لە هەشتەمین ساڵرۆژی كۆچی دوایی مامۆستا شێخ عیزەددین حوسەینی

بابەشێخ حسێنی
یادكردنەوەی كەسایەتیە دیارو تێكۆشەرەكانی رێگەی ئازادی كوردستان ئەركی هەر هاونیشتمانیەكی كوردستانە. بە تایبەت یادی مامۆستا شێخ عیزەددین رێبەری خۆنەویست و دڵپاك كە بە تەواوی مەعنا ئامانجی رزگاری كوردو كوردستان بوو و بەو پەڕی توانای لە پێناو یەكڕیزی و برایەتی لە كوردستان هەوڵی دەدا. مامۆستا شێخ عیزەددین تێكۆشەرو دڵسۆزو بێ‌ منەت بەماڵ و سەروەت و دەسەڵات بوو.
لە گەڵ ئەوەی مامۆستا شێخ عیزەددین رێبەرێكی ئایینی بوو، بەڵام بە بێ‌ جیاوازی لە هەموو بیرو بۆچوونەكانی دەڕوانی و هەموویانی بە هاوبەش لە خێرو خۆشی و شەری كوردستان دەزانی. بەداخەوە ململانێ‌ سیاسەكان و بیركردنەوە هەڵەكان كە باڵی بە سەرجوڵانەوەی مافخوازانەی كوردا كێشابوو،بوونە سەرهەڵدانی دژایەتیەكان وهۆی بزڕِكاندنی ریزی شۆڕش. دروست كردنی ئەو ناكۆكیە بێ‌ هۆیانە وایان كرد لەو هەلومەرجە لەبارەی كە لە سەرەتادا بۆ گەلی كورد لە كوردستانی ئێران هاتبوونە پێش،كەڵك لە كەسایەتی جەنابی مامۆستا شێخ عیزەددین و لە هەلومەجی لە بار وەرگیرێ‌، بەڵام بە داخەوە دژمن كەڵكی لەو پەرتەوازەیی و دژایەتیانەی نێو ریزی شۆرش وەرگرت.
ئەوەی زیاتر جێگەی داخە،بوونی كەسانی هەل پەرەست و نادڵسۆز لە دەوری جەنابی مامۆستا بوو كە رێگەیان گرت لەوەی بەڕێزیان و كەسە دڵسۆزەكانی، دەوری زیاتر لە رێبەرایەتیكردنی جوڵانەوەی مافخوازانە بگێڕن‌.
رێبوارانی رێبازی سازمانی خەبات ی كوردستانی ئێران مامۆستا شێخ عیزەددین بە بەشێك لە مێژووی سازمانی خەبات دەزانن كە لە هەلومەرجە حەستەمەكاندا پشتیوانێكی قایم و گەورەو هاوكارو یارمەتیدەرمان بوو.
مامۆستای نەمر چ لە كاتی ژیان و چ لە دوای كۆچی دوایی،هێمای خۆشەویستی و دڵسۆزی بۆ گەل و نیشتمان و بۆ من بوەو یادی ئەو رێبەرە بلیمەت و كەم وێنەیە هەمیشە لە كات بە كاتی ژیانم بە زیندوویی دەمێنێتەوە.
رۆحی پاكی مامۆستا شێخ عیزەددین حوسەینی رێبەری خۆنەویستی نەتەوەكەمان شادو جێگەی بەهەشتی بەرین بێ‌.

ڕێکه‌وت: 2019-02-09 19:46:33
به‌شی: ( سکرتێری گشتی )