خەڵكی تێكۆشەر و نیشتمانپەروەری كوردستان!ئەندامان و دۆستانی سازمانی خەبات ی كوردستان!سێ ساڵ لەمەوبەر مامۆستای تێكۆشەر و رێبەر فیداكار و دامەزرێنەری لێهاتووی رێكخراوەكەمان ماڵئاوایی یەكجاری لێكردین و ئەو جیهانەی بەرەو دوامەنزڵگەی حەسانەوەی بە جێ هێشت بێگومان ئەو رووداوە هەژێنەرە خەسارەتێكی گەورەی لە بزووتنەوەی رزگاریخوازانەی گەلی كورد و بە تایبەتیش سازمانی خەبات ی كوردستانی ئێران دا . هه‌رچه‌ندماموستا به‌ جەستە مالئاوایی لێكردووین به‌ڵام بیر و ئەندێشەكانی هەردەم چرای رووناككەرەوەی رێی خەباتمان دەمێنیتەوە. ماموَستا هەر لەسەرەتای لاویەتی دا بە ئەندام بوون ....
لە كۆمەڵەی ژیانەوەی كورد دەستی بە كوردایەتی و تێكۆشان لە پێناو رزگاری نەتەوەیی و نیشتمانی گەلی كورد دا كرد و لەپاشانیش دا لەسەرجەم قۆناغەكانی خەباتی كورد، هەر لە شۆڕی ساڵی ٤٦ و ٤٧ و خەبات دژی رژیمی شا و خەبات دژی دەسەڵاتدارانی ئاخوندی بەشداری و دەوری بەرچاوی گیرا. لوتكەی درەوشانەوەی مێژووی خەباتی مامۆستا لەسەردەمێك بوو كە هەل و مەرجێكی یەكجار ناسك بەسەر وەلاتی ئێران و كوردستان زاڵ بوو و لەكاتێكدا كە بچووكترین جووڵەی سیاسی دەرئەنجامی زیندان و شكەنجە و بێ سەرشوێنكردنی لێدەكەوتەوە، مامۆستای بوێر و چاونەترسمان بە دەنگە دلێرانەكەی جەماوەری هان دەدا و دژی دەسەڵات ووتاری پێش كەش دەكرد و پێشەنگایەتی بزووتنەوەی نارەزایەتی خەڵكی دەكرد. بە شاهیدی مێژوو توانایی و خۆتەرخان كردن و خۆنەویستی و ئازایەتی مامۆستا لە هەموو سەردەمەكان و بەتایبەتیش لەسەرەتای هەڵگیرسانی شۆڕشی گەلانی ئێران لەساڵی ١٣٥٧ دەگمەن و بێ وێنە بوون و كەم كەس هەبوو بەوجۆرەی مامۆستا بوێرێ‌ و بتوانێ‌ رێبەرایەتی خەڵكی نارازی بكات و پێشرەوییان بكات. 
خەڵكی خۆراگری كوردستان!
مامۆستا سەیید جەلالی حوسەینی نمونەی مرۆڤێكی نیشتمانپەروەری كورد بوو كە لەپێناو كوردایەتی و خەباتی ئازادیخوازانە بە هەموو هەست و نەست و بوون و نەبوونیەوە خۆی تەرخان كرد و لەو رێگەیەش قوربانی زۆر گەورەی پێش كەش كرد. مامۆستا ئەو رێبەرە بلیمەت و لێزانە بوو كە تەنیا ئەركی رێبەرایەتی و رێنوێنی لە ئەستۆ نەگرتبوو بەڵكو بە كردەوە لە ریزی پێشەوەی خەباتەكە حزووری بوو و سینگی قەڵغانی جەماوەر و نێوچاوانی لەپێش نێوچاوانی خەڵك بوو. ئەو رێباز و رێچكە نەك تەنیا لەسەردەمی شۆڕشی گەلانی ئێران بەڵكو لەدوای دامەزراندنی سازمانی خەبات ی كوردستانی ئێران بە بوونی كوڕ و كچەكانی لە ریزی پێشەوەی خەبات و مەیدانی نەبەرد و خۆراگری لەبەرانبەر دژمنان دا هێڵی یەكەمی شۆڕش و كوردایەتی بۆ كەس چۆڵ نەكرد و هەتا لەژیاندا بوو ئەوە بیروباوەر