قوئاد جەعفەری گرنگی و زەرورەتی بەستنی کۆنگرەی نەتەوەیی ماوەێکی زۆرە لە نێوان ئەحزاب و کەسایەتیە سیاسیەکانی هەر چوارپارچەی کوردستان قسەی لەسەر دەکرێت و ماوەماوە زق دەبێتەوە و دوایش بۆ ماوەێک هیچ باسێکی لێوە ناکرێت. وەک دوایین نموونەی لە گەڵاوێژی 2013 ،سی ونۆ حیزب لە چوارپارچەی کوردستان لە دەوری یەک کۆبوونەوە و بە گروتینێکی زۆرەوە باسیان لە بەستنی کۆنگرەی نەتەوەیی کورد کرد، بەڵام بە ورد بوونەوە بە کاری ئەو ماوەیەی ....
رێکخەرانی کۆنگرەی نەتەوەیی، بۆمان دەر ئەکەوی کە جیددی بوون نیە. وەک هەموان ئەزانن بەستنی کۆنگرەی نەتەوەیی لە حاست هەر چوارپارچەی کوردستان کە نوێنەرایەتی هەموو کوردستان بە ئایدۆلۆژیاو و سیاسەتی جیاواز بکات و هەموو ئەحزاب و ناوەندە سیاسی و مەدەنیەکان بە کۆنگرەی خۆیان بزانن بابەتێکی هەستیار و گرنگە و ئەتوانین بڵێین وەها کۆنگرەێک زەرورەتێکی ئەم قۆناغەی خەبات و تێکۆشانی گەلی کوردە و لەو رێگاوە دەتوانین دەنگی خۆمان بگەێنینە وڵاتانی جیهان و ناوەندەکانی مافی مرۆڤ و پشتیوانی مەعنەوی و پاڵپشتی سیاسی بۆ دۆزی رەوای گەلەکەمان لە هەر چوارپارچەی کوردستان کۆبکەینەوە. بەڵام مەسئەلەی گرنگ ئەوەیە کە پێش لەوەیکە برۆینە ناوو بابەتەکەوە دەبێت هەموو وردەکاریەکان بۆ بیرورای گشتی باس بکەین و میکانیزمی گۆنجاوی بۆ دیاری بکەین تاکوو لە درێژەی پرۆسەکەدا بەربەست نەێتە رێگامان. لە واقێعدا کاتێک دەتوانین دڵ بە بەستنی کۆنگرەی نەتەوەیی خۆش بکەین و هیوامان پێی بێت کە ئەحزابی کوردی بە پراکتیکدا لە بەرژەوەندی تەسکی حیزبایەتی خۆیان دوور بکەونەوە و بەرژەوەندی نەتەوەیی لە سەرووی هەموو بەرژەوەندیێک دابنێن. وەک دەزانین پێکهاتەی کوردستان فرە نەتەوەیی و فرە ئایدۆلۆژیایە و دەبێت لە وەها کۆنگرەێکدا رەچاوی هەموو رەهەندەکانی کۆمەڵایەتی و سیاسی کوردستان بکرێت. ئەوکاتەش ناوەندەکانی جیهانی بە شێوەێکی کاراتر و ئۆسۆڵی مامەڵە لەگەڵ نەتەوەی کورددا دەکەن و باشتر دەتوانین بەرەوو ئامانجەکانمان بروین. مێژوو ئەوەی سەلماندووە کە هەر کاتێک گەلێک یەکگرتوو بێت و یەکیەتی نەتەوەیی خۆی پاراستبێت هیچ کات دژمنان نەیانتوانیوە بەسەریدا زاڵ بن و هەمیشە لە رووبەروو بوونەوەی ئەو گەلەدا شکستیان هێناوە. ئێمەش وەک نەتەوەی کورد پیویستە ئەزموون لە رابردوومان وەر بگرین و ئەو راستیە بزانین کە لە لەت بوون و ناکۆکی هیچ قازانجێکمان نەدیوە و لە هەر کەسێک باشتر