سازمانی خه‌باتی کوردستانی ئێران
چەند ڕۆژ لەوە پێش ئاخوند حەسەن روحانی لە کۆبونەوە لە گەڵ ئوستانداران و فەرماندارەکانی پاریزگاو شارەکانی ئێران باسی لە هەلومەرجی ئاڵۆزی هەڵبژاردن و ئەو.....
نووسینی بابەشێخ حسینی
چەند ڕۆژ لەوە پێش ئاخوند حەسەن روحانی لە کۆبونەوە لە گەڵ ئوستانداران و فەرماندارەکانی پاریزگاو شارەکانی ئێران باسی لە هەلومەرجی ئاڵۆزی هەڵبژاردن و ئەو کۆسپ و ڕێگریانە کرد کە لە لایەن باڵی دەست ڕۆیشتوو بە سەرۆکایەتی خامنەیی دەخرێتە بەردەم پاڵێوراوانی باندی بە ناو ڕیفۆرمخواز.
ڕۆحانی لە قسەکانیدا باسی لە ڕەدکردنەوەی پاڵێوراوانی لایەنگری خۆی، بۆ شانۆی هەڵبژاردنی مەجلیس کردو ڕایگەیاند کە ئەگەر ئەو شێوە هەڵس و کەوت و ڕێگریانە بەردەوام بێ، ناڕەزایەتیەکان پەرە دەستێنێ و هەروەها کۆماریی بوون(جمهوریەت)، کە لە قانوونی ئەساسیدا پەسەند کراوە، دەکەوێتەژێر پرسیار.
ئاخوند روحانی بەباس کردنی بنەماکانی قانوونی ئەساسی ڕژیم لە پێوەند بە کۆماریی بوونی دەسەڵات، وە هەڕەشەکانی باڵی دەست ڕۆیشتوو لە سەر یاسای بنەڕەتی، هەوڵیدا ئەوە بگەێنێ کە لایەنگرانی خامنەیی وبە تایبەتی شۆڕای نیگەهبان، پێشێلی قانوونی بنەڕەتی وولات دەکەن، وە ئەو پێشێلکاریانەش پێچەوانەی یاسایە، کە لە بنەڕەتدا قانونی ئەساسی دواکەوتوانەیەو سەرەرای دواکەوتوانە بوونیشی لە لایەن تێکڕای پێکهاتەی دەسەڵاتەوە پێشێل دەکرێ.
ئەگەر چی ڕۆحانی ڕاستەوخۆ هێرشی نەکردە سەر خامنەیی و لە قسەکانیدا ووتی، تەنانەت ڕێبەر پێ شێلکردنی قانونی ئەساسی پێ دروست نیە. بەڵام ڕۆحانی لە هێرش کردن بۆ سەر شۆڕای نیگەهبان، ئامانجی ئەوە بوو ناڕاستەوخۆ هێرش بکاتە سەر خامنەیی.
قسەکانی ڕۆحانی لەو کۆبونەوەدا جیاواز لە هێرش بۆ سەر باڵی دەست ڕۆیشتووی دەسەلات و خامنەیی، هەوڵیش بوو بۆ گەرم داهێنانی شانۆی هەڵبژاردنی مەجلیسی ڕژیم، بەو بیانوەی کە بە ناو بەرەی چاکسازی و جمهوریەت و کۆماریخوازیی لە مەترسیدایەو، ئەگەر خەڵک بەشداری چالاکانەیان لە شانۆی هەڵبژاردن ببێ و بچنە سەر سندوقەکانی دەنگدان، ئەو کات دەسەڵات بەرەو ڕیفۆرم و چاکسازی هەنگاو دەنێ. چاکسازی و ڕیفۆرمێک کە چەندین ساڵە کەسانی وەک محەممەد خاتەمی، میرحسەین موسەوی و کەڕووبی وتەنانەت ڕەفسنجانی پڕوپاگەندەیان بۆ دەکرد، کە ئاکامی ئەوبەڵێنیانەمان بینی و دەرکەوت کە نە ئەوان دەتوانن ریفۆڕم و چاکسازی بکەن ونە دەسەڵات چاکسازی و ئاڵوگۆڕ لە خۆیدا پێک دێنێ.
