__ خۆكوژی كچێكی كورد بە مەبەستی پاراستنی ناموسی لە دەست هێزەكانی ئیتلاعات__ هێزە ئەمنیەتییەکان چالاکێکی فەرهەنگیی کوردیان دەستبەسەر کرد__ چاڵە نەوتێکی کوردستان پاش چوار دەیە لە دۆزرانەوەی، ناچالاک ماوەتەوە__ لە سێدارەدانی  بە كۆمەڵی 11 زیندانی لە زیندانی قەزەلحەسار__ گواستنەوەی 13 زیندانی لە ورمێ و شێراز بە مەبەستی لە سێدارەدان__ خامنەیی: وتووێژ لە ژێر سێبەری هەرەشە قبووڵ ناكەین__ بەیانییەی كۆتایی كۆبوونەوەی رێبەرانی شۆرای هاوكاری كەنداوی فارس__ ئەمریكا: تا ئه‌سه‌د نه‌ڕوات كێشه‌ی داعش چاره‌سه‌ر نابێت

خۆكوژی كچێكی كورد بە مەبەستی پاراستنی ناموسی لە دەست هێزەكانی ئیتلاعات
كچێكی كوردی خەڵكی شاری مەهاباد بۆ ئەوەی لە لایەن كەسێكی ئیتلاعاتییەوە بە هاوكاری خاوەنی ئۆتێل تارای مەهاباد دەستدرێژی نەكرێتە سەری خۆی كوشت. بە پێی راپۆرتی هەواڵدەرییەكان، کچێکی لاوی خەڵکی شاری مەهاباد بەناوی ''فەریناز خوسرەوانی'' کە فەرمانبەری ''هۆتێل تارا''ی ئەو شارە بووە، رۆژی دووشەممە رێکەوتی ١٤ی بانەمەڕ، بە مەبەستی ''پاراستنی نامووس'' و پێشگیری لە دەسدرێژیی مەئموورێکی سەربە ''ئیدارەی ئیتلاعات''، لە نهۆمی چوارەمی بینای هۆتێلەکەوە خۆی بەر داوەتە خوارەوە. بەپێی راپۆرتەکان، خاوەنی ''هۆتێل تارا'' لە مەهاباد بەناوی ''نادر مەولوودی'' بەستێنی دەسدرێژیی ئەو مەئموورەی ئیتلاعاتی بۆسەر ئەو کچە لەمەڕ وەرگرتنی ئیمتیازی ٥ ئەستێرە بۆ هۆتێلەکەی رەخساندووە و لە ئەنجامدا فەریناز بە ناچاری خۆی کوشتووە، . جێگەی باسە كە، بڵاوبوونەوەی ئەم هەواڵە، شەپۆلێکی بەرینی ناڕەزایەتیی بەکارهێنەرانی تۆڕە کۆمەڵایەتییەکانی لێ کەوتووەتەوە.








هێزە ئەمنیەتییەکان چالاکێکی فەرهەنگیی کوردیان دەستبەسەر کرد
لە یەکێک لە ناوچەکانی شاری بۆکان چالاکێکی فەرهەنگیی کورد لەلایەن هێزە ئەمنیەتییەکانەوە دەستبەسەر و بۆ شوێنێکی نادیار راگوێزراوە. بەپێی هەواڵی هەواڵدەریی کوردپا، چەند رۆژ لەمەوبەر هێزەکانی سەر بە ئیدارەی ئیتلاعاتی شاری میاندواو، لە ناوچەی ''پیرمحەممەد''ی شاری بۆکان کەسێکیان بە ناوی ''فەرهاد رەزاپوور'' دەستبەسەر و لەگەڵ خۆیان بردوویانە.سەرچاوەیەکی ئاگادار باسی لەوە کردووە، هێزە ئەمنیەتییەکان بەبێ ئاگادار کردنەوە، دەرگای ماڵەکەیان شکاندووە و وێڕای قۆڵبەست کردنی ئەو هاووڵاتییە، دەستیان بەسەر کەلوپەلی شەخسیی ''فەرهاد رەزاپوور''یشدا گرتووە. هەتا بڵاوبوونەوەی ئەو هەواڵە لە هۆکاری دەستبەسەرکردنی ئەو هاووڵاتییە، زانیارییەک بڵاو نەبووەتەوە..








