باخه‌ڵکی کورد، به‌تایبه‌ت باشووری کوردستان له ئه‌زموونی تاڵی فهلهستین ده‌رس وه‌رگرن!
که‌ریم فه‌یزیان/وڵاتی سوئێد.
ژێر ده‌سته‌یی گه‌لانی بن ده‌ست وداگیر کردنی زێد و نیشتمان و ژێر رکێف خستنی گه‌لان به زۆره‌ملی و به‌بێ مه‌یل و ئاره‌زوی خۆیان، له‌و دیارده دزێوانه‌ن که مرۆڤایه‌تی به‌گشتی له دژی راده‌وه‌ستێ و ئازادیخوازان و جه‌ماوه‌ری ئه‌و گه‌له بنده‌ستانه له دژی راده‌وه‌ستن و خه‌باتی بۆده‌که‌ن.
جا ئه‌و ژێرده‌ست خستن و ماف پێشێلکاریانه هه‌ر که‌س بیکا و بۆ هه‌ر مه‌به‌ستێک بکرێ، دژی به‌رژه‌وه‌ندی مرۆڤ و مافه‌کانی مۆڤه و ده‌بی به هه‌موو شێوه‌ێک دژایه‌تی بکرێ و له رێگای چاره سه‌ری کێشه پێوه‌ندیداره‌کان له‌م باره‌وه، هه‌ر کۆسپ و به‌رگرێکیش چ له لایه‌ن داگیرکه‌ره‌وه بێت یان هه‌ر لایه‌ن و تاقم و ده‌سته‌ێکی تره‌وه که به مه‌به‌ستی گێره‌شێوێنی و کۆسپ دانان له سه‌ر رێگای چاره‌سه‌ری کێشه‌کان بێت، ئه‌وه‌ش به پێشێلکاری و گێره‌شێوێی و ده‌ستێوه‌ردان له کاروباری ناو خۆی گه‌ل و وڵاتان دێته ژمار. بێجگه له کێشه‌و خه‌باتی ره‌روای گه‌لی کوردی ماف و نیشتمان داگیر کراو، یه‌کێک له کێشه ئاڵۆزه‌کانی سه‌رده‌م، کێشه‌ی گه‌لی فه‌له‌ستینه که ماوه‌ێکی دورو درێژه وه‌ک به‌رچاوترین و خوێناویترین کێشه‌ی مرۆڤایه‌تی ، به بێ چاره‌سه‌ری ماوه‌ته‌وه.کێشه‌ی گه‌لێک که ماوه‌ێکی دورو درێژه شۆڕشی خوێناوی ئه‌م گه‌له بۆ رزگاری و سه‌ربه‌خویی نه‌ته‌وه و نیشتمان له ئارادایه. له ساڵه‌کانی ئاخری سه‌ده‌ی بیست و سه‌رتای ده‌یه‌ی سه‌ده‌ی بیست و یه‌که‌م دا، به هه‌وڵ و تێکۆشانی وڵاتانی ئوروپایی و ئامریکایی و له سه‌روی ئه‌مانیشه‌وه، ئه‌نجومه‌نی ئاسایشی رێکخراوی نه‌ته‌وه‌یه‌کگرتوه‌کان، بۆ دۆزینه‌وه‌ی رێگه‌چاره‌ێک بۆ کێشه‌ی گه‌لی فهلهستین و ده‌وڵه‌تی ئیسڕائیل ، زۆر رێگه چاره‌ی گونجاو و هیوابه‌خش و تروسکایی رزگاری و ئاوبه‌ئاورداکردنی ئه‌م کێشه پڕ گرێ و گۆڵه‌دا ، له‌به‌رجاوگیران و هاتنه ئاراوه که ئه‌گه‌ر ده‌ستێوه‌ردانی لایه‌نی ئاژاوه‌گێڕ و ده‌سه‌ڵاته گێره‌شێوێنه‌کانی وه‌ک ئێران و گوێ له‌مستی تاقم و ده‌سته سه‌ره‌رۆ و ده‌ستنده‌خۆر و به کرێگیراوی سه‌ر به رژیمی ئاخوندی ئێران نه‌با، زۆر له‌مێژ بوو ئه‌و کێشه‌یه چاره‌سه‌ر ده‌کراو گه‌لی فه‌له‌ستینی له خوێندا شه‌ڵاڵ، به مافه‌کانی خۆی ده‌گه‌یشت و ئیسڕائیلیش ده‌ستی له‌و کوشتارو ده‌گیر که‌ریه دێناو فه‌له‌ستینی و ئیسڕائیلیه‌کان پێکه‌وه وه‌ک دوو جیرانی جێگای متمانه‌ی یه‌کتری، درێژه‌یان به ژیان ده‌دا. کۆماری ئیسلامی ئێران به‌رێبه‌ری ئاخوندانی دڵڕه‌ش و مرۆڤ کوژ که خۆیان و ده‌وڵه‌ت و به‌رنامه‌کانیان دژایه‌تی له‌گه‌ڵ هه‌ر پێشکه‌وتن و ئاشتی و ئاوه‌دانێک هه‌یه، له‌م نێوه‌دا به‌رچاوترین ده‌وریان هه‌یه و هه‌ر جۆره سازان و ئاشتیێک به نه‌مانی ده‌سه‌ڵات و نفوزی خۆیان ده‌زانن و به‌کرێگراوان و دارده‌سته‌کانیان له‌م ناوچه‌دا هان ده‌ده‌ن بۆ گوێ نه‌دان به بانگه‌وازی ئاشتی و چاره‌سه‌ری کێشه‌کان.