هەروەک لە ڕابردودا دەرکەوت بێگومان لە ئێستاش دا، باس لە ریفۆڕم و چاکسازی لە سیستم و پێکهاتەی دەسەڵاتی ئاخوندەکان بێجگە لە فریوکاری شتێکی دیکە نیە. چل ساڵ حکومەتی ئاخوندەکان و ئەو گشتە جینایەت و مرۆڤ کوژی و تاوانەیان، کە باندەکانی دەسەڵات بێ جیاوازی لێ بەرپرسن، ئەو ڕاستیە دەسەلمێنێ کە ئاخوندەکان باس لە چاکسازیی بەکار دێنن بۆ بەردەوام بوونی دەسەڵاتی دواکەوتوانەیان.
ئەگەر ڕۆحانی هەر وەک چەندین ساڵی ڕابردوو قسەی زریقەو بریقەدارو بی ناوەرۆک دەکا ئامانجی فریوکاریە، هەر وەک چۆن لە هەڵبژاردنی سەرۆک کۆماری ڕژیم بە نیشاندانی (کلیل) بە قسە بەڵێنی کردنەوەی هەموو دەرگا داخراوەکان لە سەر خەڵکی ئێران و خۆشگوزەرانی و ئاسایش و هەروەها ئازادی و دیموکراسی دا، نەک هیچ یەک لە بەڵێنیەکانی نەهێنایە دیی، بەڵکو خەڵکی ئێران لە ماوەی حکومەتی ناوبراودا لە گەڵ قورس ترین و بێ بەزەییانەترین نەوعی ستەم و بێدادی، گرانی و بێکاری، زیاتر بوونی کێشە کۆمەڵایەتیەکان و تێک چوونی ژیانی خانەوادە، زیاتر بوونی فەسادو گەندەڵی لە ئێراندا بەرەو ڕوو بوون.
بێگومان ئەو بەشە لە قسەکانی ڕۆحانی کە ڕایگەیاند کۆماریی بوونی دەسەڵات (جمهوریەت) کەوتۆتە ژێر پرسیار،ڕاستێکی حاشا هەڵنەگرە، بەلام بەو جیاوازیەی کە ئەو دەسەڵاتە لە بنەڕەتدا کۆماری نەبوەو هەر لە سەرەتای هاتنە سەر دەسەڵاتی ئاخوندان پڕۆسەی هەڵبژاردن ودەنگی جەماوەری ئێران بە مەبەستی درێژە کێشانی حوکمی دیکتاتۆرانەو بۆ فریوی کۆمەڵگەی دیموکراتیکی جیهان بە کار هێندراوە. دەسەڵات و حاکمیەت لە ئێراندا، بەستراوەیە بە ستەمکاری و دیکتاتۆری و لێک جیاناکرێنەوە.
حاشا هەڵنەگرە کە سیستمی دەسەلاتداری لە گەڵ هیچ یەک لە بنەماکانی حکومەتێکی خەڵکی و کۆماریی نایەتەوە، پوچەل کردنەوەو نەسەلماندنی پاڵێوراوان بۆ بەشداری کردن لە شانۆی هەڵبژاردن، تەنانەت پاڵێوراوانی باڵی ڕۆحانی و باڵی بە ناو ڕیفۆرمخوازو زیندانی کردنی کەڕوبی و موسەوی زۆر مۆرەی دیکە، دەگەێنێ کە رژیمی ئاخوندی سیستم و دەسەڵاتێکی مافیاییە، کە خاوەنی هێزی سەربازی و دەسەڵاتی بە ناو دادوەریی بۆ بە قانونی کردنی جینایەتکاریی،هەروەها خاوەنی ئابووری قۆرغ کراوە،کە لە هەرکام لەو تایبەتمەندیانە بە قازانجی خۆی و بۆ مانەوەی بە کار دێنێ. بەو پێناسانەو ناساندنەی خودی کاربەدەستان دەسەلات، سەبارەت بە مەترسیدار بوون و بێ سەرەوبەرەیی دەسەڵات ، ئەرکی خەڵکی ئێران و خەڵکی کوردستانە که، ڕۆژی 2 ی ڕەشەممە، بەشداری شانۆی هەڵبژاردنی مەجلیسی ڕژیم نەکەن و بە بەشداری نەکردنیان، ئەو ڕاستیە بە جیهانیان و بە کاربەدستانی دەسەڵات بسەلمێنن، کە دەسەلات لە ئێراندا بە دەست گروپێکی مافیایی و جینایەتکارە و ئەو دەسەڵاتە لە ئێستاو لە رابڕدوشدا، دژ بە هەموو بنەماکانی جۆری حکومەتی کۆماریی بووە.