چاڵە نەوتێکی کوردستان پاش چوار دەیە لە دۆزرانەوەی، ناچالاک ماوەتەوە
چاڵە نەوتێکی پرتووکاو لە ئیلام، پاش چوار دەیە لە دۆزرانەوەی، هەتا ئێستا چالاک نەکراوە و هیچ کەڵکێکی لێ وەرناگیرێ. بەپێی راپۆرتی هەواڵدەریی کوردپا، هەتا ئێستا هیچ کام لە ناوەندە پێوەندیدارەکانی حکوومەتی هیچ چەشنە هەوڵێکیان لەمەڕ هەڵێنجانی نەوتی بیرێک کە پێش شۆڕشی ٥٧ لەلایەن شیرکەتێکی ئەمریکایی‌یەوە دۆزرایەوە، نەداوە.ئەو چاڵە نەوتە لە ٤٥ کیلۆمیتریی شاری ئیلام و لە رۆژئاوای گوندی ''پاکڵ گراب'' لە بەرزایی‌یەکانی ''گەور'' (کبیر کوه) هەڵکەوتووە.هاووڵاتییانی ئەو ناوچەیە دەڵێن: ئەندزیارە ئەمریکایی‌یەکانی لە کاتی دۆزینەوەی ئەو چاڵە، هەبوونی نەوت و گازیان لەو چاڵەدا پشت راست کردووەتەوە. بە وتەی دانیشتوانی خۆجێیی ئەو ناوچەیە، هەنووکەش کۆمەڵێک پەڵەی نەوتی لە دەوروبەری ئەو چاڵەدا دەبینرێ.ئەو چاڵە نەوتییە سەرەڕای تێپەڕبوونی چوار دەیە لە دۆزرانەوەی هەتا ئێستا هێچ نەوتێکی تێدا هەڵنەهێنجراوە. کارناسانی ژینگەپارێزی لەو بڕوایە دان کە داتەپینی ئەو چاڵە نەوتە کارەساتی ژینگەیی لە بەرزایی‌یەکان چیای ''گەور''دا لێ دەکەوێتەوە.








لە سێدارەدانی  بە كۆمەڵی 11 زیندانی لە زیندانی قەزەلحەسار
سەر لە بەیانی ئەمرۆ چوارشەممە 16ی بانەمەر 11 زیندانی لە زیندانی قەزەلحەساری كەرەج بە شێوەی بە كۆمەڵ لە سێدارە دران. بە پێی راپۆرتی هەواڵدەرییەكان، ئەمرۆ چوارشەممە 16ی بانەمەری 1394، 11 زیندانی كە هەشت زیندانیان لە زیندانی ناوەندی كەرەجەوە بۆ زیندانی قەزەلحەسار گوازرابوونەوە و هەروەها 3 زیندانیتر لە واحدی دووی ئەو زیندانە لە لایەن رژێمی دژە مرۆڤی ئاخوندییەوە بە شێوەی بە كۆمەڵ لە سێدارە دران. جێگەی باسە كە رژێمی جینایەتكاری ئاخوندی هەواڵی ئەم لە سێدارەدانەی تاكوو ئێستا بڵاو نەكردووەتەوە. سەر لە بەیانی ئەمرۆ جەنازەی ئەم لە سێدارە دراوانە دراوەتەوە بە بنەماڵەكانیان و هەرەشەیان لێ كراوە كە بە بێ دەنگ جەنازەی رۆڵەكانیان بنێژن.








گواستنەوەی 13 زیندانی لە ورمێ و شێراز بە مەبەستی لە سێدارەدان
بەكرێگیراوانی رژێمی ئاخوندی رۆژی سێشەممە 15ی بانەمەر 13 زیندانییان لە زیندانەكانی شیراز و ورمێ بە مەبەستی بەرێوەبردنی حوكمی لە سێدارەدانیان گواستووەتەوە. بە پێی راپۆرتی هەواڵدەرییەكان، لە زیندانی پەرینا حەوت زیندانی بۆ ژوری تاكەكەسی زیندانی عادڵئاوای شێراز بە مەبەستی بەرێوەبردنی حوكمی لە سێدارەدانیان گواستراونەتەوە و هەروەها بە پێی ئەم راپۆرتە شەش زیندانیتر لە  بەندەكانی 14 و 15ی زیندانی ناوەندی ورمێ بۆ قەرەنتینەی ئەو زیندانە گواستراونەتەوە.







