سازمانی خه‌باتی کوردستانی ئێران
بەبۆنەی ڕۆژی جیهانی لاوان، گەرمترین پیرۆزبایی تان پێشکەش دەکەین و هیواخوازین کە ئەو ڕۆژە ببێتە هەوێنی یەک
هاونیشتمانیانی خۆڕاگر!
لاوانی خوێنگەرم و تێکۆشەر!
بەبۆنەی ڕۆژی جیهانی لاوان، گەرمترین پیرۆزبایی تان پێشکەش دەکەین و هیواخوازین کە ئەو ڕۆژە ببێتە هەوێنی یەکگرتوویی و هاودەنگی و هاتنەدیی ئاوات و ئامانجەکانی لاوان و خەڵکی بەشەرەفی کوردستان. رێکخراوی نەتەوە یەکگرتوەکان لە ساڵی ١٩٩٩ زاینی رۆژی ١٢ی ئاگوستی وەک ڕۆژی جیهانی لاوان ناساند، کە بەم بۆنەوە لە ووڵاتانی جیهان چالاکی جۆراوجۆرو بەرنامە و کۆڕ و کۆنفرانس بۆ پاڵپشتیکردن لە بەرنامە و پرۆژەکانی لاوان و گوێگرتن لە بیروڕا و بۆچوونەکانیان بەڕێوە دەچێ. لە سەرانسەری جیهان هێز و توانای لەبن نەهاتووی لاوان بەهێند وەردەگیرێ و هەوڵ دەدرێت پێداویستییەکانی ژیانێکی شایستە، هەلومەرجی لەبار و ئاستی بەرزی خوێندن، هەلی کار، پاڵپشتی دارایی و دەروونیان بۆ فەراهەم بکرێ، چونکە لاوان لە خزمەتکردن بە ووڵاتەکانیان دەوری سەرەکی دەگێڕن. سازمانی خەباتی کوردستانی ئێران هەر لە سەرەتای دامەزرانیەوە بە گرینگی لە بەهرە و تواناکانی لاوانی روانیوەو لاوان لە تەواوی ئۆرگانەکانی سازمانی خەباتی کوردستانی ئێران چالاکانە خەبات و تێکۆشانیان درێژەپێداوە. وە بە سەدان لاوی بەئەمەکی ریزەکانی سازمانی خەبات نەترسانە دژ بە داگیرکەرانی کوردستان جەنگاون و لە پێناو ئازادی نیشتمان گیانی پیرۆزیان بەخت کردو بە پلەی بەرزی شەهادەت گەیشتوون.
سازمانی خەباتی کوردستانی ئێران لە درێژەی بەرنامە و پلانەکانی بۆ زیاتر هێنانە پێشەوەی لاوان و بەرزنرخاندنی ئەرک و ماندووبوونیان، بڕیاری دامەزراندنی رێکخراوی تایبەت بە لاوانی داو لە ١١ی بانەمەڕی ١٣٩٠ کۆچی خۆری رێکخراوی لاوانی خەباتی کوردستانی ئێران دامەزرا. رێکخراوی لاوان بووە پێگە و مینبەرێکی مەزن بۆ زیاتر گەیاندنی پەیام و دەنگی دلێری لاوانی ڕیزەکانی رێکخراوی لاوان و سازمانی خەبات. وە بە دامەزراندنی رێکخراوی لاوان، خەبات و تێکۆشانی لاوان گوازرایەوە بۆ قوناغێکی سەرووتر و پەیامی پاڵپشتی و گرینگی پێگەی خۆیان لە سازمانی خەباتەوە پێگەیشت. هاونیشتمانیانی هێژا! لاوانی خەباتکار! لە کاتێکدا لاوانی جیهان بەبۆنەی گەیشتن بە ئامانج و ئاواتەکانیان ئاهەنگی سەرکەوتن دەگێرن، بەداخەوە لە کوردستان و ئێراندا لاوان و خەڵک لە ژێر دەسەڵاتی گەندەڵی رژێمی ئاخوندی دەناڵێنن و لە سەرەتایی ترین مافەکانی مرۆڤ بێ بەشن. رژێمی دیکتاتۆری ئاخوندی نەک ژیانێکی شایستە بە لاوان و خەڵکی کوردستان و ئێران رەوا نازانێت، بەڵکو بە بەرنامە و پلانی قێزەون و نامرۆڤانەی وەک زیندانی کردن، شکەنجە و سێدارە هەوڵی بێهێزکردن و لەناوبردنیان دەدات. بە گوێرەی راپۆرتی ڕێکخراوی مافی مرۆڤی هەنگاو، تەنها لە ماوەی وەرزی