دیاره کێشه‌ێکی ئاوا گه‌وره و له مێژینه‌ی به‌ینی دوو نه‌ته‌وه به دوو ئایینی جیاوازی دژ به‌یه‌ک، هه‌روا به ئاسانی چاره سه‌ر ناکرێ ، به‌ڵام به هه‌وڵ و تێکۆشانی وڵاتانی ئازادیخواز و مرۆڤ دۆست، هه‌وڵێکی باش دراوه، به‌داخه‌وه ده‌بێ بڵێن که رژیمی ئێران بۆته چه‌قڵی مه‌مووزینه‌و بۆته به‌ربه‌ست و تا ئێستاشی له‌گه‌ڵ بێ نه‌یان هێشتوه ئه‌م کێشه‌یه به سوڵح و ئاشتی و له رێگای جاره‌سه‌ری دیالۆگ و دیپلۆماسی و سیاسیه‌وه چاره‌سه‌ر بکرێ. به‌ناردنی چه‌ک و چۆڵه و که‌رسته‌ی کاری ترۆریستی و پێک هێنانی پلان و گه‌ڵاڵه‌ی ئاژاوه‌گێڕانه بۆتاقمێک چه‌کداری که‌لله ره‌قی گوێ له‌مستی هیچ نه‌بیست، که عاملاو و ده‌ست په‌روه‌رده‌ی خۆیانن و وه‌ک دارده‌ست وبۆ به‌‌ڕێوه‌به‌ری کارو باره ناره‌وا و پلان و گه‌ڵاڵه شومه‌کانیان له ناوچه‌کاه‌دا، زه‌قیان کردونه‌وه و که‌ڵکیان لێوه‌رده‌گرن و له سۆنگه‌ی ئه‌وانه‌وه ناهێڵن بارودۆخه‌که هیور بێته‌وه .هه‌ر که تۆزێک له ئاکامی هه‌وڵه نێونه‌ته‌وه‌یی و ناوچه‌ییه‌کانه‌وه، هه‌ست به چاره‌سه‌ری کێشه‌که و بڕێک ئارام بوونه‌وه له ناوچه‌که هاته ئاراوه، سه‌رانی رژیم ئاخوندی کێچ له که‌وڵیان ده‌که‌وێ و ده‌که‌ونه خۆ و کێشه‌ێک له‌م باره‌وه ده‌نێنه‌وه و سه‌ر له نوێ ریسه‌کان ده‌که‌نه‌وه خوری و هه‌موو هه‌ڵ وده‌وڵه‌کان له‌بارده‌به‌ن و ده‌بنه‌وه هۆی هه‌ڵایسانی شه‌‌ڕ و ئاگرێکی ماڵوێرانکه‌ری تر بۆ خه‌ڵکی زێفلێکراو و ماڵوێرانی فهلهستین و خۆشیان له‌دووره‌وه دووعای خێریان بۆده‌که‌ن و زیاتر هانیان ده‌ده‌ن که گوێ به ویست و خواستی نێوبژیوانان و خێرخوازان له‌مباره‌وه نه‌ده‌ن . به‌له‌به‌رچاوگرتنی ئه‌واستیانه‌ی که باسمان کردن، ئه‌م ماڵوێرانی و خوێن لاشه‌بردنه‌ی که ئه‌مڕۆ له غه‌ززه ده‌ی بینین ، هۆی سه‌ره‌کی و به‌رده‌وامی ئه‌م شه‌‌ڕو ماڵوێرانیه، سه‌رانی که‌لله پووچی ئاژاوه‌گیر و رێبه‌ر و رێنوێنی هه‌موو کرده‌وه ترۆریستیه‌کانی جیهان و ناوچه‌که، ئاخونده دڵڕه‌ش وخوێنڕیژه‌کانی ده‌سه‌ڵات داری کۆماری ئیسلامی ئێرانن که مانه‌وه‌ی ده‌سه‌ڵاتی خۆیان له‌وه‌دا ده‌بینن. به‌تایبه‌ت که حکومه‌تی ئاخوندی ئێران به هۆی لاساریه‌کانی و گوێنه‌دان به بانگه‌وازو بریاره نێونه‌ته‌وه‌ییه‌کان سه‌باره‌ت به کێشه ئه‌تۆمیه‌که‌ی، له ژێر فشاری نێونه‌ته‌وه‌ییدایه و ده‌ی هه‌وێت به شێوه‌ێک له شێوه‌کان له‌م باره‌وه بیرو رای گشتی به‌لاڕیدابه‌رێ، یان لانی که‌م گوشاره‌کان له‌سه‌ر خۆی که‌م کاته‌وه. ئه‌گه‌ر