ژماره‌یێکى دیکه له شیرکه‌ته‌کانى رژیمى ئێران خرانه لیستى ئابڵوقه‌کانى ئه‌مریکا
ئه‌مریکا ئابڵوقه‌ى نوێى خستۆته سه‌ر ١١ شیرکه‌تى سه‌ر به رژیمى ئێران، و ئه‌وه هه‌نگاوێکى دیکه‌یه بۆ سنووردار کردنى ئه‌و رژیمه و به‌رنامه ناوکه‌ییه‌که‌ى.
به پێى هه‌واڵى هه‌واڵده‌رى فه‌رانسه له واشینگتۆن، ده‌وڵه‌تى ئه‌مریکا ئابڵوقه‌ى خسته سه‌ر یازده شیرکه‌تى سه‌ر به بانکى میللى رژیم. له‌و ژماره ٨ شیرکه‌تیان له تاراندان.
ئه‌ستوارت لوی جێگرى وه‌زیرى خه‌زێنه‌دارى سه‌باره‌ت به ترۆریزم و زانیارى ماڵى گووتى: ئه‌و شیرکه‌تانه له ژێرده‌سه‌لاتى ئه‌و ناوه‌ندانه‌ن که پێشتر ئابڵوقه‌یان خرابووه سه‌ر، یان له‌گه‌ڵ نوێنه‌رایه‌تى ئه‌و شیرکه‌تانه چالاکى ده‌که‌ن.
ئه‌و به‌رپرسه ئه‌مریکایه گووتى: ئه‌مریکا به‌رده‌وام ده‌بێ له ئاشکرا کردنى ئه‌و بانک و شیرکه‌ت و که‌سانه‌ى پشتیوانى ده‌که‌ن له به‌رنامه‌ى ناوکه‌یی رژیمى ئێران.
به پێى ئه‌و هه‌نگاوه، هاووه‌لاتیان و شیرکه‌ته ئه‌مریکاییه‌کان ناتوانن پێوه‌ندى بگرن له‌گه‌ڵ ئه‌و دامه‌زراوانه و ده‌وڵه‌تى ئه‌مریکا ده‌ست ده‌گرێ به سه‌ر داراییه‌کانیان دا.
هه‌واڵده‌رى فه‌رانسه نووسى: بانکى میللى که گه‌وره‌ترین بانکى رژیمى ئێرانه له لیستى ئه‌و ناوه‌ندانه‌یه که به هۆى پشتیوانى له به‌رنامه‌ى ناوکه‌یی رژیمى تاران له ساڵى ٢٠ ٠ ٧ه‌وه ئابڵوقه‌ى خراوه‌ته سه‌ر.
