بەرز و بەرێز بێ یادی شانزە ساڵەی شەهادەتی كاك "تۆفیقی كەریم پوور"

بابەشێخ حوسێنی
كاتێك نیشتمان و دانیشتوانی، ژێر دەست و زوڵم لێكراون، كاتێك دوژمنی غەددار چۆنی پێ‌ خۆشەو تا چەند لە توانایدایە ستەم و بێدادی دژ بە دانیشتوانی كوردستان دەكا، پێویستە بۆ كۆتایی هێنان بەو گشتە مەینەتی و چەوساندنەوانە، ڕۆڵە نەبەزو خاوەن بڕواكان، بە كردەوەو دوور لە قسەی زل، دوور لە دروشمی گەورەو بێ‌ كردەوە، بۆ رزگاری و ئازادی تێ دەكۆشن و گیانی پیرۆزیان فیدای گەل و نیشتمان دەكەن.
بەڵێ‌ ئازادی نرخی دەوێ‌ و گیانبازی و هیممەتی مەردانەو فیداكاری هەمەچەشنە، لە گیان بوردویی، لە ماڵ و خۆشی ژیان بوردنی گەرەكە.
بێگومان ڕۆڵە خاوەن باوەڕەكانی گەل لە ڕیزەكانی سازمانی خەبات ی خوێناوی لە ڕیزی ئەو تێكۆشەرانەی گەل و نیشتمانن،كە بە كردەوە لە مەیدانی گیانبازی پێشمەرگانە، كاری سیاسی و كاری تەشكیلاتی و بە دوور لە دروشم و لە چوارچێوەی كردەوەدا بەو پەڕی توانا تێ‌ دەكۆشن و ماندوو دەبن و ئامادەی گیانبازین لە پێناو ئازادی و ڕزگاریدا. بێگومان شەهیدی فەرماندەی ئازاو چاونەترس شەهید كاك تۆفیقە چكۆل یەكێكە لەو شەهیدە ئازاو قارەمانانەی ڕیزەكانی سازمانی خەبات كە گیانی بەرزی فیدای ئازادی گەل و نیشتمان كرد.
ره‌زبه‌ر بوو ئه‌و كات، پێشمه‌رگه‌كان به‌ دوای یه‌كدا به‌ ئارامی هه‌نگاویان هه‌لده‌گرت، روناكی مانگ له‌ سه‌ریان بوو، بێ‌ ترس له‌ دژمن به‌ سام و هه‌یبه‌ت.
ئه‌وانه‌ شۆرٍه‌سوارانی رێگه‌ی ئازادین، سه‌رقافڵه‌یان فه‌رمانده‌ شوانه‌یه‌. ئه‌و سەركردەیه‌ی دژمن له‌ ناوی ده‌ترسا، خۆفرۆشان به‌ بیستنی ناوی ته‌زووی سارد سه‌رتاپای له‌شیانی داده‌گرت.
چواردە ساڵ له‌وه‌ پێش بوو كه‌ شۆره‌لاوه‌كه‌ی رێبازی خه‌بات، ئه‌و كه‌سه‌ی له‌ ته‌مه‌نێكی كه‌مدا، ساردی و گه‌رمی ژیانی سه‌ختی شۆرش و به‌رخودانی به‌ گیان كریبوو وه‌ك زۆر كاتی دیكه‌ بۆ دژمن ببوه‌ خۆره‌ی گیان و به‌ بوونی ئازاری كاخ نشینانی سته‌مگه‌ری ده‌دا.
به‌ڵی كاك تۆفیق بڵه‌سه‌نی، له‌ مانگی ره‌زبه‌ردا، له‌و كاته‌ی هێشوی ترێ‌ له‌ ره‌زو باخی گاكڕ و چه‌می ئاڵیازو بناری ئاربه‌با به‌ هه‌ڕزاڵی ره‌زه‌كاندا شۆڕ ببونه‌وه‌، ئه‌و و هه‌ڤالانیی نۆبه‌ره‌ی ترێی‌ ئه‌و ساڵه‌یان كرد. به‌لام بۆ ئه‌و خۆشی و شیرینی ترێ‌، ئه‌و كاته‌ تامی ته‌واوی ده‌دا كه‌ نیشتمان ئازاد بێ و لەداگیركەر رزگاربووبێ، چوونكە ژیانی بن ده‌ستی و ژێرچه‌پۆكی پێ‌ شه‌رم بوو.
