كاك بابەشێخ حوسێنی: هەر جۆرە وتووێژ و موزاكرەیەك بە زیانی ئامانجی شەهیدان وگەلی كوردە

سازدانی دیمانه‌ی خه‌باتمیدیا له‌لایه‌ن خاتوو شیلان محمدی له‌گه‌ڵ سکرتێری گشتی سازمانی خه‌بات کاک باباشێخ حسینی لە سەر چه‌ندین پرسی تایبەت بە بزوتنەوەی كوردستان، رووداوی ئێران و جیهان. ده‌قی دیمانه‌که‌ لێره‌ بخوێنه‌وه‌..

كاك بابەشێخ سەرەتا سوپاستان دەكەین كە ئەو دەرفەتەتان پێداین بۆ ئەم چاوپێكەوتنە.

محەممەدی: پرسیاری یەكەمی ئێمە ئەوەیە، بەگشتی دۆخی رژیمی ئێران وەك گەورە دوشمنی كورد لە ناوچەكە چۆن دەبێ؟

باباشێخ حسینی: سڵاو لەئێوەی بەڕێزو هاونیشتمانیانی تێكۆشەرو تێكڕای هۆگرانی رێبازی پیرۆزی سازمانی خەبات ی كوردستانی ئێران، و سڵاو درود بۆ رەوانی پاكی مامۆستا سەید جەلال حوسێنی دامەزرێنەری سازمانی خەبات كە ئەمساڵ یادی نۆهەمین ساڵی كۆچی دوایی بەرز رادەگرین.

لە پێوەند بە وەڵامی پرسیارەكەتان، وەك ئاشكرایە رژیمی دەسەلاتدار لە ئێران لە ئێستادا لەگەڵ چەندین كێشەی گەورەی ناوخۆیی و ناوچەیی و جیهانی بەرەو ڕووە.

لە لایەك باڵەكانی دەسەڵات بە سەرهەڵدانی كێشەكان لەگەڵ ئامریكا یەكتر تاوانبار دەكەن، باڵی خامنەیی هێرش دەكاتە سەر باڵی ڕۆحانی و بە ناو میانەڕەو كە ئەوان بوونە هۆی پاشەكشەی ڕژیم لە هەڵوێستە جیددیەكان لە بەرانبەر ئامریكادا، لە بەرانبەریشدا باڵی بە ناو میانەڕەو باڵی توندڕە و بناژۆخواز تاوانبار دەكەن كە كاریگەریان هەبووە لە سەر هەلومەرجەكەو تووش بوونی ڕژیم بە قەیران لەگەڵ ئامریكاو وڵاتانی ڕۆژئاوایی(غەربی). بێگومان ئەو كێشەیە گەلێك گەورەیەو تێكڕای دەسەڵاتداری ئێرانی گرتۆتەوە. لە لایێكی دیكە هەلومەرجی نالەباری ئابووری و دابەزینی نرخی دراو و ئەرزی ئێران و هەروەها گرانی و بێكاری، نەبونی دەرفەتی كارو لە هەموو گرینگتر رێگەگرتن لە فرۆشی نەوت و ئابلۆقەی قورسی ئابووری لە سەر دەسەڵاتی ئێران و دانانی ناوی ئۆرگان و ناوەندەكانی دەسەڵات لە لیستی ترۆریستی و بە تایبەت سپای پاسداران وەك كۆڵەكەو ئەهرومێكی سەربازی، ئابووری، ئەمنیەتی و دەیان كێشەی دیكەی ناوخۆیی بوونە هۆی ئەوە كە دەسەڵاتداریی لە ئێران كەوتۆتە ناو قەیرانی زۆر گەورە كە زۆر زەحمەتە بتوانن چارەسەریان بكەن.

