هۆگرخێرایی گۆڕانكاریە سیاسیەكانی رۆژهەڵاتی ناوەڕاست و لێكدانەوەی هەندێك میدیای حیزبی و حكومەتی ناوچەكەلای زۆر كەس گومانی ئەوەی دروست كردووە كە ئەوە پیلانێكی گەورەی رۆژئاواییەكانە بۆ بە دەست هێنانی كانگاكانی وزە (ئاو و سووتەمەنیەكان ) و وڵاتانی رۆژئاوایی ئەیانهەوێ بە دروست كردنی ئاژاوە و شەڕ و لە ناو بردنی شیرازەی سنوورەكان و حكومەتەكانی ناوچەیی شێوازێكی نوێ  بۆ بە تاڵان بردنی نەوت و لە باربردنی هێمنی و سەقامگیری سیاسی و كۆمەڵایەتی ...
ناوچەی رۆژهەڵاتی ناوین تاقی بكەنەوە و زۆربەی حكومەت و گروپەكان و سیاسەتەكانیان بە ئاراستەی پەیڕەوی كردنی وەها تێزێكدا دەڕۆن . 
بێجگە لەو جۆرە لێكدانەوەیە چەند بابەتێكی وەك زەمینەی دروست بوونی كوردستانی گەورە و سیناریۆی هرۆژمی ئامریكا و ئیسرائیل بۆ سەر ئێران و شەڕی شێعە و سوونە و زەمینەی شەڕی جیهانی سێهەمی و رووبەروو بونەوەی جەمسەری رۆژهەڵات ورۆژئاوا و شەڕی ئاخر زەمانیش هاتۆتە ئاراوە كە هەركامیان لایەنگرانێكی هەیە كە ووتە و ئیستدلالی خۆیان پێیە .
لەوە ئەچێت كەسانێكی زۆر لە یەكەم ساتەكانی بیستنی وەها تەحلیل و لێكدانەوەیەك باوەڕی پێبكەن بەڵام لە راستی دا ئەم شێواویەی ساڵانێكی زۆرە بەرۆكی بە ژیان و چارەنووسی نەتەوەكانی ناوچەكە گرتووە ئەو وەهمە نیە كە لە سەرەوە دا باسی لێوەكرا و هەموو ئەو لێكدانەوانەش راست نین كە لە میدیاكانەوە بڵاو دەبنەوە ، بەڵكوو ئەوە شەڕ و دەستەبەندی و جیبهەگیری رەوتێكی ئازادی خوازی مودێرنە لە بەرانبەر رەوتێكی كۆنەپەرەستی و تۆتالیتری دا لەم بەشەی جیهان .
لە دوای بەلاڕێ دا چوونی شۆڕشی خەڵكی سوریا و پەرەسەندنی دەسەڵاتی هێزە فندەمنتالیستە ئیسلامیەكان لەو وڵاتە و پەتای بۆ عێراق و لوبنان و هروژمی ئەو گروپانە بۆ سەر كوردستان و بەرپا بوونی شەڕێكی نیابەتی لە لایەن زلهێز و حكومەتەكانی جیهانی و ناوچەیی كە ناوەرۆكێكی ئیدئۆلۆژیكی و مەزهەبی بە خۆوە گرتووە و ئەو هەواڵ و رووداوانەی لە هەندێك میدیا و راگەیاندندا ئەبیسترێ ، بە قەلەمی زۆر نووسەر و كەسایەتی سیاسی لێكدانەوەی زۆری بەدواوە بووە كە زیاتر لەوەی لێكدانەوەی واقیعەكە بێت ، شێواندنی سیمای ناوچەكە و بەدبین كردنی خەڵك بووە لە خۆڕاگریەك كە هێزە نەتەوەیی و ئازادیخوازەكان تاقیب و سفارشتی ئەكەن . زۆر كات ئەو لێكدانەوانە وا لە مرۆڤەكان ئەكات كە هەست بكەن ئیختیارێكیان نیە و هەموو  رووداوەكان لە دەروەوەی خواست و ئیرادە و دەسەڵاتی ئەواندان ، بۆیە تاك وا هەست ئەكات كە ئەبێ تەنها گوێگر و بیسەرێكی میدیاكان بێت و بەوپێیەش بە خواستی ئیعلامەكان ئەبێتە بونەوەرێك كە ئامادەی قەبوڵكردنی هەموو ئەو رووداو و بریارانەیە كە رووبەڕوی ئەبێتەوە و ئەوەش خەباتی گەلانی ناوچە لە خشتە ئەبات چونكا "مرۆڤی میدیایی" خۆی سپاردوە بە بڕیار ولێكدانەوەی زلهێزەكانی ناو میدیاكان و لە ئاكامدا باوەڕ بەخۆیی و دەروەن گەورەیی تاك كەم ئەكاتەوە .
