__ نارەزایەتی بەربڵاوی مامۆستایان لە شارەكانی كوردستان__ بوونی نەخۆشی مەترسیدار لە زیندانی ناوەندی سنە__ لە سێدارەدانی 6 زیندانی لە زیندانی ناوەندی ورمێ__ ئەنجومەنی ژنانی مەریوان: خۆکوژی ژنان لەئێران دەرخەری توندوتیژی و نایەکسانییە__ چۆنییه‌تی له‌ سێداره‌دانی سه‌یید ڕه‌زا دێرسیمی بڵاو کرایه‌وه‌ __ جموجووڵی داعش بۆ داگیرکردنی دووباره‌ی کۆبانێ __ نوێترین هەڵوێستی عەرەبستان لەمەر رژێمی ئاخوندی__ ئه‌سه‌د دان به‌ شكستی هێزه‌كانیدا ده‌نێت

نارەزایەتی بەربڵاوی مامۆستایان لە شارەكانی كوردستان
 سەرەڕای فشار و بەربەستی ناوەندە ئەمنیەتی ـ حکوومەتییەکان بە مەبەستی کپ کردنی دەنگی کۆمەڵگەی فەرهەنگیانی کوردستان، مامۆستایانی کورد بەڵێنییەکانی خۆیان بردە سەر و ناڕەزایەتییان دەربڕی. بەپێی راپۆرتی هەواڵدەرییەكان،سەر لە بەیانی ئەمڕۆ پێنجشەممە رێکەوتی ١٧ی بانەمەڕ،  مامۆستایانی زۆربەی شارەكانی كوردستان رژانە سەر شەقامەكان و لە بەردەم ئیدارەی پەروەردە و راهێنان دەنگی نارەزایەتی خۆیان بەرز كردەوە. بە پێی ئەم راپۆرتە، لەو خۆپیشاندانانەدا مامۆستایان داوای مافەكانی خۆیان كردووە كە بریتین لە، هاوتا کردنی مووچە، رێزگرتن لە پیشەی مامۆستایەتی، گەڕاندنەوەی گەورەیی و پیرۆزیی بۆ مامۆستا، دابین کردنی دادپەروەریی بەشیک لەو دروشمانە بوون کە ئەمڕۆ لەلایەن مامۆستایانی کوردەوە وتراوەتەوە. لەشارەکانی قوروە، ئیلام، بۆکان، کرماشان، ورمێ، سەقز، سنە و مەریوان مامۆستایان رێپێوانیان ئەنجام داوە و لە بەردەم ئیدارەکانی پەروەردە و بارهێناندا خوازیاری بەدواداچوون بە داواکارییەکانیان بوون. جێگەی باسە كە، لەشارەکانی سنە، بۆکان، ورمێ و مەریوان  هێزە ئەمنیەتی ـ ئینتزامییەکان حوزوریی بەرچاویان هەبووە.








بوونی نەخۆشی مەترسیدار لە زیندانی ناوەندی سنە
لە ماوەی رۆژانی رابردوو لە زیندانی ناوەندی سنە نەخۆشی قارچی لە نێو زیندانییەكاندا پەرەی سەندووە و بەرپرسانی زیندان لە ئاست ئەو نەخۆشیەدا كەمتەر خەمن. بە پێی راپۆرتی هەواڵدەرییەكان، لە چەند مانگی رابردوو جۆرێك لە نەخۆشی قارچی پێست لە ناو زیندانی ناوەندی سنە بڵاو بووەتەوە كە بەرپرسانی زیندان هیچ چەشنە كردەوەێكیان لەمەر راگرتنی ئەو نەخۆشییە نەبووە. بە پێی وتەی یەكێك لە چالاكانی مافی مرۆڤ كە نەیویستووە ناوی بڵاو بكرێتەوە نەخۆشی پێستی و مەترسیدار لە زیندانی سنە پەرەی سەندووە. ناوبراوو وتویە كە من لەو زیندانەدا شاهێدی ئەوە بووم كە كەسانێك بە نەخۆشی ئیدز گیرۆدە بوون بەڵام پێراگەیشتن پێیان وەك پێویست نەبووە. ئەم چالاكەی مافی مرۆڤ هەروەها رایگەیاندووە كە بارودۆخی زیندانیانی نەخۆش لەو زیندانەدا جێگای شەرمە و كەمترین پێداویستی پزشكییان بۆ دابین ناكرێت.








