__ كوژرانی سەرهەنگێكی ئینتزامی بە دەست لاوانی قارەمانی مەهاباد__ دەستبەسەركردنی 12 كەس لە خۆپیشاندانە هێمنانەكەی سەردەشت__ سنە/ ناڕازییانی کورد لەلایەن هێزە لیباس شەخسییەکانەوە دەسبەسەر کران__ ماڵپەڕی پشتیوانانی ویلایەت ناڕەزایەتییەکانی مەهابادی خستە ئەستۆی عەرەبستان__ پشتگیری فراكسیۆنی pdk، لە داواكاری خەڵكی كوردستانی ئێران__ دانپێدانانی فەرماندەێكی سوپا بۆ دروستكردنی هیلالی شیعە لە ناوچەكە__ درۆشمی مەگ بۆ دیكتاتۆر، زیندووە زیندانی سیاسی لە زیندانی گەوهەردەشت__ بنكه‌ سه‌ربازییه‌كانی ئه‌مریكا ده‌خرێنه‌ ئاماده‌باشیی خێراوه‌

كوژرانی سەرهەنگێكی ئینتزامی بە دەست لاوانی قارەمانی مەهاباد
سەرهەنگێكی هێزەكانی ئینتزامی كە لە شاری ورمێوە بۆ سەركوتی نارەزایەتییەكانی خەڵكی خۆراگری مەهاباد رۆیشتبوو بۆ ئەو شارە بە تەقەی راستەوخۆی لاوانی ئەو شارە كوژراوە. بە پێی راپۆرتی هەواڵدەرییەكان، دوانیوەرۆی رۆژی هەینی 18ی بانەمەری 1394 سەرهەنگێكی بەكرێگیراوی هێزە ئینتزامییەكان كە لەگەڵ كۆمەڵێك لەو هێزانە لە شاری ورمێوە بۆ سەركوتی نارەزایەتییەكانی خەڵكی مەهاباد رۆیشتبوونە ئەو شارە لە پشت هۆتێل تاراوە دەكەوێتە بۆسەی كۆمەلێك لە لاوانی ئەو شارە و بە تەقەی یەكێك لەو لاوانە بریندار دەبێت. بە پێی ئەم راپۆرتە،لە ئاكامی تەقە لە نێوان بەكرێگیراوانی رژێم و لاوانی مەهاباد یەكێك لە لاوانی ئەو شارە بریندار دەبێت كە دەست بە جێ لە لایەن هاورێكانیەوە دوور دەخرێتەوە. جێگەی باسە كە ئەو سەرهەنگەی كە بریندار ببوو دەیگوازنەوە بۆ خەستەخانەی شاری ورمێ و لەوی دەمرێت.








دەستبەسەركردنی 12 كەس لە خۆپیشاندانە هێمنانەكەی سەردەشت
هاوكات لەگەڵ دەربرینی نارەزایەتییەكان لە شاری مەهاباد و شارەكانیتری كوردستان، دوێنی لە شاری سەردەشت خۆپیشاندانێكی هێمنانە بۆ پشتگیری لە داواكاری خەڵكی مەهاباد بەرێوە چوو كە تێیدا 12 كەس لە لایەن هێزە ئەمنییەتییەكانەوە دەستبەسەر كران. بە پێی راپۆرتی هەواڵدەرییەكان، شارۆمەندانی شاری سەردەشت بۆ مەحكوم كردنی خۆكوژی فەریناز خۆسرەوانی كچێكی لاوی شاری مەهاباد كە بە مەبەستی پاراستنی خۆی لە دەستدرێژی دەست و پەیوەندەكانی رژێمی ئاخوندی لە نۆهۆمی چوارەمی هۆتێل تارای مەهابادەوە خۆی خستبووە خوارێ خۆپیشاندانێكی هێمنانەیان وەك باقی شار و شارۆچكەكانیتری كوردستان لە رۆژی شەممە 19ی بانەمەر بەرێوە برد. بە پێی ئەم راپۆرتە، لەو خۆپیشاندانەدا هێزە ئەمنییەتییەكانی رژێم هێرشیان كردە سەر خۆپیشاندەران و لانیكەم 12 كەس لە خۆپیشاندەرانیان دەستبەسەر كرد. جێگەی باسە كە دەستبەسەر كراوان بۆ ئیدارەی ئیتلاعاتی سەردەشت گوازراونەتەوە و هەنوكە لە گرتووخانەی ئیتلاعاتی سەردەشت لە دەستبەسەریدان.








