مێژووی سەرهەڵدانی جووڵانەوەی كرێكاری دەگەرێتەوە بۆ ساڵی 1886كە كرێكاران هەستیان كرد مافەكانیان پێخوست دەكرێت و وەك مرۆڤ هەڵس وكەوتیان لەگەڵ ناكرێت. جووڵەی بەرینی ناڕەزایەتیان وەرێخست وبەشێوەیێكی سەردەمیانە هەنگاویان بۆ باس كردنی مافەكانیان هەڵگرت، بەم بۆنەوە پڕبەدڵ پیرۆزبایی خۆمان پێشكەش بە كرێكارانی كوردستان و سەرجەم جیهان دەكەین.ڕابوون وئاخێزی كرێكاران لەو رۆژگارەدا تێچووییكی زۆری بۆ ئەو بەش مەینەتانە بەدواوە بوو كە دواتر فیداكاری و...
گیانبازیان بووە بەرهەم بۆ نەوەكانی دیكە و چینێكی بەرینی كۆمەڵگا لەسایەی رەنجی ئەوان بەبەشێك لە مافەكانیان گەیشتن. دیارە مسۆگەربوونی مافی كرێكاران لە وەڵاتێكەوە بۆ وەڵاتێكی دیكە جیاوازە. سیستمی حاكمیەت لە وەڵاتانی پێشكەوتوو بەستێنی لەباری بۆ داوا وخواستی چینەكان بە تایبەت چینی كرێكار ڕەخساندوە تا كار بكەن بۆ دەستەبەر كردنی مافەكانیان ولەم پێوەندیەدا پێشەوە چوونی باشیان هەبووە . هەرچەند سیستمە دژی كرێكارییەكان تا ئیستاش بەربەستن لەبەرانبەر دەستەبەربوونی مافی كرێكاران و تائیستاش ناعەداڵەتی هەر هەیە وجیاوازی دەكرێت لە مافی ژن وپیاوی كرێكار بەڵام دۆخە لە  لە وەڵاتانی جیهانی سێهەم كە خەڵك گیرۆدەی كومەلێك قەیرانن بە هۆی حاكمانی دیكتاتۆرەوە ئاڵۆزترە و مافی كرێكاران  بە شێوەیێكی بەرین وەك مافی باقی چینەكانی دیكە پێشێل دەكرێت و لە سەرەتایترین ماف بێبەشن. 
ئێران كە دیلی دەستی ڕژیمی دیكتاتۆر و ماف پێشێلكەری ئاخوندییە،مافی كرێكارانی تێدا پێشێل دەكرێت وكرێكاران لە لەگەڵ باقی چینەكانی دیكە مافیان وەك یەك پێشێل دەكرێت. كرێكاران لە مافە سەرەتاییەكان بێبەشن و لە یاسای رژیمدا مافەكانیان دیاری نەكراوە. رۆژی یەكی مانگی مەی كە رۆژێكی پرشنگدارە لە مێژووی كرێكاراندا،لە ئێران بە شێوەیێك یاد دەكرێتەوە و ڕێزی دەگرن كە نیزامی ئاخوندی لە هەموو لاییكەوە تووشی قەیران بووە وهێزەكانی رژیمیش لە دووی رێكەوتنی لۆزان لەسەر قەیرانی ناوكەیی،خۆیان بۆ دەوورێكی نۆیی سەكوت و زەبرو زەنگ ئامادە كردوە و بێگومان كرێكارانیش بەشێكی بەرچاو لەو ستەم و چەوسانەوەیان بەردەكەوێ‌. پەرەگرتنی شەپۆلی ئێعدام وگرتن لە شەقام وگێڕانی خەڵك بە شێوەی ئابڕووبەرانە،لەو سزا و تۆڵانەن كە ڕژیم لە خەڵكی دەكاتەوە وبە بیانووی جۆراوجۆر زیندانەكانی گەورەتر دەكاتەوە تاكرێكاران چاوترسێن بكات و بەر، بە هەر جۆرە جووڵانەوەیێكی ئازادیخوازانەبگرێ‌. چینی كرێكار كە هاوشانی چینەكانی دیكە بەردەوام دژی سیستمی چەوسینەرو ئیستبداد وەستاونەتەوە و لەشۆرش و موبارزە بۆ ژیانێكی باشتر،رۆڵی كارایان هەیە،هەمیشە لەبەر نێزەی حاكمانی دیكتاتۆردان. لەئێران،بە تایبەت كوردستان بە هۆی رژیمەوە بۆتە شوێنێكی تەسك وتەنگەبەر وبە هەموو شێوەیێك هەوڵ دراوە دەنگی دلێریان كپ كەن، بەڵام هەتا سەركووت و زەبرو زەنگ زۆرتر بووبێت،رۆحی بەرخودان وئازادی زیاتر پەرەی گرتووەو كرێكاران و زەحمەتكێشان زیاتر كورەی خەباتیان نێڵ داوە.
