__ بەردەوامی نارەزایەتییەكان لە شارەكانی سنە، بانەو سەردەشت__ ئیعدامەکان لە زیندانی ناوەندیی ورمێ بەردەوامن__ تەقینەوەی مین لە کرماشان، دوو هاووڵاتیی کوردی کردە قوربانی__ مانگرتنی زیندانیانی سیاسی زیندانی گەوهەردەشتی كەرەج__ زیادبوونه‌وه‌ی جووڵه‌ی سه‌ربازی تورکیە له‌ سنووری هه‌رێمی کوردستان __ عەلی ئەكبەر ساڵحی: لایەنی وتووێژكەر بیانوو دەگرێت__ عومره‌كارێك شوشه‌ی‌ راگری‌ ناو حه‌ره‌می مه‌ككه‌ ده‌شكێنێت

بەردەوامی نارەزایەتییەكان لە شارەكانی سنە، بانەو سەردەشت
خۆپیشاندان و نارەزایەتی بە خۆكوژی فەریناز خۆسرەوانی كچە كوردی خەڵكی مەهاباد تا دێت بەربڵاوتر دەبێت. بە پێی راپۆرتی هەواڵدەرییەكان، ئەمرۆ دووشەممە 21ی بانەمەر نارەزایەتی و خۆپیشاندان لە شارەكانی سنە، بانە و سەردەشت لە پشتیوانی لە خۆپیشاندانی خەڵكی مەهاباد بەرێوە چوو. بە پێی ئەم راپۆرتە، لە شارەكانی سنە، بانەو سەردەشت خۆپیشاندەران بە درۆشمی دژە رژێم جینایەتەكانی دەست و پەیوەندەكانی رژێمیان لە مەهاباد كە بوو بە هۆی خۆكوژی فەریناز خۆسرەوانی بە توندی مەحكوم كرد. هەروەها لە ئاكامی ئەو خۆپیشاندانانەدا بە هۆی دەستێوەردانی هێزە ئەمنییەتییەكان تێكهەڵچوون لە نێوان خەڵكی نارازی و هێزە ئەمنییەكان هاتووەتە ئاراوە. جێگەی باسە كە لە شاری سەردەشت 15 كەسیتر لە لایەن مەئورانی ئیتلاعاتەوە دەستبەسەر كراون.








ئیعدامەکان لە زیندانی ناوەندیی ورمێ بەردەوامن
 حوکمی ئیعدامی دوو هاووڵاتیی دیکەی کورد، لەلایەن دەزگای قەزایی رژێمی ئاخوندی ئێرانەوە لە زیندانی ناوەندیی شاری ورمێ بەڕێوەچوو.بەپێی راپۆرتی هەواڵدەریی کوردپا، سەرلە بەیانیی رۆژی رابردوو، دوو هاووڵاتیی دیکەی کورد لە زیندانی ناوەندیی ورمێ بە ناوەكانی سەید قادر حەمیدی تەمەن 37 ساڵ و بەهمەن تەمەن 28 ساڵ خەڵكی گەرەكی كۆشتارگای ورمێ ئیعدام کران. دەوترێ، سەید قادر حەمیدی بە تۆمەتی ''کوشتی ژن''ەکەی و بەهمەن بە تۆمەتی ''کوشتنی هاووڵاتییەکی ئازەری'' لەلایەن دەزگای قەزایی رژێمی ئاخوندی ئێرانەوە سزای ئیعدامیان بەسەردا سەپابوو. لەلایەکی دیکەوە و هەر لە هەمان رۆژدا، دوو هاووڵاتیی دیکە لە زیندانی ناوەندیی ورمێ ئیعدام کران، بەڵام هەتا ئێستا ناسنامەیان بۆ ئاژانسی هەواڵدەریی کوردپا روون نەبووەتەوە. هەروەها رۆژی پێنج‌شەممە رێکەوتی ١٧ی بانەمەڕ، بەرپرسانی زیندانی ناوەندیی ورمێ، حوکمی ئیعدامی شەش هاووڵاتیی دیکەیان لەو زیندانە بەڕێوە بردبوو.