بەهاری ساڵی ١٣٩٩ لانیکەم ٥٤ کۆڵبەر کوژراون و یان بریندار کراون، ١٤ هاووڵاتی لەسێدارە دراون، ١٢ بەندکراو لە بەندیخانە گیانیان لە دەست داوە، ٧٦ هاووڵاتی دەستبەسەر و ١٧ هاووڵاتی حوکمی بەندکران و لێدانی قامچییان بە سەردا سەپاوە و ٥٢ هاوولاتی خۆیان کوشتووە، کە ئامارێکی مەترسیداری خراپی باروودۆخی مرۆییە لە کوردستان و ئێراندا. لە لاێکی دیکەوە قەیرانی ئیعتیادو زۆری ژمارەی ئاڵودەبووان بە ماددەی هۆشبەر گەیشتووەتە ئاستێکی مەترسیدار. بە گوێرەی راپۆرتی ناوەندی رووبەڕووبوونەوەی ماددەی هۆشبەر لە ئێران، ٢ ملیۆن و ٨٠ ٠ هەزار گیرۆدەی ماددەی هۆشبەر لە ئێراندا هەیە و رۆژانە ژمارەیەکی زۆری ئاڵوودەبووانی ماددەی هۆشبەر کۆچی دوایی دەکەن. بەپێی یاسا بەکارهێنانی ماددەی هۆشبەر لە ئێراندا سزای قورسی هەیە و هەندێک جار دەگاتە سزای سێدارە، ئەمە لە کاتێکدا کە رژێمی دیکتاتۆری ئاخوندی هۆکاری سەرەکی بڵاوکردنەوەی ماددە هۆشبەرەکانە و لە ڕێگەوە، لاوانی پێ لاواز و نەخۆش دەخات و دواتریش سزای زیندان و مەرگیان بەسەردا دەسەپێنت.
بێکاری و هەژاری و بێ ماڵی ژمارەیەکی تری کێشە نەبڕاوەکانی لاوان و دانیشتوانی کوردستان و ئێرانە. بە گوێرەی ئامارێکی فەرمی رژێم ١٦.٣%ی خەڵکی ئێران بێکارن کە ئەم ئامارە دووئەوندە و زیاتر لە رێژەی دروستی بێکاری لە ئێران کەمترە. لە هەموو ئەمانەش کوشندەتر، بڵاوبوونەوەی ڤایرۆسی کۆڤید-١٩(کرۆنا) یە، لەسەرتادا شاردنەوە و دواتر هەڵسوکەوتی نەزانانەی دەسەڵاتدارانی رژێمی ئاخوندی بووە هۆکاری لە کۆنترۆڵ دەرچوونی رێژەی تووشبوونی هاونیشتمانیان بە ڤایرۆسەکە. بەگوێرەی ئاماری نافەرمی، مردووان بە ڤایرۆسی کۆڤید-١٩(کرۆنا) لە ئێران زیاتر لە ٨٥ هەزار کەسی تێپەڕاندووە کە ئەمەش چەند بەرابەری ئاماری راگەیاندراوی رژێمی ئاخوندی ئێرانە. دەستەی بەڕێوەبەریی و ئەندامانی رێکخراوی لاوانی خەبات هاوبەشی خەم و ناخۆشی هاونیشتمانیانی کوردستان و ئێرانین، سەرەخۆشی بە خانەوادەی کۆچکردووانی نەخۆشی کڕۆنا ڕادەگەێنین. ئاشکرایە کە رژێمی ئاخوندی بەڵایەکی مەترسیدارە کە بەرۆکی ئێران و ناوچەکە و جیهان بەگشتی و لاوان و خەڵکی کوردستانی بەتایبەت گرتووە و بۆ هەمیشە وەک پەڵەیەکی رەش لە مێژووی مرۆڤایەتیدا دەمێنێتەوە و تەنها چارەسەر بۆ ئەم باروودۆخە نالەبارە رووخان و لەناوچوونی رژێمی خوێنڕێژی ئاخوندیە.
ئێمە لاوانی ڕیزەکانی رێکخراوی لاوان و سازمانی خەبات لە پێناو دەستەبەرکرانی مافەکانی لاوانی بێ بەشی کوردستان و بۆ رووخانی یەکجاری رژێمی دیکتاتۆری ئاخوندی و ئازادبوونی نیشتمان، لە خەبات و تێکۆشان شێلگیرانە بەردەوام دەبین. جارێکی تر پیرۆزبایی رۆژی جیهانی لاوانتان پێدەڵێن. بڕوخێ رژێمی دیکتاتۆری ئاخوندی. سەرکەوێ خەباتی رەوای گەلەکەمان.
رێکخراوی لاوانی خەباتی کوردستانی ئێران دەستەی بەڕێوەبەریی
١١ ئاگوستی ٢٠ ٢٠
