندا. ناوبراوو وتی، ئێمە نوێنەرانی مەجلیس لە وەزارەتی دەرەوە دەپرسین بۆچی ناوەرۆكی رێكەوتنەكە سەرەرای دەستوری رێبەری بڵاو ناكەنەوە، مەگەر لە وتووێژەكاندا چ بەلێنێكتان داوە كە نوێنەران و خەڵكی ئێران نامەحرەمن و ئەمریكا، ئیسرائیل، بریتانیا، ئاڵمان و فەرانسە مەحرەمن. من بە فەرمی دەڵێم كە، لەو رێكەوتنەدا ئێران لە مافی پیتاندن بێ بەش كراوە هەموو دەستكەوتەكانمان لە دەست داوە و هیچ گەرانتیێك بوونی نییە كە دوای 10 ساڵ ماغی پیتاندن بۆ ئێمە بە رەوا بزانن، لەو بەیاننامەیەدا نە تەنیا مافی پیتاندنمان بە فەرمی نەناسراوە بەڵكوو مافی پیتاندنی ئێران تەنیا كاریكاتۆرێكی مینیاتۆرییە و چاوپێكەوتنەكان لە ناوەندەكانی ئێمە جگە لە سەرشۆری بۆ خەڵكی ئێمە هیچیتری تێدا نییە.

ڕێکه‌وت: 2015-04-21 12:27:54
به‌شی ( هەواڵەكانی كوردستان، ئێران و جیهان 1ی بانەمەری 1394 )