__ رووداوی هاتوچۆ دوو هونەرمەندی کوردی کردە قوربانی__ کڕین و فرۆشی سمۆرە رێگەیەکی نوێ بۆ بازرگانیکردن لەکوردستان__ مه‌ترسی داخرانی کۆنترین ڕۆژنامه‌ی چالاکی کوردی __ ناروونی چارەنوسی چالاكێكی كرێكاری كورد پاش 15 رۆژ دەستبەسەری__ ئۆباما: ئەمریكا دەتوانێت سیستەمی بەرگری هەوایی رژێم پەك بخات__ لە سێدارەدانی بە كۆمەڵی 9 زیندانی لە زیندانی بەندەرعەباس__ سعد حریری: دەستێوەردانەكانی رژێمی ئاخوندی لە ناوژەكە مەترسیدارە

رووداوی هاتوچۆ دوو هونەرمەندی کوردی کردە قوربانی
 لەبەرەبەری بەڕێوەچوونی کۆنسێرتی بیژەن کامکار لەمەهاباد، هونەرمەندێکی کورد بە هۆی رووداوی هاتوچۆوە گیانی لەدەست دا و یەکێکی دیکەش بریندار بووە. بەپێی هەواڵی هەواڵدەریی کوردپا، رێکەوتی ٢ی بانەمەڕ، ئەرسەلان قانع زادە هونەرمەندی خەڵکی مەهاباد و ژەنیاری سازی" تمبک" لە نێوان جادەی تاران ـ قەزوین گیانی خۆی لەدەست داوە. ئەو هونەرمەندە کوردە، ئەندامی ئۆرکێسترای فیلارمونیکی موکریان لە مەهاباد بوو و لەماوەی چەند رۆژی رابردوودا سەرقاڵی تەمرین و راهێنان بە مەبەستی بەڕێوەبردنی کۆنسێرتی بیژەن کامکار بوو. ئەو رووداوە یەک رۆژ بەر لەوادەی بەڕێوەچوونی کۆنسێرتی کامکار و ئۆرکێسترای فیلارمونیک لە مەهاباد، رووی داوە و بە وتەی سەرپەرەستی گرووپەکە، کۆنسێرتەکە لەکاتی خۆیدا بەڕێوە دەچێت و هەڵناوەشێتەوە. هەر لەو رووداوەدا سەلاح خزری هونەرمەندیکی دیکەی کوردکە لەگەڵ ئەرسەلان قانع زادە بوووە، بریندارە و ئێستا لە ژێر چاودێری پزیشکی دایە.








کڕین و فرۆشی سمۆرە رێگەیەکی نوێ بۆ بازرگانیکردن لەکوردستان
ژمارەیەکی بەرچاو سمۆرەی دەگمەن کە ویستراوە لەلایەن بازرگانانەوە کاسبی پێوە بکرێت، لە ئۆستانی کوردستان دەستی بەسەردا گیرا. بە پێی راپۆرتی هەواڵدەری کوردپا، لە چەند رۆژی رابردوودا، ٢١٩ سمۆرەی کوردستانی لە ئوستانی کوردستان لەلایەن هێزە ئینتزامییەکان دەستی بە سەردا گیراوە و رادەستی ئیدارەی گشتی ژینگە پارێزیی کوردستان کراوە. ئەو سمۆرانە دواتر لەلایەن پێرسۆنێلی ژینگەپاریزییەوە گەڕێندراونەتەوە باوەشی سروشت. لەو چەند ساڵەی دواییدا بازرگانی کردن بە جۆرەکانی گیانلەبەرانی وەک زەردە قۆرە(سەمەندەر) و سمۆرەی کوردستانی لەناوچەکانی ئێران و تەنانەت دەرەوەی ئێرانیش رووی لەزیادبوون کردووە و لەو پێوندییەدا ئەنجومەنی سەوزی چیای مەریوان بەمەبەستی پاراستنی گیانی ئەو گیانلەبەرە لەشوێنە گشتی و گەشتیارییەکانی مەریوان ئاگاداری بڵاو کردووەتەوە. چالاکانی ژینگە پاڕێزی، بازرگانیکردن بە سمۆرە بە هۆکاری سەرەکی لەناوچوونی دار بەڕووەکانی زاگرۆس لەقەڵەم دەدەن و لەو باوەڕەدان سمۆرە هۆکاری زاوزێ، بڵاوکردنەوەی تۆوی بەڕوو و سەر لە نوێ گەشانەوەی دار بەڕووەکانی زاگرۆسە. بە وتەی یەکێک لە بەرپرسانی ژینگەپارێزی کوردستان، نزیک بە ١٤جۆر گیانلەبەر و ئاژەڵی وەک ورچ، پڵینگ، پشیلەی وەحشی و کێوی، سەگی ‌ئاوی، کەڵ، بزن، هەڵۆ، داڵ و... مەترسی لە ناوچوونیان لە سەرە.