هاوكات باس كردنی ویستی شەرخوازانەی دەسەلات و سوور بوون لە سەر پەرەپێدانی توانای مووشەكی و هەروەها بەردەوام بوون لەسەر بەرنامە ئەتۆمیەكان و هەڕەشە بۆ سەر ئەمنیەتی كەشتیەكان لە كەنداوی فارس وبە گشتی لێدانی تەپڵی جەنگ و دەستێوەردان لە كاروباری ووڵاتان، لە لایەكی دیكەوە نارەزایەتی چین و توێژەكانی خەڵك، خوێندكاران، كرێكاران و جوتیاران بە شێوەیەكی بەربڵاو درێژەیان هەیەو لە گەرمەی ئەو ناڕەزایەتیانەدا دروشمی توند دژی كاربەدەستان و تێكڕای پێكهاتەی ئەو حكومەتە دیكتاتۆرە دووپات دەكرێنەوە، و بە تێكڕا جەماوەر خوازیاری ڕوخانی ئەو دەسەلاتە خوێن ڕێژەن.

 محەممەدی: زۆر كەس ئەو ساڵ بە ساڵی رووخانی رژیمی ئێران لێكدەدەنەوە و پێیان وایە رژیم ناتوانێ لەژێر ئەم فشارانەدا خۆبگرێ و لە ئەنجامدا دەروخێ، ئێوە داهاتووی ئەو رژیمە چۆن دەبینن؟

باباشێخ حسینی: بەپێ‌ هەڵسەنگاندنەكانی شارەزایانی سیاسی و بەپێی‌ بەراوردی شارەزایانی دۆستمان لە ناوخۆی ئێران و هەروەها بە لە بەرچاوگرتنی ئەو هەلومەرجە نالەبارو ئاڵۆزەی ڕژیم تووشی هاتووە، بێگومان ئەوەمان پێدەڵێن كە ڕژیمی ئاخوندی بەرەو لە ناوچوون و ڕوخانی یەكجاری هەنگاو هەڵدەگرێ‌. بەڵام نابێ‌ ئەو ڕاستیەش لەبەرچاو نەگرین كە لەگەڵ فشارە سیاسی، ئابووری ، ناوخۆیی وهەروەها دەرەكیەكان، و لە هەمانكاتدا یەكگرتوویی و یەكدەنگی هێزو لایەنەكانی ئێرانی و كوردستانی ویەكگرتوویی جەماوەرو سەرهەڵدانی ناڕەزایەتی هەمەلایەن لە هەموو شارو ناوچەكانی ئێران و كوردستان زەرورەتێكی حەتمیە بۆ زوتر هاتنە دیی ڕوخانی ڕژیمی سەركوتگەر لە ئێران.

محەممەدی: سیاسەتی سنوورداركردنی دەستێوەردانی رژیم لە وەڵاتان تا چەند توانیویەتی كاریگەری هەبێ و دەخاڵەتی رژیم لە وەڵاتان سنووردار بكات؟

باباشێخ حسینی: پێم وانیە فشارە جیهانیەكان تا ئێستا ڕێگەیان لە دەستێوەردانەكانی ڕژیم لە كاروباری وڵاتان گرتبێ‌، بە تایبەت كە دەستێوەردان و ئاژاوەگێڕی و ناردنی ئینقلابی خومەینی بۆ وڵاتانی ناوچەكە یەكێكە لە بەرنامەكانی دەسەڵاتداری ئێران و تا ئەو دەسەڵاتە لە ئێراندا بەردەوام بێ‌، سیاسەتی دەست تێوەردان و ئاژاوەگێڕی لە وڵاتانی ناوچەكە بە تایبەت و جیهان بە گشتی بەردەوام دەبێ‌.

