کارمه‌ندێکى سه‌فاره‌تى به‌ریتانیا له‌ئێران به‌دژایه‌تى کردنى ئاسایشى نه‌ته‌وه‌یی رژیم تاوانبارکرا
عه‌بدواسه‌مه‌د خوره‌مشاهى وه‌کیلى حوسێن ره‌سام، یه‌کێک له کارمه‌نده گیراوه‌کانى به‌ریتانیا له تاران، ده‌ڵێ: مووه‌کله‌که‌ى به دژایه‌تى کردنى ئاسایشى نه‌ته‌وه‌یی تاوانبار کراوه.
به پێى ووته‌ى ئه‌و وه‌کیله‌ى دادگوسته‌رى حوسێنى ره‌سام، که وه‌ک لێکۆڵه‌رى پله‌به‌رزى سیاسى سه‌فاره‌تى به‌ریتانیا کارى کردوه، له زیندانى ئه‌وین دایه و ئه‌گه‌رى زۆرى هه‌یه به زوویی دادگایی بکرێ.
هێزه ئه‌منیه‌تیه‌کانى رژیمى ئاخوندى یه‌کشه‌ممه‌ى رابردوو ٩ کارمه‌ندى ئێرانى سه‌فاره‌تى به‌ریتانیایان به‌وه تاوانبار کرد که ده‌ستیان بووه له نار٠ه‌زایه‌تیه‌کاندا و گیران.
ده‌وڵه‌تى به‌ریتانیا ئه‌و تاوانه‌ى ره‌د کرده‌وه و داواى کرد زوو ئازاد بکرێن. به پێى راپۆرتى هه‌واڵده‌ریه‌کان تا ئێستا ٧ که‌سیان ئازاد کراون به‌لام دوو که‌سیان هه‌روا له زینداندان.
