مه‌حکومیه‌تى نوێى ساسان بابایی
هه‌واڵده‌رى چاودێرى مافى مرۆڤى کوردستان، ساسان بابایی خه‌ڵکى کامیاران که مامۆستایه سێ ساڵ له‌وه پێش به تۆمه‌تى دژایه‌تى کردنى ئاسایشى نه‌ته‌وه‌یی رژیم
و پێوه‌ندى له‌گه‌ڵ یه‌کێک له هێزه کوردستانیه‌کان له زیندان دایه.
له نوێ ترین په‌روه‌نده‌یدا به تۆمه‌تى دژایه‌تى ئه‌منیه‌تى نه‌ته‌وه‌یی رژیم له دادگاى رژیم له سنه به سه‌رۆکایه‌تى قازى بابایی، ساڵێک زیندانى دیکه‌ى به سه‌ردا سه‌پا. ئه‌وه له کاتێکدایه که ئه‌و په‌روه‌نده نوێ یه‌ى ناوبراو بۆ کاتێکه که له زینداندا بووه.
هه‌روه‌ها دادگایێکى دیکه‌ى رژیم ئه‌و مامۆستا کورده‌ى له په‌روه‌نده‌یێکى دیکه‌دا له پێوه‌ند به مه‌سه‌له‌ى سینفى و پیشه‌وه به ٣ ساڵ دوورخستنه‌وه بۆ سمنان مه‌حکوم کردوه و له دواى ته‌واو بوونى حوکمه‌که‌ى بۆ وانه ووتنه‌وه ده‌بێ بگوازێته‌وه بۆ سمنان.
شایانى باسه، ساسان بابایی له‌و ماوه‌ى که له زیندانى سنه‌دا بووه به هۆى جێ و رێى خراپه‌وه تووشى چه‌ند نه‌خۆشى بووه.