سه‌رنج بده‌ین ده بینین که سه‌ر دێڕی هه‌موو رۆژنامه‌کان و قسه‌و باسی سه‌رکی سه‌ر رادیۆ و ته‌له‌فزیۆنه‌کانیان ، هه‌ر هاتوو هاواره بۆ خه‌ڵکی فهلهستین و جیا له دروشم و چیوه‌خته‌ی کێشه‌کان، هیچ هه‌نگاوێکی تریان له‌ده‌ست نایا. سه‌یر ئه‌وه‌یه که ئه‌م رژیمه و ده‌سه‌ڵاتدارانی، بۆ خۆیان یه‌کێک له داگیرکارترین و خۆێنڕێژترین ده‌سه‌ڵاته‌کانی سه‌رده‌من. له ژێر سێبه‌ری ده‌سه‌ڵاتی ئه‌واندا هیچکام له گه‌لانی بنده‌ستی ئه‌وان، له هیچ چه‌شنه ئازادی و مافێکی مرۆڤ به‌رخوردار نین و هه‌ر ده‌نگێکی ئازادیخوازی و هه‌ر باگه‌وازێکی ئاشتیخوازانه به گولله و په‌تک و سێداره و زیندان و پێشێلکاری وڵام ده‌ده‌نه‌وه، له کاتێک دا فرکێسکی تیماساحی بۆ گه‌لی فهلهستین هه‌ڵده‌‌ڕێژن، له گه‌لانی ئیران ، به‌تایبه‌ت گه‌لی کورد له کوردستانی بن ده‌ستیاندا له هه‌رچه‌شنه ماف و ئازادێک بێ به‌شن و رۆژ نیه رۆڵه‌کانی ئه‌م گه‌له به‌دست ئه‌م تاقمه دین به دنیا فرۆشانه‌وه نه‌گیرێن و شکه‌نجه و ئیعدام نه‌کرێن، قه‌ڵه‌م نه‌شکێن، زمانی راست وێژی نه‌بڕێن!. ئه‌وه‌ی که جێگای دڵخۆشیه و تروسکه‌ی هیوای داهاتوه، ئه‌وه‌یه که بێجگه له هێندێک تاقم و ده‌سته‌ی فه‌له‌ستینی سه‌ربه دارو ده‌سته‌ی کۆماری ئیسلامی ئێران، گه‌لی فهلهستین به گشتی باش بۆیان روون بۆته‌وه و رووی ره‌ش و ئاژاوه‌گێڕی کاربه‌ده‌ستانی ئێرانیان بۆ ده‌رکه‌وتوه،به‌ڵام ئه‌و خه‌ڵکه گیرۆده‌و مافخراوه، گیرۆده‌ی داوی تاقمێکی سه‌ره‌‌ڕۆی سه‌ر به رژیمی ئێرانن و رێگای ده‌رباز بوونیان هه‌روا ئاسان نییه و شه‌‌ڕ و ماڵوێرانکه‌رێکی وایان بۆ ناونه‌وه که ئه‌وسه‌ری دیار نه‌بێ و له‌م ناوه‌دا هه‌ڵاواردنی لایه‌نی شه‌‌ڕخواز و شه‌‌ڕ نه‌خواز زۆر دیژواره و ته‌‌ڕوپووش پێکه‌وه ده‌سووتێ و تائێستا له‌ئاکامی ئه شه‌‌ڕه تازه‌دا که به هۆی سه‌ره‌‌ڕۆیی ئه‌و تاقمانه‌وه هاتۆته‌وه ، سه‌ره‌‌ڕای قات وقڕی وبرسیه‌وتی و بێ ده‌رمانی، زیاتر له سه‌دان که‌س کوژراون و هه‌زاران که‌سیش برینداربوون و رۆژ له دوای رۆژ رێژه‌ی کوژاو و برنداره‌کان له هه‌ردوو لای تێکهه‌ڵچوو له زیادبوون دایه‌و تا ئێستا هه‌وڵه‌کان له‌م باره‌وه بۆ راگرتنی ئه‌م شه‌‌ڕه سه‌رو ماڵ سووتێنه‌ره، بێ ئاکام ماونه‌ته‌وه. راسته ده‌بێ گه‌لی فهلهستین سه‌ربه‌ستی به‌ده‌ست بێنێ و به ئاشتی و ئاسایش شاد بێت و بۆ ئه‌م کاره‌ش ده‌بێ پشتیوانی شایان و پێویستی لێبکرێ و خه‌بات و تێکۆشانیان له دژی داگیر که‌رییه و دفاعه له‌ماف و ئازادیه‌کانیان و جێگای رێز و ئه‌وه‌ی که خۆی به ئازادیخواز بزانێ نابێ له‌م باره‌وه بێ هه‌ڵوێست بێ و چاو له کرده‌وه‌کانی لایه‌نی تاوانبار بقونچێنێ. به‌ڵام به‌داخه‌وه سه‌رانی رژیمی ئێران هه‌ل و مه‌رجه‌کانیان بۆ قازانجی خۆیان