بانگهێشتى خوێندکاران بۆ به‌شدارى له‌رێپێوانى ٢٢ى جۆزه‌ردان
خوێندکارانى زانستگاى ئازادى واحیدى زانست و لێکۆڵینه‌وه‌ى تاران له‌بانگه‌وازێکدا داوایان له‌سه‌رجه‌م خوێندکارانى زانستگاکانى ئێران کرد که به هاتنه سه‌ر شه‌قام له رۆژى ٢٢ى جۆزه‌ردان مستێکى قایم له ده‌مى خامنه‌یی رێبه‌رى نامه‌شروع و پایه‌کانى له‌رزۆکى نیزامى ئاخوندى بده‌ن. خوێندکارانى ئازادیخواز له‌سه‌ره‌تاى بانگه‌وازه‌که‌یان سه‌ره‌خۆشیان له خانه‌واده‌ى داغدارى فه‌رزاد که‌مانگه‌ر، شیرین عه‌له‌م هوولى، عه‌لى حه‌یده‌ریان، فه‌رهاد وه‌کیلى و مه‌هدى ئیسلامیان کردووه و له‌درێژه‌دا ده‌ڵێن، پرسیار له عه‌لى خامنه‌یی ده‌که‌ین که ...
به چ هۆیێک هه‌ورام و هه‌ورازی وه‌کیلیان له نیعمه‌تى باوک بێ به‌ش کرد؟ مێرمندالانى کامیارانیان له بوونى مامۆستا فه‌رزاد که‌مانگه‌ر بێ به‌ش کرد؟ هه‌روه‌ها روو به‌خامنه‌یی نووسیوویانه، به‌هۆى نه‌شیاوى و نالێهاتووى تۆ له ئیداره‌ى وه‌لات، هه‌م سه‌رچاوه‌کانى نه‌ته‌وه‌یی و هه‌م گیان و ماڵ و ناموسی خه‌ڵکى ئێران هه‌رزان فرۆش کرا. به‌راستى یه‌زید و شمر و چه‌نگیز و هیتله‌ر به به‌راوه‌رد له‌گه‌ڵ تۆ له‌ده‌رگاى خودا روو سپى و سه‌ربه‌رزن. ئێمه خوێندکارانى زانستگاى ئازادى واحیدى زانست و لێکۆڵینه‌وه‌ى تاران وێراى مه‌حکووم کردنى کرده‌وه قیزه‌ونه‌کانى ئێوه، راده‌گه‌ێنین که نه‌رژیمى فاشیستى ئاخوندى به ره‌سمى ده‌ناسین و نه‌عه‌لى خامنه‌ییمان وه‌کوو رێبه‌رى ئێران قه‌بووڵه و به هیواى رۆژێکین که خامنه‌ییش وه‌کوو سه‌دام حوسێن موحاکه‌ممه بکرێت. له‌کۆتایی بانگه‌وازه‌که‌دا له‌سه‌ر به‌شدارى به‌رفراوانى خوێندکارانى سه‌راسه‌رى ئێران پێداگرى کراوه‌ته‌وه.