هەست بە گرنگی بوونی یەکیەتی نەتەوەیی دەکەین و ئەزانین کە بە هۆی نەبوونی یەکگرتوویی و یەک هەڵوێستیمانەوە لە رابردوو چ زەرەر و زیانێکمان دیوە. دوژمنان لە ماوەی ساڵانی رابردوو هەمیشە کەڵکیان لە لەت بوون و دوورکەوتنەکەمان وەر گرتووە و بە قازانجی خۆیان سوودیان لێ وەرگرتووە. ئەوەش راستییکە کە خواست و ئارەزووی یەکبوون لە ناوو نەتەوەی کورددا لە هەموو قۆناغەکاندا بوونی هەبووە، بەڵام بە داخەوە لە قۆناغە جیاوازەکانی مێژوو کەسانی بەکرێگیراو ونەیاری کورد زەربەیان لە کورد داوە و نەیانهێشتووە ئەو یەکیەتیەی کە دەبێت لە ناو نەتەوەی کورددا ببواێت بوونی هەبێت و بە ئاکام بگات. بە ئاوردانەوەێکی لە مێژوو بۆمان دەردەکەوێت کە لە چەند قۆناغێکدا ئەو یەکیەتیە نەتەوەییە کاریگەری ئەرێنی خۆی لەسەر کەش و هەوای کوردستان داناوە و گەلی کورد توانیویە ئەگەر بۆ ماوەیکی کورتیش بیت ببێت بە خاوەن یەکیەتی و یەک هەڵوێستی نەتەوەیی. لە ئێستاشدا سەررای گرنگی و پێویستی کۆنگرەی نەتەوەیی کورد بۆ خەڵکی کوردستان دەبێت ئەو راستیە لەبەر چاو بگرین کە نابێت هیچ کەس و لایەنێک یان چەند لایەنێک خۆیان بە خاوەنی کوردستان بزانن و هەست بکەن کە ئەوەی ئەوان دەیکەن راستیە و ئەوانیتر دەبێت پێبەند و مل کەچیان بن. ئەو کاتەی دەتوانین دڵمان بە سەرکەوتوو بوونی کۆنگرەی نەتەوەیی خۆش بکەین کە هەر تاکێکی کورد بە هەر ئایدیا و بیروباوەرێکەوە خۆی تێدا ببینێتەوە و هەست بکات کۆنگرە نوێنەرایەتی دەکات نەک چەند لایەن و حیزبێک بۆ بەرژەوەندی خۆیان کەڵکی لێ وەر بگرن. شەرتی بەستنی کۆنگرەی نەتەوەیی ئەوە نیە کە دەبێت چوار پارچەی کوردستان یەک بگرێتەوە و کوردستانی گەورە سەر لە نوێ بۆنیاد بنرێتەوە. ئێمە دەتوانین بە چاوخشانێک بە مێژووی وڵاتانی لاۆژئاوایی و تەنانەت وڵاتانی ناوچەکە ببینین کە نەتەوەی عەرەب چلۆن وەک یەک نەتەوە خاوەنی چەندین وڵاتی سەر بە خۆن و یان چۆن وڵاتانی رۆژئاوایی بە پێک هێنانی یەکیەتیێکی سەرکەوتوو سەرەرای بوونی چەندین وڵاتی جیاواز بەڵام لە دەوری یەک کۆ بوونەتەوە و بەرژەوەندی و زیانیان پێکەوە گرێ دراوە. گرنگ ئەوەیە کە رۆحی یەکتر قبووڵ کردنمان تێدا بێت و رێز لە ئێرادە و دەنگی خەڵکی کوردستان بگرین، گرنگ ئەوەیە کە لاوان و ژنان هەست نەکەن کە لە وەها بابەتێکی هەستیاری نەتەوەییدا پشت گوێ خراون و بەشداریان پێ نەکراون. پێویستی وەها کۆنگرەێک ئەوەیە کە رۆژنامەوانان، چالاکانی