كوژران و برینداربونی 3 كۆڵبەر لە پارێزگای كرماشان

خەباتمێدیا: کارەساتی کوڵبەرکوشتن لە سنوورەکانی کوردستان بۆتە کاری رۆژانەی هێزە ئینتیزامیەكانی رژیمی ئاخوندی ئێران و رۆژ نیە هەواڵی کوژران و برینداربوونی ئەو چینە چەوساوە بڵاونەبێتەوە.
لەناوچە سنوورییەکانی “سەلاسی باوەجانی” لە شوێنێک بە ناوی “شێخ سڵە”، كۆمەڵێك کۆڵبەری کورد دەکەونە بەردەسڕێژی هێزە ئینتیزامیەكانی رژیم و لە ئەنجامدا 2 کۆڵبەر بە ناوەکانی “بروومەند بەهرامی” و هۆشیار نەمامی” دەكوژرێن و کۆڵبەرێکیش بەناوی “ئەرکان بەهرامی” بە سەختی بریندار بووە.
کۆڵبەریی یەکێک لەو کارە پڕمەترسیانەیە کە خەڵکی ناوچە سنوورییەکانی کوردستان، بەهۆی بێکاری و نەبوونی و نەدارییەوە ڕووی تێدەکەن و بەداخەوە رۆژ نییە کە شاهێدی كوژران و برینداربوونی چەند کەسێک نەبین.
هێزە چەکدارەکانی رژیمی ئاخوندی ئێران ،بێ گوێدانە یاسا مرۆیی و نێودەوڵەتیەکانی پێوەندیدار بە مافی مرۆڤەوە، ئەو کۆڵبەرانە دەدەنە بەر دەستڕێژی چەکەکانیان کە دەبێتە هۆی کوژران و برینداربوونی ئەو توێژە زەحمەتکێشە، کە دەیانهەوێ لەو ڕێگەیەوە بژێویی خێزانەکانیان دابین دەکەن

ڕێکه‌وت: 2018-11-05 08:02:15
به‌شی: ( هه‌وال )