تا کەی بە داوی بێ دانەوە بین؟

رێبوار حوسەینی

ساغبوونەوە و باوەڕبوون بەخەبات و تیکۆشان لە پێناوی ئازادی و ڕزگاری نەتەوە و نیشتمان دا، تایبەتمەندیه‌کی هێندە بەرزی مرۆڤە دەربەست و خاوەن هەڵوێستەکانە، کە ناکرێ مرۆڤ بەسادەیی و ساکاریەوە لێی بڕوانێ و سەرنج نەخاتە سەری.

 ئەوانەی کە له‌پێناوی بەختەوەری و رزگاری و پیشکەوتن و پێگەیشتنی نەتەوە و نیشتمانەکایان دا ، لە هەوڵی بێ وچان و بڕینی رێگای سەختی پڕ لە کەند و لەندی بەرخودانن و، دەست لە بوون و مان و سەروەت و سامانی خۆیان هەڵدەگرن ولەو پێناودا دەیکەنە قوربانی، لە میژووی مرۆڤایەتی دا زۆر دەگمەن و دانسقەن. بە سەرنج دان و خوێندنەوەی مێژووی پڕ لە کارەساتی گەلانی بن دەست و خەباتکار بۆ ئازادی و یەکسانی، ئەوەی کە لە هەموو شتێک زیاتر سەرنج راکێشەو بە هەوێن و هێمای ئەو خەبات و بەرخودانە دیتە ئەژمار، دەور و کاریگەری و توانایی مەعنەوی و تێرامان و تێروانینی دروست و هەڵبژاردنی خەت و رێبازی خۆماڵیانە و ئاشنا بە ویست و خواستەکانی جەماوەرە لە لایەن سەرکردە و رێبەری ئەو جەماوەرە و جوڵانەوەکەیان.

 بێ شک رێگای راست و رێبازی پاک و هەڵویستی نەگۆڕ و چاک و باوەڕی پتەو بە راستی و رەوایی داخواز و ئامانج، رێگای دووری بەرخودان نزیکتر دەکا و کەند و کۆسپ و لەمپەرەکان ئاسانتر لە سەر رێگای رەوتی بەرەو پیشچوونی شۆڕش و جوڵانەوەکە لادەبرێن. کەوایە کەسێک دەتوانێ رێبەر و سەرکردەبێ کە خاوەنی وێژدان و دەروونێکی زیندوو پاک و هەست و هەلوێستێکی چاک و ورە و توانای بە هێز و هزر و بیری بە پێز و خۆشناو و خاوەن رێز و رەوشت بەرزو بە پارێزبێ. ئاشنا بێ بە ئازار و مەینەتیەکانی گەل، ئاوێتەێک بێ لەهەست و سۆز و خۆشەویستی و بە هەڵویستی بۆ نەتەوە و نبیشتمانەکەی. زانا بێ بە زانستی سیاسی و ماف پەروەری و یەکسانخوازی، خۆراگر و بە بڕیار و نەگۆڕ و داهاتوو بین و بەراێژ و دەوروبەر بین بێ و بۆ هەر کەوتن و نسکۆ بردنێک خوێندنەوە و خەسارناسی هەبێ، لە هەستانەوە و خۆ سازدانەوە دا خاوەن ورە و تەگبیر و بە مشوور بێ. بۆ بار‌هینان وتێگەیاندنی هاو کار و هاوباوەڕانی و چین و توێژەکانی کۆمەڵگاکەی مامۆستاێکی لێزان وشارەزابێ. بۆ پێگەیاندن و بەرەوپێش چوونی کۆمەڵگا، خاوەن بەرنامە ولێکدانەوەی ووردی وابێ کە لەو دا هەموو وردەکاریەکانی مافی نەتەوەکەی خۆی و رێزدانان بۆ بیر و باوەڕە جێاوازەکان بپارێزێ. رێبەری دڵسۆز و سەرکردەی سەردەرچوو ئەوکەسەیە کە لە هەر کردە و گوتارێکیدا، نموونەی ئەوپەڕی پارێزگاری لە ماف و رێزگرتن لە بیرورای جیاواز و گوێگر بۆ بەرانبەر و موخاتەبی خۆی بێ و وەها هەڵس و کەوت بکا کە رەنج بە خەسار و کردە پەشیمان نەبێ و قازانج و بەرژەوەندی گەل و نەتەوەکەی لە لا بەرز و بەرێز و پیرۆز بێ ولە ناو هاواڵان و هاوباوەڕکانیشی دا بە بێ هەڵاواردن و پەراوێز خستن، بۆ هەر کار و فەرمانێک کە پێوەندی بە ئەرک و چالاکی لە پێناو بەرەو پێشچون و گەشە کردنی کاری تەشکیلاتی و دیپلۆماتی ئەو لایەنە سیاسیەی کە ئەو سەرکردایەتی دەکا ، لە هەر هەل و مەرجیک دا دەبێ بە راوێژ و هاونەزەری هاوڕیکانی و کەڵک وەرگرتن لە زانیاری وئەزموون و سەردەچووی هەمووان لە بەڕێوەبەری و راپەڕاندنی بەرنامە و گەڵاڵەی کارەکانی هەنگاو هەڵگرێ و خۆی لە هەر جۆرە کردە و وتەیکی تەک رۆیانە و سەربەخۆ بە دوور بگرێ. لە بەڕێوەبەری حیزب و لایەنی سیاسی شۆڕشگێڕ لە دژی دەسەڵاتی خوینڕێژی ویلایەتی فەقیە لە ئێران دا، زۆر سەرکردەو بەڕێوەبەر و رابەر هەر کام لە لای خۆیەوە لایەنی سیاسی خۆی رێبەری کردوە و هەموو شێوازەکانی خەبات و تێکۆشان لە هەمبەر گەیشتن بە ئاوات و ئامانجی لایەنەکەی لە مەڕ خۆی، بە کار هێناوە، وەک خەباتی سیاسی، مەدەنی، کۆمەلایەتی، دیپلۆماتی، چەکداری و دانوستان و وتووێژ، یەکیک لە شێواز و مێتۆدەکانی ئەو تێکۆشان و خەباتە لە پیناو رزگاری نەتەوە و نیشتمان دا بوون. هەرکام لەو شێوازانەی خەباتکردن دەرئەنجام و بەرهەمی کەم تا زۆریان لە پێناو گەشە و پێشخستنی بزاوڤی رەوای گەلەکەمان دا هەبووه، بێجگە لە شێواز و مێتۆدی وتووێژ و دانووستان لە گەڵ دەسڵاتی ئاخوندی و نیزامی ویلایەتی فەقیە. لە تەواوی رەوتی ئەم چل ساڵەی خەباتی گەلی کورد لە کوردستانی ئێران دا، رژیمی خوێنڕێژ و دژی ئینسانی ئاخوندی لە دوو حاڵەت دا لە گەل دژبەرانی خۆی لە کوردستان ئامادەی وتوو وێژ و دانووستان بوە.

