رژیمى ئاخوندى ناوچه‌کانى ده‌ورووبه‌رى پێنجوێنى بۆردومان کرد
رۆژى شه‌ممه ١٢/٢/١٣٨٨، رژیمى ئێران له سه‌عات ٥ى سه‌رله‌به‌یانیه‌وه زنجیره چیاکانى پێنجوێن و شاخى سورێنى هه‌رێمى کوردستانى بۆردوومان کرد.
سه‌عات ٩ى سه‌رله‌به‌یانیی رۆژى شه‌ممه سێ هێلی کۆپته‌رى رژیمى ئێران ئاسمانى هه‌رێمى کوردستانیان به‌زاند و بۆردوومانى ناوچه سنووریه‌کانى هه‌رێمى کوردستان و گوونده‌کانى بۆر٠ێر و کانى سێف و جۆمه‌ره‌سی و چه‌ند گوندێکى دیکه‌ى ئه‌و ناوچه‌یه‌یان کرد. هه‌رچه‌ند تائێستا زیانه گیانیه‌کانى ئه‌و بۆردوومانانه نه‌زاندراوه، به‌لام زیانی مادیی زۆر به‌و ناوچانه گه‌یشتووه. ئه‌وه بۆ یه‌که‌مین جاره رژیمى ئاخوندى بۆ بۆردوومانى ناوچه سنووریه‌کانى هه‌رێمى کوردستان هێلی کۆپته‌ر بکار بێنێ.
جێى ئاماژه‌یه رژیمى ئاخوندیی ئێران به‌رده‌وام به‌بیانووى راوه‌دوونانى گه‌ریلاکانى په‌که‌که ناوچه سنووریه‌کانى هه‌رێمى کوردستان بۆردوومان ده‌کات و تاکوو ئێستا به‌و هۆیه‌وه زیانێکى زۆرى ماددى و گیانیی به دانیشتوانى سنوورى هه‌رێمى کوردستان گه‌یاندووه.
له‌لایێکى دیکه‌وه سه‌رۆکایه‌تیی ئه‌نجوومه‌نى وه‌زیرانى حکوومه‌تى هه‌رێمى کوردستان له به‌یاننامه‌یێکدا زۆر به توندى ئیدانه‌ى تۆپباران و بۆردومانه‌کانى ناوچه سنووریه‌کانى هه‌رێمى کوردستانى کرد.