هه‌ر ئه‌و ئیمان به‌ ئازادی و بڕوا به‌ مانه‌وه‌ له‌ سه‌ر رێبازی سازمانی خه‌بات بووه‌ هۆی ئه‌وەی‌ كه‌ سوور بێ‌ له‌ سه‌ر به‌رده‌وام بوون به‌ ئامانج ورێبازی كوردایه‌تی و سازمانی خه‌بات.
له‌ یادی شانزدە ساڵه‌ی شه‌هاده‌تی پێشره‌وی مه‌یدانی نه‌به‌رد وسازمانی خه‌بات و كوردستان سلاو درود بۆ رۆحی به‌رزی شه‌هید تۆفیق كه‌ریمپوور و شه‌هیدانی سازمانی خه‌بات و رێگه‌ی ئازادیی و رزگاری كوردستان.

پەیڤێك لەگەڵ شەهید تۆفیق!
تۆ مێرمنداڵ بووی کە هه‌ستی شۆرشگێری و ئەوینی پێشمەرگایەتی لەدڵتدا رەگی داکوتابوو، هەربۆیە شوێن ئەوین و دوا هیوات کەوتی و لەبەردەڵانی قەڵای خەبات داو چەند ساعەتێک دورتر لەماڵ و کەس و کارت گیرسایه‌وه‌و چوویە ناو کۆڕی هەواڵانی خه‌باتكار. پرسیاریان لێ کردی کە چۆنە هاتووی ؟، وەڵامت دایه‌وه‌ بۆ پیشمەرگایەتی، هاتوم ببمە پێشمەرگە، پێشمەرگەی کوردستان. یەکەمین جار جوابیان کردی و رێیان نەدای. ئاخر هێشتا بەو گشتە توانا و ورە و لێهاتوویەی تۆیان نەزانیبوو. بەڵام خۆشه‌ویستی بۆ بوون بە پێشمەرگە و هەستی نیشتمانپەروەری ئیزنی نەدا، دڵە بچکولانەکەت لە برا پێشمەرگەکانت برەنجێ و سووربووی لەسەر مانەوە.
کێ دەیزانی تۆفیقە چکۆل،كه‌ رازی نەبوون بە مانەوەی، دەبێتە ئەو قارەمانەی کە خەڵکی دێهات و شاری ناوچە جیاجیاکانی کوردستان شانازی پێوە بکەن، کێ بیری بۆ ئەوه‌ دەچوو رۆژێک دێ دژمن بە بیستنی ناوی ئەو بێچوە شێرە هێزی ئەژنۆی نامێنێ.
ئەو رۆژانەی کە کاک تۆفیقە چکۆل و زۆری دیکەی هەڤاڵانی وەک ئەو، لەسەنگەری دیفاع لە مەوجوودیەتی سازمانی خەبات و لەبەربەرەکانێ لەبەرانبەر هێزی تەیارو پۆشتەی رژیمی ئاخوندی گیان فیدایی یان دەکرد، رۆژ و سەردەمانێکن کە بۆ هەمیشە وەک چۆڵەچرا، رووناکی دەدات و تاسەر دەبنە هەوێنی برایەتی و بەخەمەوەبوونی هاوباوەڕانی رێبازە پیرۆزەکەی سازمانی خەبات. ئەو رێبازەی چەقلی چاوی دژمن و خۆشەویستی گەلە، ئەو سازمانەی چاوچنۆکان خەوی گولی پێوە دەبینن و نەیاران و حەسوودان سەریان بە ناو و رێبازی پاک و بێخەوشی کاس دەبێ و چاویان عەرز نابینێ.
کاک تۆفیقی بەرێز، شەهید و هەڤاڵ و هاوسەنگەر و شۆڕشگێرە خۆشەویستەکەم، بە شەهیدبوونت، خەفەت دایگرتین، بە بیرەوەرییەکانت بە لێهاتووییت، بەو ئەوینەی لە راست سازمانی خەبات لەدڵت دا ریشەی داکوتابوو، ئێستاش کۆری هەڤاڵان سەرسامن بە تایبەتمەندیە کەم وێنەکانت. بەراستی شەهادەتت، کۆست و خەسارەتێکی گەورە بوو لە کورد و سازمانی خەبات کەوت. شەهید بوونت موسیبەت بوو بۆ من و هەموو هاوبیرانت.