مه‌ترسی داخرانی کۆنترین ڕۆژنامه‌ی چالاکی کوردی 
ڕۆژنامه‌ی کوردی زمانی "ڕێگای نوێ" که‌ 85 ساڵە‌ له‌ ئه‌رمه‌نستان بڵادەکرێتەوە‌ رەنگە به‌بۆنه‌ی کێشه‌ وگرفتەوە بۆ هەمیشە ڕەوانەی مۆزه‌خانه‌ی چاپه‌مه‌نییه‌کان بکرێت. به‌پێی راپۆرتی هەواڵدەرییەكان، ڕۆژنامه‌ی Ryia Taze یان "ڕێگای نوێ" که‌ یه‌که‌مین ژماره‌ی له‌ مانگی مارچی ساڵی 1930 له‌ لایه‌ن کورده‌کانی ئیرەڤانەوە بڵاو کرایه‌وه‌، زۆرجار به‌ هۆکاره‌ جۆراوجۆره‌کان به‌ شێوه‌ی کاتی بڵاونه‌کراوه‌ته‌وه‌، به‌ڵام تا ئه‌مڕۆ به‌ شێوه‌ی به‌رده‌وام هەر لە چاپ دراوە. تیتاڵ که‌ره‌م، سه‌رنووسه‌ری ئێستای ڕۆژنامه‌ی "ڕێگای نوێ" که‌ خۆی زمان و ئه‌ده‌بیاتی ئێنگلیزی له‌ زانکۆی ئیرەڤان ته‌واو کردووه‌، به‌ به‌شی ئینگلیزی سایتی ڕووداوی وت‌: ڕۆژنامه‌ی "ڕێگای نوێ" له‌م 85 ساڵه‌دا سەڕەڕای بوونی کێشه‌ی زۆر‌ له‌وانه؛‌ شه‌ڕی جیهانی، ستەمی ڕژێمی ئێستالین و ڕووخانی سۆڤییه‌ت له‌ ساڵی 1991 توانیویه‌تی تا ئێستا خۆی بپارێزێت. زیادیشی کرد:  ئێستا به‌هۆی کێشەی وه‌کوو نه‌بوونی خوێنه‌ر به‌هۆی کۆچی زۆرینەی کورده‌کان له‌ ئه‌رمه‌نستان، ڕکابه‌ری نێوان کورده‌کان و کێشه‌ی دارایی ڕه‌نگه‌ ئه‌م ڕۆژنامه‌یه‌ وه‌کوو کۆنترێن و مێژوویی ترین ڕۆژنامه‌ی کوردی زمانی، چالاک بۆ هه‌میشه‌ دابخرێت‌. یه‌که‌مین ژماره‌ی ڕۆژنامه‌ی کوردی زمانی "ڕێگای نوێ" له‌ نه‌ورۆزی ساڵی 1930 و له‌ لایه‌ن هراچیا کۆچه‌ر، هرویتون میکیرچیان و گۆرک پاریس له‌ کورده‌کانی دانیشتووی ئیرەڤان، بڵاوکرایه‌وه‌.








ناروونی چارەنوسی چالاكێكی كرێكاری كورد پاش 15 رۆژ دەستبەسەری
دوای تێپەربوونی 15 رۆژ بەسەر دەستبەسەر كردنی نیزام سادقی چالاكی كرێكاری لە لایەن هێزە ئەمنییەتییەكانی ئیتلاعاتەوە تاكوو ئێستا هیچ زانیاریێك لەمەر چارەنووسی ناوبراوو لە بەر دەستدا نییە. بە پێی راپۆرتی هەواڵدەرییەكان، نیزام سادقی چالاكی كرێكاری خەڵكی شاری كامیاران كە ماوەی 15 رۆژە لە لایەن ئیتلاعاتی سنەوە دەستبەسەر راوە تاكوو ئێستا هیچ زانیاریێك لەمەر هۆی گرتن و شوێنی راگیرانی لە بەر دەستدا نییە. بە پێی ئەم راپۆرتە، ئیتلاعاتی كامیاران تاكوو ئێستا چەندین جار بنەماڵەی ئەم چالاكە كرێكارییەیان بانگهێشتی ئیتلاعات كردووە و وێڕای هەرەشە كردن لێیان پێیان راگەیاندوون كە بە هیچ شێوەێك بۆیان نییە كۆببنەوە یان برۆنە بەردەم ئیتلاعاتی سنە.