محەممەدی: بەشێك پێیان وایە گەمارۆكانی ئامریكا بۆ سەر رژیم كاریگەری لەسەر خەڵك دادەنێ‌ و ژیانی خەڵكی تاڵ كردووە و ئەو كاریگەریەی لەسەر دەسەڵات نیە، ئێوە ئەم بابەتە چۆن دەبینن؟

باباشێخ حسینی: بەرپرسی یەكەمی تێكرای ئازارەكانی خەڵك، حاكمیەتی ئێرانە. زیاتر لە چل ساڵە ئەو دەسەڵاتە بۆتە هۆی ماڵویرانی، گرانی، بێكاری و دەیان كێشەی دیكە. لە ئێستاشدا كە ئابڵوقە ئابوریەكان بۆ سەر ڕژیم و ناوەندەكانی ئابوری ئەو دەسەڵاتە پەرەی ستاندوە، لەگەڵ ئەوەی كاریگەری لە سەر ژیانی خەڵك بە تێكڕا هەبوە، بەڵام ئاخوندە دەسەڵاتدارەكان هەوڵ دەدەن تێكڕای ئەو قەیرانانەی كە لە ئێراندا هەن ببەستنەوە بە ئابڵوقە جیهانیەكان كە لە ڕاستیدا ئەو ئابڵوقانە تەنیا دەسەڵاتداری و ناوەندە سەركوتگەرەكانی كردۆتە ئامانج. بێگومان دابینكردنی كەل و پەل و دەرمان و پێداویستیەكانی ڕۆژانەی خەڵك لە چوارچێوەی ئابلۆقە سەپێندراوەكاندا نیە، بەڵام دەسەڵاتداران وەك هەمیشە لە ڕزگاركردنی دەسەڵاتەكەیاندان ئامریكاو وڵاتانی دیكە بە بەرپرسی قەیرانە ناوخۆییەكان و كێشەی ئابووری لە ئێران دەناسێنن. شتێكی حاشاهەڵنەگرە كە سەپاندنی ئابڵوقەكان كاریگەری زۆری لەسەر پێكهاتەی ڕژیم دروست كردوەو دەسەڵاتدارانی ئەو ڕژیمە بە ڕادەیێك بەو ئابلۆقانە نیگەرانن كە ئامادەن بۆ كەم كردنەوەیان هەر جۆرە ڕێگەیەك بگرنە بەرو هەموو جۆرە ئیمتیازێك بدەن بە وڵاتانی جیهانی و وڵاتانی ڕۆژئاوایی.

محەممەدی: پێوەندی ئەحزابی كوردستانی ئێران لەم هەلومەرجەدا لە چ ئاستێكدایە؟

باباشێخ حسینی: ساڵێك و چەند مانگ لەوەپێش بە هەوڵی سازمانی خەبات و دوو لایەنی كۆمەڵەی شۆڕشگێڕی زەحمەتكێشان و كۆمەڵەی زەحمەتكێشان و هەروەها دوو لایەنی حیزبی دیموكراتی كوردستان و حیزبی دیموكراتی كوردستانی ئێران، ناوەندی هاوكاری حیزبەكانی كوردستانی ئێران دامەزرا. پێكهاتنی ناوەندی هاوكاری حیزبەكانی كوردستانی ئێران لەسەر چەند بنەمای سەرەكی وەك، خەبات بۆ ڕوخانی ڕژیمی ئێران و ڕەدی ووتوێژ لەگەڵ ئەو دەسەڵاتە دژی كوردو دژ بە مرۆڤایەتی لە ئێران، هەروەها تێكۆشان بۆ هێنانەدیی حكومەتێكی دیموكرات و سێكۆلار لە ئێران و گەیشتنی گەلی كورد بە مافەكانی لە چوارچێوەی ئێراندا، لە خاڵە سەرەكیەكانی پێكهاتنی ناوەندی هاوكاری بوو. بەڵام بەداخەوە دوولایەنی دیموكرات و دولایەنی كۆمەڵە پشتیان لە پڕنسیپ و بڕیارە سەرەتاییەكان كردو بوونە هۆی هەڵوەشانەوەی ناوەندی هاوكاری، ئەو ناوەندەی كە بەو پڕنسیپانەی باسم كردن دامەزرا بوو. ئەو كارە بووە هۆی لاواز بوونی هەلومەرجی پێكەوە كار كردن بەو شێوەی كە فرە رەهەندو هەمەلایەن بێ‌.

