راپەرینی سەرانسەریی لە دژی دیكتاتۆریەتی ئاخوندی باشترین بژاردە

كامیل نورانی فەرد
ماوەی 4 دەیەیە بە زەبری سەركووت و جینایەت دەسەڵاتی رەشی ئاخوندان باڵی كشاندووە بەسەر وەڵاتی ئێران و لەماوەی ئەو ساڵانە زیانی قەرەبوو نەکراوەی بە هەموو پێكهاتە و بەش و رەهەندەكانی كۆمەڵگای ئێران گەیاندوە، و هاوكات بە هۆی زێدەخوازییەكانی دەسەڵات لە ئاستی دەرەوە، پانتاییەكی گەورەی لە ئاژاوە و بشێویی و ترۆریست پەروەری دروست كردووە كە ناوچەكە و جیهانیشی بەو كێشانە سەرقاڵ كردووە.
جینایەت و تاڵان و دزی و سەركووت لە ئاستی ناوخۆ و سەرەرۆیی و شەرەئەنگێزییە بەردەوامەكان لە ئاستی دەرەوە مەشروعیەتی نیزامی ئاخوندی بەتەواوی لە هەردوو ئاستی ناوخو و دەرەوە ستاندۆتەوە و تا دێ‌ فشارە دەرەكی و ناوخۆییەكان بۆسەر دەسەڵاتدارانی ئێران تەنگتر دەبێتەوەو ویستی نەمان و گۆڕینی دەسەڵات بە روونی خۆی نیشان دەدا، ئەوەش بە شێوەێكە كە نەك تەنیا ویستێكی گشتیە بەڵكو بۆتە زەرورەتێك بە ئامانجی كەم كردنەوەی خەسارەت و زیانەكان بۆ دەوروبەر و بەرگرتن لە تەوژمی ئالۆزی و شەرئەنگێزی زیاتر.
لەماوەی ئەو 4 دەیە فشارە جیهانیەكان بۆ سەر رژیم وەك پێویست نەبوون، بەڵام لەدوای قۆناغی ئاشكرابوونی بەرنامەی شاراوەی ناوكەیی رژیمی ئێران لەلایەن شۆرای میللی موقاومەتی ئێران، قۆناغێكی نوێ لە فشارەكان دەستیان پێكرد و لەماوەی ئەو سالانەدا زۆرهێنانەكان بۆ سەر رژیم بەرز و نزمی بە خۆیەوە بینیوە. ئەوەی ئێستا دەیبینین لوتكەی فشارە نێونەتەوەییەكان بۆ سەر رژیمی ئێرانەو بە ئارایشی هێزی سەربازی ئەمریكا لە ناوچەكەدا هەلو مەرجەكە ئەوەندە هەستیارە كە بچووكترین هەڵەی رژیم هێرشی توندی نیزامی بەدواوە دەبێ.
هاوكات لەگەڵ ئەو دۆخەدا ئەوەی جێگەی سەرنجە،هەل و مەرجەكە لە ئاستی ناوخۆش دا بۆ دەسەڵاتداران هەستیار و جێگەی مەترسیە، ناسەقامگیری دۆخی ئابووری بە هۆی گەمارۆكان،دزی و گەندەڵی و هەروەها سیاسەتە هەڵەكانی ئاخوندان بە رێژەیێك كارەساتبارە كە بوونە هۆكاری شۆڕشێك كە بە شۆڕشی برسیەكان ناوەزد كراو زۆربەی شارەكانی ئێران بوو بە مەیدانی خۆپیشاندان و شوعاری نوێ كە سەرجەم پێكهاتەی ئاخوندانی كردۆتە ئامانج و داوای نەمانی دەسەڵاتی تێدا بەرز كرایەوە .
هاوكات بوونی ئەو فشارانە لە ئاستی نێو خۆ و لە ئاستی دەرەوە دەرفەتێكی زێرینی خوڵقاندووە بۆ وەدیهێنانی خەونی چەندین ساڵەی رووخانی دیكتاتۆری لە وەڵاتی ئێران و كۆتایی هێنان بە رۆژە رەشی و نەهامەتی لە لایەن دەسەڵاتدارانی ملهوری رژیمی ئاخوندی .
ئەوەی جێگەی بایەخە هەڵبژاردنی رێگەێكی كەم تێچووتر بۆ وەدیهێنانی ئەو ئاڵوگۆرەیە كە بێ گومان ئەو رێگەیە گۆرینی دەسەڵات لە رێگەی خۆپیشاندان و نارەزایەتی لەلایەن گەلانی ئێرانەوە لە ئێستادا دەرفەتێكی زێرینە بۆ وەدیهێنانی ئالوگۆری قووڵ و بنەڕەتی و رووخانی دیكتاتۆریەتی فاشیستی دینی و ئەگەر خەڵكی وەزاڵەهاتوو برژێنە سەر شەقام، هەم بە خێرایی لە ئاستی نێونەتەوەیی دەبێتە جێگەی پشتیوانی و سەرەنجی بیرورای گشتی نێودەوڵەتی و هەمیش پێش بە زیانی ماددی و مرۆیی لە ئاكامی شەڕی نیزامی دەگیرێ‌ و پرۆسەی سەقامگیریی وەڵات خێرایی زیاتر بەخۆیەوە دەبینێ‌ و ئەگەری پاڵپشتی سیاسی نێونەتەوەیی لەراپەرینی خەڵکی ئێرانیش بوونی دەبێ.
بێگومان بژاردەی راپەرینی گشتی نێوخۆیی بژاردەیێكی یەكلایكەرەوە دەبێ و مەجالی خواردنەوەی جامی ژەهر و تەسلیم بوون بە مەرجەكانی ئەمریكا و لە ئاكامدا هێشتنەوەی دەسەڵاتی دیكتاتۆریەتی ئاخوندی بۆ ماوەێكی تر و لە ئاكامی سات وسەودایەكی ئابووری و سیاسی ناهێلێتەوە.
ئەمرۆ ئەرك و بەرپرسیارەتی گەورە لەسەر شانی سەرجەم چین و توێژەكانی كۆمەڵگای ئێران بە هەموو پێكهاتە نەتەوەیی و دینی و ئیتنیكیەكانە كە لە رێگەی رژانە سەرشەقامەكان و بەرز كردنەوەی هاواری ئازادیخوازیان و تەقینەوەی رقی پەنگخواردووی چەندین ساڵەیان كۆتایی بە حوكمی دیكتاتۆریەتی ئاخوندی بێنن و ئەو دەسەڵاتە لاواز و تەریك كەوتووە بۆ هەمیشە بە لادابێنن.

ڕێکه‌وت: 2019-05-16 11:14:39
به‌شی: ( ڕامیاری )