یادی 5ی خەرمانان لە وەلاتی نۆروێژ بەرز ڕاگیرا

خەباتمێدیا: لە وەڵاتی نۆروێژ 5ی خەرمانان یادی 39هەمین ساڵرۆژی دامەزرانی سازمانی خەباتی كوردستانی ئێران بەرز ڕاگیرا.
رۆژی شەممە 30ی خەرمانانی 1398ی هەتاوی، بەبۆنەی 5ی خەرمانان یادی 39هەمین ساڵرۆژی دامەرزانی سازمانی خەباتی كوردستانی ئێران، بە بەشداری بەرێز كاك بابەشێخ حوسێنی سكرتێری گشتی سازمانی خەبات رێورەسمێكی بەشكۆ لەلایەن كومیتەی نۆروێژی سازمان و بەشداری ژمارەیەكی بەرچاو لە دۆست و ئەندامان و رەوەندی كوردی لە نۆروێژ بەرێوەچوو.
سەرەتای رێورەسمەكە بە سرودی ئەی رەقیب و دەقیقەیەك وەستان بۆ گیانی پاكی شەهیدان دەستی پێ كرد.
پاشان پەیامی كومیتەی نۆروێژی سازمان لەلایەن كاك عەبدولا قادری بەرپرسی كومیتەوە پێشكەش كرا.
لە پەیامەكەی كاك عەبدولادا وێڕای بەخێرهاتنی بەشداران، ئیشارەی بە پێنجی خەرمانان كرد و وتی: 5ی خەرمانان یەك لەو رۆژە درەوشاوانەی مێژووی خەباتی نەتەوەكەمانە، كە تیایدا سازمانێكی نەتەوەیی و نیشتمانی بە رێبەرایەتیەكی فیداكار، شۆرشگێڕ، بە ئەزمون و جیددی پێی نایە مەیدانی خەباتی رزگاریخوازانەی كورد لە كوردستانی ئێران. رێبەر و رێبوارانی سازمانی خەبات كە لە راپەرینی جەماوەریی دژ بە رژیمی بنەماڵەی پەهلەوی بەشێوەی ئاشكرا و نەپساوە لە مەیداندا بوون و بەبێ سڵ كردن لە هەر مەترسیەك و دانی هەر نرخێك بۆ وەدیی هێنانی مافە نەتەوەیی و سیاسیەكانی كورد تێكۆشاون، لە دوای روخانی دەسەڵاتی پەهلەوی و دزینی بەری راپەرینی جەماوەری ئێران لەلایەن خومەینی هاوبیرانیەوە، مامۆستا سەید جەلال حوسەینی و هاوڕێكانی لە دەفتەری مامۆستا شێخ عزەدیندا درێژەیان بە خەباتی سیاسی خۆیاندا و هەموو هەوڵێكیان بۆ پارێزگاری لە نیشتمان و چەسپاندنی مافەكانی كورد لە سیستەمی تازەدا وەگەرخست.
پاشان بەرێزیان باسێكی لەسەر مێژووی سازمانی خەبات و هەڵوێستە نەتەوەییەكانی سازمانی خەبات كرد و گوتی: لە دوای ئەوەی خومەینی و رژیمەكەی كەوتنە بیانووگرتن بە خەڵكی كوردستان و سەلماندیان كە باوەریان بە مافی كورد نیە و هەر داوایەكی گەلی كورد بە لەشكەركێشی و پەلاماری دڕندانە جواب دەدەنەوە، مامۆستا سەید جەلالی نەمر كەوتە رێكخستن و پۆشتەكردنی هێزی پێشمەرگە بۆ بەرەنگاریی هێزەكانی دژمن. لە دوای فتوای نارەوای خومەینی بۆ سەر كوردستان، هێزی پێشمەرگەی دەفتەر بە سەركردایەتی مامۆستا شێخ جەلال بریاری خۆراگریان داو لەماوەی شەڕی سێ مانگەدا لە ناوچە جیاجیاكانی كوردستان چەندین داستانی قارەمانانەیان تۆماركرد كە دەكرێ ئیشارە بە، جەنگەكانی قەرەچیاوای سەقز، كامیاران، تیلەكۆ، كەلی خان، ناوچەی بۆكان و داستانی كەم وێنەی 10ی خەزەڵوەر بكرێ كە تیایدا هێزی پۆڵایینی پێشمەرگە شكستێكی گەورەی بە هێزەكانی دژمن داو بووە هۆی پاشەكشە و راگەیاندنی ئاگڕبڕ لەلایەن خومەینی و رژیمەكەیەوە.
لەدوای روداوەكانی ساڵی 1359ی هەتاوی مامۆستا سەید جەلال و هاوڕێكانی بیریان لە دامەزرانی سازمانێكی نەتەوەیی و نیشتمانی كردەوە كە وەڵامدەر بێ بۆ هەلومەرج و دۆخی ئەوكاتە و بتوانێ زۆرترین هێز و پتانسیەلی كۆمەڵگە لە راستای خزمەتی پرسی نەتەوەیی كورد كۆبكاتەوە و بە بەهێزەوە بەرەنگاری هێزە داگیركەرەكانی رژیمی خومەینی بنەوە.
