سازمانی خەبات،داهاتوو و ئەركەكانمان

بابەشێخ حوسەینی
لە 5ی خەرمانان یادی 39 هەمین ساڵڕۆژی دامەزرانی سازمانی خەبات ی كوردستانی ئێران بەرز ڕاگیرا. ئەگەر بەراوردێكی سەرەتایی بۆ رووداوە سیاسیەكانی چل ساڵ لەوەپێشی كوردستان بكەین و بە وردی لە فەلسەفەی دامەزرانی سازمانی خەبات بكۆڵینەوە، بە باشی ئەوەمان بۆ دەردەكەوێ‌ كە دامەزراندنی سازمانی خەبات زەرورەتێكی حاشاهەڵنەگرو گەلێك پێویست بوو، لەو سەردەمەدا.
زەرورەتێكی ئەوتۆ كە بە دوای تێ‌ پەڕینی زیاتر لە چل ساڵ تێكۆشان و فیداكاری سیاسی و پێشمەرگانەی دوور لە هەڵپەهەڵپ و خۆ گیف كردنەوە، باشتر لە ڕابردوو دەردەكەوێ‌ كە سازمانی خەبات تەشكیلات و سازمانێكی تەواو جیاوازی سیاسیەو بەدیلی هیچ لایەنێكی سیاسی دیكەی كوردستانی نەبوەو نابێ‌ و، ئەوانەی پڕوپاگەندەی ژەهراویان لە دژی سازمانی خەبات بڵاودەكردەوە، دەركەوت یا بیریان كورتە و یا هەر بێ‌ هۆ كینەو ڕقیان لە سازمانی خەبات هەیەو ناتوانن بوونی ئەو تەشكیلاتە ڕەسەن و نیشتمانیە ببینن.
بەڵێ‌، دەركەوت كە سازمانی خەبات، خەت و باوەڕێكی جیاوازەو كۆپی یا بۆ جێگرتنەوەی هیچ لایەنێكی دیكە نیە، دەركەوت كە سازمانی خەبات خاوەن بیری نیشتمانی ونەتەویی و تەواو كوردستانیە. ئەگەر سەرنجێكی وردی ڕوداوە سیاسیەكان لە كوردستان و ئێران بدەین، دەردەكەوێ‌ كە سازمانی خەبات،بە دروستی بەرنامەو دروشمی داناوەو بە شێوەێكی سەركەوتوانەو شەفاف كاری كردوەو، تا ئەو جێگەی بۆی كراوە دروشمەكانی بە كردەوە جێ‌ بە جێ‌ كردووە. سازمانی خەبات شێوەێكی نوێ لە كاری سیاسی و شۆڕشگێڕانەی پەیڕەو كردو سیاسەت و كاری سیاسی، بە پێبەندبوون بە پەیمان و بەلێن و سەداقەت و وەفا بەستەوە. سازمانی خەبات سیاسەتی ڕاست و هەڵوێستی سادقانەی كردە بنەما، پشتی لەوانە نەكرد كە دۆستی بوون، تەنانەت ئەگەر دۆستەكان كەم لوتفیان لەگەڵ سازمان كردبێ‌، بەو حاڵەش سازمانی خەبات، چاوی لە كەم لوتفیەكان پۆشیەوەو بەردەوام بووە لە دۆستایەتی،دیارە تا ئەو جێگەی، بێ‌ لوتفی لایەنی بەرانبەر نەگەیشتبێتە ڕادەی زیان گەیاندنی قەرەبوونەكراوە بە ئامانجەكانی جوڵانەوەی مافخوازانەی گەلی كوردو شۆڕشی ڕەوا لە بەرانبەر ڕژیمی دیكتاتۆری ئاخوندی و لە هەمانكاتیشدا، زیانی زۆر قورس و قەرەبونەكراوەی بۆ سازمانی خەبات ی كوردستانی ئێران بە دواوە نەبوبێ‌.
لێرەدا چەند نمونە لە سیاسەت و كاركردی دروستی سازمانی خەبات لە ماوەی چل ساڵ تێكۆشانیدا دەخەمە ڕوو.
1.شۆڕش و تێكۆشانی خۆماڵیانەو نەتەوەیی و دوور لە كاریگەری خەت و بەرنامەی بێگانە.
2.خەباتی نەتەوەیی و نیشتمانی سالم و نەبزڕكاو، بە شێوەێك دانیشتوانی كوردستان بە هەموو بیرو بۆچوون و ئایین و مەزهەبێك و كەمایەتی نەتەوەیی، كەلە سنووری كوردستاندان و خاوەن بەش و خاوەن جێگەن، نامۆیی لێ‌ نەكەن.
