رژیمی ئێران، سەرچاوەی قەیرانەكان!

شیلان محەممەدی
ووڵاتی ئێران کە بە ووڵاتی تەمەدون و ئێرانی باستان ناسراوە و حەشیمەتی نزیك بە 80 ملیۆنە، بەڵام رێژەیەكی زۆر لە دانیشتوانەكەی هەژار و برسی و لە 40 ساڵی رابردوودا ووڵاتێكی پڕ قەیران و كێشە بووە. ووڵاتی ئێران سەردەمانێك لە زۆربەی پێشکەوتن و دەسکەوتەکاندا لەسەر ئاستی جیهانیدا خاوەن پلە بووە، بەڵام لەئێستادا و ئەوە بۆ ماوەی چوار دەیەیە لەلایەن کۆمەڵێک ئاخوند و مەلای خوێنمژ، لەگەڵ گەورەترین قەیران و نەهامەتی و کێشە دەست و پەنجە لێ دەدات. ووڵاتی ئێران خاوەن سەرمایەیەكی زۆری سروشتی و داهاتێكی بەرزە، بەڵام خەڵكەكەی بە هەژارترین خەڵك دەناسرێن، چونكە ئاخوندان و جەللادە كاربەدەستەكانی زاڵ بەسەر ئەو وڵاتەدا، ماوەی چل ساڵە قوت و سامانی ئەو ووڵاتە و خەڵكەكەی خەرجی عەیاشی و گەندەڵی و خۆشگوزەرانی خۆیان و دەست و پێوەندەكانیان دەكەن، ئەو سامانەی كە موڵكی ئەو خەڵكەیە، خەرجی دروست كردنی گروپ و تاقمە ترۆریستیەكان، پشتیوانی لە دەسەڵات و رژیمە دیكتاتۆرەكان، دروستكردنی چەك و تەقەمەنی و چەكی ناوكەیی و كۆمەڵكوژ، بڵاوكردنەوەی فەساد و بێ ئەخلاقی لەناو ووڵات و هەناردەكردنی بۆ ووڵاتانی دراوسێ،‌ وە هەتا دوای....
ئەوە لە حاڵێكدایە بۆ خەڵكەكەی خۆشی جگە لە سەرکوتکردن، لەداردان، زیندانی کردن، چاودەرهێنان، دەست برین، لێدان و بگرە و بەردە، فەسادی ئەخلاقی، ماف پێشێلكردن، وە لەسەروی هەمووشیانەوە و بەپلەی یەكەم فەقرو هەژاریەكی كوشندە كە بەرۆكی بە هاووڵاتیانی ئەو ووڵاتە گرتووەو رۆژانە دیاردە و كارەساتی جەرگبری بەدواوە دێت، كردووەتە دیاری.
هاووڵاتیانی ئێران بە هەموو پێکهاتە و چینەکانیەوە گیرۆدەی ئەو سیستم و نیزامە دواکەوتوو و ماوە بەسەرچووەن و رۆژانە لەگەڵ هەموو پێشكەوتنە جیهانیەكان، ئەمان لەگەڵ دیاردەی تازە بەرەوروو دەبنەوە، بۆ وێنە: دیاردەی كارتۆن خەو، ماشین خەو، چادرنشینی، كۆچكردنی هاووڵاتیان، خۆكوشتن و كوشتن .... كە ئەمانە و زۆر دیاردە و حاڵەتی دیكە هەمووی بەهۆی سیاسەتی چەوت و دژە خەڵكی دەسەڵاتدارانی رژیمەوە سەرهەڵدەدەن و كاریگەری خراپ و دڵتەزێن لەسەر رۆح و جەستەی برینداری كۆمەڵگە دروست دەكەن.
ئەوە لە كاتێكدایە رۆژانە دەبینین فشارە ئابووریەكان بۆ سەر رژیم لە زیادبووندایە و رژیمیش هەوڵی تەواو دەدات كاریگەری گەمارۆ ئابووری و سیاسیەكان رووبەرووی خەڵك بكاتەوە و كاریگەری فشار و زیانی گەمارۆكان لەسەر خۆی كەمكاتەوە، و بەو شێوە بتوانێ‌ زیاتر خۆی راگرێ، ئەوەش وەك دەبینین پەرەی بە زیاتر هەژار و برسی بوونی خەڵك داوەو تا دێ دیاردە كۆمەڵایەتیەكان لە زیادبووندان و دەسەڵاتداران هیچ هەوڵێك بۆ چارەسەریان نادەن. دەسەڵاتدارانی رژیمیش لە وەها دۆخێكدا نەك هەوڵیان نەداوە بیر لە چارەنووسی خەڵك و دۆخی خراپی كۆمەڵگەی ئێران بكەنەوە، بە هۆی یاخیگەری و پەلاماری كەشتیە نەوتیەكان و مەترسی دروست كردن بۆ سەر قازانجەكانی ئامریكا و ووڵاتان، کۆدەنگی جیهانی لەدژی دروست بووەو بە بەردەوامی مۆرە و کاربەدەستان و دام و دەزگاکانی دەخرێنە لیستەی تیرۆر و گەمارۆكانەوە.
بێ دەربەستیەكانی رژیم لە حاست چارەنووس و ژیانی خەڵكی ئێران توورەیی و بێزاری هەموو چین و تووێژەكانی گرتووەتەوە، بە درێژە كێشانی ئەو دۆخە نارەزایەتیەكان بەرینتر و گشتگیرتر دەبێتەوە و هێماكان ئاڵووگۆڕێكی بنەڕەتی لە ئێرانمان نیشان دەدات و هەروەك شارەزایان و چاودێرانی دۆخی ئێران شێمانەی دەكەن، رژیمی ئاخوندی دوا رۆژەكانی تەمەنی دەباتەسەر و جەماوەری ئێران بە شۆرشێكی جەماوەری و شۆرشگێڕانە بریاری یەكلاكەرەوە لە راستای گوزار لە سیستەمی ئاخوندی و دامەزرانی دەسەڵاتێكی دیموكراتیك و خەڵكی هەنگاو دەنێن.

ڕێکه‌وت: 2019-08-13 21:31:49
به‌شی: ( ڕامیاری )