قۆستۆته‌وه و بۆ مانه‌وه‌ی خۆیان ئه‌و زه‌بره گه‌وره‌یان له په‌یکه‌ری خه‌باتی خوێناوی گه‌لی فهلهستین داوه، که هیوادارین به هیممه‌تی خێرخوازانی به‌راستی و دڵسۆزانی مافی مرۆڤ و کۆڕو کۆمه‌ڵه نایونه‌ته‌وه‌ییه‌کان، بتواندرێ کۆتایی به‌م شه‌‌ڕو ماڵوێرانکاریه بهێندرێ و به‌هه‌مووان بتواندرێ ده‌ستی رژیمی ئێران له‌م باره‌وه کۆتا کرێ تا سوڵح و ئاشتی له‌م ناوچه‌دا سه‌قامگیر بێ و رۆژهه‌لاتی ناوین یه‌کێک له گێره‌و کێشه‌کانی چاره‌سه‌ر بکرێ . ئه‌وه‌ی که من له‌م باسه‌دا ده‌مه‌وێت بیخه‌مه به‌رباس و روونکردنه‌وه، ئه‌وه‌یه که ده‌ست نیشانی ئه‌وه‌بکه‌م که، چۆن رژیمی ئاخوندی ده‌ی هه‌وێت له ناو گه‌لانی بن ده‌ست دا به ناوی پشتیوانی و هاوکاری، گه‌رای ئاژاوه‌گێری و دووبه‌ره‌کی و شه‌‌ڕو شۆر دانێ و ئه‌و گه‌لانه بکاته دارده‌ست و چاوله‌ده‌ستی خۆی، که گه‌لی ئێمه‌ش گه‌لی کورد یه‌کێکه له گه‌لانی به‌شمه‌ینه‌ت و مافخوراو و کۆماری ئیسلامیش تاراده‌ێک توانیویه‌تی له ناوچه‌کانی ژێر ده‌سه‌لاتی حکومه‌تی هه‌رێمی کوردسان و عیراق دا به‌ناوی دانانی ناوه‌ندی هاوکاری و خزمه‌تگوزاری و راکێشانی سه‌رنجی هێندێک لایه‌نی خاوه‌ن خه‌ت و رێبازی نزیک له خۆی، خه‌ریکه گه‌لی ئیمه‌ش وه‌ک گه‌لی فهلهستین زلیل و کۆڵه‌وار وچاوله‌ده‌ست و گوێ له‌مستی خۆی بکات. که‌د‌ه‌بێ له‌م باره‌وه هه‌موو لایه‌ک زۆر به هوشیاری و چاوکراوه‌ییه‌وه، هه‌ڵس و که‌وته‌کانی بخه‌نه ژێر چاوه‌دێری و نه‌هێڵدرێ گه‌را دانێ و جێ پێی خۆی وه‌کا و به ناوی دڵسۆزی و هاوکاریه‌وه، ئه‌و ئازادی و ئارامیه‌ی که ئیستا هه‌یه بشێوێنێ و ئه‌زمونه‌کانمان له‌بار به‌رێ و به شیعار و ته‌بلیغاتی بریقه‌دار، سه‌ر ته‌ڵه‌مان په‌‌ڕێنێ و ده‌ستکه‌وته‌کانمان به فیڕۆبداو بیرو رێبازی جیا له بیرو رێبازی نه‌ته‌وه‌یی و کوردایه‌تی و ئاشتیخوازی و مافی مرۆڤ و به‌رانبه‌ری و پێشکه‌وتنخوازی له‌ناو چین و تویژه‌کانی کورده‌واریدا په‌ره‌پێ بدا. گه‌لی خه‌باتکار و هوشیاری کورد ده‌زانێ کێ دۆسته و کێ دژمنه و کێ به‌رژه‌وه‌ندی ئێمه‌ی ده‌وێ و کێ به‌ناوی دۆست و دڵسۆز ده‌یه‌وێ له خشته‌مان به‌رێ و داری ژێر پێمان ببڕێته‌وه . لێره‌دا رووی باسه‌که‌م ده‌که‌مه جه‌ماوه‌ری رۆژهه‌ڵات و باشووری کوردستان که ئه‌گه‌ر هه‌موولایه‌کمان به‌باشی له ئاکار و کرده‌وه‌کانی کاربه‌ده‌ستانی کۆماری ئیسلامی ئێران وردبینه‌وه و سه‌رنج بده‌ینه راگه‌ێندراوه‌کانیان له رێگای رادوێ و ته‌له‌ڤزیۆنه‌کانیانه‌وه، زۆر شتمان بۆ ده‌رده‌که‌وێ و له مه‌به‌ست و نیازه‌کانیان حاڵی ده‌بین ، که چه‌نده دژمنکارانه و نه‌یارانه باس له ئه‌زموونی باشووری کوردستان ده‌که‌ن و چۆن هه‌موو فیکر و زیکریان بۆ له‌به‌ریه‌کترازانی ئه‌م نیمچه کیانه ساوایه‌ی کوردستانه که به خوێنی رۆله‌کانی ئه‌م گه‌له و ماڵوێرانی و ده‌ربه‌ده‌ری و ئه‌نفال و شیمیایی باران، هاتۆته ئاراوه و گه‌یشتۆته ئه‌م قۆناغه و پاراستن و په‌ره‌پێدانی له‌سه‌ر هه‌مووان پێویسته.