تەقینەوەی مین لە کرماشان، دوو هاووڵاتیی کوردی کردە قوربانی
 لە ئوستانی کرماشان مین بە ماشێنێکدا (تەنکێری ئاو) کەلە حاڵی کارکردن بۆ نۆژەکردنەوەی ئاواییەکی ناوچە سنوورییەکان بووە، تەقیوەتەوە و لە ئەنجامدا دوو کەس بریندار بوون. بەپێی هەواڵی هەواڵدەریی کوردپا، رێکەوتی ١٩ی بانەمەڕ تەنکەرێکی ئاو لە ئاوایی نەوت شار لە ئوستانی کرماشان بەهۆی کەوتنە سەر مینە چێنراوەکانی دەوروبەری رووبارێک تەقیوەتەوە و بێجگە لە بریندار بوونی شۆفێرەکە، سەرنشینی ماشێنێکی دیکەش بریندار بووە.دەوترێت ئەو مینانەی کەلە سەردەمی شەڕی هەشت ساڵەی ئێران و عێراق چێنراون لە ئەنجامی لافاو و هێندێ هۆکاری دیکەوە شوێنەکانیان گۆڕدراوە و ئەو مینەش هەر بەو هۆکارەوە تەقیوەتەوە. جێگەی باسە كە سەرەتای ئەمساڵەوە هەتا ئێستا، ٧ هاووڵاتیی کورد تەنیا لە ئوستانی کرماشان لە ئەنجامی تەقینەوەی مین و کەرەسە جەنگییەکانەوە کوژراو و بریندار بوون و لە ناوچە کوردنشینەکانی ئێرانیش ژمارەی کوژراو و بریندارەکان ٩ کەس تۆمار کراوە.








مانگرتنی زیندانیانی سیاسی زیندانی گەوهەردەشتی كەرەج
لە درێژەی فشارەكان بۆ سەر زیندانیانی سیاسی و دانانی ئامێری پارازیت لە ناو زیندانەكە كە دەبێتە هۆی نەخۆشی سەرەتان زیندانیانی سیاسی زیندانی گەوهەردەشتی كەرەج مانیان لە خواردن گرت. بە پێی راپۆرتی هەواڵدەرییەكان، زیندانیانی سیاسی ئەو زیندانە لە ئەمرۆ دووشەممە 21ی بانەمەر لە نارەزایەتی بە دانانی ئامێری مەوج شكێن ( پارازیت) كە زیندانیان وەك شكەنجەی سپی ناوی لێ دەبەن و بەردەوامی فشارەكان بۆ سەریان و نەبوونی پیداویستی بێهداشتی و پزشكی پێویست دەستیان داوەتە مانگرتن. جێگەی باسە كە زیندانیانی سیاسی زیندانی گەوهەردەشت لە رێكەوتی 19ی بانەمەر درۆشمی مەرگ و نەمان بۆ دیكتاتۆر و زیندانیانی سیاسی زیندوون ، بژی ئازادی نارەزایەتی خۆیان نیشان دابوو.








زیادبوونه‌وه‌ی جووڵه‌ی سه‌ربازی تورکیە له‌ سنووری هه‌رێمی کوردستان 
به‌پێی زانیارییه‌ بڵاوکراوه‌کان له‌ سه‌رچاوه‌ ناوچه‌ییه‌کانی پارێزگای جۆله‌مێرگ، 2 حه‌وته‌یه‌ که‌ جووڵه‌ی سه‌ربازی هێزی زه‌وینی و ئاسمانی سوپای تورکیە له‌ ده‌ورووبه‌ری سنووره‌کانی ئه‌م پارێزگایه‌ زیادی کردووه‌. به‌پێی راپۆرتی هەواڵدەرییەكان،  2 حەفتەیە که‌ جموجووڵی سه‌ربازی زه‌وینی و ئاسمانی سوپای تورکیە له‌ ده‌ورووبه‌ری سنوورکانی ئه‌م پارێزگایه‌ زیادی کردووه‌، له‌ ماوه‌ی ڕابردوودا گواستنه‌وه‌ی جیهازاتی سه‌ربازی سوپا بۆ پارێزگای جۆله‌مێرگ زیادی کردووه‌. هه‌واڵه‌ بڵاوکراوه‌کان له‌ پارێزگای جۆله‌مێرگ ده‌ریده‌خات که‌ که‌تیبه‌ی فه‌رمانده‌یی هێزه‌ تایبه‌ته‌کانی جۆله‌مێرگ به‌ هاوڕێی ئۆتۆمبێلی سه‌ربازهه‌ڵگر و زرێپۆش ناسراو به‌ "خارپشت" و زرێپۆش سینگاڵ پچڕێن به فه‌رمانده‌یی ناوه‌ندی هێزه‌ چه‌کداره‌کانی پارێزگای جۆله‌مێرگ بۆ سنووره‌کانی ئه‌م پارێزگایه‌ به‌ڕێککه‌وتووه‌.