سنە/ ناڕازییانی کورد لەلایەن هێزە لیباس شەخسییەکانەوە دەسبەسەر کران
مەئموورانی ئیدارەی ئیتلاعات بە شێوەیەکی ئاشکرا و لە ئاستی شاری سنەدا و لەسەر بیناکانی ناوەندی شارەوە، بە کامێرا لە هەوڵی وێنەگرتنی هاتوچۆی هاووڵاتییان دان. بەپێی راپۆرتی هەواڵدەریی کوردپا و لە زاری شایەحاڵانەوە، ٣ لاوی شاری سنە بەبێ هیچ هۆکارێکی دیاریکراو، لەلایەن هێزە لیباس شەخسییەکانەوە و لەبەر چاوی گشتیی خەڵکەوە دەسبەسەر کران. بە پێی ئەم راپۆرتە، بوونی هێزە لیباس شەخسی و نیزامییەکان لە ئاستی شاردا دەبینرێن. مەئموورانی لیباس شەخسی و نیزامی، هوشداریی توند بەو هاووڵاتییانە دەدەن کە ''سمارت مۆبایل''یان لەگەڵ خۆیان هەڵگرتووە. هەروەها لە شەقام و گۆڕەپانە سەرەکییەکانی شاری سنە، هیچ کەس مافی راوەستانی پێ نادرێ.








ماڵپەڕی پشتیوانانی ویلایەت ناڕەزایەتییەکانی مەهابادی خستە ئەستۆی عەرەبستان
ماڵپەڕێکی سەربە ناوەندی دەسەڵات لە ئێران لەژێر ناوی ''پێگەی خەبەریی حامیانی ویلایەت''، عەرەبستانی سعوودیی بە رێکخستنی ناڕەزایەتییەکانی ئەم دوایی‌یانەی مەهاباد تۆمەتبار کرد. بەپێی راپۆرتی هەواڵدەریی کوردپا، پێشتریش جێگری سیاسیی پارێزگاری ئازەربایجانی رۆژئاوا، ناڕەزایەتییەکانی ئەم دوایی‌یانەی شاری مەهابادی خستبووە ئەستۆی ''دێموکرات و کۆمەڵە'' لە حیزبە کوردییەکانی ئوپۆزسیۆنی رژێمی ئاخوندی ئێران.ماڵپەڕی پشتیوانانی ویلایەت (حامیان ولایت) سەر به "بەیتی رەهبەری"یەئەو ماڵپەڕە خەبەرییە و ماڵپەڕەکانی دیکەی لەو چەشنە کە لەلایەن ناوەندە دەسەڵاتدارەکانی حکوومەتی ئێران و ''بەیتی رەهبەری''یەوە پشتیوانی دەکرێن، رێکخراوی موجاهیدنی لەژێر ناوی ''منافقین'' لە هاندەرانی ئەو ناڕەزایەتییانەی مەهاباد لە قەڵەم داوە. لە بەشێکی دیکەی ئەو ماڵپەڕەدا هاتووە: ''ئەو رەوتە کە ئامانجی لەباربردنی دۆخی هێمنی ئەو رووداوە و هەڵخڕاندنی هەستی قەومی ــ مەزهەبیی خەڵکی هەبوو، روونی کردەوە کە زیاترین چالاکیی لە تۆڕە کۆمەڵایەتییەکاندا لە دەرەوەی وڵات ئەنجام داوە و زیاترین رێژەی ئەو چالاکییانە لە عەرەبستانی سعوودی بوون.جێگری سیاسیی پارێزگاری ئازەربایجانی رۆژئاوا لە بەشێکی دیکەی قسەکانیدا لە کۆڕی هەواڵنێران و میدیا حکوومەتییەکان، هەڕەشەی لە خەڵکی شاری مەهاباد بە شێوەیەکی توندتر لە ئەگەری بەردەوام بوون لە ناڕەزایەتییەکاندا کردبوو.