گه‌لی کورد له باشوری کوردستان ده‌بێ باش بزانن که کۆماری ئیسلامی ئێران، چاوی به کورد و کوردستان هه‌ڵنایه‌و تا بۆی بکرێ له‌پشته‌وه خه‌نجه‌ری ژاراوی خۆی ده‌وه‌شێنێ . له‌م باره‌وه به‌ڵگه زۆرن و که ئێمه لێره‌دا ئیشاره‌ێکی بچووکیان پێده‌کین:
له‌م حه‌وتوانه‌دا له ته‌له‌ڤزیۆنی به‌ناو رایه‌ڵه‌ی جیهانی سه‌حه‌روه‌وه که رۆژانه چه‌ند سه‌عاتێک به زمانی کوردی به‌رنامه بڵاوده‌کاته‌وه و به‌شی زۆری به‌رنامه‌کانیشی دوبلاژ وته‌رجومه‌کراوی به‌رنامه فاسیه‌کانن و به‌شێکی زۆر که‌میان راسته‌و خۆ کوردین و دوبلاژ و ته‌رجومه‌نین، ئه‌ویش ئه‌وانه‌ی که ده‌قاو ده‌ق دژ به کورد و کوردستان و جوڵانه‌وه‌کانی گه‌لی کورد له‌م به‌شه‌ی کوردستان دا، به‌رنامه‌کانی بڵاوده‌کاته‌وه و زۆر جارانیش بۆ پشتگیری له سیاسه‌ته‌کانی رژیم و که‌م ره‌نگ کردنه‌وه‌ی کار و به‌رنامه‌کانی حکومه‌تی هه‌ریمی کوردستان له باشوری کوردستان یان دژایه‌تی له‌گه‌ڵ کار و تێکۆشانی لایه‌نه خه‌باتگێڕ و سیاسیه‌کانی کوردی رۆژهه‌لات، بۆ قسه‌و باس و راویژ و کاوێژ، بانگهێشتنی که‌سانێک ده‌که‌ن و له‌سه‌ر وه‌زعی باشووری کوردستان، ده‌یان هێننه سه‌ر ده‌لاقه‌و په‌نچه‌ره‌ی ئه‌م ته‌له‌ڤزیۆنه، ئه‌وانه‌ش به زۆری ئه‌و که‌سانه‌ن که ئه‌فراد و ئه‌ندامی ئه‌و گروپ و تاقمه ئیسلامیانه‌ی سه‌ر به رژیمی کۆماری ئاخوندین و حاڵی حازر له ئێران و له‌ژێر سیبه‌ری پڕ له‌که‌ره‌م و ره‌حمه‌تی ئه‌م رژیمه‌دا ده‌ژین و هیچ له وه‌زعی باشوری کوردستان ئاگادار نین و زۆر بێ ئینسافانه و به پێی دڵی کاربه‌ده‌ستانی رژیمی ئاخوندی ده‌ئاخاون و ئه‌وه‌ی ده‌یڵێن فڕی به‌راستیه‌وه نیه‌و باشوری کوردستان و حکومه‌تی هه‌رێم له‌و شتانه بێ به‌رین. ئه‌وی ده‌یڵین ته‌نیاو ته‌نیا له‌به‌ر ئه‌وه‌یه که چاویان له حاست ئه‌م به شه‌ی کوردستان و ده‌ستکه‌وته‌کانی گه‌له‌که‌مان هه‌ڵنایه و خه‌ونی گولی پێوه ده‌بینن. که‌سێک له‌و که‌سانه‌ی که به قه‌ولی خۆیان بانگهێشتنیان کردبوو بۆ چاوپێکه‌وتن له سه‌ر داوی جاڵجاڵۆکه‌ی به‌ناو کاناڵی سه‌حه‌ر، که‌سێک بوو به‌ناوی ،،بیلال،،و وه‌ک شاره‌زای پرسه‌کانی ناوچه هێنابوویان. ئه‌م به‌ناو کارناسه‌ی پرسه‌کانی ناوچه، هه‌موو باسه‌که‌ی له‌سه‌ر که‌م و کووڕی و پێڕانه‌گه‌یشتنی حکومه‌تی هه‌رێمی کوردستان بوو. مام بیلال کاره‌کانی حکومه‌تی کوردستانی به‌راورد ده‌کرد له‌گه‌ڵ وڵاتانی ئوروپایی. باشوورێکی کوردستان که به سه‌دان ساڵه وێران ده‌کرێ و ده‌سووتێندرێ و خه‌ڵکه‌که‌ی ئاواره و