بە لای نووسەرەوە گەرچی زلهێزەكان و ولاتانی رۆژئاوا كاریگەری خۆیان هەیە لە ناوچەكەدا بەلام ئەوان كاتێك دێن و تەداخول دەكەن كە بیانویەكی زەق و مەسڵەحەتێكی خۆیانی تێدا بێت و ئەوە حكومەت و لایەنەكانن كە بە جێی وەلانانی لوت بەرزی و خۆپەرەستی و كۆنەپەرەستی و لە رەكەبەرایەتی یەكتریدا داوای موداخەلە لە وڵاتە زلهێزەكان دەكەن . لە راستیدا ناوەرۆكی ئەم شەڕ و شێواویە(حكومەت و گروپەكانی رۆژهەڵاتی ناوڕاست)ن كەلەلاێیك لە بەرانبەر خەڵكانی ناو وڵاتەكان و لە لایێكی تر لە بەرانبەر یەكتر ( رەكابەرەكانیان) تووشی شەڕ و ناكۆكی هاتوون .
دیارە ئازادیخوازان رۆژێك لە رۆژان هەنگاو و كارە عەمەلیەكانی خۆیان دەبوا زیاتر ئاشكرا بكردایە و بەرەو پێش ببردایە و دژی ستەمی نەتەوەی و فەزای دروست كراوی پڕ لە خەفەقانی ئەو تۆتالیتێرانە هەڵبگەڕانایەوە كە حەز بە تواندنەوە و كۆیلەیی نەتەوەكان و كەمایەتیەكان و خەڵكانی ستەم چێشتووی ناوچەكە دەكەن .بەڵام ناوچەكە هێندە تووشی سەرلێشێواوی و ئاشووبە كە راستیەكان و دەنگە بچووك و ستەملێكراوەكان لەم كاتەدا وون دەبن و نابیسرێن .
ئەو رەوتەی ناوی بەهاری عەرەبی لێنرا بە شۆڕشی گەلانی ئێرانیشەوە لە ساڵی 1979 و شۆڕشی گەلی كورد لە هەرچوارپارچەش شتێك نیە ناوی بنێیت پیلانی داڕێژراوی سەدان ساڵەی رۆژئاواییەكان ، بەڵكوو ئەوە هەستی رەها بوونە لە قەید و بەندی ستەمگەری و خەفەقانی ئەو حكومەت و رێبەرە ملهوڕ و كۆنەپەرستانەی ناوچەكە كە لە ناخیاندا هێشتا ناتوان باوەڕ بە ئازایخوازی و بەرابەری مافی مرۆڤەكان بكەن و دیكتاتۆری دەرونیان هیشتاش فەرمان بە نەبیستنی داخوازیەكان و سەركوتكردنی ئازادیەكان ئەدات . ئەگەر تا ئەم كاتەش شۆڕشی گەلانی ناوچەكە ئەدزرێت و بەرهەمی خوێنی نەتەوەكان بە تاڵان ئەبردرێت و ئەگەر دوای ساڵانێكی زۆر تێكۆشان و قوربانیدان و سەبر و خۆڕاگری دیسان هەر زۆرداران و ملهوڕان دێنە سەر دەسەڵات و یان هێشتا هەر ئەوان لە سەر كورسی ماون ، ئەبێت بۆمان دەركەوتبێت كە پێویستە هەنگاوێكی عەمەلی و جیاكاریەكی تەواو لە درون و بیروباوەڕی كۆمەڵگاكەماندا رووبدات ، ئەوكات ئەبێت هیوداربین كە نەتیجەی خۆڕاگری و قوربانیدانەكانمان دێتە بەرهەم . ئەویش قەبوڵكردنی تەواو و بێ ئەملاولای مافەكانی مرۆڤ و ئازادیخوازانەیە و دوور كەوتنەوەیە لە خۆپەرەستی و بڕەوی نەدان بە بەها و مەسڵەحەتی ئیدئۆلۆژیك و تاكەكەسی بە سەر بەها و مەسڵەحەتی نەتەوەیی و گشتی دا . ئەگەر ئەم ناوچەیە لە بەردەم هەڕەشەی دیكتاتۆری و شەڕ  و كارەساتدایە سەرچاوەكەی لوت