عەلی ئەكبەر ساڵحی: لایەنی وتووێژكەر بیانوو دەگرێت
ساڵحی سەرۆكی سازمانی ئێنرژی ئەتۆمی رژێمی ئاخوندی بە وتنی ئەوەیكە لایەنی بەرانبەر لە وتووێژە ناوكەییەكاندا لەسەر هێندێك بابەت كە پێشتر لە سەری رێك كەوتووین بیانوو دەگرێت، بە بۆنبەستی ئەو وتووێژانە دانی نا. بە پێی راپۆرتی هەواڵدەرییەكان، ساڵحی بە هێرش كردنە سەر نیگەرانانی ناوكەیی وتی، كۆمەڵێك كە ناوی خۆیان ناوە زانای ناوكەیی ئەزانن، من نازانم كە ئەم ناوەی زانا چۆن بە كار دێنن كاتێكە وەك نموونە ئەنیشتەین زانایە ئەم كۆمەلە كەسەش خۆیان ناو ناوە زانا. بە پێی ئەم راپۆرتە، ساڵحی هەروەها بە نەیارانی وتووێژی ناوكەیی لە ناوخۆی رژێم وتی، من برایانە پێتان دەڵێم هەر چەندە ئێوە بێ ئەدەبی بكن دەگەرێتەوە بۆ خۆتان.








عومره‌كارێك شوشه‌ی‌ راگری‌ ناو حه‌ره‌می مه‌ككه‌ ده‌شكێنێت
له‌ تۆڕی‌ كۆمه‌ڵایه‌تی‌ یوتیوب گرته‌یه‌گی‌ ڤیدیۆیی بڵاوكرایه‌وه‌ كه‌ تیایدا عومره‌كارێك شوشه‌ی راگری ناو حه‌ره‌می مه‌ككه‌ ده‌شكێنێت و بانگه‌شه‌ی‌ ئه‌وه‌ ده‌كات كه‌ "محه‌مه‌دی‌ مه‌هدی‌"یه‌. بە پێی راپۆرتی هەواڵدەرییەكان، رۆژنامه‌ی "مه‌دینه‌"ی‌ سعودی،بڵاوی كردووەتەوە كە عومره‌كاره‌كه‌ خه‌ڵكی‌ وڵاتی‌ یه‌مه‌نه‌ و كێشه‌ی‌ ده‌روونی‌ هه‌یه‌ و دوای‌ رووداوه‌كه‌ ده‌ستبه‌سه‌ر كراوه‌ و راده‌ستی‌ هێزه‌كانی‌ پۆلیس كراوه‌. وه‌ك له‌ گرته‌ڤیدیۆییه‌كه‌دا ده‌ركه‌وتووه‌، ئه‌و عومره‌كاره‌ له‌ڕێی كورسییه‌كی ئاسنه‌وه‌ كه‌ به‌ته‌مه‌نه‌كان بۆ نوێژكردن به‌كاری‌ ده‌هێنن، به‌شێك له‌ شوشه‌ی راگر و به‌ربه‌ستی ناو حه‌ره‌می مه‌ككه‌ ده‌شكێنێت و به‌ ده‌نگی‌ به‌رز هاوار ده‌كات و ده‌ڵێت: "من مه‌هدیم" وه‌ك ئاماژه‌یه‌ك بۆ "محه‌مه‌دی مه‌هدی".

ڕێکه‌وت: 2015-05-11 15:27:19
به‌شی ( هەواڵەكانی كوردستان، ئێران و جیهان 21ی بانەمەری 1394 )