ده‌به‌به‌ر‌ده‌کرێ ده‌کوژرێ و له لایه‌ن دژمنانی نه‌ته‌وه‌و نیشتمانمانه‌وه، که کۆماری ئیسلامی یه‌کیک له‌و دژمنانه‌یه، به‌رده‌وام شه‌‌ڕی به‌سه‌ردا سه‌پاوه و قه‌ت تاوێک ئارامی و ئاوه‌دانی و دامه‌زراوی به خۆیه‌وه نه‌دیوه، له گه‌ڵ وڵاتانی ئوروپایی به‌راورد ده‌کرد که ئه‌وه‌تی کوردستان دابه‌ش و داگیر کراوه، ئه‌وان خه‌ریکی ته‌مرینی ئازادی و دیموکراسی و ئاوه‌دانی و پێشکه‌وتنن و به‌راورد کردنی ولاتێکی وێرانی دابه‌شکراوی له چوار لاوه گه‌مارۆدراو به دژمنان یه‌ک له‌وان خانه‌خوێکه‌ی مام بیلال، شتێکه دوور له مه‌نتیق و ئه‌قڵی سالم و مرۆڤی کوردی دڵسۆز وخاوه‌ن تێگه‌یشتن قه‌ت رێگا به خۆی نادا نه‌ک وابئاخوێ، بگره بیریشی لێبکاته‌وه!. مامۆستا بیلال باسی له ئاوه‌دانی ئه‌و گوندانه ده‌کرد که رۆژانه له ژێر ره‌هێڵه ره‌حمه‌تی بارانه‌ی تۆپ و کاتیوشاکانی حکومه‌تی عه‌دڵی ئیلاهی ئاخوندی سه‌روه‌ر و سه‌رداری مامۆستا بیلالی کارناسی پرسه‌کانی ناوچه‌دان ، که گۆیا پێیان رانه‌گه‌یشتوون و ئاوه‌دان نه‌کراونه‌وه!!. من لێره‌دا له کاک بیلال و ئه‌وانه‌ی که وه‌ک کاک بیلال بیرده‌که‌نه‌وه ده‌پرسم: به چی و به هاوکاری کێ پێیان رابگه‌ن؟ هه‌زاران گوند به شار و سارۆچکه‌وه سوتێندراون و کیمیای باران کراون و بهردی بناغه‌یان نه‌ماوه و هه‌موو کێڵگه‌کانی ده‌وروبه‌ریان به مین چێندراون وده‌بێ له شوێنێکی ترو به شێوه‌ێکی سه‌رده‌میانه بنیات وه‌ندرێن، چۆن هه‌روا به‌ئاسانی و به ماوه‌ێکی کورت و ده‌م و ده‌ست به‌و بودجه‌ی که به هه‌وڵ وماندووبوونی دڵسۆزانی کورد له حکومه‌تی ناوه‌ندی عیراقی ده‌ستێندرێ له‌گه‌ڵ هێندێک داهاتی ناوخۆیی، وه‌ک ئوروپای لێ ده‌کرێ و جاده و کاره‌با و پرد و مه‌دره‌سه و ه‌خوشخانه و هه‌موو پێداویسته‌کانی ژیانیان بۆ ده‌بینده‌کرێ؟. ئه‌و کارناسه پسپۆڕه !، باسی له خه‌ڵکی فه‌قیر و هه‌ژار و که‌م ئه‌ندام ده‌کرد که گۆیا یارمه‌تیان پێناکرێ و پێیان راناگه‌ن. له گه‌ڵ ئه‌م باسه‌ی دا نموونه‌ی به باسێک هێنایه‌وه که، نازانم جه‌نابی سه‌فه‌ری ئوروپای کردبێ یان فیلمی له‌وباره‌وه دیبێ، گێرایه‌وه که که‌م ئه‌ندامێکی ئوروپایی دیوه که به عاره‌بانه‌که‌یه‌وه له ماشینه‌که‌ی هاتۆته‌ده‌رێ و هه‌موو کاره‌کانی خۆی بۆ خۆی ده‌کرد و ده‌یگوت له ئوروپا زۆریان پێراده‌گه‌ن!. باسی له مه‌کته‌ب و خوێندنگه‌گان ده‌کرد و ده‌ی گوت حکومه‌تی هه‌رێمی کوردستا نه‌یتونیوه قوتابخانه و جێگاو رێگا بۆ خوێندکاران دابین بکا. من لێره‌دا قه‌زاوه‌ت له‌سه‌ر مام بێلاله‌کان بۆ ئێوه جێدێڵم و لێره‌دا ده‌مه‌ویت رووی ره‌شی رژیمی کۆماری ئیسلامی بۆ خه‌ڵکی کوردستان زیاتر ده‌رخه‌م که ئه‌م رژیمه چ گێچه‌ڵێکی بۆ گه‌لی کورد پییه و له رێگای ئه‌م که‌سانه‌وه که