بەرزی و جەهلی ئەودیكاتۆرە كۆنەپەرست و خۆپەرستانەیەكە نایانهەوەێ دۆستایەتی نەتەوەكان و یەكگرتن و ئازادیخوازی كەس ببینن و وەك هیتلێر هەر بیر لە بڕاندنەوەی نەیاران و بیرجیاوازان و كەمایەتیەكان ئەكەنەوە . بەداخەوە تاقم وگروپ و حكومەتە كۆنەپەرست و رەگەزپەرەستەكان ( حكومەتەكانی ئیران ، توركیا ، عێراق و وڵاتانی عەرەبی تر ... و تاقمە و دەستە و حیزب و لایەنەكانی لایەنگر و دروست كراویان ) لە گەڵ ئەوە دا هیچ بیر و رایەكی جیاواز و ئازادیخوازانە قەبوڵ ناكەن، بەردەوام خەریكی سەركوتكردنی بزوتنەوە و دەنگی ئازادیخوازی و ماف خوازی نەتەوەكان بوون و هاوكات لە رەكەبەرایەتی یەكتر دا سەدان پیلان دژی یەكتریش ئەنجام ئەدەن و بە دروست كردنی تاقم و گروپی توندڕەو و گیرە شێوێن ، باری ناوچەكەیان ئاڵۆزتر كردووە و گەرەكیانە دەنگەكانی ئازادیخوازانە لە ناو هەراو هۆریای دروست كراوی خۆیاندا بێدەنگ و بەلارێدا ببن .
گەرچی روەتێكی خێرا و پڕ لە رووداو وكارەسات ناوچەكەی تەنیوە بەڵام لەم ناوە دا دەنگی نەتەوەی كورد بیسترا و جیهان لە بەرانبەر درۆ و فێڵی نامرۆڤانەی حكومەتەكانی توركیا و ئێران ولاتانی تری عەرەبی هەڵوێستیان گرت و كۆماری ئاخوندیش كە بە تەمای گرتنی ماسی لە قورئاوی ناوچەكە بوو خۆی لە گێژاوی شەڕیكی خوێناوی مەزهەبی لە سوریا و عێراق و لوبنان و یەمەن دا تێكەوتووە و ئەگەری سەردانەواندنی بۆ رۆژئاوا لە بواری بابەتی ناوەكی زیاترە لە جاران و هەر رووداوێك ئێستا لە ناو خۆی ئێراندا خێرا وەك بابەتێكی گشتی لێ دێت و رژێم تووشی كێشە ئەكات و ئەبێتە هۆی هەڵوێست گرتنی خەڵك و هەردواكشانەوەیەكی و هەر رەوینەوەی ترسێك لە دەرونی كۆمەڵگادا دواتر پەتایەكی كوشندە ئەبێت بۆ رژیم . 
دیارە لەم سەردەمەدا و بە وریا بوونی نەتەوەكان و جەماوەری ستەم لێكراو و پەیوندی نێوان تاكەكانی وڵات لە گەڵ یەكتردا لە رێی كەرەسەكانی مۆدێرن و ئاگاداربوونیان لە مافە سەرەتاییەكانی خۆیان و بەتایبەت لاوان و ژنان ، چیتر ئیمكانی گەڕانەوە بۆ دواوە و قەبوڵكردنی ستەم و خەفەقان لە لایەن چین و توێژەكانی كۆمەڵگاوە مەحاڵە و هەموو سات و كاتەكان پڕن لەو رووداوانەی هێما و بەڵێنی ئازادی و رەها بوونی جەماوەر و رووخانی كۆشكی دیكتاتۆر و كۆنەپەرستەكانی تیایە.


ڕێکه‌وت: 2014-11-21 20:19:24
به‌شی ( چی دەگوزەێت ؟ )







تاگی ئه‌رشیڤی خه‌بات مێدیا
خوێنه‌ران له کاتی گه‌ران بۆ ئه‌مانه‌ی خواره‌وه‌ توانیویانه‌ ئه‌و نووسینه بدۆزنه‌وه‌

چی دەگوزەێت چی دەگوزەێت ؟ چی ؟ دەگوزەێت ؟ چی دەگوزەێت ؟