لە سێدارەدانی 6 زیندانی لە زیندانی ناوەندی ورمێ
حوکمی سێدارەی شەش هاووڵاتیی خەڵکی ورمێ لەلایەن دەزگا قەزاییەکانی رژێمی ئاخوندی ئێرانەوە لە زیندانی ناوەندی ئەو شارە بەڕێوە چوو. بەپێی راپۆرتی هەواڵدەرییەكان، سەر لەبەیانی رۆژی چوارشەممە 16ی بانەمەر، بەرپرسانی زیندانێ ورمێ حوکمی لەسێدارەدانی شەش هاووڵاتیان بەڕێوە برد. هەتا كاتی بڵاوبوونەوەی ئەم هەواڵە تاوانی ئەو ئێعدامکراونە روون نەبووەتەوە. جێگەی باسە كە ئەو شەش زیندانییە رۆژی سێشەممە 15ی بانەمەر بە مەبەستی لە سێدارەدان بۆ ژوری قەرەنتینەی  زیندانی ورمێ گوازرابوونەوە.






ئەنجومەنی ژنانی مەریوان: خۆکوژی ژنان لەئێران دەرخەری توندوتیژی و نایەکسانییە
پاش بڵاو بوونەوەی هەواڵی مەرگی گوماناوی کچێکی خەڵکی شاری مەهاباد و دەنگدانەوەی لە میدیا و تۆڕەکۆمەڵایەتییەکاندا، ئەنجومەنی ژنانی مەریوان لەبەیاننامەیەکدا وێڕای دەربڕینی هاوخەمی خوازیاری بە سزاگەیاندنی تاوانباران بووە. لە بەیاننامەکەدا باس لەوە کراوە، لە هەر کۆمەڵگەیەکدا کە بنەما و پێکهاتەکان لەسەر نایەکسانی و نادادپەروەری دژی ژنان بونیاد نرابێت، توندوتیژییەکان روو لەزیادبوون دەکەن و تەنانەت هێندێ دیاردەی قێزەونیش سەرهەڵدەدەن. لەبەیاننامەکەدا هاتووە، توندوتیژی دژی ژنان کە سەرچاوە گرتوو لە کۆمەڵگەی پیاوسالارییە، مێژووییەکی دوور و درێژی هەبووە و هەتا ئێستاش ژنانی لە سەرەتاییترین مافەکانیان کە ژیانێکی ئاساییە بێبەش کردووە. ئەنجومەنی ژنانی مەریوان لە درێژەدا باسییان لەوەش کردووە، لەماوەی یەک ساڵی رابردوودا چەندین حاڵەتی مەرگی گوماناوی کەسانیکی وەکوو سەحەر چوێنی، شەیدا حاتەمی، لەسیدارەدانی رەیحانە جەباری و چەندین حاڵەتی دیکەی پژاندنی تێزاب لە ئیسفەهان رووی داوە و ئەمڕۆکەش شایەتی خۆکوژی فەریناز خوسرەوانین کە هەمووی ئەوانە دەرخەری توندوتیژی و نایەکسانی لە کۆمەڵگەی ئێرانن. بەیاننامەکە ئەوەشی خستووەتەڕوو، نەبوونی ئەمنیەت لەناوماڵ و لەدەرەوە بۆ ژنان، لەو هۆکارانەن کە گیان لەدست دانی ژنانی بە دوای خۆیدا هێناوە. ئەو ئەنجومەنە لەکۆتایی بەیاننامەکەشدا چوار داواکاریی روو بە ناوەندە پێوەندیدارەکان خستووەتەڕوو کە بریتین لە:
ــ بە دواداچوون و لێکۆڵینەوە لە دۆسییەی فەریناز خوسرەوانی
ــ دابین کردنی ئەمنیەت و کەش و هەوایەکی لەبار بۆ ژنان
ــ دابین کردنی شوێنی تایبەت بۆ ژنانی لێقەوماو
ــ کۆتایی هێنان بە روانینی ئەمنیەتی بۆ سەر چالاکییەکانی ژنان لە کوردستان