بێگومان ئەو هەلومەرجی هاوكاری و یەك دەنگی لە نێوان لایەنە سیاسیەكانی كوردستان وەك پێویست نیە، بەتایبەت لە شێوەی هەڵوێست و میكانیزم و ئیستراتیژی گەلێك جیاوازی و لێك دووركەوتنەوە هەیە.

محەممەدی: بۆچی سازمانی خەبات لە ناوەندی هاوكاری كشایەوە، دەكرێ بە روونی ئیشارە بە هۆكانی بكەن؟

باباشێخ حسینی: سازمانی خەبات هەولێكی بەرچاویدا بۆ پێكهاتنی ناوەندی هاوكاری حیزبەكانی كوردستانی ئێران ،بێگومان بونی ئەو ناوەندە جێگەی دڵخۆشی بوو. هومێد دەكرا ببێتە مایەی یەكیەتی و تەبایی گشتی لە كوردستانی ئێراندا بەڵام بەداخەوە كارو ئامانجەكانی بە لاڕێدا برا.

بڕیار بوو ناوەندی هاوكاریی، لە سەر بنەمای تەوافقی پێنج لایەنی پێكهێنەری ناوەند بەڕێوەبچێ‌ و هیچ بڕیارێك بە زۆرینە تێ‌ نەپەڕێندرێ‌. هەروەها بڕیار بوو ئەو ناوەندە سیاسەت و هەڵوێستەكانی بە دوور لە ووتوێژ و دانوستان لەگەڵ دەسەڵاتی ئێران بێ‌، بەڵام لە دوو كۆبونەوەكانی كۆتایی، مەبەستم ئەو كۆبونەوانە كە نوێنەرانی سازمانی خەبات تیایاندا بەشدار بوو باسی ووتوێژ لەگەڵ ڕژیم و چەند باسی دیكەی دوور لە بنەما سەرەتاییەكانی پێكهاتنی ناوەند هێندرابوونە ناو باسەكانی كۆبونەوە. هەرچەند نوێنەرانی سازمانی خەبات هەوڵی زۆریاندابوو كە كاری ناوەندو بەرنامەكانی وەك ئەوە بێت كە هەر لە ڕۆژانی سەرەتا لە سەری ساغ ببونەوە، بەڵام وەك دیار بوو ئەو چوار لایەنەی دیكە هەم بنەما سەرەتاییەكانیان پێشێل كرد و هەم جارێكی دیكە دڵیان بە ووتوێژو موزاكرە لەگەڵ رژیمی ئێران خۆش كرد و كارێكیان كرد ناوەندی هاوكاری لە ناوەندێكی فرەچەشنەو فرە لایەنیەوە ببێتە ناوەندی چوار جەریان كە لە ڕاستیدا هەر چواریان بە دوو خەت و دوو بەرنامە دەژمێردرێن و دەناسرێن نەك چوار.

محەممەدی: ماوەیەك لەوە پێش چەند حیزبی كوردستانی ئێران لە ئۆسلۆی پێتەختی نۆروێژ لەگەڵ نوێنەرانی رژیمی ئێران وتووێژیان هەبووە، سازمانی خەبات ئەم هەنگاوەی رژیم و ئەو لایەنانە چۆن دەبینێ؟

باباشێخ حسینی: پێشەكی، هەر جۆرە ووتووێژێك لەگەڵ ئەو ڕژیمە بە زیانی ئامانجی شەهیدان وگەلی كوردو لە بەرانبەریشدا خزمەتە بەو دەسەڵاتە ملهوڕەو ئاخوندان كەڵكی لێ‌ وەردەگرن بە ئامانجی درێژكردنەوەی تەمەنی رژیمەكەیان.