هاوزمان و هاو ره‌گه‌زی خۆمانن، زه‌ربه‌مان لێ بدا، بۆ دڵنیایتان هه‌موو باسه‌که‌یان بۆ هاندانی جه‌ماوه‌ری باشووری کوردستان بوو دژ به حکومه‌تی هه‌رێم و که‌م ره‌نگ کردن و بێ بایه‌خ نیشاندانی ئه‌و ئازادی و دیموکراسیه‌ی له‌م به‌شه‌ی کوردستان به خه‌ڵکی کورد له رۆژهه‌ڵاتی کوردستان به‌تایبه‌تی و بیراورای ده‌وروبه‌ر و جیهانی به‌گشتی. من لیره‌دا له ئێوه ده‌پرسم: باشه ئه‌م به‌رواڵه‌ت دڵسۆزانه بۆچی باس له پێشکه‌وتنه‌کانی باشوری کوردستان ناکه‌ن و خاڵه ئه‌رێنیه‌کانی ناخه‌نه به‌رباس و کاکی کارناسی پرسه ناوچه‌ییکان به ئاقاریشیاندا ناروا؟. رۆژێ به‌ده‌یان پڕۆژه‌ی خزمه‌تگوزاری وه‌ک بیناسازی و ئاوو ئاوه‌رۆ، مه‌درسه‌و جاده‌و بان و نه‌خۆشخانه وشوێنی گه‌شت و گورزارو، په‌ره‌پێدان به کشت وکاڵ و لایه‌نی ته‌ندروستی و ناوه‌ندی وه‌رزشی وله‌ش ساخی، به‌رێوه‌ده‌چن و پوڵ و پاره‌ێکی زۆریان بۆ ته‌رخان ده‌کرێ، نابینن . به‌راستی جوانیان وتوه که ده‌لێن قالۆچه له بۆنی خۆش سڵ ده‌کا!!. من ناڵێم که‌م و کووڕی نییه و هه‌مووشت به بێ گیرو گرفت ده‌رواته پیش و حکومه‌تی هه‌رێم و کاردبه‌ده‌ستانی زێڕی بێ غه‌شن و له سه‌نگی محه‌ک دراون. به‌ڵام ئه‌گه‌ر ئاوڕیک له رابردوی ئه‌م گه‌له به‌ده‌ست داگیرکه‌ر و دژمنانی له ده‌ورانی ده‌سڵاتی دیکتاتۆری سه‌ددام دا بده‌ینه‌وه و له گه‌ڵ وه‌زعی ئێستا دا به‌راوردی بکه‌ین،ویژدانمان ئیجازه‌مان پێ نادا نه‌ک وه‌ک بیلاله‌کان بیروه‌که‌ی به‌ڵکوو ئیجازه‌شمان پێنادا که له‌به‌رانبه‌ریان دا بێده‌نگ راوه‌ستین و به‌رپه‌رچیان نه‌ده‌ینه‌وه. بێگومان خه‌ڵکی کورد به گشتی و باشوور کوردستان به‌تایبه‌تی، نرخ و قه‌دری ئه‌م ئازادی و ئاسایشه ده‌زانن و وه‌ک بیلبیله‌ی چاویان ده‌ی پارێزن و پێویستیان به خه‌مخۆریی ریاکارانه‌ی رژیمی کۆماری ئیسلامی ئێران نیه. مام بێلال و باقی ده‌ستو پێوه‌نده‌کانی رژیمی ئیران بۆ له به‌رپرسه‌کانی خۆیان ناپرسن؟، که به هه‌زاران که‌م ئه‌ندامی شه‌ری ماڵوێرانکرواو و جه‌ماوه‌ر نه‌خوازی، ئێران ــ عیراق، که له‌و په‌‌ڕی نه‌داری و بیوه‌زعی و هه‌ژاری دا ده‌ژین. بۆ وه‌ک که‌م ئه‌ندامانی به‌قه‌ولی وان ئوروپایی پێداویسته‌کانیان بۆ دابین ناکرێ؟ ئیرانێک که کانگای نه‌وت و سێهه‌مین پله‌ی داهاتی نه‌وتی له جیهاندا هه‌یه ، پوڵی ئه‌م داهاته بۆ چ مه‌به‌ستێک حه‌یف و مه‌یل ده‌کرێ و بۆ چی ناگاته ده‌ستی ئاتاج و موحتاجانی که وه‌ختی خۆی له پێناو فه‌رمانی ئیمامی جه‌ماراندا، بۆ گه‌یشتن به که‌ربه‌لا و هێرش هێنانه سه‌ر کوردستان و شاد بوون به به‌هه‌شت، فریویان خوارد و ئێستا لانه‌واز و داماو و موحتاجن و که‌س ئاوڕیان لێناداته‌وه و پارو له ده‌می ئه‌ون ده‌گێڕنه‌وه و ده‌یده‌ن به تاقم و گروپه تروریسته‌کان له هه‌ر گۆشه‌و که‌نارێکی ئه‌م جیهانه‌دا .