كرێكارانی كوردستان!
ئێوەی بەرێز و داهێنەر كە بە هۆی سیاسەتە دزێوەكانی دەسەڵات دەیان قەیران بەرۆكی گرتوون و ژیانێكی سەخت وتاقەت پڕوكێن بەسەر دەبەن،زەحمەت وفیداكاریتان لە پێناو بەدەست هێنانی بژیویی بۆ خانەوادە و نەهێشتنی ناعەداڵەتیەكان جێگەی ڕێزو پێزانینە. لەم بارودۆخە قەیراناویەی كە رژیم خولقێنەریەتی،ئێوە ناچارن چەند كاربكەن تا بژێوی ژیانی منداڵەكانتان دابین بكەن. لەگەڵ بێكاری بەرەووڕوون و لەهەموو مافێك كە ڕەوای كرێكارانە بێبەشن. زۆرترین سەركووت ڕووی لە وەڵات كردوە و بەر بە هەر جۆرە حەرەكەتێك بۆ بەهاناوە چوونی كرێكاران دەگیردرێت. بەهۆی سەربزێوی كرێكاران سەدان كرێكار لە چاڵەڕەشەكان تووندكراون و لەگەڵ هەڕەشە وئیعدام بەرەووڕوون. بێگومان بە درێژایی دەسەڵاتی رژیمە یەك لە دوای یەكەكان بە تایبەت رژیمی ئاخوندی كرێكار لە كوردستان هیچ مافێكی نەبووە و رێگە نەدراوە بە شێوەیێكی مەدەنیانە داوا ڕەواكانی باس بكات. ئیستاش كە رۆژی 1ی مانگی مەی بەرانبەر بە 11ی گوڵان رۆژی هاوپێوەندی چینی كرێكار جێژن دەگیردرێت ،پێویستە كرێكاران وتێكرای چینەكانی كۆمەڵگا هەوڵی تەواوی خۆیان بخەنەگڕ كە داوا ڕەواكانی ئەم چینە لەبەر چاو بگیردرین وئاوڕێكی واقعیانە لە كێشەكانیان بدرێتەوە.پێویستە كرێكاران لە كوردستان هاوشانی كرێكارانی دیكەی ئێران لە بەرانبەر حەق دەستەكانیان نارەزایەتی خۆیان بگەیەننە شۆڕای بەرزی كارو بەداواكردنی حەقی زیاتر وبیمەو دابین كردنی بابەتە مرۆڤایەتیەكان،دەنگی خۆیان زیاتر لە ئێستا بەرز بكەنەوە.لەگەڵ خواستی پێراگەشتن بەم بابەتانە ئەوەش لەبەرچاو بگرن كە دەبێت یاساییك بۆ كار دابنرێت ومندالان كە لە نەبوونی یاساییكی بەكەڵك زۆرترین زیانیان بەركەوتووە،قەرەبوو بكرێنەوە و ژینگەیێكی لە باریان بۆ فەراهەم بكرێت.ژنان كە بەشێكی گرینگی چینی گرینگی كرێكار پێك دەهێنن،بایەخی تایبەتیان پێبدرێت وباری رۆحی و ڕەوانیان لەبەرچاو بگیردرێت.چینی كرێكار كە پێك دیت لە هەرێ‌ چەوساوەترین مرۆڤی ئەم سەردەمە،هاوكات چینێكی بەوەج وبونیاد نەرن كە زۆر لایەنی كۆمەڵگا بەستراوەتەوە بە چارەنووسیانەوە.
سازمانی خەبات ی كوردستانی ئێران بەبۆنەی رۆژی یەكی مانگی مەی رۆژی هاوپێوەندی چینی كرێكار،پیرۆزبای خۆی پێشكەش دەكات بە هەموو زەحمەتكێش و كرێكارێك لە كوردستان و ئێران وئارەزوو دەكەین كە رژیمی دیكتاتۆری ئاخوندی لە ناو بچێ‌ وماف بۆ خەڵكی ئێران بە تایبەت چینی كرێكار دەستەبەر بێ..

سازمانی خەبات ی كوردستانی ئێران
كومیتەی ناوەندی 
11ی بانەمەڕی 1394


ڕێکه‌وت: 2015-05-01 16:59:00
به‌شی ( پیرۆز بێت رۆژی 1ی مانگی مەی ڕۆژی كرێكار )