خامنەیی: وتووێژ لە ژێر سێبەری هەرەشە قبووڵ ناكەین
خامنەیی ئەمرۆ چوارشەممە 16ی بانەمەر لە كاتێكدا كە هەوڵی دەدا كە بارودۆخی ناڵەباری نیزام لە ژێر سێبەری هەیا و هوریا بشارێتەوە، وێرای ئاماژە بە درێژەپێدان بە وتووێژەكان رایگەیاند، دوو بەرپرسی فەرمی ئەمریكا هەرەشەیان كردووە كە هێرشی نیزامی دەكەین، ئەوەڵەن غەلەت دەكەن و سانیەن قۆناغی لێبدە و رابكە تەواوو بووە، خەڵكی ئێران كەسێكە هێرش بكاتە سەری وێڵی ناكەن. بە پێی راپۆرتی هەواڵدەرییەكان، عەلی خامنەیی وەلی فەقێهی رژێمی ئاخوندی، وتی، وتووێژكەران برۆن و بە لەبەر چاو گرتنی هێڵی سوور وتووێژ بكەن چونكوو هەرەشە و  بێ رێزی كردن قبووڵ ناكەین. جێگەی باسە كە خامنەیی زیادی كرد كە بەو وتووێژانەی كە لە ژێر سێبەری هەرەشەدا بەرێوە دەچێت رازی نابم و وتووێژ لە ژێر هەیمەنەی هەرەشەدا قبووڵ ناكەم.








بەیانییەی كۆتایی كۆبوونەوەی رێبەرانی شۆرای هاوكاری كەنداوی فارس
رێبەرانی وڵاتانی ئەندامی شۆرای هاوكاری كەنداوی فارس لە كۆتایی دانشتنەكانی خۆیان لە ریاز لە مەر پێویستی دابینكردنی ئەمنییەت و ئاسایشی ناوچەكە و دوور كەوتنەوە لە دەستێوەردان دووپاتیان كردەوە. بە پێی راپۆرتی هەواڵدەرییەكان، لەو بەیاننامەیەدا هاتووە كە نەیارانی سووری لە ریاز پایتەختی عەرەبستان كۆنفەرانسێك بەرێوە دەبەن تاكوو قۆناغی دوای بەشارئەسەد تاوتوێ بكەن. بە پێی ئەم راپۆرتە، لەو بەیاننامەیەدا هاتووە كە، لە دەوڵەتی قانوونی یەمەن پشتیوانی دەكەین و  لە بەرانبەر حوسیەكان و لایەنگرانی عەلی عەبدۆڵا سالح دەوەستینەوە. هەروەها رێبەرانی وڵاتانی عەرەبی جاریكیتر پێدارییان كردووە لەمەر بەرەورووبوونەوەی تیرۆریسم و گرووپە توندرەوەكان.








ئەمریكا: تا ئه‌سه‌د نه‌ڕوات كێشه‌ی داعش چاره‌سه‌ر نابێت
دوێنێ سێشه‌ممه‌ سامنسا پاوه‌ر باڵیۆزی  ئه‌مه‌ریكا له‌نه‌ته‌وه‌ یه‌كگرتووه‌كان رایگه‌یاند، تا به‌شار ئه‌سه‌د له‌ده‌سه‌ڵاتدا مابێت، كێشه‌ی رێكخراوی تیرۆریستی ده‌وڵه‌تی ئیسلامی ناسراو به‌ داعش له‌ سوریاو ناوچه‌كانی تری رۆژهه‌ڵاتی ناوه‌ڕاست چاره‌سه‌ر نایێت. بە پێی راپۆرتی هەواڵدەرییەكان، سامانسا له‌میانه‌ی دیدارێكدا له‌گه‌ڵ ته‌له‌فزیۆنی بی بی ئێس وتی، باراك ئۆباما له‌و بڕوا چه‌سپیوه‌دایه‌ كه‌ تا كێشه‌ی ئه‌سه‌د چاره‌سه‌ر نه‌كرێت، كێشه‌ی رێكخراوی داعش چاره‌سه‌ر نابێت. باڵیۆزی ئه‌مه‌ریكا له‌نه‌ته‌وه‌ یه‌كگرتووه‌كان له‌ درێژەی قسه‌كانی وتی، یه‌كێك له‌و هۆكارانه‌ی وا له‌تیرۆریسته‌ بیانییه‌كان ده‌كات بچنه‌ ناو سوریا ئه‌وه‌یه‌ كه‌ له‌دژی ئه‌سه‌د ده‌جه‌نگن.  ئه‌مه‌ریكاو به‌ریتانیاو فه‌ره‌نسا رژێمی دیمه‌شق  به‌ به‌كارهێنانی مادده‌ی كلۆر له‌دژی هاوڵاتیانی مەدەنی له‌ سوریا تۆمه‌تبار ده‌كه‌ن، به‌ڵام روسیا پێیوایه‌ هیچ به‌ڵگه‌یه‌كی به‌هێز نیه‌ كه‌ به‌رپرسیارتێیی دیمه‌شق له‌و رووه‌وه‌ جه‌ختبكاته‌وه‌.

ڕێکه‌وت: 2015-05-06 13:54:01
به‌شی ( هەواڵەكانی كوردستان، ئێران و جیهان 16ی بانەمەری 1394 )