پشتگیری فراكسیۆنی pdk، لە داواكاری خەڵكی كوردستانی ئێران
ئه‌ندامێكی فراكسیۆنی پارتی دیموكراتی كوردستان ئاشكرای ده‌كات، كه‌ ئه‌وان پشتگیری له‌ داواكانی خه‌ڵكی كوردستانی ئێران ده‌كه‌ن و ئیدانه‌ی ئه‌و تاوانه‌ گه‌وره‌یه‌ش ده‌كه‌ن كه‌ دژ به‌و كچه‌ كورده‌ و خه‌ڵكی مه‌هاباد ئه‌نجام دراوه‌. بە پێی راپۆرتی هەواڵدەرییەكان، فەرحان جەوهەر، ئەندامی فراکسیۆنی پارتی  به‌"وشە" رایگەیاند، ئێمە پشتگیری لە داوا رەواکانی خەڵکی کوردستانی رۆژهەڵات دەکەین و پێمان و ایە دەبێ روونکردنەوەیەک لەلایەن بەرپرسانی حکومەتی ئێرانەوە بدرێ لە سەر چۆنییەتی ئەم رووداوە و خۆ کوشتنی ئەو کچە لاوە لە هۆتێل تارای  شاری مه‌هاباد، هاوكات پشتگیری لە داخوازییەکانی خەڵک دەکەین و مەحکومی ئەو تاوانە گەورەیە دەکەین کە دژی ئەو کچە و خەڵكی کورد کراوە. له‌باره‌ی پشتگیری فراكسیۆنه‌كه‌یان بۆ گردبوونه‌وه‌ی پشتیوانی له‌ ناڕه‌زایه‌تییه‌كانی شاری مه‌هاباد، ناوبراو گوتی: پشتگیری له‌ ناڕه‌زایه‌تییه‌كه‌ی سبه‌ی له‌ شاری هه‌ولێر ده‌كه‌ین، هیوادارین ناڕه‌زایه‌تییه‌كانیش له‌ چوارچێوه‌ی دیموكراتییه‌ت و مه‌ده‌نیه‌ت ده‌رنه‌چن و نه‌چنه‌ خانه‌ی توندوتیژییه‌وه‌.








دانپێدانانی فەرماندەێكی سوپا بۆ دروستكردنی هیلالی شیعە لە ناوچەكە
محەمەد عەلی جەعفەری فەرماندەی سوپای پاسدارانی رژێمی ئاخوندی ئێران باس لە ئامادەبوونی 200 هەزار چەکدار لە عێراق و سوریا دەکات کە پشتیوانی رژێمی ئاخوندی ئێران و سیاسەتەکانی دەکەن و موژدەی ئەوەش بە ئێران دەدات کە خەریکه‌ هیلالی شیعی بەرەو کۆتایی دەگات. بە پێی راپۆرتی هەواڵدەرییەكان، جەعفەری وتویە، کە کۆماری ئیسلامی ئێران لە سوریا 100 هەزار چەکداری ئامادە کردووە.هاوکات باسی لە رێکخستنی 100 هەزار چەکدار لە عێراق کرد و جەعفەری  ئەو چەکدارانە بە سەرمایەکی گەورەی بۆ رژێمی ئاخوندی هەژمار دەکات. ئەو فەرماندەیەی سوپای پاسداران گۆڕانکارییەکانی یەمەن، بەحرێن و لوبنان بە هێمایەک بۆ تەواوکردنی ئەو هیلالە شیعییەی کە رژێمی ئاخوندی مەبەستییەتی، دەزانێت و پێی وایە ئەو هیلالە واتای یەکێتی وڵاتانی ئێران، سوریا، عێراق، لوبنان و وڵاتە ئیسلامییەکانی ترە.