یەکەم: کاتێک کە لە هه‌ندێک ناوچە و شوینی وڵات لە لەیەن هێزی پێشمەرگەوە زەبری گرچو بڕی لێدراوە و ناوچەکەی لە ژێر کۆنترڵ دا نەماوە و هێزەکانی تیکشاون، بە مەبەستی خۆ ئامادە کردنەوە و تەیار کردنەوەی هێزەکانی بۆ دووبارە دەست بەسەرداگرتنەوەی ئەو ناوچانە و کۆ کردنەوەی زانیاری لە سەر بەرنامە و کاری شۆڕش و شۆڕشگێڕه‌کانی کوردستان، داوای وتووێژی کردوە،کە هەموو جاران ئاکامی ئەو وتوو وێژانە بە قازانجی دژمن بوون و لایەنی بەرانبەر جیا لە پەشیمانی و زەرەرو زیانی قەرەبوونەکراوە، هیچ دەستکەوتێکی بەده‌سەت نەهێناوە.

 دووهەم: هەرکات رژیمی ئاخوندی گەڵاڵە و بەرنامەی بۆ تیرۆر و له‌ داوخستن و لە ناوبردنی سەرکردە و بەرپرسانی دیار و چالاکی حیزب و لایەنە خەباتکارەکانی کوردی داڕشتبێ و ویستبێتی پلان و گەڵاڵە شوومەکانی بە کردەوە بەڕێوە بەرێ. کە بە داخەوە لەم بارو بوارەشدا وەک ڕاوچیه‌کی شارەزاو کارکوشتە داوی بێدانی داناوە و نێچرەکانی بە بێ دان بەداو گرتوون و لە ناوی بردوون، کە بەداخەوە دوای دووبارە بوونەوە و تەجرووبەکردنەوەی دەیان جار لەم جۆرە داوانە، نێچیرە دڵساف ئەزموون و دەرس وەرنەگرەکانی لە داو و راو و راوچیەکانی پێشوو، نەک بە باڵ و لاق، بەڵکو بە دەندووک پێوە بوون و هاوکار و رێبوارانی رێگایان دوای ئەو هەموو زیان و شکست و زام وبرین و پەڕو باڵ هەڵپاچینانە، دەیانەوێت روە و هەمان حەشارگە و دان و داوانە بفڕن و ئازاری دۆڕانی پێوە بوون بەو داوە بێدانانە بە گیان بۆ خۆیان بکرن و دڵی دژمنی گەل و شۆڕشە ڕواکەی بە خۆیان و بە نەتەوە و نیشتمان خۆشکەنەوە. کە وایە زۆر لە جێگای خۆیدایە کە بە بێ پەردە و بە ڕاشکاوی روو لە هەمووان بڵین کە: ئەو سەرکردەو و بەرپرس و لایەنانەی کە دوای چەندین دەیە ئێستاش سەرەڕای ئەو هەموو زیان و زەربانه‌ کە لە لایەن دژمنی سەرەکی نەتەوە و نیشتمانمان لە شۆڕش و نەتەوەکەمان و لایەنە سیاسەکانمان دراون و قه‌رەبووکردنەوەیان ئەگەر محاڵ نەبێ، زۆر قورس و گرانە، ئێستاشی لە گەڵ بێ ماهییەت و نییەتی دژمنیان نەناسیوە، یان بە ئەمانەت و بەقەرز تاویان داوەتە خەبات و تێکۆشان و لە کوێوە بای هات لەوێوە شەن و قوونە کەوی خەرمانی