سه‌رکوزى: ئێران خه‌ریکى کارکردن له‌سه‌ر به‌رنامه‌یێکى ناوکه‌یی نیزامیه
رۆژى سێ شه‌ممه ٢٤ى خه‌رمانانى ١٣٨٨، نیکولا سه‌رکوزى گووتى: به پێى راپۆرتى رێکخراوه ئیتلاعاتیه‌کانى فه‌رانسه، کۆمارى ئیسلامى ئێران له ئێستادا کار له سه‌ر به‌رنامه‌یێکى ناوکه‌یی نیزامى ده‌کا.
سه‌رۆک کۆمارى فه‌رانسه له کاتى چاوپێکه‌وتن له‌گه‌ڵ نوێنه‌رانى حیزبه‌که‌ى له پارله‌مانى ئه‌و وه‌لاته گووتى: ئێمه ناتوانین رێگه به ئێران بده‌ین ده‌ستى به چه‌کى ناوکه‌یی بگا.
به پێى هه‌واڵى هه‌واڵده‌رى فه‌رانسه، سه‌رکوزى هه‌روه‌ها گووتوویه‌تى که به پێى راپۆرتى ته‌واوى سرویسه نهێنیه‌کانى ئێمه، ئێران چالاکیه ناوکه‌ییه‌کانى به ئامانجى نیزامى، ده‌شارێته‌وه. ناوبراو ته‌ئکیدى کرده‌وه له‌گه‌ڵ که‌سێک که مه‌به‌ستى لابردنى ئیسرائیل له سه‌ر نه‌قشه‌ى جیهانه، ده‌ست لێ ناداته‌وه.