3.زۆر بە جیددی و سادقانەو غەمخۆرانە كاری بۆ یەكێتی و تەبایی لە كوردستاندا كردوەو هەوڵی بۆ داڕشتنی بەرنامەو كردەوە بە مەبەستی دۆستایەتی و هاوكاری لەگەڵ هێزو لایەنە سیاسیەكانی كوردستانی ئێران داوە. تەنانەت لەو چوارچێوەداو بۆ گەیشتن بەو مەبەست و ئامانجە گرینگە،زۆر جار لە هێرشی فیزیكی و تەبلیغی ناڕەوا لە دژی سازمانی خەبات و پێشمەرگەكانی، لە سەرەتای جوڵانەوەی مافخوازانەی گەلی كورد لە دژی خۆی پۆشیوە. كە تازەترین نمونەی بڕیاڕی سازمانی خەبات بە كشانەوە لە قەندیل و چیای هەڵگورد بوو لە هاوینی ئەمساڵ(1398) كۆچی خۆری ئەویش بە مەبەستی دوور كەوتنەوە لە ئاڵۆزی لەگەڵ دوو لایەنی حیزبی دیموكرات. بەو بڕیارە جارێكی دیكەش سەلماندمان كە سازمانی خەبات چەندە خاوەن پڕنسیپەو چەند خاوەن ئووسووڵەو ناهێڵێ‌ هەلومەرجە نەخوازراوەكان و هەوڵە نابەجێكان ڕێگەی ئامانجە پیرۆزەكانی لێ‌ وون بكەن.
4. سازمانی خەبات تێكڕای پێكهاتەی دەسەڵاتداریی ئاخوندەكان بە هەموو لق و باڵەكانی، پێ‌ دزێوو قێزەونە،لە كاتێكدا تێكڕای باڵ و مۆرەكانی دەسەڵات لە جینایەت و مرۆف كوژی و ئازارو شكەنجەدان و بە فیڕۆدانی سەرمایەی خەڵك و كردەوەی ترۆریستی و شەڕو ئاژاوە لە ناوچەكەو جیهاندا دەوریان هەبوەو هەیە، لە كاتێكدا كوشتن و سەركوتی ژنان و منداڵان و هەر تاكێك لە ئێران و كوردستان لە لایەن ئاخوندانی دەسەڵاتدار كارێكی ئاساییە، لە كاتێكدا دژایەتی گەلی كوردو جینایەت لە بەرانبەر دانیشتوانی كوردستان دەبێتە هۆی بەرزكردنەوەی پلەی پاسدارو چەكدارە جینایەتكارانی حكومەت و بە كورتی لە كاتێكدا ئەو دەسەڵاتە هەموو پێوەرە ئەخلاقی و ئینسانی و ئایینی پێ‌ شێل دەكاو تەنیا زمانی هەڕەشەو ئەشكەنجەی لە ماوەی دەسەڵاتداریدا زانیوەو كاری پێ‌ كردوە، سازمانی خەبات بە خوێندنەوەی دروست لە سەر پێكهاتەی دەسەڵات و كۆی جینایەت و مەترسیەكانی بۆ سەرداهاتووی كوردستان وئێران بڕیارێكی ژیرانەی ئەوەیە كە ووتوێژ لەگەڵ ئەو دەسەڵاتە دڕندەیە بە تەواوی ڕەد كردۆتەوەو ئامادە نیە هیچ جۆرە ووتوێژێك لەگەڵ ئاخوندانی ملهوڕو درندە بكات، و لە هەمانكاتدا پێی‌ وایە ووتوێژو دانیشتن لەگەڵ ئەو دەسەڵاتە، نەك خزمەت بە جوڵانەوەی مافخوازانەی خەڵكی كوردستان و شۆڕشی دیموكراسیخوازی لە ئێراندا ناكات، بەڵكو تەواو بە زیانی خەڵكی كوردستان و شۆڕشە ڕەواكەی وبە زیانی ئامانج و خوێنی شەهیدانە.
5.سازمانی خەبات باوەڕی وایە جوڵانەوەی مافخوازانەی كوردستان، دەبێ‌ سیاسەت، ئیستراتیژی و بەرنامەكانی لە سەر بنەمای واقعیەتی سیاسی ناوخۆیی و ناوچەیی و جیهانی دابڕێژی، و پێ‌ وایە دروست نیە كارەكان و سیاسەتەكان، كاتی و لە سەر بنەمای ئیحساسی بنیات بنرێن. هەر لە سەر ئەو بنەمایە، سازمانی خەبات ئیستراتیژی ڕوونی بۆ شێوەی كارو تێكۆشانی خۆی داڕشتوەو پێی‌ وایە شۆڕشی گەلەكەمان نابێ لەسەر دروشمی بێ‌ ناوەرۆك وقسەو هەڵوێستی ئیحساسی دابڕێژرێ‌.