کۆمەڵگای مەدەنی و میدیای سەربەخۆ خۆیان بە بەرپرسیار لە وەها پرسێکدا بزانن و بەهایان پێ بدرێت، دەبێت لە وەها پرۆسەێکی نیشتمانیدا هەموو رەهەندەکانی سیاسی، کۆمەڵایەتی و کەلتوری لە بەر چاو بگیردرێت تاکوو بتوانین وەک تاکی ئەم نیشتمانە شانازی پێوە بکەین و مۆدێلێکی جوان و پر بایەخ لە یەکیەتی نەتەوەیی و رۆحی یەکتر قبووڵ کردن بۆ نەوەی دوا رۆژمان جێبهێڵین. ئەبێت ئەحزاب و سەرکردایەتی سیاسی کوردستان بەرژەوەندی نەتەوەییان لە پێش هەموو بەرژەوەندیێکەوە بێت و ئامادە بن بۆ بەستنی وەها کۆنگرەییک . لە راستیشدا ئەوی ئێستا وەک کۆسپ لە بەردەم سەرنەگرتنی کۆنگرەی نەتەوەییدا دەبیندرێت تەبا نەبوونی ئەحزاب وهاووکات چەند فاکتەریکی ناووچەین. خەڵکی کورد لە پراکتیکدا نیشانیداوە کە هەستی بەرپرسیارەتی و ئاستی تێگەیشتنی بە رادەێکی بەرچاو لە سەرەوەیە و ئامادەیە لە هەر کاتێکدا پارێزگاری لە خاکی نیشتمانەکەی بکات لە هەر شوێنێکی کوردستان بێت، ئەوەش لە ماوەی رابردوودا بە هاتنی شەمشەمە کوێرەکانی داعش و هێرشیان بۆ سەر کوردستان لە لایەن خەڵکەوە سەلمێندرا. لە ماوەی رابردوو و ئێستاشی لەگەڵدا بێت بینیمان و دەیبینین کە کورد لە هەر چوارپارچەی کوردستان و رەوەندی کوردی لە دەرەوەی وڵات بە چ ورە و ئیرادەێکەوە بەرانبەری هێزە کۆنەپەرەستەکانی داعش دەبنەوە و خاکی پیرۆزی کوردستان دەپارێزن. ئێستا چیتر کورد و کوردستان لای خەڵکی جیهان و بە تایبەت دەوڵەتانی جیهان نامۆ و بێگانە نیە و بە شانازیەوە بەرپرسانی وڵاتانی نێونەتەوەیی ناوی کورد و کوردستان دێنن و ئامادەن بۆ پاراستنی کوردستان ،هەر چەشنە هاوکاریێکی کورد بکەن. چیتر کارەساتەکانی کوردستان پەردەپۆش ناکرێت و لە بیر ناچێتەوە وبە پێچەوانەوە رووداوەکانی کوردستان و خۆراگری ژنان و کۆرانی کورد بووە بە باسی میدیا و کۆرو کۆبوونەوە جیهانیەکان. کە وابوو لە ئێستادا ئەرکی سیاسەتمەدارانی کورد لە هەر کاتێک قۆرسترە و بەرپرسیارەتی نەتەوەیی پێویست دەکات کە نیشان بدەین کە خاک و نیشتمان لای ئێمە لە هەر شتێکیتر پیرۆزتر و گرنگترە و ئامادەین لە پێناو رزگاری نەتەوەکەماندا زۆرترین فیداکاری بکەین وئێمە دەبێت لەم قۆناغە هەستیارەی ئێستادا کە چاوی هەموو جیهان لەسەر کوردە نیشانی بدەین و بیسەلمێنین کە کورد نەتەوەییکی خەباتکاروئاشتیخوازەو باوەری بە پلۆرالیزم هەیە.
9 ساڵ و 11 مانگ و 5 ڕۆژ و 22 کاتژمێر و 41 خوله‌ک له‌مه‌وپێش