لە 5ی خەرمانانی 1359ی كۆچی خۆری، سازمانی خەباتی كوردستانی ئێران بە رێبەرایەتی مامۆستا سەید جەلال بوونی خۆی راگەیاند و كەوتە چالاكی سیاسی و پێشمەرگانە لە شار و ناوچەكانی كوردستان، وێڕای هەموو كەندو كۆسپەكانی بەردەم كار و چالاكی سازمانی خەبات، بەهۆی پێشەوایی و رێبەرایەتی حەكیمانەی مامۆستای نەمر مامۆستا سەید جەلال، سازمان توانی سەركەوێ بەسەر كێشەكان و تووشی هەڵە و پەڵەی سیاسی و نەتەوەیی نەبێتەوە. یەكێك لە سەروەریەكانی سازمانی خەبات بەرەنگاریی و بەرەورووبوونەوەی سەرسەختانەی رژیمی داگیركەری ئاخوندیە كە لە ماوەی چوار دەیەی رابردوودا سازمان توانیویەتی لە باری سیاسی و نیزامیەوە شكستی بەرچاو بە رژیمی ئاخوندی و هێزە سەركوتگەرەكانی لە كوردستان بدات.
لە دوای پەیامی كۆمیتە، رێزدار كاك بابەشێخی حوسێنی سكرتێری گشتی سازمانی خەبات چەند وتەیەكی پێشكەش كرد.
كاك بابەشێخ لە پەیامەكەی خۆیدا وێڕای ئیشارە بۆ مێژوو، هەڵوێستە سیاسیەكانی سازمانی خەبات، فەرمووی: سازمانی خەباتی كوردستانی ئێران هەر لە سەرەتای دامەزرانیەوە بەشێوەیەكی زۆر سادقانە خەباتی بۆ نەتەوەكەی كردووە و لەو چوارچێوەدا نەیار و دژمنیش ناتوانن پەڵەیەك لەسەر سازمانی خەبات بدۆزنەوە.
بەڕێزیان باسی لە پێویستی یەكدەنگی و یەكگرتوویی نێوان هێزولایەنەسیاسیەكانی كوردستان و ئێران كردو یەكێتی و یەگكرتوویی بە زەرورتێكی گەورەو هەنگاوێكی بنەڕەتی زانی.
بە پێچەوانەوە نەبونی یەكدەنگی وهاوكاری لەنێوان هێزولایەنەكان بە ویست و لە چوارچێوەی قازانجی دوژمنان ناوهێنا.
سكرتێری گشتی سازمانی خەبات، چوار دەیە دەسەڵاتی ڕژیمی ئاخوندی بە مەترسیدارترین شێوەی دەسەڵاتداری لە ئێران زانی و، ووتیان حكومەتی ئاخوندەكان دوژمنی هەموو تاكەكانی نیشتەجێ‌ لە ئێران وكوردستانن و تەنیا چارەسەر بۆ ڕزگاری خەڵك و ووڵات، روخانی یەكجاری حكومەتی دیكتاتۆری و دژی كوردی ئاخوندە ستەمگەرەكانە.
لە دوای وتەكانی بەرێز كاك بابەشێخ، پەیامی هاوبەشی ئافرەتان و لاوانی خەباتی كوردستانی ئێران لەلایەن بەرێز كەژاڵ كاكەیی بەرپرسی رێكخراوی ئافرەتانی خەباتی كوردستانی ئێران لە نۆروێژ خوێندرایەوە.
لە رێورەسمی یادی 39 ساڵەی دامەزرانی سازمانی خەبات لە وەڵاتی نۆروێژ ژمارەیەك لە هێز و لایەنە سیاسیەكان پەیام و بروسكە و چەپكەگوڵیان پێشكەش بە بەرێوەبەرانی رێورەسمی 5ی خەرمانان كرد كە بریتی بوون لە:
سازمانی موجاهیدینی خەلقی ئێران
نوێنەری شۆرای ملی مقاومەتی ئێران لە وەڵاتانی نۆردیك (پەرویز خەزایی)
پارتی دیموكراتی كوردستان
یەكێتی نیشتمانی كوردستان
حیزبی دیموكراتی كوردستانی ئێران
حیزبی دیموكراتی كوردستان
كۆمەڵەی شۆرشگێڕی زەحمەتكێشانی كوردستانی ئێران
پارتی ئازادی كوردستان
هاوبیرانی دیموكرات
بڕگەی دووهەمی رێورەسمەكە تایبەت بوو بە ئاهەنگ


ڕێکه‌وت: 2019-09-24 10:31:22
به‌شی: ( کاروتێکۆشان )