دڵنیابە، هاوباوەرانی رێبازە پیرۆزەکەت، رێبوارانی رێگەی سەرفرازی سازمانی خەبات ی کوردستانی ئێران، بەردەوام دەبن لە تێکۆشان و کۆڵنەدان لەرێگەی پڕ لەسەروەری کوردایەتی و ئازادیخوازیی، سازمانی خەباتی تێکۆشەر و نیشتیمانپەروەر.
شار ڕەشی پۆشیوەو گوندو دێهات و هەموو ئەوانەی غەمی پێشمەرگەو شەهیدانی ئازادین ماتەم بارن وتازییەیان گێراوە، چیاو پێ دەشت ولێرەوار،كانیاوەكان وزۆر شوێنی دیكە لە نیشتمانی رەنگین لەماتەمدان، چونكە ئیتر بەدیداری هەڤاڵێكی دێرینمان كەهەر ساڵەو ئەگەر بۆ ماوەیەكی كەمیش بووایە له‌ لایان میوان دەبوو شاد نابنەوە، منداڵەكان و پیرو لاوەكان، شەنگە بێریەكان، هەموو ئەوانەی بە قسەی خۆش وبیری پاك وشۆڕشگێری ماندووی رێی نیشتمان دڵخۆش دەبوون ئیتر جارێكی دیكە بە دیداری ناگەنەوە. بەڵێ ئیتر ئەو تۆفیق بڵەسەنیەی كە شارەزای هەموو دوڵ و لێرەوار و جێ حەوانەوەیێكی پێشمەرگە بوو، پڵنگی چیا و هەڵۆی تیژ باڵی پێ دەشت بوو، لە هەموو كۆیەك و لە هیچ كۆیەك نەبوو، ئیتر لە ناومان نەما. چیا لە پێدەشت دەپرسێ بیستووتە هەواڵی میوانە چەك و رەخت بە كۆڵ وئازاو بوێرمان شەهید بووە، ئەویش بە دەست خوێریترین وخۆفرۆشترین خۆفرۆشەكانی نیشتمان، ئەو خۆفرۆشەی كەپێی وابوو كە بە یەكەم تەقە كاك تۆفیق دەخه‌جلێ وتوانای دەست كردنەوەی نامێنێ. بەڵام چەندە خەیاڵی خاو بوو ئەو خۆفرۆشە، هەر بەخەیاڵی خاوی كه‌ سه‌ركه‌وتوبووه‌ به‌ سه‌ر قاره‌مانی گه‌لدا سه‌رمه‌ست ببوو! به‌لام بە زوویی لەلایەن كاك تۆفیق كه‌ خه‌ڵتانی خوێن بوو درایه‌ به‌ر ده‌ستڕێژی چه‌ك و هه‌ر زوو كۆتایی به‌ تەمەنی روو ڕەشانەی هات.
بە داخی گرانەوە شه‌وی هەینی11ی رەزبەری 1382كاك تۆفیق كەریم پوور لە ئەنجامی مەئمووریەتی سازمانی لە ناوچەی سوورێنی بانە لەلایەن به‌كرێگراوێكی رژیم دەكەوێتە بەر دەستڕێژی چەك وبە سەختی بریندار دەبێ، كە بە برینداریش ناخەجڵێ و دەست دەكاتەوە و سەرهەنگ پاسدارێكی ناوزراوی رژیم بە ناوی ئەمیر بەهرامی بە سزای خەیانەتی دەگەیەنێ، خۆیشی به‌ هۆی سەختی برینەكەی شەهید دەبێ‌ و تێكەڵ بە كاروانی شەهیدانی رێگەی ئازادی و سەرفرازی و خەباتی ڕەوا دژ بە ڕژیمی ستەمگەرو دیكتاتۆری ئاخوندی دەبێ‌.
هەزاران سڵاو لە ڕۆحی پاكی شەهید تۆفیق كەریمپورو تێكڕای شەهیدانی رێگەی ئازادیی گەل و نیشتمان.

ڕێکه‌وت: 2019-10-02 07:40:53
به‌شی: ( شه‌هیدان )