که‌روبی فه‌رمانده‌ى سوپاى به شاردنه‌وه‌ى به‌ڵگه‌ى جینایه‌ته‌کان تاوانبار کرد
مێهدى که‌روبی سکرتێرى گشتى حیزبی ئیعتیمادى نه‌ته‌وه‌یی، له نامه‌یێکى سه‌رئاواڵه‌دا بۆ سه‌رۆکى دادگاى دادوه‌رى رژیم، سه‌باره‌ت به ده‌ستێوه‌ردانى سوپاى پاسداران له مه‌سه‌له‌ى دادوه‌ریدا ووریایی دا.
به پێى ر٠اپۆرته‌کان، که‌روبی که به هۆى به‌دواداچوونى په‌ره‌وه‌نده‌ى کوژراوه‌کانى بشێویه‌کانى ئه‌م دواییه، له‌لایه‌ن باندى ناسراو به ئوسولگه‌راوه هێرشى کرایه سه‌ر، له نامه‌ی خۆیدا داواى له ده‌زگاى دادوه‌رى رژیم کردوه رێگه نه‌دا، پاسداره‌کان بیر له ده‌ستێوه‌ردان له کاروبارى دادوه‌ریدا بکه‌ن.
ناوبراو له به‌شێکى دیکه‌ى نامه‌که‌یدا په‌رده‌ى له سه‌ر فه‌رمانى سوپا به وه‌زاره‌تى ته‌ندروستى رژیم داوه که به ووته‌ى ئه‌و، پزیشکان رێگه‌یان پێ نه‌دراوه به‌ڵگه‌ى پزیشکى به برینداره‌کان بده‌ن. که‌روبی هه‌روه‌ها ته‌ئکیدى کرده‌وه که ئاماده نیه له هه‌ڵوێستى خۆى پاشه‌کشێ بکا.