به‌راستی ئه‌وانه‌کێن له ده‌ورو به‌ری شاره گه‌وره‌کانی ئێران به‌تایبه‌ت، تارانی پایته‌خت له بن پردو ژێر ته‌نه‌که‌و نێو کارتۆن دا ده‌ژین و رۆژ نییه به ده‌یان که‌سیان لی له‌سه‌رمان ره‌ق نه‌بیته‌وه و له برسان گیان نه‌ده‌ن؟ با بچن به‌وانه و به هه‌زاران که‌م و کوڕی تر که هه‌یانه و خه‌ڵکانی ئێران له‌گه‌ڵیان ده‌سته‌و یه‌خه‌ن رابگه‌ن و کاریان به میلله‌تانی تره‌وه‌نه‌بێ!، به راستی بانێکه و دوو هه‌وا. له بڵیندگۆکانیانه‌وه بانگ و هاوار بۆ لێقه‌وماوانی وڵاتانی دوور و ده‌ورو به‌رده‌که‌ن و بهردی دڵسۆزی بۆ خه‌ڵکی باشوری کوردستان له سینگیان ده‌ده‌ن ،به‌ڵام له‌و لاشه‌وه هه‌موو رۆژێک گوندو سارۆچکه‌کانی باشووری کوردستان ده‌ده‌نه به‌ر ره‌هێڵه‌ی تۆپ و کاتیوشا و ماڵ و حاڵیان که تازه دایان مه‌زراندۆته‌وه و ئه‌وان ده‌ڵێن هیچ نه‌کراوه، وێران ده‌که‌نه‌وه. جه‌ماوه‌ری کورد به تایبه‌ت گوندنشینانی ناوچه سنوریه‌کانی رۆژهه‌لات و باشوور و باکووری کوردستان، رۆژ نیه که له‌لایه‌ن هێزه‌کانی تورکیه مودێڕن و ئێرانی ئیسلامیه‌وه، که فرمێسکی به‌درۆیان بۆ هه‌ڵدرێژن، تۆپ باران نه‌کرێن و به بیانوی جۆراوجۆر له لایه‌ن دژمنانی کورد وکوردستانه‌وه زه‌ره‌رمه‌ند نه‌بن و سه‌رو ماڵین له‌ده‌ست نه‌ده‌ن!. حکومه‌ی کۆماری ئیسلامی رۆژنیه له رێگای که‌سانی وه‌ک بیلاله‌کانه‌وه ماده‌ی سڕکه‌رو بیهوشکه‌ر نه‌نێرێته باشوری کوردستانه‌وه و به‌م چه‌که سه‌رو ماڵ تیابه‌ره پارێزگاری له ره‌ش و رووت و موسته‌زعه‌فه‌کانی ئه‌م هه‌رێمه نه‌کا!!. به‌ڵگه زۆرن بۆ تاوانکاریه‌کانی رژیمی ئیران ، به‌ڵام به نووسینی وتارێک یان پڕکردنه‌وه‌ی چه‌ند لاپه‌‌ڕێک نا تواندرێ هه‌مووی باس بکرێ. هه‌ر چه‌ند جه‌ماوه‌ری گه‌له‌که‌مان چ له باشور و چ له رۆژهه‌ڵاتی کوردستان ماهیه‌تی رژیمیان باش بۆ ده‌رکه‌وتوه و باشی ده‌ناسن، به‌ڵام له‌سه‌روی ئه‌مانه‌شه‌وه من داوام له جه‌ماوه‌ری کورد به تایبه‌تی چینی نوێ ئه‌وه‌یه که گوێ بۆ پڕوپاگه‌نده‌ی ژه‌هراوی دژمنانی گه‌له‌که‌مان نه‌گرن و هیچ جیاوازێک له به‌ینی دژمنانی کورد و کوردستان دا دانه‌نێن ، هه‌مویان هه‌ر یه‌کن و فه‌رقی ره‌ش و سپیان نیه‌و هه‌مویان تووکه‌ی یه‌ک سه‌رانگویلکن!. دڵنیاش بن ئه‌وه‌ی که رژیمی ئیران و باقی دژمنانی کورد و گه‌لانی بنده‌ست ده‌کی که‌ن، په‌له‌قاژه‌ی رزگاری له تیاچونیانه‌و هیچیان پێ ناکرێ و له کۆتاییدا ریسوایی بۆ خۆیان و نۆکه‌رانیان به‌جێ دێڵن و عاقیبه‌ت ده‌بێ ته‌شریفی ناشه‌ریفیان بۆ ناو سه‌رانگوێلکی مێژوو سه‌رواو ژێر وه‌بن. هه‌رچی یه‌کگرتووتربێ یه‌کیه‌تی نه‌ته‌وه‌یی کورد دژی داگیر که‌رانی کوردستان.
که‌ریم فه‌یزیان/ وڵاتی سوئێد.