خەبات بۆ رزگاری دەکەن و هەر رۆژەی روو لە رووگەیک نوێژی خەیاڵی دادەبەستن، یان تەنیا و تەنیا بە کتێب خویندنەوە و لەبەر کردنی هێندیک رستە و ووشەی لەسەر دڵ و زمانان خۆش و جێی باوەر پێکردنی خۆشباوەڕانی بێ ئەزموون، لە شۆڕش و خەبات بۆ رزگاری نەتەوە و نیشتمان لە دوای ئەو هەموو ماڵوێرانی و دەربەدەری و فیداکاریه‌ییی گەل و خۆبەختکرنی رۆڵە فیداکارەکانی کوردستان، لە سیاسەت و بەڕێوەبەری و دریژەدان بە تیکۆشان تا گەیشتن بە سەرکەوتنی و سەرفرازی یەکجاری، لە مانای خەباتی گەلێکی وەک گەلی قارەمان و نیشتمان و ماف داگیرکراو گەیشتون. بە راستی بەم شێوە تێڕامان و بەرنامانەوە چۆن دەتوانن بناوان لە رووباڕی بەختەوەری و رزگاری نەتەوە و نیشتمان هەڵبەستن و بیگەێننە سەر باغ و مەزرای خۆزیا و بریای گەلی بەشمەینەت وماف پێشێلکراومان؟. بەراستی ئەوانەی کە بە میلۆدی و ساز و ئاوازی ناسازەوە بەدیار مەلۆتکەی نیوە گیانی رژیمی جینایەتکاری ویلایەتی فەقیەوە شەوبێدارانە لایلایەی بۆ دەکەن و خۆینی بەناحەق رژاوی هەزاران شەهیدی نەتەوە و نیشیمانی کوردی بۆ لە مەمکە شیشەی لە سەدلا چڕژاوی میکڕۆباوی ئەم رژیمە دەکەن و دەیانەوێت سەرلەنوێ فرچکی پێبگرنەوە و بە ڕەوڕەوەی وتووێژ دارەدارەی پێبەکەنەوە ، سبەی رۆژێ چۆن جوابی دایکی شەهیدان دەدەنەوە و بە کام مەرهەم و هەتوانێک زامی جەستە و دەروونی هەزاران هەزار زامداری تیغی پیسی دەستی ئەم نیزامە تیمار و ساڕێژدەکەنەوە؟.

 

 دڵنیا بن ئەمە حوکمی مێژوویە و چارەنووسی دیکتاتۆران و خوێنڕێژان سەرنگرێ بوونە بۆسەرانگوێلکی مێژوو و خۆش باوەڕانیش بێجگە لە خەیاڵ و قەت نەبوو بە ماڵ، هیچی تریان بەنسیب نابێ. ئەوەی کە دەمێنێتەوە گەل و نیشتمان و شانازی خەبات و تیکۆشانی لێبراوانە و بڕیاری نەگۆڕی تاسەری ریبازی راست و خەباتگێڕان و سەرکردە خاوەن هەڵوێستە خۆ نەدۆڕ و قەت نەگۆڕەکانە کە لە سەرتاوە تا کۆتا، یەک ئامانج و یەک بڕوا، بەرەو پێش دەڕۆن، جا یان سەردەکەون یان بە شانازیەوە لە سەر رێباز و ئامانجی پیرۆزیان سەردادەنین و مەزاریان دەبێتە نزرگەی گەل و رێبوارانی ریگایان.


 

 

ڕێکه‌وت: 2019-06-22 19:12:33
به‌شی: ( ڕامیاری )
رێبوار حوسەینی