چۆنییه‌تی له‌ سێداره‌دانی سه‌یید ڕه‌زا دێرسیمی بڵاو کرایه‌وه‌ 
سه‌یید ڕه‌زا خۆی به‌ره‌و سێداره‌ ڕۆیشت. خۆی چووه‌ سه‌ر کورسی سێداره‌ و ڕێگه‌ی نه‌دا که‌س ده‌ستی لێدا. به‌ ده‌نگێکی به‌رز له‌ کاتێکدا له‌سه‌ر کورسییه‌که‌ ڕاوه‌ستابوو، هاواری کرد: "ڕۆڵه‌کانی که‌ربه‌لاین، ئێره‌ سه‌رتاپێ، شه‌رم، سته‌م و تاوانه‌" پاشان په‌ته‌که‌ی خسته‌ ملی و به‌ پێ کورسییه‌ی لادا. به‌پێی راپۆرتی هەواڵدەرییەكان، ڕۆژنامه‌ی یه‌نی شه‌فه‌قی تورکیا، [یه‌کێک له‌ ڕۆژنامه‌کانی نێزیک له‌ پارتی دادوگه‌شه‌] له‌ لاپه‌ڕه‌ی تایبه‌تی خۆیدا، به‌ڵگه‌یه‌کی نهێنی له‌ ده‌زگای هه‌واڵگری تورکیا [Mit] بڵاو کردۆته‌وه‌ که‌ نیشان ده‌دا که‌ماڵ پاشا [ئه‌تاتورک] دامه‌زرێنه‌ری کۆماری تورکیا، به‌ر له‌وه‌ی سه‌یید ڕه‌زا دێرسیمی، ڕێبه‌ری خه‌ڵکی دێرسیم، [تونجه‌لی] له‌ سێداره‌ بدرێ، چاوی پێکه‌وتووه‌. به‌م جۆره‌ یه‌کێک له‌ لاپه‌ڕه‌کانی گرینگی، گۆشه‌ شاردراوه‌کانی مێژووی هاوچه‌رخی تورکیا که‌ به‌ساڵان بوو، حکوومه‌ته‌کانی تورکیا، حاشایان لێده‌کرد، په‌رده‌ی له‌سه‌ر لادرا. به‌ گوێره‌ی ئه‌م زانیارییانه‌ی له‌م به‌ڵگه‌یه‌ نهێنییه‌، ده‌ست که‌وتووه‌، که‌ماڵ پاشا، داوا له‌ سه‌یید ڕه‌زا ده‌کات، داوای به‌خشین و لێبوردن له‌ که‌ماڵ پاشا بکات که‌ ئه‌م داوایه‌ له‌لایه‌ن "سه‌یید ڕه‌زا"وه‌، وه‌ڵام نادرێته‌وه‌.








جموجووڵی داعش بۆ داگیرکردنی دووباره‌ی کۆبانێ 
به‌ وته‌ی هێزه‌ کوردییه‌کانی سووریا، گرووپی تیرۆریستی داعش له‌ ڕۆژانی ڕابردوودا هێرشی قورسی خۆیان له‌ باشووری شاری کۆبانێ به‌ ئامانجی داگیرکردنی دووباره‌ی ئه‌م شاره‌ ده‌ستپێکردووه‌. به‌پێی راپۆرتی هەواڵدەرییەكان،  هه‌واڵده‌ریی ئارا له‌ سووریا له‌ هه‌وڵی گرووپی تیرۆریستی داعش به‌ مه‌به‌ستی هێرش بردنه‌سه‌ر هێزه‌ کوردییه‌کان له‌ باشووری کۆبانێ هه‌واڵی دا. شه‌ڕڤانانی کورد ڕایانگه‌یاندووه‌: داعش له‌ ڕۆژهه‌ڵاتی شاری سرین که‌ له‌ باشووری کۆبانێ هه‌ڵکه‌وتووه‌، هێرشی توندی خۆیان ده‌ستپێکردووه‌ و له‌و هێرشه‌دا‌ له هه‌موو جۆره‌کانی‌ چه‌کی‌ قورسیش که‌ڵکیان وه‌رگرتووه‌. هێزه‌ کوردییه‌کان وتوویانه‌: گرووپی تیرۆریستی داعش له‌م هێرشانه‌دا به‌ره‌وپێشچوونیان بووه‌ و توانیویانه‌ یه‌کێک له‌ بازگه‌کانی پشکنینی هێزه‌ کوردییه‌کان داگیر بکه‌ن. هێزه‌ کوردییه‌کانیش له‌م ناوچه‌یه‌‌ پاشه‌کشێ تاکتیکییان کردووه‌.
ڕاشیانگه‌یاند: سه‌ره‌ڕای ئه‌وه‌ی‌ که‌ فڕۆکه‌کانی هاوپه‌یمانی دژی داعش له‌ ناوچه‌که‌‌ ئاماده‌ بوون، به‌ڵام خۆیان بواردووه‌ له‌ بوردومانی مۆڵگه‌کانی داعش..  