ئۆباما: ئەمریكا دەتوانێت سیستەمی بەرگری هەوایی رژێم پەك بخات
باراك ئۆباما سەرۆك كۆماری ئەمریكا رایگەیاند، لە كاتێكدا كە ئەمریكا بریار بدات كە بەرنامەی ناوكەیی رژێمی ئاخوندی لە ناو بەرێت دەتوانێت سیستەمی بەرگری مووشەكی ئەو رژێمە كە سەرقاڵی كرینیەتی لە روسیە كون بكات و برواتە ناوی. بە پێی راپۆرتی هەواڵدەرییەكان، ئۆباما وتی، بوجەی بەرگری ئەمریكا نزیك بە 600 میلیارد دۆلار و بوجەی بەرگری رژێمی ئاخوندی نزیك بە 17 میلیارد دۆلارە. بە پێی ئەم راپۆرتە، رۆژنامەی واشەنگتۆن تایمز نوسیویە كە، ئەم وتانەی ئۆباما لە كاتێكدایە كە ناوبراو سەرقاڵی تاوتوێكردنی پێشنیاری روسیەیە بە مەبەستی فرۆشی سیستەمێكی دژە هەوایی مووشەكی بە نرخی 800 میلیۆن دۆلارە بە رژێمی ئاخوندی كە دەبێتە هۆی پێچەڵاوپێچ بوونی وتووێژە ناوكەییەكان.








لە سێدارەدانی بە كۆمەڵی 9 زیندانی لە زیندانی بەندەرعەباس
سەر لە بەیانی ئەمرۆ 9 زیندانی لە زیندانی ناوەندی بەندەرعەباس لە لایەن رژێمی دژە مرۆڤی ئاخوندییەوە لە سێدارە دران. بە پێی راپۆرتی هەواڵدەرییەكان، ئەمرۆ پێنجشەممە 3ی بانەمەری 1394، 9 زیندانی لە زیندانی ناوەندی بەندەرعەباس لە لایەن رژێمی ئاخوندییەوە لە سێدارە دران. بە پێی ئەم راپۆرتە تاكوو ئێستا ناوی ئەو 9 زیندانییە رانەگەێندراوە. جێگەی باسە كە رژێمی ئاخوندی بە مەبەستی پێشگرتن لە نارەزایەتی بە رێكەوتنە شكست خواردووەكەی لەگەڵ وڵاتانی رۆژئاوایی تەنیا لە ماوەی 10 رۆژی رابردوو زیاتر لە 85 زیندانی لە سێدارە داوە.








سعد حریری: دەستێوەردانەكانی رژێمی ئاخوندی لە ناوژەكە مەترسیدارە
سعد حریری سەرۆك وەزیرانی پێشووی لۆبنان رایگەیاند كە دەستێوەردانەكانی رژێمی ئاخوندی لە ناوچەكە بووە بە جێگای مەترسی. بە پێی راپۆرتی هەواڵدەرییەكان، حەریری وتی، دەستێوەردانەكانی رژێمی ئاخوندی و حیزبۆڵای لۆبنان لە وڵاتانی ناوژچەكە گەیشتووەتە شوێنی مەترسیدار. ناوبراو وتی، دەستێوەردانەكانی رژێمی ئاخوندی لە لۆبنان جێگای قبووڵ نییە. بە پێی ئەم راپۆرتە، سعد حریری زیادی كرد كە، ناوچەكە لە بارودۆخێكی مەترسیداردایە و دەستێوەردانەكانی رژێمی ئاخوندی و گرووپی حیزبۆڵای لۆبنان لە لۆبنان، سووریە، عێراق و یەمەن چوارچێوەی مەترسیداری بە خۆیەوە گرتووە.

ڕێکه‌وت: 2015-04-23 12:27:45
به‌شی ( هەواڵەكانی كوردستان، ئێران و جیهان 3ی بانەمەری 1394 )