6. هەوڵ بۆ نەهێشتنی فەرهەنگی ناوچەگەرایی و دەستە بەندی لە ناو شۆرش بە گشتی و لە ڕیزی سازمانی خەبات ی كوردستانی ئێران ِبە تایبەتی و دیاری كردنی خاڵێك لە پەیڕەو پڕۆگرامی سازماندا سەبارەت بەو دیاردە زیانبارە لە بەندی سێهەمی ئەركەكانی ئەندام هاتووە(هەر جۆرە ناوچەگەرایی،فراكسیۆن ودەستە بەندی لە ڕیزەكانی سازمان بە خەیانەت بە گەلی كورد و سازمانی خەبات دەزاندرێ‌).ئەو خاڵە دەرخەری ئەو ڕاستیەیە كە سازمانی خەبات چەندە پەرۆشی تەبایی و یەكدەنگی و لە هەمانكاتدا هەوڵ بۆ نەهێشتنی ئەو دیاردە قێزەونە لە ناو كۆمەڵگەی كوردەواری وهەروەها لە گۆڕەپانی جوڵانەوەی مافخوازانەی خەڵكی كوردستانە......هتد.
چاوەڕوانی تێكۆشەرانی ڕیزەكانی سازمانی خەبات لە چین و توێژەكانی خەڵكی كوردستان:
ئەو چەند نمونە لە سیاسەت وبەرنامەی سیاسی و كاركردی سازمانی خەبات كە باسم كردوون، نمونەێكی ڕوونن بۆ ئەوەی كە هەر كەسێك بە دروستی خۆێندنەوەیان بۆ بكات، بۆی دەردەكەوێ‌ سازمانی خەبات چەند غەمخۆرانە لە پێناو ئامانجەكانی خەڵك و شەهیدان تێكۆشاوە. هەر بۆیە جێگەی خۆیەتی،وە هەروەها بەرپرسایەتێكی نیشتمانی و نەتەوەییشە كە پشتیوانی و پشتگیری سازمانی خەبات بكرێ‌ و هاوكاری هەمەچەشنەی بكرێ‌ بۆ ئەوەی بە ئامانجەكانی بگات، كە بێگومان سیاسەت و بەرنامەكانی بۆ كوردو بۆ رزگاریی و ئازادیە. گومان لەوەدا نیە كە هاونیشتمانیانی كوردستان هەمیشە پشتیوانی سازمانی خەبات بوون، بەڵام پێویستە لەم هەلومەرجە حەستەمەدا و بە تایبەت بەو جێگەو پێگە سیاسی و بەرنامە دروستانەی سازمانی خەبات كە بۆ ئێستاو بۆ سەردەمی ئازادی ئێران و كوردستان هەیەتی، پشتیوانیە هەمەچەشنەكانیان زیاتر بكەن. پشتگیری سازمانی خەبات دەبێتە هۆی بە توانایی و بە هێزیی، كە بە هێزی سازمانی خەبات بەو گشتە باگراوەندو بنەماو پڕنسیپ و ئوسوڵی شۆڕشگێرانەیەو بەو پێ بەندیانەی بە داب و نەریتی كوردەواریی هەیەتی، پێشڕەوی گەلی كورد بەرەو ئازادیی و رزگاریی یەكجاریی دەبێ‌.
ئەركی تێكۆشەرانی سازمانی خەبات لە ئێستاو قۆناغی داهاتوو:
هەموو ڕێبوارانی ڕێبازی سازمانی خەبات بەرپرسایەتی گەورەیان لە سەر شانە بۆ بەرەو پێش بردن و گەشە پێدانی ئەم تەشكیلاتە پاك و دڵسۆزەی كوردستان. بە جێگەیاندنی ئەركی تەشكیلاتی،ڕاگەیاندن، بەرزكردنەوەی توانای ماددی و تەداروكاتی، بەرزكردنەوەی حاستی هۆشیاری سیاسی و فكری و.......هتد دەبێ‌ بە جیددی كاری بۆ بكرێ‌ و پێویستە هەوڵی جیددی بدرێ‌ لە پێناو گەشەپێدان و بەرزكردنەوەی تێكرای ئەو خاڵە گرینگانە.
بەردەوام بوون لە سەر رێبازی سازمانی خەبات شانازیە بۆ هەموان و لە هەمانكاتدا گەشە پێدان و بەرزكردنەوەی تێكڕای هۆكانی كاركردن، هەم ئەركێكی گرینگەو لە هەمانكاتیشدا وەفایە بە ڕێبازی سازمانی خەبات و خوێنی شەهیدانی سوورخەڵات و ڕێبەری نەتەوەیی دڵسۆزی كۆچ كردووی سازمان مامۆستا شێخ جەلال حوسەینی.
بەو هومێدەی لە داهاتودا شاهیدی گەشەو پێشكەوتنی زیاتری سازمانی خەبات بین.
مەرگ و نەمان بۆ ڕژیمی دیكتاتۆری ئاخوندی
سەركەوێ شۆڕشی ڕەواو ئازادیخوازیی گەلی كورد و گەلانی ئێران

ڕێکه‌وت: 2019-09-17 21:14:58
به‌شی: ( ڕامیاری )