بێگومان لەم هەلومەرجەدا دەسەڵاتدارانی ئێران لە هەر هۆیەك و ڕێگەیەك كەڵك وەردەگرن بۆ كەم كردنەوەی فشار و مەترسیەكان لەسەر خۆیان. لە ئێستادا كە ئامریكاو زۆربەی ووڵاتانی خۆرهەڵاتی ناوەڕاست لە بەرانبەر ئەو ڕژیمەدا وێستاون، و ئامریكا قورسترین ئابڵوقەی ئابووری و سیاسی خستۆتە سەر حكومەتی ئێران و مەودای مانۆڕی بۆ ئەو حكومەتە كەم كردۆتەوە، دەسەڵاتدارانی ڕژیم هەوڵ دەدەن دەروو بۆ خۆدەرباز كردن لەو فشارانە بدۆزنەوە كە یەكێك لەو هەوڵانەی رژیم ئەو بە ناو ووتووێژەیە كە لەگەڵ چوار لایەن لە ووڵاتی نۆڕوێژ ئەنجامی داوە.

محەممەدی: راتان لەسەر كۆنگرەی ناودارانی كورد كە لەلایەن دەسەڵاتی ئێرانەوە لە سنە بەرێوەچوو، چیە؟

باباشێخ حسینی: ئەو نمایشە فریوكاریێكی دیكەی دەسەلاتی ئێران بوو بەرانبەر بە خەڵكی كورد. ئاشكرایە كە ئەو كارە بێجگە لە گالتەجاری ناتوانێ ناوێكی دیكەی لێ‌ بندرێ‌. بێگومان نە كۆنگرە بوو،وە نە ناوداری كوردی لێ‌ بوو.

محەممەدی: ماوەیەك لەوەپێش هەندێ كێشە لە نێوان پێشمەرگەكانی سازمانی خەبات و دوو لایەنی دیموكرات لە هەڵگورد دروست بوو، ئەو كێشەیە بە كوێ گەیشت؟

باباشێخ حسینی: دەستەیەك لە پێشمەرگەكانی سازمانی خەبات چوو بوون بۆ قەندیل بە مەبەستی ڕێگە خۆش كردن بۆ دانانی بنكەیەك لەوێ،‌ بەڵام بە گەیشتنیان كەوتبونە بەر هەڕەشەی پێشمەرگەی دوو لایەنی حیزبی دیموكرات. هەر چەند هەوڵدرا كە ئەو كێشەیە لە ڕێگەی دانیشتن و ووتووێژ چارەسەر بكرێ،‌ بەڵام بەداخەوە ئەوان سووربوون لەسەر هەڕەشەكانیان كە بە هەست كردن بە بەرپرسایەتی و بۆ دوور كەوتنەوە لە شەڕ لەسەرەتادا ئاگادارێكی بە پەلەمان بڵاو كردەوە، و دوایەش داوا كرا پێشمەرگەكانی سازمانی خەبات ئەو شوێنە بە جێ‌ بێڵن.

محەممەدی: ئایا ناردنی پێشمەرگەی سازمانی خەبات بۆ هەڵگورد، نیشانەی ئەوەیە سازمانی خەبات بەرنامەی دەست پێكردنەوەی خەباتی پێشمەرگانەیە یان هەر هەنگاوێكی سنووردار و دانانی بنكە بووە لەو ناوچەیە؟

باباشێخ حسینی: بوونی هێزی پێشمەرگەی سازمانی خەبات لە هەر شوێن و ناوچەیەك بە مەبەستی خۆ ئامادەكردن بۆ قۆناغی داهاتوو، ناردنی بێشمەرگە بۆ قەندیل ئامادەكاریە بۆ گەیشتن بە ئامانجەكانی سازمانی خەبات بۆ قۆناغی داهاتوو.

ڕێکه‌وت: 2019-07-30 11:34:36
به‌شی: ( دیدار و چاوپێكه‌وتن )
شیلان محمدی