١٠ی خەزەڵوەری گەلی كوردو رۆژی پێشمەرگەی سازمانی خەبات

خومەینی فەرمانی جیهادی دژی گەلی كوردستان راگەیاندبوو لە دوای ئەو فەرمانە قێزەونە، پاسدارە چەقۆكێشەكان كە لەگەڵ چەقۆكانیشیان ئەسڵەحەو چەكیان درابوە دەست و، بەرەو كوردستان مەكۆی مەردایەتی و ئازادیخوازی، مەڵبەندی بەرابەریی خوازی و دیموكراسیخوازی شۆڕبوونەوە

هێزی بەكرێگیراوی حكومەتی خومەینی بەبێ‌ ڕەچاو كردنی هەرجۆرە بنەمای ئیسلامی و ئینسانی، بە شارو دێی‌ كوردستان وەر بوون وگەلی ستەم لێكراو بێ‌ ماف و زوڵملێكراوی كوردیان خستە هەلومەرجێكی حەستەم و سەختەوە

بەڵێ لەو كاتەی پاسدارو هێزە بەكرێگیراوەكانی حكومەتی خومەینی كوردستانیان كردە گۆڕەپانی جەنگ، و ماڵ و شوێنی ژیانی خەڵكیان وێران دەكردو بە حوكمی قەرەقوشیان، پیرو لاوی كوردیان گوللە باران دەكرد، لە 10ی خەزەڵوەری ساڵی 1358 كۆچی خۆری پێشمەرگە نەبەزو لێهاتوەكان،ئەو پێشمەرگەو كادرو فەرماندانەی كە دوای ساڵێك سازمانی خەبات ی كوردستانیان دامەزراند، بە شێوەیەكی لیهاتوانەو زۆر قارەمانانە لە مەودایەكی 30 كیلومیتری هێزی بەكرێگیراوی گاردی جاویدان(هێزی قودس)یان لە دەرەوەی شاری بانە تا سەر پردی ناوشاریان تەفروتونا كردو سەدان كەس لەو هێزە بەكرێگیراو و دەیان ماشین و كەلوپەلی سەربازیان لە ناوبرد

بێگومان بۆ هۆگرانی رێبازی پیرۆزی سازمانی خەبات داستانی حەماسی 10ی خەزەڵوەرو ئەو قارەمانیە كەم وێنەیە، بیرەوەریەكی گەورەو شانازیەكە، كە هەمیشە وەك میداڵ و وەك ناسنامەو پێناسەی خەباتی بوون و بە بڕشتی هۆگرانی رێبازی پیرۆزی سازمانی خەبات دەمێنێتەوە، لە هەمانكاتدا بۆ جەماوەری وەزاڵەهاتووی كوردستان و تێكرای تێكۆشەران و خەباتكارانی رێگەی ئازادیی و شۆڕشی ڕەوا، دژ بە رژیمی ملهوری ئاخوندی، رۆژێكی مێژوویی گرینگە، بە تایبەت كە ئەو داستانە حەماسیە خومەینی ناچار كرد داوای ووت ووێژو دانوستاندن لە گەلی كورد بكاو لە دوای ئەو داستانە پر لە حەماسیە، خومەینی رابگەێنێ‌ كە خەڵكی كوردستان من دەنگی ئێوەم بیست

لەم رۆژانەدا كە یادی 10ی خەزەڵوەرو ئەوە داستانە حەماسیە دەكەینەوە، دەبینین رژیمی ئاخوندی چەندە داماو زەلیل بووە، بە شێوەیەك كە روخان و لە ناوچوونی گەلێك نزیك بۆتەوە. بێگومان لە وەها هەلومەرجێكدا پێویستە هۆگرانی رێبازی سازمانی خەبات زیاتر خۆیان بە فكرو ئەندێشەی شۆرشگێرانەو نەتەوەیی لە چوارچێوەی رێبازی سازمانی خەبات باربێنن و لە پێناو هاتنە دیی مافەكانی گەلی چەوساوەی كوردو بە مەبەستی رووخانی رژیمی ملهوری ئاخوندی چالاكانەتر تێبكۆشن

بە پێویستی دەزانم بە بۆنەی ئەو یادە گەورەو پڕلە سەروەریە درود بنێرم بۆ رۆحی پاكی شەهیدانی رێبازی كوردایەتی و ئازادیخوازی لە ریزەكانی سازمانی خەبات ی كوردستانی ئێران و رۆحی مامۆستا سەید جەلال حوسەینی پێشرەو میعماری 10ی خەزەڵوەرو تێكرای شەهیدانی رێگەی ئازادی و خەباتی شۆڕشگێرانە بەرانبەر بە حكومەتی دیكتاتۆری ویلایەتی فەقیه

ڕێکه‌وت: 2018-10-31 18:23:19
به‌شی: ( مێژوویی )
بابەشێخ حسێنی