درۆشمی مەگ بۆ دیكتاتۆر، زیندووە زیندانی سیاسی لە زیندانی گەوهەردەشت
كۆمەڵێك لە زیندانیانی سیاسی بەندی 12ی لە نارەزایەتی بە دانانی دەزگای پارازیتی سەرەتانزا و هەروەها بەردەوامی فشار و شكەنجەكان، لە كردەوەێكی بێ وێنەدا دەستیان دایە سەردانی درۆشمی مەرگ بۆ دیكتاتۆر و زیندووە زیندانیانی سیاسی. بە پێی راپۆرتی هەواڵدەرییەكان، لە رۆژی یەكشەممە 19ی بانەمەر زیندانیانی سیاسی لە ناو زیندانی گەوهەردەشتی كەرەج دەستیان دایە خۆپیشاندان بە درۆشمی مەگ و نەمان بۆ دیكتاتۆر، زیندانی سیاسی زیندووە. بە پێی ئەم راپۆرتە، یەكێك لە زیندانییەكان بە بەرپرسێكی ناو زیندان دەڵێت ئێوە ئێمەتان لە هەموو مافێكی زیندانی بێبەش كردووە و كردەوەی غەیرە ئینسانی لەگەڵ دژبەرانی نیزام دەكەن، ئێوە بە دانانی ئەم دەزگایانە ئەتانەوێت ئێمە لەم چاڵە رەشەدا لە ناو بەرن. جێگەی باسە كە زیندانیان رایانگەیاندووە كە لە ئەگەری درێژە كێشانی ئەم بارودۆخەدا دەست دەدەنە مانگرتنی درێژ ماوە.








بنكه‌ سه‌ربازییه‌كانی ئه‌مریكا ده‌خرێنه‌ ئاماده‌باشیی خێراوه‌
ژماره‌ی پاسه‌وانه‌كان له‌ سه‌رجه‌م ناوچه‌كانی  ئه‌مریكا زیادكرا، ئه‌وه‌ش دوای ئه‌و هه‌ڕه‌شانه‌ی كه‌ رێكخراوی تیرۆریستی داعش له‌و وڵاته‌ی كرد. به‌پێی راپۆرتی هەواڵدەرییەكان، سایتی هەواڵدەری سی ئێن ئێن رایگەیاندووە، پله‌ی ئاماده‌باشیی bravo ، كه‌ وه‌زاره‌تی به‌رگریی ئه‌مریكا ناوی لێناوه‌، ته‌نیا له‌و كاتانه‌دا راده‌گه‌یه‌نرێت كه‌ ده‌وڵه‌ت درك به‌ هه‌ڕه‌شه‌یه‌كی تیرۆرستیی چاوه‌ڕوانكراو بكات، له‌ رۆژی پێنجشه‌ممه‌ی رابردووشه‌وه‌ بنكه‌ سه‌ربازییه‌كانی ئه‌مریكا كه‌وتوونه‌ته‌ حاڵه‌تی ئاماده‌باشیی bravo . وه‌زاره‌تی به‌رگریی ئه‌مریكا، پێنج جۆر حاڵه‌تی ئاماده‌باشیی هه‌یه‌، bravo ش له‌ پله‌ی سێیه‌می ئه‌و وه‌زاره‌ته‌دایه‌، ئاشكراش بووه‌ رێژه‌ی دڵه‌ڕاوكێ نیگه‌رانی به‌هۆی هه‌ڕه‌شه‌كانی رێكخراوی تیرۆریستی داعشه‌وه‌، له‌نێو هێزه‌كانی سوپای ئه‌مریكا زۆر به‌رزبووه‌ته‌وه‌، هه‌ربۆیه‌ ئه‌و هێزانه‌ خراونه‌ته‌ حاڵه‌تی ئاماده‌باشییه‌وه‌. چه‌ند هه‌فته‌یه‌ك له‌مه‌وبه‌ر، په‌یجه‌كانی سه‌ر به‌ رێكخراوی تیرۆریستی داعش ناو و ناونیشانی زیاترله‌ 100 سه‌ربازی ئه‌مریكای بڵاوكرده‌وه‌ و جیهادییه‌ك به‌ناوی جنید حسێن، له‌ تویته‌ره‌وه‌ ناونیشانی سه‌ربازێكی ئاشكراكرد كه‌ هانی ده‌دات هێرشێك ئه‌نجام بدات.


ڕێکه‌وت: 2015-05-10 12:10:57
به‌شی ( هەواڵەكانی كوردستان، ئێران و جیهان 20ی بانەمەری 1394 )