و خوێندنەوەی بۆ بەشداری لە شۆڕش و خەبات بوو. مامۆستا سەیید جەلال چەندە چاونەترس و خۆنەویست و فیداكار بوو ئەوەندەش سیاسەتمەدارێكی لێزان و لێهاتوو بوو. پیلانەكانی دژمنی بە دروستی دەخوێندەوە و هەرگیز بۆ جارێكیش وێرای هەوڵی زۆر بۆ لەخشتە بردنی نەكەوتە ناو داوی رژیم و فریوی درۆ و بەڵێن و هاندەرەكانی دەسەڵاتی نەخوارد و تا دوا هەناسەی ژیانی لەبەرەی شۆڕشگێران و ئازادیخوازان مایەوە. هەروەها داهێنان و دووربینی مامۆستا لە ساڵی ٥٨ لەپێوەند بە سازماندانی خەڵكی ناوچەی ژیانی خۆی بە وەرگرتنی چەك لە دەوڵەتی بازرگان و بڵاوكردنەوەی ئەو چەكانە لە نێو خەڵكی ناوچەی بانە و تەیار كردنی ئەو حەشیمەتە و هەروەها ئاكامەكەی كە خۆراگرییەكی بێ وێنەی خەڵك لەبەرانبەر هێزی زۆری داگیركەر لە هەژدەدۆلان و رێگەی سەردەشت بانەی لێكەوتەوە دەركەوت و دەریخست مامۆستای نەمرمان خاوەنی ژیری و دوربینی و سیاسەتێكی دووربینانە و لێزانانەی كەم وێنەیە. 
ئەندامان و دۆستانی سازمانی خەبات!
مامۆستای بیرمەند بە كردەوە و ئاكار و هەلس و كەوت و ئەندێشەكانی رێبازی راستەقینەی كوردایەتی و نیشتمان خۆشەویستی پیشان داین و لەو مەكتەبەی بۆی بە جێهێشتین فێر دەبین كە مرۆڤی شۆڕشگێر پێویستە هەموو پێناسەكانی وەك راستگۆیی، بوێری، ژیری، خۆراگری، خۆنەویستی و فیداكاری دەبێ تێدا مەوجوود بێ و لە پێناو رزگاریی نەتەوەیی نابێ لە هیچ تێچووێك سڵ بكاتەوە، هەر وەك چۆن رەمزی هەرمانی و نەمری رێبەری بلیمەتمان بە باوەرمەندی تەواو بەو پێناسە و چەمكانە وەدی هات. پیویستە بە وردبوونەوەی زیاتر لە ژیان و خەباتی مامۆستای رێبەرمان زیاتر رووبچینە ناو فەلسەفەی ئازادی و شۆڕشگیری و وەك رێبورانی رێگەی ئەو زاتە مەزنە ئەرك و دەینی خۆمان لەراست خاك و گەلەكەمان جێبەجێ بكەین. 
سازمانی خەبات ی كوردستانی ئێران لە سێهەم ساڵیادی كۆچی ناوادەی رێبەری دڵسۆز و نەتەوەیمان مامۆستا سەیید جەلال حوسێنی سەری رێز و ن دادەنوێنین لەراست روحی پاك و گەورەی مامۆستای ئازیز و نەمرمان و بەلین دووپات دەكەینەوە تا سەركەوتنی یەكجاری و دەستەبەربوونی مافە رەواكانی گەلەكەمان درێژەدەری رێگای پیرۆزی مامۆستا بین و سەربردە و ژیانی مامۆستا چرای رووناككەرەوەی رێگای خەباتمان بێ. 

سازمانی خەبات ی كوردستانی ئێران 
كومیتەی ناوەندی
30ی پووشپەری 1392

ڕێکه‌وت: 2013-07-21 07:43:31
به‌شی ( راگەێندراوی سازمانی خەبات ی كوردستانی ئێران بە بۆنەی سێهەمین ساڵیادی كۆچی دوایی جەنابی مامۆستا سەیید جەلال حوسەینی )







تاگی ئه‌رشیڤی خه‌بات مێدیا
خوێنه‌ران له کاتی گه‌ران بۆ ئه‌مانه‌ی خواره‌وه‌ توانیویانه‌ ئه‌و نووسینه بدۆزنه‌وه‌