نوێترین هەڵوێستی عەرەبستان لەمەر رژێمی ئاخوندی
بەرپرسێكی دەوڵەتی یەمەن رایگەیاندووە كە، رژێمی ئاخوندی لە ئێریترە چەكدارانی حوسی رادەهێنێت. بە پێی راپۆرتی هەواڵدەرییەكان، نوێنەری هەمیشەیی عەرەبستان لە سازمانی نەتەوەیەكگرتووەكان وێرای تاوانبار كردنی رژێمی ئاخوندی وتی، رژێمی ئاخوندی نابێت هیچ دەورێكی لە چارەسەری قەیرانی یەمەندا هەبێت. بە پێی ئەم راپۆرتە، ناوبراوو لە وتووێژ لە گەڵ هەواڵنێراندا رایگەیاندووە كە، رژێمی ئاخوندی بە پاڵپشتیكردنی لە چەكدارانی یەمەنی، دەستێوەردانی نایاسایی و قبووڵنەكراوی لەو وڵاتەدا هەیە. جێگەی باسە كە نوێنەری عەرەبستان لە نەتەوەیەكگرتووەكان ئاماژەی بەوە كردووە كە ریاز پێی خۆش نییە كە نێردراوی نەتەوەیەكگرتووەكان بۆ چارەسەری قەیرانی یەمەن لەگەڵ رژێمی ئاخوندی وتووێژ بكات. ناوبراوو وتویە كە رژێمی ئاخوندی نە ئەندامی شۆرای هاوكاری وڵاتانی كەنداوی فارسە و نە دراوسێی یەمەن و نە ئەندامی یەكیەتی عەرب، كەوابوو هیچ پەیوەندیێكی بە رژێمی ئاخوندییەوە نییە.








ئه‌سه‌د دان به‌ شكستی هێزه‌كانیدا ده‌نێت
له‌ یه‌كه‌م دانپێدادانی ناڕاسته‌وخۆیدا به‌ زنجیره‌یه‌ك زیان پێگه‌یشتن و شكستی هێزه‌كانیدا له‌ماوه‌ی ئه‌م هه‌فتانه‌ی دواییدا، به‌شار ئه‌سه‌د سه‌رۆكی رژێمی سوریا رایگه‌یاند، زیانه‌كانی جه‌نگی ناوخۆی وڵاته‌كه‌ی مانای شكست نییه‌. بە پێی راپۆرتی هەواڵدەرییەكان، ئه‌سه‌د له‌ ده‌ركه‌وتنێكی تریدا له‌ دیمه‌شقی پایته‌خت به‌بۆنه‌ی جه‌ژنی شه‌هیدانه‌وه‌، رایگه‌یاند: "ئێمه‌ ئه‌مڕۆ له ‌شه‌ڕداین نه‌ك جه‌نگ". وتیشی: "ئێمه‌ قسه‌ له‌سه‌ر ده‌یان یان سه‌دان جه‌نگ ناكه‌ین، به‌ڵكو قسه‌ له‌سه‌ر هه‌زاران جه‌نگ ده‌كه‌ین. سروشتیشه‌ كه‌ له‌م جۆره‌ جه‌نگ و بارودۆخانه‌دا پرۆسه‌ی هه‌ڵاتن و هێرشكردن، قازانج و زیان، به‌رزبوونه‌وه ‌و دابه‌زین، هه‌بێت. هه‌موو شتێك ده‌كرێت گۆڕانی به‌سه‌ردا بێت جگه‌ له‌ بڕوا به‌ جه‌نگاوه‌ر و باوه‌ڕی جه‌نگاوه‌ر به‌ حه‌تمیه‌تی سه‌ركه‌وتن". ئه‌سه‌د روونیشیكرده‌وه‌ كه‌ به‌مه‌به‌ستی به‌هاناوه‌چوونی سه‌ربازه‌ ئابڵوقه‌دراوه‌كانی، سوپای سوریا رووده‌كاته‌ شارۆچكه‌ی جسر شغوری سه‌ر به‌ پارێزگای ئیدلب كه‌ له‌ئێستادا له‌ژێر كۆنتڕۆڵی چه‌كدارانی ئۆپۆزسیۆندایه‌.

ڕێکه‌وت: 2015-05-07 12:27:30
به‌شی ( هەواڵەكانی كوردستان، ئێران و جیهان 17ی بانەمەری 1394 )