له هه‌ر هه‌شت ئێرانى یه‌ک که‌س په‌روه‌نده‌ى دادوه‌رى هه‌یه
خه‌باتمێدیا: به پێى هه‌واڵى هه‌واڵده‌رى حکومه‌تیى ئیسنا، عه‌بباس عه‌لیزاده جێگرى ئیداره‌ى ئابوورى ده‌زگاى دادوه‌رى رژیم ده‌ڵێ:
له هه‌ر هه‌شت ئێرانى یه‌ک که‌س له دادگاکانى رژیمدا په‌روه‌نده‌ى دادوه‌ریان هه‌یه، و (بگره و ببه‌سته) وه‌لامده‌ره‌وه‌ى سزا و په‌روه‌نده‌کانى دادوه‌رى نیه.
پێش ئه‌وه‌یش ئاخوند مه‌حمود هاشمى شاهرودى سه‌رۆک ده‌زگاى دادوه‌رى رژیم، گوتبووى به بوونى جه‌ماوه‌رى ٧٠ ملوێنى له ئێران سالانه نزیک به نۆ ملوێن په‌روه‌نده دروست ده‌کرێ.
عه‌لیزاده له ووتووێژ له‌گه‌ڵ هه‌واڵده‌رى ئیسنا، ره‌خنه‌ى له زیادبوونى به‌رچاوى په‌روه‌نده‌ى دادوه‌رى و زیادکردنى له چاو جه‌ماوه‌رى ئێران گرت.
ناوبراو به ئیشاره به‌وه‌ى که هه‌ر په‌روه‌ندیێک پێوه‌ندى به سێ که‌سه‌وه هه‌یه، گووتى: که حه‌تا له‌گه‌ڵ خۆش بینى و قه‌بووڵ کردنى ئه‌وه‌ى که له هه‌ر په‌روه‌نده‌یێکدا دوو که‌سیش دیارى بکرێن، له ساڵدا ١٨ ملوێن که‌س له په‌روه‌نده‌کانى دادوه‌ریدا وه‌ک شکاتکه‌ر و تاوانبار ناویان دێت.
